فيدوني تكفون يا اهل الخبره محتار بين سفاري 97 أو لاند كروزر99

[قانوص الكويت]

السلام عليكم وحمة الله وركاته:

والله يالربع محتار بين سفاري1997 أو لاند كروزر1999.

أنا أرجح لاند 99 لأنه قصه جديده ويتحمل أكثر.


لاند كروزر99

70%



سفاري97

30%


ولا شتقولون يا أهل الخبره

[قانوص الكويت]

24 واحد ومحد رد

[بواسامه]

اخوي قانوص
خذ تويوتا وترشيحك في محله
اذا كنت ذا رأيا فكم ذا عزيمة000فان فساد الراي ان تترددا

[المزروعي]

اخوي قانوص الكويت لو تسمع كلامي .. نيسان 97 خذه وانت مغمظ . يميزه عن لانكروزر اشيا كثيره . قلة الصرفيه للبترول . خفة وزنه . قطع غيار رخيص . وخرابه قليل . وبعدين شكل احلا . انا عندي واحد وماشي معايه زي الحلاوه
http://www.mekshat.com/pix/upload/images43/mk57508_dscf0148.jpg

وزيدك من الشعر بيت ... تقدر تبدل مكينته ب مكينة لومينا اس اس

[شبح الموت]

اخوي قانوص

الله لايهينك اذكر المواصفات والممشى (المسافة)

وهل فيه حوادث ولا لا وراعين الموترين شياب ولا شباب

[قانوص الكويت]

انا للحين مادورت علشان اقولك هالمواصفات.
وانا محتار وش ادور؟

[dr.mekshat]

السلام عليكم
اخوي اذا الباترول 97 انصحك بالتويوتا
لان التويوتا 99 ازين من البترول 97 بكل شي
وبعدين يكفي انه تويوتا لاكن لو الباترول من الموديلات الجديده قلت لك خذ باترول ولا تشاور
وعسي الله يوفقك للراي الصالح
تـــــحـــــيـــــاتــــي

[جبل راف]

عليك بالاند كروزر
وخل السفاري على جنب
تووووووويوووووووووتا وبس

[مستر 1]

مايبيلها مطوع تويوتا وبس

[الدبل الثقيل]

السفاري إذا كان بخاخ ياويلي خفه ورساوه في الخط وفي الجلد في طرد الصيد ........ز لكن يشرب بنزين ويقربع.......... وأرخص من الاندكروزر........

[النمر الأشهب]

تكفى لا تشتري السفاري ترى جربته عله وقطع غياره غالي عليك بتايوتــــــــــــــــــــــــــــــــــــــــــــ ــــــــــــــا أبرك من النيسان الي كل يوم يحتاج تربيط تقبل مروري وأعذروني يا أهل النيسان

[الثويرات]

طعن وخذ باترول هو سفينة الصحراء بعد البعير


اما التايوتا صدقني خراب ومطب وقرشعه ووطابه بالطرد وغيره الكثير الكثير من المشاكل

[الدبل الثقيل]

السفاري بالطرد في المقناص أفضل من الاندكروزر وبدون مقارنة..........

[هاوي الربع]

السلام عليكم

والله إذا تبي رايي خذ لاند كروزر وانت مغمض

يكفي تويوتا ولكن عليك بالنظيييف

[باترول للأبد]

خذلك نيسان ولاتفكر قوة وشكل وكل الزين فية

[راس الرعيلة]

والله ياخي إذا أنت راعي قنص ومطامر
فأنصحك أنك تاخذ السفاري 97 لأنه خفيف مره مب مثل الاند
((الكلام هنا للنيسان القديم))
وشغله بسيييييييييييييييييييط وغير معقد وأي واحد يصلح فيه
لكن إذا أنت شاريه للديره فأنا أنصحك بالاند لا يعلى عليه
((عطية الله تويوتا))

[مكشات عنيزه]

تبي نصيحتي خذ الاندكروزر ولا تشاور احد
انا عندي لاندكروزر vxr موديل 92 والحمد لله اي شي براسي رحتله
ورحت عليه للشام ثلاث مرات ولا اغير الا الاشياء الاستهلاكيه
وأشياء بسيطه ما تسوا ولا عندي نيه ابيعه وله هالحين عندي 16 سنه مشري وكاله
قولوا ماشاء الله

[المنصوري-قطر]

والله النيساااان هذا موتر الي هو السفاري

ياشباب على حسب الريال يبي يقنص فيه ولا يبيه استعمال حشمه

بس احنا ياهل قطر اهل التيوتا يمدحون النيسان في المقناص من ناحيه مطارد لاتشتكي منه شي

اما التيوتا الي يطيح مقصه والي كل يوم خراب
والله انا عندي نيسان ومرتاااااااااح والربع عندهم نياسين هذهي احلى مايكون

والراي الاول والاخير رايك

تقبل مروري

[هاوي الله]

الله يفرجها على جميع المسلمين آمين

[غازي 1]

عليك بالاند كروزر
وخل السفاري عنك
جربت السفاري وجربت اللاند والأخير لايعلى عليه ...

تووووووويوووووووووتا وبس عند البيع جنيه ذهب ...

[ابو ناصر2020]

باترول ولا 97 وش خليت من المواتر وخصوصن اذ كان بخاخ يعني فل كامل
خفيف ومريح وقطع الغيار رخيص والموتر ماعليه اي كلام .

[.أبوعبدالرحمن]

وانا اخوك خذ اللاند وبتدعيلي ان شاء الله


الوالد معه 2001 خليجي


والحين يفكر يبيعه ويشتري ثاني جديد


3 من عمّاني معهم لاندات ولا فيه امل يغيرونها


وتبي قوة ونشاط وخفه ومسكت سعر وشكل


وبعدين اصلا ما فيه مقارنة ابدا


اللاند الـ 99 تقارنه مع الباترول الــ 99


والله يكتب اللي فيه خير


ولا تنسى الاستخارة

[ابـ معزي ـو]

كانك تبي تاخذ تويوتا Gx .. خذ ولا تشاور .. وخل النيسان على جنب
اما اذا كنت تبي تاخذ تويوتا Gxr او vxr لا والله سلم لي على السفاري

انا معي جيب تويوتا Gxr 2002 والله من كثر القربعه لو تطلع به كيلو تقربع وطلعت به اصوات
سلم لي على الجي اكس والله

وهذا شوري والباقي على رب العالمين

[سندباد الخليج]

اخوي بارك الله فيك

توكل على الله وخذ اللاند كروزر وش تبي بالنيسان النيسان من القرقعه ماتسمع خويك الي بجنبك من الصجة

ولا بعد موديله 97 بعد ....

احد يبدل الصين بالطين والله عجب

[Waleed1]

السلام عليكم

يبدوا لى ان النوعين منافسين لبعض الله يعينك لاكن أستخير الله وتوكل على الله

[قانوص الكويت]

أشكركم على مروركم العجيب.

والله حيرتوني يالربع بس نسبة السفاري ارتفعت بعد ما وظحتلي خفت السفاري وثقل اللاند.

[الدحبول]

النيسان باترول خفيف ويصرف أكثر من لاند
سمعت ان الباترول عندكم يأهل الكويت عشقوة الحضار قبل البدو
بصراحة انا أملك لاندكروزر 1997
بس الحق ينقال
الباترول أخف من لاندكروزر
ودفرنش من قدام
أنصحك بالبترول إذا راعي مقانيص وطلعات بر ترى لاند الجديد مهوب مثل القديم إلا إذا تبي لاند97 تره زين
خذ قير عادي وكربريتر
لان قطع البخاخ غالي وغير متوفرة لشكل القديم إلا عند الوكالة

[كهلان]

تويوتا سياره تمسك سعرها ولها زبون لكن ثقيل ويستهلك فرامل
اما نيسان خفيف قليل اعطال لكن ماله زبون عند البيع
حكم رايك واستخر وتوكل على الله

[sall]

السلام عليكم
انا انصحك يا اخوي باللاند كروزر لان شكل 99 مثل شكل 2007 بتغيرات بسيطه
بعدين سيارة مثل هذي ما تبغا منك شي
ما عليك الا انك تنتبه من الصدوم وحاول انك تسوق السياره وتسرع فيها تشوف اذا كان فيها تنسيم ولا لا.
هذا الي يرفع الضغط وصعب تزيينه
غيره لا تشيل هم هذي سيارة جبارة ماشالله
اذا كتبلك الله وشريتها ما عليك الا:
تصفية مكينه بواجي ، اسلاك بواجي ، سيور ، تنضيف بخاخات .
تنظيف الراديتر ، تشييك حرارة السيارة منها البلف والليات والمراوح
تغيير زيوت السيارة : الماكينه ، القير ، الدركسون ، الدبل لا تنسى الدبل ، الدفرنس
وبعدها الفلاتر كل شي اسمه فلتر في السيارة حاول تغيره
شيك على القير
وعلى طول لم الكفرات طق له بوالين مكسس 8بلي
يايات استراليه خلفيه ورفعه من قدام

وتوكل على الله ودق سلف وقل انا معي سيارة جديده
الله يعطيك خيره ويكفيك شره مبروك مقدماً