مارأيكم أن ينام الأب مع أولاده في البر( الصحراء)

[سماوي]

مارأيكم أن ينام الأب مع أولاده في البر( الصحراء)
بسم الله الرحمن الرحيم
السلام عليكم ورحمة الله وبركاته
فكرة خطرت في بالي فقلت أذكرها لأخواني لأستشيرهم بها ...
ألا وهي فكرة أن يأخذ الأب أولاده وينامون في البر القريب من المدينة .... وليس البعيد ...!!!
وقد فكّرت فيها كثيراً (وأنا نائم في البر وقد استفدت مثل ما استفاد غيري من النوم هناك ) ووجدت ما يلي :-
- أن فيها تعويد للأولاد على الشدة والرجولة وترك حياة الرفاهية والكسل والعجز .
- أن فيها تعويد النفس على أن تملكها بما تريد أنت لا بما تريد هي ... فكم من نائم لا يوقظه من نومه إلا نفسه حتى لو ضيّع الصلاة .
- أن فيها تغيير للروتين الموجود في الحياة .
- أن فيها تطبيق عملي للأولاد بأن غيرنا يعيش في مثل هذه الحياة وأشد .. وأننا في حياة سعيدة ولله الحمد فلا بد أن نقارن أنفسنا فيمن هم أقل منا ..
- فيها تطبيق عملي على أن الحياة صعبة وأنها لا يمكن أن تأتي على ما نريد دائماً وأنها لا تقابل بالإعتماد على الأب والأم دائما في كل شيء .
- أن فيها تعويد الصغار على عدم الخوف وذلك بالتدرج ..
- لو أصبح معها عزبة وقهوة وشاهي وفطور ونار والذي يقوم بالأعمال هو الأولاد والوالد يُشرف عليهم ...لكانت الرحلة .... رحلة نشامى
هذا ما لدي فهل من زيادة أو هل من رافض للفكرة ..؟؟؟ فأردت أن آخذ رأيكم وتجاربكم فهل تؤيدونني على ذلك أم لا ولماذا ...؟؟؟

والله يرعاكم

[شبوب]

اخوي 000سماوي


كلامك جميل جدا بس للي عياله كبار00 ولا احلاء اذا خاويتهم وهم ارجال
وكلا يقولك00 ابوي 00ابوي00 مخدوم ومحشوم 0

بلاك والله الي عياله توهم على الحليب ، والكبير منهم تلقاه مشخص اعيونه
على برامج الاطفال ، والدعااااايات0

يعني الى الحين ( مراطيس )00 الله يصلح لنا ولكم الذريه0


تحيااااااااااااااااتي

اثرك شايب;) ;)

[سماوي]

الله يعيننا وإياك على إعيالنا

لكن تذكر يوم حنا صغار يوم يروح بنا أحد الرجال للبر ونسوي شاهي العصر ونرجع ...الله يا أحسن حياة ذيك الحياة..

ورى ما نسوي بعيالنا مثل ما يسوون بنا أهلنا منذ مبطي ..:D :D

وبعده تتلقى إعيالك ... يبه ..يبه .. نبي نطلع للمكشته :mad: :D قصدي للكشته

وبعده يتعودون على اللي قلنا في أول المقال

مشكور أخوي

[شبوب]

سمااااااوي00 هي سواليف

هذا منول اما الحين الى بغيت اوديهم لازم 100 كيلو اقل شي يعني 200 كيلو
روحه ورده00‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍؟؟

انا اهرج عن اهل الرياض الي يبي بر من جد لعياله بعد00‍‍‍ ولا هو الله
يعينه اذا بغى البر والمكشات0

يودع اعياله و والدينه ، ويكتب وصيته بعد000 :D


تراء سواليف ( المنتدى ) مهب زي الواقع 000


تحيااااااااااااااتي

[سماوي]

طيب ولا تزعل أخوي أكشتوا بالرصيف :D :D المهم كشته وبس

:p :D
أنا أتكلّم عن نفسي ... البر يبي لك تفتح باب لحوش وتصير كاشت لأن كل شيء عند أذنك :good:

[شبوب]

اجَـــــــــــــــــــــــل 000 بركـــــــــــــــــم في حوشكـــــــــــــــم;)

الله يرزقكم من واسع فضله000




تحياااااااااااتي

[أيمن]

إي والله ..
يازينها من أيام ..
في السابق كان جدي الله يمتعه بالصحة والعافية والخاتمة الحسنة والقارئين، يذهب بنا للبر شبه أسبوعي وحنا ما نتجاوز 9 سنوات ويخلينا نمرح في الخلا، كل مقصده أن يعودنا على هذه الأمور، حتى القهوة والفطور ما يصلحها إلا حنا وهو - مثل ما تفضلت - يشرف علينا ويوجهنا ..
ووالله انها عالقة في ذهني وذهن من معي إلى الآن، وكنا بالفعل نحرص عليها دائما ..
وأتوقع الآن في بعض المناطق القريبة من قريتك ليس هناك مشكلة أن تفعل مثل هذا الشيء ..

تحيتي

[تالي الاولين*]

.


الله يجيب امهم :D هالحين واذا جت يصير خير


بالنسبه لي مثل ماقلت مامن عيال بس انا اايد الفكره

ومطبقها مع اخواني الصغارالى اعمارهم من 7 سنين وفوق

حتى انه اذا بغيت اكشت بهم يصير واحد منهم المعزب

والباقين يفزعون له .... ويصير كلش في وجهه من العزبه وتجهيزها الى الطبخ

طبعاً انا احسسهم بالشي هذا مع اني ماخليهم من التوجيه والفزعة

طبعاً كشتات بسيطة يوم يومين بالكثير

وهالحين كل واحد منهم يجمعله عزبه خاصه . ومتشاركين في ساكتون وحدة

وكل ماشافوني سألوا كم باقي على القميري :D

بس من الى يتفرغ لهم



.

[سماوي]

يامال العافية يا أخواني على هالزيارات الحلوة والتعليقات الأحلى

المهم إنهم يشوفون حياة غير حياتهم

يرعاكم ربي

إيه قبل ما أنسى يامستر أيمن أنا مانب إبقرية أنا بالرس
( الرس رسك إلى من الزمن رصّك ) بعدين ترى الأمور زينه لا تقعد إتخربه ( واحد واثق );) :D :D

[الباهي]

الغالي سماوي ولايهونون الربع

كلام جميل ومايمنع ان الواحد يودي عياله والمعزبه فوقهم اذا فيه فرصه والجو مناسب

امابالنسبه لي فانا الله رزقني بثلاثه عيال وبنت توها جايه واوديهم معي بعض الاوقات

وقت الصفري والمقانيص اذا جا العصر وديتهم كلهم وخذنا معنا الشاي والقهوه

والثلاجه معباه من الارزاق وقبل المغرب ادعي الطير عندهم واعشيه وبعدها خذ

من السوالف مع المعزبه الى حول العشا وكل ماجانا احد من العيال صرفته قلتله روح يالولد

العب مع اخوانك( يقال له مروق مع المعزبه)

:D :D

اخوكم الباهي

[سماوي]

شكرا أخوي الباهي
هل إسم المعزبة ( مروق ):D :D

[سعود مسعود]

اخوي سماوي وجهه نظرك صحيحه وكلا مك زين رجعنا الى الماضي وايام الصبى مع شيباننا الله يرحمهم
كانو حريصين على مرافقتنا لهم وتعويدنا على البر والاعتماد على النفس والمرجله .
لذا ياخوي سماوي كل ماشفت الشباب الصغار ونعومتهم واتكاليتهم وتنبلتهم ضاق صدري وتذكرت الماضي
فانا معك بوجوب تعويد الصغار على الطلعات مع اهلهم وتشجيعهم على خفه النفس والقرامه
والله يحفظكم

[سماوي]

الله يا ذاك الزمان والله إنه وناسة

شكرا أخوي سعود مسعود
لكن الله أعلم إن البلا بنا وإلا الصغار مابهم بلا:confused: :rolleyes:

[مخاوي المطر]

شيء جميل ان يدربهم على هذه الامور

[دغيم]

أخوي سماوي
فكره ممتازه
أنا عندي ولد عمرسبع سنين يروح معي دايم للبر
واخر مره كنا بالمستوي قانصين ضبان وهوالى
يجيب الضب الى رميته ويوم النزل الى راح صاد
أول دخله بحياته وعنده لها صوره وهو هالحين
مهبول بر بس عيبه تعلق بي كثير

[سماوي]

والله الحياة يزين طعمها مع الذكريات الحلوة

[طلال]

فكره فوق الممتازه يا سماوي فعلاً هذا الواجب الي المفروض الواحد يسويه مثل تأخذ اولادك معك للصيد وتنام انت وهم بالبر او في اوقات الربيع وتخليهم يجمعون الحطب ويسوون القهوه وانت جالس عندهم وتوجههم التوجيه السليم حتى يتعودو على الخشونه والرجوله والصبروالتحمل على الحر والشمس والخفه بالقومه وعدم الثقل لا ان يجلس الواحد ويقول يافلان جب البياله او الطاسه مثلا ويخلي غيره يخدمه يجب ان ينهر ويقال له قم انت وجبها الحين اعرف ناس كبار في السن ما يعرف يسوي الشاهي - حتى مثلا لو ذهبت الى سفر انت والعائله ممكن تدور مكان اذا كنت مثلا ماراً في مدينه ساحليه بجنب البحر وتنام انت وهم لو يوم او يومين بدل ما تأخذ شقه وتكون قريب من المدينه وفي مكان امن بالنسبه للي معه نساء ، فا فكره رائعه والله يعطيك العافيه ياسماوي 0

[الربيع]

الاخ سماوي
موضوع جميل وجيد جدا
وهذا في الواقع تطبيق عملي لمقولة اذا كبر ولدك خاويه
فتواجدك مع اولادك في مثل هذه الاجواء البعيدة عن الرسمية يتيح الفرصة للتعامل معهم من باب الصداقة
ولا ننسى ان التجمع حول النار في البر او في الصيد وغيره سوف يجعل كلا من الاب والاولاد يخرج ما في نفسه من الاحاديث التي قد لا تتم في الضروف العادية

[غبار وكشته]

السلام عليكم ...

فكره اكثر من رائعه :rolleyes:

وعلى فكره ترا العيال الصغار يفرحون اذا انت ارسلت الواحد منهم يجمع حطب ..

او يشب النار .. او على الاقل يغسل المعاميل ..:)

فكره ممتازه والله يعطيك الف عافيه ..ياصاحب الموضوع الاخ ..سماوي

[سماوي]

أخواني أنتم نعم الأخوة ونعم الأعضاء في هذا المنتدى الرائع

[التاجر]

صدقت يا أخوي والله وناسة يوم نطلع ومعنا إعيالنا وعسى الله يقدرنا ونربيهم صح والدنيا تبي صبر

[الربذي]

السلام عليكم
صراحة اخوي سماوي شي طيب انك تغير الروتين
بس وين الجزمة بعضهم مايجزم ..

[الاداري]

يالله من عام 2003 قديم مره

[قرناس شماالي]

شئ جميل علشان يتعودو على كسر حاجز الخوف

[بدران9]

يالله من عام 2003 قديم مره


والله يانت حبر :D

مشاء الله عليك وشلون انتبهت :D

[@السيف@]

بيض الله وجهك لا عدمناك ونعم الراي من راس مطنوخ

[العميد ابواروى]

فكره ممتازه

بس الاحتياط واجب

من لبس وطعام وشراب

وموتر يزبن

لأن الي معك ادنات شي يبي يخرونه

ثم ابلش عاد

موفق خير

[دوسريه كول]

البر مو مقياس للرجوله ............... الله يهدي عيال الجميع ويصلحهم

[كاتم الشكوى]

البر أفضل من الشارع
ويعلمهم الشئ الكثير من معاني الرجولة والصبر
من واقع تجربة
وفقك الله على هالفكرة وجزاك الله خيرا

[mngahi]

عندي قصه ربما تكون مختلفة
أحب مكان اسمه الرونه بعيد عنا حوالي ساعة ونصف حسب الخط و السرعة عند جبل اسمه الرونه
قالو أولادي الله يحفظهم نريد نروح زيك للرونه قلت لهم مشينا حملت العزبة و الماء و التخطيط العشاء هناك جلست بر مع الأولاد و المعزبه يا سلام بتكون رحله روعه
سرنا بسم الله للرونه كان المكان خطه كله حجارة و قبله كانت امطار من اسبوع يعني في طين بس سلم على جيب تويوتا 91 الدلح في القار و النعم به في خط الحجارة و الطين انا مجربه
مع اتجاهنا انحرفنا اتجاه غروب الشمس و كانت الشمس مقابله لنا مباشرة وقال احد الأبناء حنا رايحين للشمس ضحكت من استنتاجه العجيب ربما يكون مستغرب الاتجاه و نور الشمس
ثم لحظات حتى وصلنا المكان على المغرب وبعد كذا خذ تعاليق الخوف في ذياب فيه اسود و الله ثم و الله ما نكتب لنا غير التعب خوفهم كان غير متوقع
فهذا سبب ان الشخص منا انه لا يعود أبنائه على رحلات البر

يعطيكم العافية و المعذرة في أطاله السطور

[ابو عبدالملك 2]

بس المشكله اذا صار الابو خواف مصيبه بيخوف عياله وبيخليهم ذرقان هههههههههههه

[أبوزيد20006]

شيء جميل ان يدربهم على هذه الامور

[الجمــــــــــــــل]

فكرة جميلة والفوئد منها اكثر

[مقناص 20]

وعليكم السلام ورحمة الله وبركاته
اتصدق الكشتات الي زمان الى هالحين عالقه في الذهن
والحين تطلع للبر شهر وانت ناسي بعض من هالكشته
وفعلا تعويد الاولاد على البر شي جميل
الله يعطيك العافيه على هالموضوع
http://img33.imageshack.us/img33/362/222r.gif

http://img41.imageshack.us/img41/3078/sign3bk.jpg

[Reem najd]

انا اواافقك الرااي

كلامك عين العقل وباليت بعد تعلمهم الرماايه بالبر

احترااامي

[mhm-191]

مابه ازين من الورعان اذا جاء يوم الربوع الاهم مجهزين فرشهم ويقولون هاه وين بنكشت هالسبوع فيه - ومن اللي بيخاوينا << صاروا هم المعازيب .
ماهوب كل عصريه بها الشوارع مغير يفرقون ويسنترون وخذ ياكوره.

[وليم]

فكره جميله ويتعودون الاشبال علا الصبر والبعد عن المدنيه

[كحيلان تميم]

ممتاز ومع هذا الكلام .. لاكن بشرط يكون زي ماذكرت قريب وفيه امان .. لان الواحد يخاف على نفسه فكيف لو معه عائله وبزران ..

[ابوطلال1111]

انشهد انك صادق عشان يربيهم على كل شي حتى الصدق واحترام الكبير والادب في الكلام ومعرفة امور كثيره تنفعه والله اشياء الى اليوم فادتنا كلها بعد الله من خوة الشيبان