ياأهل الخبرة..سؤال عن جيب سوزوكي..ارجو الدخول

[كاري]

السلام عليكم ..

كيف حالكم ياشباب..


وش رايكم بجيب سوزوكي الصغير ابو باب واحد ..واستخدامة ممتاز وإلا لا..
وقطع غياره هل هي غالية وإلا لا..
بصراحة انا ابشتري هالجيب وما قد استخدمتة وابي منكم الشور ؟

[كاشخ 24 ساعه]

لو انه دباب عز الله بمدحه لكن سياراتهم والله اعلم غير مرغوبه من الناس

وانت عارف اللى ماهو مرغوب اكيد انه ما يصلح


انا اشوفه دايم مع موضفين البريد وشكله صغير مره.

[المميـز]

والله ماعندي علم عنه

ولكن اشوفه منتشر مع الصيادين ( حقين القنص )

وتراه ياباني

يعني من وجهة نظري انه ممتاز

وعليك بالاستخاره بعد الاستشاره

[كاري]

كاشخ
.
المميز

..مشكورين على المرور..
والله يكتب اللي فيه خير

[فلر]

الله العالم انه صناعه هنديه

بس ماني متاكد وسو حسابك مطبه قوي جدا

[راعي الركيات]

اعتقد انك لازم تجربه قبل لا تشريه يعني تراه مهوب الي في بالك وان عزمت خذلك مستعمل استعمال حشمه تراه يطيح سعره بسرعه

[كاري]

مشكورين على المرور,,,

[شقن بقا]

أخويكا ر ي / الجيب السوزوكي ياباني وهو حليل إن كان مرادك فيه صيد الطيور والقميري فهو عز الطلب لأن ماله صوت يروع الطيور وحجمه صغير يعني مايخاف الطير منه ويتحمل المشي في الرمل المتوسط الغراز مايصلح للأرنب والطرد السريع وسرعته لك عليها شوي يعني المشوار اللي يحتاج إلى ساعة ياخذ فيه ساعتين خصوصا إذا كان مناطح الهوا أدواته مرتفعة نوعا ما مثله مثل الياباني وإستهلاك البنزين ولا شي والدبل ممتاز الموديلات الجديدة مريحة والقديمة عضية يعني مطباتها قاسية والتجربة أكبر برهان

[كاري]

أخوي( شقن بقا ) اشهد إنك ماقصرت كفييت ووفييت...

[الدحبول]

بصرحة ماجربت إذا كان سعرة مغري ونظيف زين بس كم موديلة ؟؟ وش موصفاته ؟؟ كم طالب في راعية ؟؟ مكينة 6 أو 4 ؟؟

هناك سيارات أفضل وقطع غيار متوفرة وسعره معقولة
1) نيسان ربع
2) تيوتا ربع
3) بليزر باب واحد ( سوبربان باب )

########
الشيروكي ربع
الرنجلر
بس قطع الغيار عند الوكالة ومرتفعة نسبينا

[كاري]

الدحبول .. مشكور على مرورك بس انا إلى هالحين ادور مالقيت
الموتر النظيف,,

[أ.الخزاعي]

سعر المستعمل موديل 2005م العام الماضي لقيته أربع أبوابب40ألف ريال
لكن قطع غياره غاليه جدا
وترا السيارة زينه

[شبح الصحراء]

سوزوكي جيمني سعر الجديد قبل سنتين 44 الف وكالة بصراحة شكله حليل وعاجبني ويصلح للمشاوير والطلعات الخفيفة وصيد الطيور وقت النزل وأهم حاجة فيه انه ياباني صنع وتجميع ولكن اعتقد انه خطير في الحوادث لا قدر الله بسبب صغر حجمه كأنه طابق ببسي .

http://www.suzuki-timmerman.nl/images/mdl_jimny.jpg

http://www.automoret.nl/nissan_suzuki/images/stories/suzuki/Jimny_binnen_klein.jpg

[مـدحـدر]

قربه من الارض ارى انه عيب

[fassad]

يا كاري الله لايهينك بغيت موديله وسعره لانه اذا ماتبغيه تراني شراي لاني ادوره دواره وانا من قطر وهاي رقمي 009745399109

[كاري]

يا كاري الله لايهينك بغيت موديله وسعره لانه اذا ماتبغيه تراني شراي لاني ادوره دواره وانا من قطر وهاي رقمي 009745399109

مــــافهمت قصدك يـــالغالي,,,:confused:

[شروكي ربع]

شفت واحد قبل اكثر من سنة موديله 2004 ومسيوم بـ 18 ..


بلااااااااااااااااش


واعرف واحد بايع خوه مديل 2002 بـ 14 ..


كان ماشي 60 بس فيه دقشه مصلحه

[كاري]

شروكي ربع .... مشكور على المعلومه,,,,

[الفوزان]

السلام عليكم , الأخ شبح الصحراء : الرجال ما يقصد هذا , يقصد الجراند فيتارا باب واحد , هذه يجي اكثر من مكينة أكبر وحده 2 لتر اربعة سرندل وهو خفيف جدا. صناعة تجميع ياباني

[الفوزان]

واللنسبة للقطع سعرها جيد وليس غالي كما هي يضن البعض

[شبح الصحراء]

لا يا الفوزان الظاهر انه يقصد الجيمني لأن الجراند فيتارا غالي جداً كما ان البريد السعودي وشركة الكهرباء وبعض الشركات الأخرى كانت ولا زالت تستخدم الجيمني بسبب رخص سعره وجودة صناعته وقلة استهلاك البنزين فهو مثالي للدوجة بالشوارع والقرى القريبة من المدن ، وهو منتشر اكثر من الجراند فيتارا وانا اشوف موديلات قديمة منه موديلات 90 و 91 للحين ماشية ولكن محركه ضعيف 1.5 لتر ما اظن يصلح للنفود ابد كما ان حجمه الصغير خطير في الحوادث لا قدر الله .
بالنسبة للجراند فيتارا فسعره غالي ومقارب لأسعار شركات اخرى مثل الميتسوبيشي وهي اجود صناعة بنظري من السيزوكي .
على فكرة الموضوع قديم شوي اكيد صاحبنا اشترى السيارة اللي يدور عليها الله يوفقنا وأياه لكل خير .

[الأعصـــــار]

أخوي الكريم أذا تقصد سزوكي جيمني أنا كان عندي واحد موديل 2004 بصراحه سياره عمليه جدا راح تلقى مواقف بسرعه مايتعطل و تبيه يطمر الرصيف ماعنده مشكله وفي الزحمه يعجبك يطلع نفسه من بين السيارات وفي البر طيب ... موتر حق كرف .

بس سلبياته : (1) مايصلح حق خطوط .. يعني حدك البران القريبه من الديره لأن تانكيه مايمشيك 200 كيلو وبعدين مايصلح حق راعي السرعه ..

(2) الموتر ترى يتعلق على أي شي مثل بيب أرامكو أوعقم يعني لازم تعلم كيف تسايسه وبعدها يصير معك مثل الحلاوه ...



أخوكم الأعصـــــار