ويش علاج العوماس؟

[راعي الناوي]

العوماس يمكن يختلف معناها من مجتمع إلى آخر ، معنى العوماس على حد فهمي هي كلمه تعني عن (التعب + الملل + قل التوفيق ) تصادف الجميع سواء اهل البحر ام المقناص ، لكن علاج العوماس العكس التفاؤل والصبر ، صادفنا شباب يقنصون معانا ومن تحمى الشمس ومالقو شي يترخصون منا وينكفون وانا ماحب النوع هذا :mad: ،وبعض الشباب يعجبونك صامدين معاك وإن مالقى شي قال ابشر بالخير انشالله بتلقى جرتها الحين وإلا يازين طيارها .....يعني يعطيك جرعات نشاط :good: ادري بداية الموسم وودكم بموضوع حلو ابرك من هالفال لكن لازم نحط الموضوع هذا في عين الإعتبار وإلا شرايكم يالربع ؟

[الوافي عزام]

موضوع جميل جدا جدا
وهي حاله يعيشها كل صقار في حالة بحثه عن فريسته المفضله ومعشوقت الملايين ( الحبارى )

ولاكن ما اقول الا ان التوفيق بيد الله عز وجل

وكم من مقناص ذهبنا به ولم يحالفنا الحض الا بالايام الاخيره او بالاصح باللحضات الاخيره
فالواحد لا يفقد الامل بالله عز وجل فالارزاق من الله ومقسمه على عباده وكل واحد وله نصيبه منها
ومافي شي يجي بدون تعب لازم ندور ونتلفت يمين ويسار ( ونبخشش رعيان الغنم ;) ) عشان يذكرون لنا جره ويالله السلامه



وشاكر لك يالغالي

[عناز]

علاجه والله الفنجال الاشقر

[قرناس خلوي]

والله العام وإنا في المقناص لقينا جرتها وجرت سيارة مقطعه عليها ومطيرها ولكن ماصادها وأثرها جديد وتوكلنا على الله وقمنا ندور يمين ويسار وكل سيارة في جهه ويوم كملنا أكثر من ثلاث ساعات جانا ملل ويأس وصلف وتعومسنا لدرجة إني نزلت وخليت خويي يسوق وسدحت المرتبه وخلينا مهمة البحث للطير ،، وأثناء حوار عن الملل بيني وبين خويي الا واحد من الربع يصيح في الجهاز طااااااااارت وأنا أنقز وليني في قزازة السيارة اللي قدام وأنقطع إرساله ونبداً وينك عطنا الإحداثي وماحولك أحد مارد ولا شي شوي إلا رجع يصيح هديت هديت وعطانا الإحداثي يوم وصلنا الا وهو توه معلقها مابعد ذبحها ،،، والله ياراح العماس وأنواع النشاط لو يبي وقتها نلف الكوره الأرضيه ماعندنا اي مشكله ونزل المعاميل ونتقهوا والطير يعلف من حباراه ،،،، وانا اشوف إن هذاا أحسن علاج للعماس والله أعلم .

[راعي الجير]

مشكور وانت ذكرتني ابيات اتمنى تلقى فيها اجابت سؤالك









ربـعــي هـلــي ياكاسـبـيـن النـوامـيـس **** وش حيلة اللي ضايقن خاطـره عمـس







يشكـي الهمـوم امـن الليالـي المعابـيـس *** باكـر مثـل قبـلـه عـلـى الابـلـه وامــس







لافـرق غيـر اللـي ســوات المحامـيـس *** مـع بنهـا الاشقـر تكـوى مــن الحـمـس







هــذي عـلـوم الـلـي بـعـيـد المـرامـيـس *** خـــذا مـــن الايــــام مـعـلـومـه ودرس







لاضـاق صــدره فيتـعـوذ مــن ابلـيـس *** ويترك صديق السـو ومطـاوع النفـس







ويقـنـي الـحـرار الـتـامـات القـرانـيـس *** الـلـي يـونـس شوفـهـا مطـلـع الشـمـس







حـرش الكـفـوف الـنـادرات المقابـيـس *** طرح السنـه ماوسـرت بربـع وخمـس







مـــع خـوتــن مـايـعـرفـون الـدنـافـيـس *** وعلـومـهـم زيـنــه ولافـيـهـم الـنـجــس







احـد علـى الشـبـة واحــد عـلـق التـيـس *** واحـد يــدوج الـخـد ويـشـوف ويـعـس







فـي خايعـن معـشـب بــراد ونسانـيـس *** فيـه ام سالـم تـرفـع الـصـوت والـحـس







يطـرب لهـا مـن فـيـه هــم وهواجـيـس *** ولاحــــداه الــديــن والــحــال مـفــلــس







ومعهـم حـلال القـوم صـنـع الابالـيـس *** مــن وارد اليـابـان والـخـشـم الافـنــس







صمم على رقي الصعب والتضاريـس *** يمشي الوعر والطين والحزم والطعس







وختامهـا عــد الحـبـر فــي القراطـيـس *** صلـوا علـى مـن عـلـم الـجـن والانــس

[راعي الناوي]

الوافي عزام ،عناز ، قرناس خلوي بيض الله وجيهكم على المرور الطيب ، راعي الجير صح لسانك ووفيت وكفيت والابيات شرحت الموضوع كامل الله لايهينكم

[فنجون]

شوف يا قنص علاج العوماس في المقناص توقف وتشب ضؤك وتسوي شاي وقهوه وتفك الريق وتعين منالله خير وتريح لك ساعه زمان ومن ثما تواصل مقناصك هذا هو علاج العوماس

[abu hlal]

شوف يا قنص علاج العوماس في المقناص توقف وتشب ضؤك وتسوي شاي وقهوه وتفك الريق وتعين منالله خير وتريح لك ساعه زمان ومن ثما تواصل مقناصك هذا هو علاج العوماس


عز الله جبتها

[راعي الناوي]

عز الله جبتها

شاكرلك مرورك الطيب