فزعتكم يالنشامى عندي مشكلة بالباثفايندر 2005

[yaserx]

الفزعة يا الربع

عندي باث 2005 توماتيك
اذا امشي بسرعة 20 او30 يعني بشويش ثم ادعس للموتر اسمع صوت قرقشة خفيفة ثم تروح

المشكلة ماطلعت إلا بعد ماغيرت زيت السيارة من
زيت موبيل 1 (ابو عشرة الاف كيلو)الى زيت الترا 7

أنا شكيت بالقير

حتى رجعت وسألت البنشري اللي غيرلي زيت الماكينة عن زيت القير وشيك عليه وقالي تمام
ورحت لثاني وقالي ترى عيار زيت القيرمافيه زيت
ورحت لثالث وقالي لايهمك اللي قالك مافيه لأن الزيت لاتعايره إلا الصباح بس
ونصحني أروح لورش القيربوكس
لكن كنت مستعجل وأبسافر وتركت الموتر موقف لما أرجع من السفر أبحث عن مشكلته
ملاحظة ::
الموتر ماشي 24000

تكفون يالربع ردوا علي بسرعة لأني أبي أرجع لديرتي على الموتر
وأخوكم معلوماته الميكانيكية صفر
وشكراً لمن تجاوب معي ....

[هواي البر]

هلا اخوي

بالنسبة للصوت الي تقول انك تمشي 20 او 30 ثم اذا دعست عليه يطلع صوت قرقشه !!

هذا الله يسلمك اذا صارت السيارة بنمر خفيفة ودعست عليها وهو مابعد غيرت الى نمره اقوى يطلع الصوت !!

وانا عندي باثفندر قير عادي يطلع الصوت اذا صارت النمره خفيفة والسرعه قليله يطلع الصوت من القزوز


هذا الي اتوقعه وان شاء الله انها عادية


حبيت الافادة وشكرا

[yaserx]

هلابك أخوي
وكلامك صحيح يوم إنك قلت من نمرة خفيفة إلى نمرة أقوى
لكن أنا خايف يصير من القير و حصلت رد في الموضوع المشهور الخاص بمشاكل الباثفايندر ويقول فيه عضو رداً لتساؤل عضو

إن عندك مشكلة في صحن الكلتش أو زي كذا
وأنا ماصدقته لأن موتري ماكد طب بر أبد
وأصلاً الموتر جديد لأن ممشاه بس 24000

أشكر لك مرورك وتفاعلك

[غضنفر]

موترك تماتيك
وشلون تصير عندك مشكلة في صحن الكلتش ؟؟؟؟؟؟؟؟؟
موترك ما فيه الا العافية

[VTC]

الصوت الي عندك والله العالم انه صرقعت بلوف لأن كان معي اخو موترك وطلعت بعد التطعيس والجور

[z a n h o r]

استاذي ..

ممشى الموتر لا يدل على ان المشكله بالقير والعالم الله :D

اظن ان ان المشكله عندك من اشياء مرتخيه وتضرب بعضها وتطلع لك صوت

انتبه لهذي النقطه ترى دايم تصير معي :D

اخيرا ..

هل مدة الضمان انتهت ..؟

نحن الان في السنه الثالثه من 2005 الى 2007

فلعله لم يتنهي :rolleyes:


تقبل مروري :good:

[المميـز]

واحد من الشباب صارت عنده نفس المشكله

اذا هداء وداس بعده يطلع صوت قرشعه

والصوت ماكان صادر من تحت القير

كان صادر من تحت المكينه وبعد ماكشفوا عليه الوكاله

طلعت المشكله بالاكزوز

وانحلت ولله الحمد

تأكد من الاكزوز

[عاير القارات]

يا ابن الحلال مافي موترك الا العافية
انا عندي باثقندر اخو سيارتك 2005 قير تماتيك وعندي هالقرقشة الخفيفة
علما اني احط زيت سوبر جت وانصحك لا تحط غيرة وهو اللي ينصحون به لسيارات نيسان
وسيارتي ماشيه 70.000 والقرقشة انا اسمعها خفيفه لازم تركز مرة عشان تسمعها
وحتى اذا دعست وشلت رجلك ودعست مرة ثانية تسمع طقة بالدفرنس هم هذي عادي
ولا تخاف ولا شي وانا اخوووووك ....
نصيحتي لك لا تخلي احد يلعب فيه
وبعد اترك عنك الوسوسه لأني انا هبلني موتري اخر شي يوم طنشت مشى الموتر تمام التمام
والله يوفقك ويرزقك ...
اخوك

[عبدالرحمن السالم]

والله ما ادري اشوف انها طبيعيه ومابها شى
انا معي 2005 قير عادي ويطلع هذا الصوت مافيه اى شى وطبيعي وحتى الباترول يطلع فيه

عادي ترا لا توسوس وانا مثل عابر القارات بالتمام احط سوبر جي تي فوكس ووش حلاته بالموتر
واذا رجعت نمره ودست عليه يطلع الصوت شوي ويروح خلاص

طبيعي ولا توسوس

[نمر 33]

الصوت 100% طبيعي ولا توسوس أخوي عنده نفس الصوت
والوكالة يقولون غير نوع البانزين الى 95 يخف الصوت

[فلر]

نمره33 تراه صادق المشكله في البنزين وتبي تتاكد غير البنزين الى بنزين رقمه غير الي في التانكي بعد ما تولع عليك اللمبه

[راعي الركيات]

اعتقد ان الصوت يطلع من الديلكو بس لاتوسوس تراه طبيعي

[ونااااسه]

انا ياخوي معي 2005 تماتيك
ويطلع الصوت كانه حلقتين نحاس على بعضهن والصوت واضح جدا عندما تمشي جنب جدار مثلا
واذا وقفت السياره ودعست عليه مافيه اي صوت
ولكن اذا مشيت يطلع الصوت
وناوي اوديه للوكاله دامه على الضمان
الله يعين عليهم

[باثفاندر 2005]

عادي الصوت يطلع عندي ..

إذا عبيت بنزين 95 يخف الصوت ..

[yaserx]

مشكورين على المرور على الموضوع والرد عليه ياجماعة الخير

لكن نسيت أقول لكم إني توني شاريه ماصار لي شهر
وعلشان كذا ماعندي خبرة بالجيوب ولا بالنيسان
أخوكم أول مرة يشري جيب و سياراتي كلها كانت صغيرة من تويوتا و متسوبيشي وهوندا إلى فورد
وبعد ماعندي خبرة بالميكانيكا

[yaserx]

واحد من الشباب صارت عنده نفس المشكله

اذا هداء وداس بعده يطلع صوت قرشعه

والصوت ماكان صادر من تحت القير

كان صادر من تحت المكينه وبعد ماكشفوا عليه الوكاله

طلعت المشكله بالاكزوز

وانحلت ولله الحمد

تأكد من الاكزوز


أخوي المميز شكرا على تجاوبك
لكن كيف خويك حل مشكلة القزوز , غيرها يعني

[yaserx]

انا ياخوي معي 2005 تماتيك
ويطلع الصوت كانه حلقتين نحاس على بعضهن والصوت واضح جدا عندما تمشي جنب جدار مثلا
واذا وقفت السياره ودعست عليه مافيه اي صوت
ولكن اذا مشيت يطلع الصوت
وناوي اوديه للوكاله دامه على الضمان
الله يعين عليهم



شكراً على ردك , ولا عليك أمر يا أمير أنتظر منك رد بعد ماتعرضه على الوكالة

وتراني الان أراسلك من برا السعودية عشان كذا محتاج أعرف حل المشكلة قبل ما أرجع وبعدها محتاج الموتر عشان أروح للديرة

وهذا أميلي yaserx@hotmail.com

[عاشق الGXR]

اخوي القرقعه اللي تقصدها وتطرقولها الشباب هي عاديه وتحصل في جميع السيارات

لاتوسوس وموترك مافيه الا العافيه والله يكفيك شره ويعطيك خيره ,,,,,

[yaserx]

أخوي عاشق الله يهديك

أنا ماأتكلم عن قرقعة مثل اللي صايرة لسيارات الفورد وتقطيعها
وهذا واضح بسبب تغير نوع البنزين
ولكن هذي مو قرقعة وتقطيع
هذي سلمك الله صوت قرقشة حديد أو معدن زي ماقال واحد من الشباب في أحد الردود إنها مثل حلقتين نحاس
وأشكر لك مرورك وتفاعلك مع الموضوع

[باترول 4×4]

إذا كان الصوت ما يطلع إلا إذا دعست الابنص دعسة جامدة فهذا طبيعي في كل السيارات صوت القزوز (زي الطقطقة)، أما إذا كانت الدعسة خفيفة فراجع الورشة .
ونصيحة : لاتعود تدعس على السيارة دعسة جامدة لأن هذا مما يقلل عمر السيارة .

[yaserx]

مشكور على المرور باترول 4×4

وأنا وضحت إنها ماتطلع إلا إذا وأنا مهدئ بين 20 و30

ثم دعست للموتردعسة خفيفة تطلع صوت القرقشة خفيفة
وإذا الدعسة قوية تجي القرقشة واضحة

بعدين ماعندي وسوسة لكن بما إني رجلي خفيفة على مواتري اللي أشتريها فأنا حريص على عدم وجود خلل بالموتر وأخاف لو أهملته يمكن يكلفني الشئ الكثير
لكن لو أنا أكرف الموتر وأجلده كان مالقيتني مهتم

واللي مضايقني إن الموتر جديد وممشاه قليل
فعلشان كذا مستغرب من موتر جديد تطلع به مثل هالمشكلة وخاصة إذا دفع رباعي و وماركة سيارات معروفة بمشاكل يسياراتها مو مثل التويوتا

[yaserx]

مشكور على المرور باترول 4×4

وأنا وضحت إنها ماتطلع إلا إذا وأنا مهدئ بين 20 و30

ثم دعست للموتردعسة خفيفة تطلع صوت القرقشة خفيفة
وإذا الدعسة قوية تجي القرقشة واضحة

بعدين ماعندي وسوسة لكن بما إني رجلي خفيفة على مواتري اللي أشتريها فأنا حريص على عدم وجود خلل بالموتر وأخاف لو أهملته يمكن يكلفني الشئ الكثير
لكن لو أنا أكرف الموتر وأجلده كان مالقيتني مهتم

واللي مضايقني إن الموتر جديد وممشاه قليل
فعلشان كذا مستغرب من موتر جديد تطلع به مثل هالمشكلة وخاصة إذا دفع رباعي و وماركة سيارات معروفة بمشاكل يسياراتها مو مثل التويوتا

وشكرا على المرور