مشكلة الرجة للسوبر سفاري مالحل؟

[سوبر1]

السلام عليكم
أنا معي سوبر سفاري 2005 والموتر نظيف ولله الحمد
لكن إذا مشيت مابين 80 إلى 110 تطلع عندي رجة قوية خاصة إذا مسكت الفرامل علما أن الفرامل نظام إي بي اس
ورحت وغيرت الكفرات وركبت دنلوب وماراحت المشكلة
وإذا صار بالكفرات هواء20 تعاف الموتر كله من الرجة
علما بأني سبق وأن ركبت كفرات بالون مقاس جنط البلد 17 فهل هي سبب المشكلة؟؟
أرجوا منكم توضيح السبب
ولكم مني جزيل الشكر والعرفان

[عاشق السيل]

وعليكم السلام ورحمة الله وبركاته ،،

أول نصيحة أنصحك فيها ابعد عن كفرات البالون كل البعد ،، تراها ماتنفع إلا بالرمل فـــــــقـــــــــط ،،

ثانيا سبب الرجة 90% من مساعد الدركسون اللي تحت المكينة !! غيره بواحد أصلي وترتاح ،،

أما إذا كانت الرجة خفيفة وملحوظة على الدركسون بس تراها طبيعية جدا بالباترول في كل الموديلات وإذا سويت ترصيص تروح وترجعلك بعد شهر أو شهرين علشان كذا مافيه ورشة تعطي الباترول ضمان بعد الترصيص ،،

أتمنى أكون أفدتك وانتظر غيري بيفيدك أكثر وتقبل مروري يالغالي ....



http://www.m5zn.com/uploads/00ea3cfba5.bmp (http://www.m5zn.com/)

[حمد808]

سولة ترصيص ارضي عند المجد او اليرموك وتروح
الرجة هذي بكل الباترل انا عندي باترل 2003جنوط كرم وسويتلة ترصيص وراحة

[سوبر1]

مشكور ياعاشق السيل
ونفس الكلام اللي قاله لي بنشري اليوم
لكن بالنسبة لمساعد الدركسون فيه شيئ أحسن من حق بلاده؟؟؟


وأثني بالشكر لأخي حمد
وعز الله أنكم ونستون بردودكم

[bb5599]

علاج مشكلة الرجة في الباترول عند ميزان البادية فقط لاغير...عند شايب اسمه أبو أمجد...مع الضماااااااااااااااااااان...لا تقعد كل شهر ترصص ولا يفيد.. واسأل قبل ان تعمل اي شيء..ولك تحياتي..دعواتك..

[الوليد سالم]

مشكور على الموضوع



ـــــــــــــــــــــــــــــــــ

مع اجلوكو تصبح مليونير

http://food2000.maktoobblog.com

[الثويرات]

http://www.mekshat.com/pix/upload/images39/mk55341_zaz.gif


علاج الرجه للحبيب القلب الباترول

1- شد رمانات العكوس الين تروح الفضاوه
2- ادبل مساعد الدركسون
3- اعادة كبس الذراع اذ كان فيه فضاوه
4- الترصيص الجيد+ جنوط سليمة

ــــــــــــــــــــــــــــــــــــــــــــــ








وانا ماركب الا بالون يلي تسب البالون لاكن كل سنه اشيك على الحاجات ذي والحمد لله ماعرف الرجه

[عاشق السيل]

أخوي سوبر 1 : طبعا إذا غيرت المساعد لازم تركب واحد أصلي ،،

ولاتستغرب إن حق المصنع يخرب ترى موديلها 2005 وأي مطب جامد أو كرف بالبران ممكن ينفقع المساعد يعني شي طبيعي إنه يخرب ،،


أخوي الثويرات : كفرات البالون من أفضل الكفرات بالرمال وترفع الجيب بشكل جميل ،، لكنها خطيرة جدا بالسرعات العالية لأنها معرضة للإنفجار وتسبب الرجة وعدم الثبات ، وخطيرة جدا بالأمطار لسرعة إنزلاقها ، وماتتحمل المناطق الصخرية الوعرة ،، هذا رأيي ومن تجاربي مع احترامي الشديد لرأيك يالغالي ولولا إختلاف الآراء لبارت السلع ،، تقبل تحياتي ...



http://www.m5zn.com/uploads/00ea3cfba5.bmp (http://www.m5zn.com/)

[aa-2000]

الحل ياخي العزيز ان تركب مساعد يكون مع المساعد الدركسون

[الظاغط]

السلام قبل الكلام :-

انا عندي باترول 2004 فيه رجه كان فيه بالون 900 لكن ركبت مساعد دركسون وبعد فترة رجعت الرجه .

الحل عندي فيه ورشه ببريده تصلحه على الضمان عند ابو عبدالله الهبيش العنوان جنوب بريده شارع خضيراء اسأل اي واحد عن الهبيش يعلمك عنه ومن عندي مضمون انا امصلحوه لي 8شهور ولافيه رجه ولاهم يحزنون الكفرات بالون900 ولو فيه اكبر من هذا المقاس لركبته .ولك تحياتي انا امصلحه 250ريال فقط .

[سمير]

طيب لا تزعلون علي مجرد اقتراح

لو تلغي نظام الفرام اي بي إس ما تروح هالمشاكل؟

وهل

[الثويرات]

اخوي عاشق السيل

كفرالبالون انا من ناحيتي ماشفت مثله كفر يتحمل الارض الوعره (الحصا ) بس بشرط انه يكون 10 كاندس وصدقني مارايح تحصل مثله للارض الوعره


من ناحيت النفود بس للهيار فقط زين يعني لطلوع الطعوس الرفيعه ماهو زين

من ناحيت الانفجار للمعلومية كفر البالون ماينفجر لانه نايلون بس بشرط انه يكون توبلس وكلامي هذا صاربه حقوق وجربنا وشفنا

[صقر20]

سولة ترصيص ارضي عند المجد او اليرموك وتروح
الرجة هذي بكل الباترل انا عندي باترل 2003جنوط كرم وسويتلة ترصيص وراحة
السلام عليكم
كانك من سكان الرياض لاتتعدى ميزان المجد بالصناعية القديمة-طريق الخرج
تحيتي

[منصور ع]

كان عندي نفس المشكلة بس في الكابرس تقعد ترج السيارة وخصوصا اذا دعست فرامل ووديته للميكانيكي وقال هذا من الفحمات او القماشات ... غيرتها والحمدلله رجع موتري زي الحلاوة ( شيك على الفحمات قبل لاتغير) ويمكن يفيدونك الاخوان اكثر

[مجتهد***]

كان عندي رجة بعد ماشيكت عل السيارة و جدت كل القطع سليمة و توني مركب كفرات برجستون
و الرجة و جودة حتى بعد الترصيص !!
دلني أحد الأخوان عل الترصيص الأرضي الي ( يكون الكفر راكب في السيارة و يدور الكفر بواسطة دينمو ويرصص أو يقولك حط القير في الخامس و السيارة مرفوعة ودوس حتى السرعة التي تسير عيها في العادة بعد ذلك تتوقف عن تدوير السيارة ويقوم العامل بالترصيص _ يعني ما يحتاج يفك الكفرات من على السيارة _ )

[وقاااااد]

علاج مشكلة الرجة في الباترول عند ميزان البادية فقط لاغير...عند شايب اسمه أبو أمجد...مع الضماااااااااااااااااااان...لا تقعد كل شهر ترصص ولا يفيد.. واسأل قبل ان تعمل اي شيء..ولك تحياتي..دعواتك..


كلام سليم ومجرب :good: :good: :good:
مر ميزان الباديه وغير الصوف عندهم ورهم مساعد للدركسون عرضي ثاني وانس الرجه للأبد
تقبل مروري
وقاااااد

[بن محفوظ]

بسم الله ,,,,
أول شي سو لها ترصيص ارضي ..

واذا ما صلح ..

اتبع خطوات الاخ الثويرات ...
علاج الرجه للحبيب القلب الباترول

1- شد رمانات العكوس الين تروح الفضاوه
2- ادبل مساعد الدركسون
3- اعادة كبس الذراع اذ كان فيه فضاوه
4- الترصيص الجيد+ جنوط سليمة

[alwweed]

اخوي الثويرات تحياتي لك ولحبيبنا عاشق السيل 00ردك على عاشق السيل 100% في كل كلامك كله واضح إنه من تجربه بعكس كلام عاشق السيل بقوله إن البالون مايتحمل المناطق الصخريه0بالعكس البالون يتحمل الصخور مالا يتحمله كفر ثاني هو الكفر الوحيد الذي يطلع الجنط مهو بس تقضي الدعسه ما انفجر000بس ترنا ياشباب الظاهر إننا خرجنا عن الموضوع الاساسي وهو رجة الكفرات في الباترول
بالنسبه لرجة الكفرات في الباترول من مديل 2002 وفوق في اعتقادي وحسب التجربه أتبع التالي:
1-تأكد من سلامة ربلات الدفرنس(الرباطات)0 2- غير المساعدات الاماميه0 3- ركب كفرات جديده مع الترصيص الجيد4- تأكد من سلامة الجنوط0 5- غير مساعد الدركسون0 وبإذن الله تروح الرجه ويمكن تكبس الاذرعه ودبل مساعد الدركسون
أما المديلات القديمه لازم تسوي هذي الاشياء كلها بمافيه كبس الاذرعه وتدبيل مساعد الدركسون
والله أعلم

[جنتل1]

الحل عندي عن الرجه ومرها بسيط جدا
اول شي يااخي اذا كنت في القصيم اذهب الى ورشة الفيز في الشارع التجاري في بريده اسم العامل (حنيف )اشتر مساعد امريكي عند العبيدان في المحل القريب منه وسعره مائة ريال وتركيبه في اربعين ريال واذا كان موترك اتوماتيك القير علمه خله يبعده عن لي التبريد حق القير اللى يدخل لرديتر علشان مايجرحه وينزل الزيت
واذا كان لديك اي مشكله الرجاء مراسلتي علشان اعلمك في التفصيل ولك جزيل الشكر والعرفان

[power]

يا جماعة الخير أنا عندي الرجة على التويوتا اللاندكروزر أتوماتيك 99 ؟؟؟
وش الحل ؟؟؟؟
مع العلم كل شيء سليم !!!! بعدين وشو مساعد الدركسون ؟؟
وين أركبه ؟؟؟

أنا بالرياض ....

الفزعة يالنشامى ....

[أحب القمرا]

اخوي سوبر
أنا أؤيد كلام الأخ طراد القميري
من واقع تجربة صار معي نفس مشكلتك وغيرت الفحمات والهوبات وراحت الرجة بنسبة مية في المية
وفق الله الجميع

[فنجون]

البالون اتعس الكفرات من حيث البنشر والرجه وبعدين اذا كانت الرجه اثناء الدس على الفرامل اكيد السبب تلف الدرام ويل

[حر ((قصاص))]

يقول المثل اسأل مجرب ولا تسأل طبيب كان معي 2003 وكانت الرجه مطلعه ريحتي ماخليت شي ماسويته الاشي واحد وهو ركبت مساعد دركسون امريكي جبريل لونه احمر طبعا هو مايركب على الباترول الا بالترهيم وارتحت حتى بعته وشريت سوبر سفاري ((قديمك نديمك)) 93خليجي بس طبعا الرجه موجوده ركبت اربع مساعدات استرالي مع مكينة 4800فتك ومساعد دركسون اي سي ديلكو ترهيم والحمد لله لا رجه ولا يحزنون الموتر يلاعب الهوا علما ان الكفرات دنلوب grand trekوالحمد لله

[راعي الخطوط]

أضم صوتي لصوت عاشق السيل
وأنا واحد مجرب لهاالحاله
وشكرا

[power]

:alarm: لازلنا ننتظر الإجابة يا جماعة الخير :alarm:


يا جماعة الخير أنا عندي الرجة على التويوتا اللاندكروزر أتوماتيك 99 ؟؟؟
وش الحل ؟؟؟؟
مع العلم كل شيء سليم !!!! بعدين وشو مساعد الدركسون ؟؟
وين أركبه ؟؟؟

أنا بالرياض ....

الفزعة يالنشامى ....


:alarm: لازلنا ننتظر الإجابة يا جماعة الخير :alarm:

[power]

ياشباب نبي عنوان ورشة بالرياض مجربين ممكن يركبون مساعد دركسون ؟؟؟

ممكن ؟؟؟؟
تكفون اللي يعرف يقول لنا ...
سؤال بسيط ...

[صمت اللقاء]

انا عندي سفاري معي نفس المشكله

رصصت الكفرات ( ترصيص عادي )
شديت رمانات الفرات
غيرت مساعد الدركسون
( راحت الرجه القوية لكن ما زال فيه رجه خفيفه )
وما زالت رجه الفرامل موجوده بعد ان امسك فرامل يقوم يرج الموتر

عطونا حل جذري الله يرحم والديكم .