أنا قرم لكن أصير تنبلي معكم يا أخوياي والسبب أنتم ...!!!!

[سماوي]

أنا قرم لكن أصير تنبلي معكم يا أخوياي والسبب أنتم ...!!!!
بسم الله الرحمن الرحيم
السلام عليكم ورحمة الله وبركاته
نعم يا أخواني أعضاء مكشات أنا أعرف بنفسي منكم ...فأنا قرم ونشمي ونشيط ..آخذ هذا وأعطي هذا وأساعد وأطبخ وأنفخ وأحطب وأرق ( من المرقوق ) وأطزز ( من المطازيز ) و.....
ولكن إذا طلعت مع أخوياي أصير إنسان ثاني ... أنقلب 180 درجة ...وأصير تنبلي ..سوداني ...و....و... والسبب تدرون ليش يا أخواني :
السبب هو أنتم ... نعم أنتم ... !!! لأني لمّا أطبخ مثلاً كبسة ( قميري ) وتطلع مالحة ... تلقى هذا يستهزئ وهذا يجدع كلام وهذا يسب وهذا يشتم وهذا يقول لا عمرك تطبخ ... وهذا يقول ..... وأنا في هالوقت ضايع بثيابي وألعن الكشته اللي جيت معهم به .
ولمّا أجي أبصلّح أي شي ثاني أحسب لها ألف حساب وأحط ألف وستمائة وأربعين إحتمال ....وأخيرا أهوّن وأترك الشغل كلّه ....ولما تترك الشغل تصير مجرم ..فإن تحركت ياويلك وإن قعدت ياويلك ..!!!!
ولذلك صرت أحط بإذني اليمنى طينه وبالأذن اليسرى عجينة ... وأقعد أسولف وأقرأ لي كتاب وإلا رحت أتمشى ....
فأقول يا أيها الأخوة : لما تقوم وتصلّح أي شئ تطبخ مثلاً.. تلقى هذا يقول يامل العافية والثاني يمدحك والثالث يشكرك والرابع يقول الله يسلّم هاليدين والخامس يقول ..... لو إن الطبخ لك عليه إشوي ...كان تقول والله لو تبونن عامل عندكم ما عندي مانع ...
صدق الله حين قال ( ولو كنت فظاً غليظ القلب لانفضوا من حولك )...
فلماذا أيها الأخوة أكون ضحية لتعاملات خطأ .. يحترق دمّي وأفقد الثقة بنفسي وأكون مضحاكة لغيري , والسبب أني ( حبيّب ، أجودي )
أرجوا أن تكون الرسالة قد وصلت ... فما أجمل التعامل الطيب فصاحبه محبوب وكلامه مسموع ..
طوّلت عليكم لكن حبيت أقول أن الذي تعامله مع أخوياه كذا .. الله يعين زوجته وأولاده ...يبون يطلعون (ولا شي )لأنه يساعد على موتهم ، ويكبرون ويصيرون ميتين ،
فالحي يحييك ... والميت يزيدك غبن .
والله يرعاكم

[العيد]

والله يا اخوي انا قريت كلامك وتاثرت :( صراحة اللي هذا كلامه والله ونعم به وينكشت معه والروحة معه تشرى وما فيه اصلا احد كامل والطلعه ما تحلو الا بمثل المواقف هذي والا كان كل واحد يقعد ببيته عند اميمته ويضمن العيشه الزينه:D

[سماوي]

يا أخوي أنا أدري إن النوم عند الوالدة أفضل
لكن إذا كانوا أخوياك ما يعرفون الكلام الزين ...بس أوامر ... تنفذ وإلا صك براسك الجدار:D

شكرا أخوي العيد ( الأضحى وإلا الفطر )

[مفتون صيد]

يارجال زلبهم وخلهم يسون كل شي خوصوصًا هالنوعية من الناس ........... وهذا رده الله يسلمك .. قله اشتغل والا سف تراب الله يكرمك :mad: ..........هذا انا اسميها بثاره وغثاثه

[الاجودي]

وعليكم السلام ورحمة الله


فعلا اخوي السماوي كل الكلام الي قلته موجود ويحصل كثير

ويأثر بالنفس ويخلي مالك خلق الي حولك كلهم ولا لك خلق الرحله كلها

لكن لو تلاحظ ان الي يطلقون مثل هالكلام هم راعين التبطح والكلام ولاهم راعين شغل

يصير مفضي نفسه بالطلعه ينتقد غيره ولا يشتغل وكثير ما يخربون الرحلة

ومادام جاء طاري هالامور عندي لك قصة

مرة كنا طالعين ومبعدين عن ديرتنا ومطولين وبلانا الله بواحد من هذي النوعية راعين التبطح والضحك بشغل الخلق

قلنا والله مهيب سالفه نخليه يخرب روحتنا على الفاضي وش نسوي ونسوي

قال اميرنا خلوه علي يوم جاء الصبح وصلينا الفجر قالي اميرنا تعال ورحنا انا وياه وراعي التبطح

والله ونزل لأقرب قرية به محطة لنقل الجماعي ونحجزله ونعطيه قطته وقلناله روح اقعد عند ماما

والله ورجعنا وكملنا رحلتنا من اروع مايكون وكانت من افضل الرحلات والطلعات بحياتنا

واسف على الاطالة

[عبدالعزيز الدباسي]

أُوحيي فيك هذه الروح الطيبة اخوي سماوي ، وانشهد انك قرم وشقردي والدليل على ذلك كثرة مشاركاتك وتنوعها ، وما يحليها الا اسلوبك الجميل البسيط في الكتابة .

والحقيقة مثل ما تفضلت انه احياناً يصير معك ناس ما همهم الا المعاير والتطنز والنقاده ، ومثل ما قالوا الشباب وذلوا هم اللي تلقاهم راعين التبطح والتأمر ودايم على لسانهم (لا دامك واقف ) فهم يحترون اي واحد يا قف علشان يقلون جب لنا وهات لنا .

ومثل ذولا يا شباب تراهم مساكين لانهم ودهم يصيرون يعرفون يطبخون (ولو نص طبخك) ودهم يصيرون حركين وقرمين لكنهم ما تعودوا على علوم الرجال وهبة الريح اللي عندكم .

واحسن شى لهذه الفئة انك تخصرهم ولا كنهم موجدين معك لكن اذا رديت عليهم تقل انك تنفخ بقربة منشقه ما منهم نفع ولا منهم حيا .

وعادة اللي مثل ذولا تلقاهم ما عندهم من علوم البر ما يزن ابره ، وعادة تلقاهم راكبين مع احد (يعني احد متصدق عليهم ومركبهم معه)

واذا كان معك اثنين او ثلاثة مثلك قرمين اتفقوا على هذي المجموعة ، وشغلوهم باي شى مثل (غسيل المواعين - تقطيع البصل - تقطيع اللحم - فك العلب ) ومن هالامور اللي تاخذ وقت على المعزب ويمكن يقوم فيها غيره .

الامر الأخر يا جماعة الخير ، انه انا اذا اشتغلت وصرت قرم بالرحلة ما انتظر احد يقول عافاك الله والا يقول الله يسلم الايدين او ما شابه ذلك ، لاني اعرف نفسي والا ابي احد يمدحن ، ولاني اصلا ما قمت سويت وتزهلت للرجاجيل الا لاني احب هالشغلة وانبسط عليه ، واذا ما قمت وسويت وحطيت وعدلت ما تقلني طلعة للبر .

هذا اللي بالخاطر وآسف على الاطالة

[المسفهل]

عافاك الله أخي سماوي هذا الكلام اللي عليه نور وله حلاوة وعليه طلاوة ...

مثل هذا الكلام هو اللي يربي النفوس ويسمو بها إلى أعلى الدرجات والرتب.. ويحررها

من ربقة التماوت والكسل وانتظار خدمة الآخرين ...

وصدق الرسول الكريم صلى الله عليه وسلم إذ وصى أصحابه ألا يسألوا أحدا فكان أحدهم

يسقط سوطه من راحلته ولا يسأل أحدا أن يعطيه إياه بل ينيخ راحلته ويأخذ حاجته .

[سيف السيف1]

مشكور أخي سماوي على طرح الموضوع المهم بالنسبة لي أقول يجب على الشخص أن لايكون له في كل رحلة أشخاص أوشلة لأن رضى الناس غاية لاتدرك!!! خاصة اذا كانت رحلة طويلة لأن المسالة ليست تجارب
لكن أحياناً الشخص يبلى:mad: عموما الرحلات البرية وخاصة الطويلة تحتاج إلى تنظيم وإعداد جدولللرحلة
مثل : الوجهة أي المكان , عدد الأيام , السيارات , طريقة الممشى لأن بعض الناس يتضايق من كثرة المشي في السيارة, توزيع المهام على الأعضاء إلى ثلاث مجموعات ( 1) الطباخين ( 2) القهوجية ( 3) التغسيل والتنظيف ,, تحميل العفش والتنزيل يكون جماعي, وبالنسبة للشخص التنبلي ألي ما ينفع معه لاجدول ولاغيره ما همه إلا التنقد عطه أشكل في الرحلات القادمه:D :D

[ابومدين]

اخوي الفاضل سماوي ........ تنبيه جميل اياك اعني وسمعي ياجاره
وفيه كثير من الصنف هذا .... ومع ذالك تجدنا انحبهم ونرتاح لهم ومانبي الا هم

ولكن انت ايها السنافي القرم تستطيع تغيير اسلوبهم ... تقول كيف
نقول كلمة ترددها على مسامعهم كل ماسمعت منهم مثل هذا الكلام الا وهي
(سم ابشر سامحونا هالمرة) ونظر الى التغير السريع واقول جرب وانت الحكم

يااخوان نحن نفتقد الين بيد اخواننا بالقول والعمل ... والله المستعان


اخوك
ابو معتز

[ميراج]

الاخ سماوى السلام عليكم ورحمة الله وبركاته

كلامك صحيح وموجود ولكن راعى البر مع الوقت يتوصل الى ربع على كيفه كلهم

نشاما شرواك والاشخاص الى ذكرتهم اذا تجاهلتهم مع الوقت تتخلص منهم

تحياتى ( مانبيك الا شقردى وبس )

[سماوي]

شرواك الطيب أخوي
وعافاك مولاك

[دله وفنجال]

السلام عليكم ...


اخوي سماوي يمكن اني رديت مبطي لاكن الموضوع شداً اشوي المهم ودك ان الواحد قبل لايكشت او يسافر الى وهو عارف من يبي يخاوية يعني مايكشت مع اي واحد لان السفر والمقناص والرحلات البرية يبيلة ارجال تسند ضهرك عليهم ويسندون اضهورهم عليك ويبيلة ناس مثل اهبوب الريح خفيفين وقلوبهم على بعض .

وودي اقولك سالفة صايرة معي وهي ابنفس الوقت درس لي تعلمتة . هذا سلمك الله مكشات لنا قبل خمس اسنين المراد اني اول مرة اكشت مع الشباب هاذولا ولا انا لي ربعي الخاصين لاكن القرادة والمشكلة انه على موتري المهم ان الشباب هذولا جايين عن طريق واحد اعرفة وهو من ضمن الكشتة واول مرة اشوفهم وأعرف انهم حتى القطة ماقطو الى انا وخويي الي اعرف وراح اليوم الاول مايتحرك وينزل ويشيل ويحط الا انا ورفيقي ويجي اليوم الثاني وننزل ابقرية ونوقف ابمحطة ولاهناك محل رحلات بلجهه الثانية وانا وخويي مشغولين بتعبيت البانزين والي ينفخ الكفرات المهم انهم امتبطحين على المراتب وانا مستحي من خويي اول شي وكرامةٍ له ماودي اتخانق معهم وروح انا والرجال للمحل ونشري الاغراض, المراد ويعدي اليوم هذا على خير ويجي اليوم الثالث ولانا تونا فارشين البصاط والعزبه بلموتر ونبي انزلة لجل نكبس على الغدا وقول لواحد منهم يافلان الله لايهينك نزل العزبه ومن زود البجاحة انسدح وقال الخوية الي اعجز منة قم انت نزل العزبة ويتخانقون كل واحد يقول لثاني انت نزل العزبه المراد اني تنرفزت ولتفت على خويي وقولة ان بغيت تكشت معي وجبت ربعك لاتجيبلي زبالت الحارة (يكرم من يقرا) البر يبيلة ارجال وانا اضف العزبة والعفش وانكس لديرة ومن يومة لاشفت خويي ولاشفتهم ...


ارجو اني ماطولة عليكم لاكن هذا الي حاصل معي للاسف ...

[Bader-M]

ياشباب
الرفيق قبل الطريق
وعلى فكره حنا السعودين وبالاخص اهل نجد
فيهم جلافه ماهي باحد ابد
يعني مافيه كلمة مشكوراو الله يعطيك العافيه او تبرني (سوي فيها لبناني )... الخ
بس يابن الحلال
وسع صدرك
ولا احد يهمك تبي نصحتي
تعلم عليهم
وبعد ما تضبط الشغه
اسحب عليهم
:D ;)
وتعال نطلع انا وياك
بس لاتجي الا وانت متعلم :D

[قتال]

السلام عليكم ورحمة الله وبركاته ،،،

أظنكم بالربع ما كشتوا مع شيبان .. كان شفتوا العجب :D :D

وخصوصاً ليا كنت أنت أصغر القوم .. أشهد أنك بتاكل هوا :D :D

عليك الشغل كله ولا أخطيت بشغله أو سويت شي ما أعجبت واحد منهم .. صرت حديث الموسم .. وأسمع الإنتقادات والنصايح وكلام كبير .. ولا بعد يعيرونك فيها للطلعة اللي بعدها وكل ما قدعت شوي ذكروك بها لكن الشكوى لله .. وهم ليا حاس واحد منهم العيشه قالوا أيه هذا شغل الأولين ماهو عيالنا التالين :D :D

وكله كوم وسالفة مهنا وغزوته كوم ثاني .. :D :D

[سماوي]

يا مال العافية للجميع

ذكرت هذا لأننا أبناء الصحراء وفينا الشدة والغلظة ... وهي للتذكير فقط