ما هو الحل إذا غرزت السيارة

[أبو عادل]

إذا صرت سواق عليمي مثل كاتب هالسطور
ومعك هايلوكس ولا ددسن ولا سيارة صغيرة يعني انس دفرنس ثاني
خوياك طالعين لهم بر وتبي تروح لهم
ومن رداة الحظ الي موصف لك الله بالخير وأنت بليل لا وبعد لحالك يعني لا تفكر أحد يدف
عاد أخذت لك تدور ما لقيت خوياك يوم قلت يابن الحلال دس وارجع يوم غرزت السيارة وقعدت بمحلها
وش تسوي ؟

أبي حلول عملية لواحد عليمي

[أيمن]

أبو عادل يا بعدي ..
أنا أنصحك بأنك تطلع خيشة البصل وتبدأ بالتقشير لين ربك يفرجها :D (أمزح)

أخوي العزيز بمشيئة الله في ظرف أسبوع أو أكثر فد نزيد زقد تنقص ..
هناك موضوع متكامل - نرجوه كذلك - عن هذه الأمر وهو كيفية الخروج من الغراز مدعم بالصور، والوسائل الطبيعية أو غيرها أو ما يمكن أن تفعله بالسيارة والطرق التي يمكن اتباعها في التغريز بأنواعه المختلفة ..
أرجو ألا يتأخر الموضوع كثيرا ..
ومن كان له فائدة فليدل بدلوه هنا حتى تعم الفائدة ..

تحيتي

[الوسيم]

اذا كنت عليمي فاسهل طريقه خفف الهواء الى 10او اقل بشرط انك تخففه قبل ماتتعلق السياره وشف الفرق

[mmsm53]

الاخ العليمي
عليك ان تتركها وتذهب الى المنزل واذا كنت في ليل عليك ان تلوح للماره عسى ان يقف عندك احد ، الله
لايحطك بدربي ، يييييوو ياشي باسويه فيك ابدفن السياره واقول لك اخذها الجنى او سراها الفار ( مزحه )

الحقيقه لاتعليق بعد المشرف ايمن 0

[قناص رماح]

السلام عليكم ورحمة الله وبركاته

انا اشوف انه احسن شي للعليمي مايطلع بالسياره الصغيره أو بالوانيت احسن شي يشتري له جيب ويتعلم


كيف يشغل دبلاته ويطاعس فيه، مايشتريه واذا غرز جا يدور احد يطلعه له الزبده اشتر لك جيب وريح راسك

وسلامتك ،،،،،،،،،،:good:

[ابو حسام]

اول ماتحس ان السياره غرزت على طول نسم الكفرات الى اقل من 10
ثم احفر من امام جميع الكفرات ومن خلفها بحيث تمهمد الطريق امام الكفرات لمسافة نصف متر على الاقل
قم بحركة هز السياره وهي عبارة عن الظغط على البنزين بخفه بحيث تتقدم قليلا جدا ثم رفع الرجل عن البنزين مع الحفاظ على الكلتش مدعوسا لترجع السياره للخلف. بعد رجوعها للخلف قم باعادة الحركه خمس او ست مرات.
ستلاحظ ان السياره ودها تنقز ( :) ) . اذا لاحظت هالشي واصل الدعس على البنزين وان شاء الله راح تطلع.

تحياتي

[راعي بر]

السلام عليكم ورحمة الله وبركاته

يا ابو عادل انا عندي حل مضمون بس عدته واجد وانت معك هايلكس يعني ما تسأل ماشاء الله عن الزحمة أو الضيق في العفش

أمس دخلت عند ساكو ولقيت عندهم زي الواير بس له شنكارين وفي النص فيه زي العصاء اليدويه تضغطها فاينسحب الواير وهو يجر 2طن ب 114ريال وتاخذ معك عكس ملحم في ماسورة و وخذ مرزبه واذا غرزت دق العكس بالمرزبه وميله لم الجهة اللي عكس السيارة وبعدين اشبك فيه الواير واشبكه في السيارة وجره وان شاء الله يطلع .
والله يحفظنا واياكم من التغريز
ارجوا ان تنال الفكرة اعجابك واعجاب الجميع

[الدافور]

السلام عليكم

ابو عادل الموضوع اللي كتبته مهم للغايه
مثلا وانت طالع البر لوحدك وغرزت سيارتك ما تدري وش تسوي

ونشكر الاخوان على ردهم الوافي

[ولد شقراء]

طلعها:D :D :D :D :D :D














أقول برد على عمرك بتنسيم الكفر (بالهوى الي يطلع من الأمبير)

وللى أقعد أشر



:flog:

[السحقان]

ابزيدشي واحدفقط على كلام الاخوان

مع تخفيف الهواء

أنزع سلك بوجي واحد حتى يخف عزم السيارة ودوران الكفرات بسرعة

طريقة مجربة:redcar:

[أبو عادل]

الأخ أيمن أشكرك
المرة الجاية لا جيت أطلع البر باخذ خيشة بصل عشان أقطعها
وبإنتظار موضوعك المتكامل المدعم بالصور

الأخ الوسيم نصيحه ثمينه وبصراحة تخفيف الهواء من أهم الحلول

الأخmmsm53 تحية طيبه ولا تخاف ما ني من الناس الي يخلون سيارتهم ويروحون

الأخ قناص رماح طيب والي داج زي حالتي وما عنده فلوس يشري جيب يعين ما يطلع بر

الأخ ابو حسام أشكرك على التوجيهات الرائعة

الأخ راعي بر والله فكرة جديدة ومبتكرة وبشتري هالواير انشاء الله

الأخ الدافور أشكرك على مرورك على الموضوع

الأخ ولد شقراء أطلعها بس وشلون وبعدين هواء الكفرات غالبا يكون حار كيف أبرد على عمري :D

الأخ السحقان بصراحة طريقتك أول مرة أسمع فيها بس الهايلوكس من حين عزمها ضعيف

[المدير]

إذا وصلت للرمل أو السهلة أو الشعيب أو النفود أوأي مصطلح يدل على أن هذا مكان صالح للتغريز فعليك بالتالي :
1/ التوكل على الله
2/ لازم تصير سواق نفود لاتحسب الدعوى دوس للبنزين مثل الزفلت الدعوى تبي له حرافة
3/ إحضار أجهزة الاتصال الكنود مع القارمن لتحديد الموقع وتحضر واير أو حبل قوي لعل الله يسعفك براعي جيب يفكك من المشاكل اللي تبي تواجهك
4/ الاستعداد بالماء والطعام من تمر وغيره ولا تنس ماطور الهواء أو آلة نفخ العجلات ( كما سماه غير واحد من أهل اللغة )
5/ قبل ماتدخل للرمل وقف وخفف الهواء حسب الحال اذا كانت الأرض قوية نوعاً ما وتسمى ( عزاز ) فهذه لو خففت الهواء من 15 – 20 راح تمشي الأمور وما عليك ان شاء الله أما اذا كانت الأرض رملها ناعم وتسمى (هيار ) فهذه خفف الهواء من 15 – 10 لايزيد ولازم يكون معك ماطور ( والا رحت بخرايطها لأن الكفرات راح تبنشر عليك اذا طلعت خارج الرمل بهذا الضغط لهواء الكفرات عاد رقعها اذا بنشرت كل الكفرات الا اذا معك عدة بنشر) المهم بعد ذلك امش ولا عليك الا العافية ويختلف الأمر إذا كانت الأرض ممطورة أو لم يأتها مطر
6/ أما اذا اراد الله انك تغرز وغرززززززت مباشرة وقف لا تطينها ترى الوضع ما يحتمل الدعوى فيها حياة وموت المهم وقف وخفف الهواء حسب نوعية الأرض كما في السابق ثم ( برح ) للكفرات يعني قم بإبعاد الرمل من حولها حتى تبدوا للعيان هكذا قالت العرب ثم قم بوضع شجر أو شي صلب تحت الكفرات من خشب أو غيره إذا لزم الأمر وقم بهز السيارة إلى الأمام (لاتهزه انت خلها هي تهز روحها )حتى تفتح طريقاً ثم ارجع الى الخلف فإذا رأيت الفرصة سانحة للإنطلاق اسرع قليلاً ثم انطلق فإذا أنت خارج المصيبة اللي أنت فيها و اشغلتنا معك وان تهيأ لك وايت ماء يرش لك الأرض فهذا ممتاز لكن عاد دور لك وايت بالنفود .
7 / أما اذا ما سمعت النصايح وتعلق الموتر بالهواء فقلعتك ( مزحة ) ما راح نخليك أنت اخونا المهم عليك انك توضأ بماء قليل إلا اذا أنت محتاجه للشرب فتيمم والدين يسر وصل لك ركعتين وادع ربك انه يفرج كربتك وماراح يخيب ظنك إن شاء الله لأنك مضطر والله وعد أنه يجيب دعوة المضطر إذا دعاه ثم إذا سلمت توكل على الله وخفف هواء الكفرات وحاول تبعد الرمل عن الكفرات ومن تحت السيارة بالكريك أو المسحاة وإذا معك (عفريته) ممتاز أو( آلة رافعة ) كما يحلو للبعض من المثقفين تسميتها ولكنا وجدنا آبائنا هكذا يسمونها عفريته وهي على اسمها ترفع أشياء بضعف حجمها ووزنها مئات المرات فهي كالعفاريت وزناً ولفظاً ومعنى المهم ارفع الكفرات واحداً تلو الآخر وضع تحت كل كفر تراب أو شجر أو خشب أو أشياء صلبة ثم اتبع الطريقة السابقة اذا بدأت السيار ة في الحركة ثم اطلع وخلصنا .
8/ أما إذا لم ينفع ذلك كله فالله يعين اللي يشرح لك وراح نشوف آخرتها معك يا تطلع يا نسحب السيارة من تحت رجلك والسواقة ماهيب غصب المهم وين وصلنا الله يعين اللي يخاويك ايه تذكرت قلنا لك جب الكنود والقارمن لاتقول نسيت مثل عوايدك حدد موقعك واتصل باقرب نداء والنشامى واجد هذا اذا انت بالشتاء أما اذا انت بالصيف ولاهو وقت صيد لاوبالدهناء بعد فالله يعينك الله واعلم ان اهلك ماراح يقلبون وجهك مرة ثانية ( هذا مصطلح قصيمي يحتاج رسالة دكتوراه لشرحه ) ومعناه والا نقول الله يبعد بساعة الشر ويخليك لنا
9/ اذا ماحصلت أحد اشحن القارمن أو ضع فيه بطارية وحدد اقرب موقع وخذ الجهاز معك وخذ معك ماء كاف للشرب وبعض الطعام والبسكويت فإنه خفيف المحمل ويسد الجوع واذا فيه تمر ازين وازين واكتب لك ورقة تحدد اتجاهك وضعها فوق طبلون السيارة يمكن الله يكرمك بواحد يسعفك وخذ سلاحك على كتفك ماتدري وش يواجهك تعرف الاحوال هاليومين وتوكل على الله ولاتنس الورد من الاذكار اليومية مع الاستغفار كما في الحديث عن ابن عباس رضي الله عنهما قال قال رسول الله صلى الله عليه وسلم ( من لزم الاستغفار جعل الله له من كل ضيق مخرجا ومن كل هم فرجا ورزقه من حيث لا يحتسب ) رواه أبو داود كل هذا مع المحافظة على الصلاة في وقتها والدعاء فالله راح يعينك ويوفقك واللي ما يوفقه الله ما هو بموفق ودعواتنا ان الله يفرج كربتنا وكربتك وامش حتى تصل إلى المكان المطلوب عاد إن وصلت وصلت وان ماوصلت ماباليد حيلة بذلت الاسباب والتوفيق بيد الله لكن نتفائل بخير ونقول انك راح تصل إن شاء الله مع تحيات أخيكم المدير .

[mohamad1121]

ابوعادل
مع التحيه

ماترك لنا المشرف الله يعطيه العافيه والجميع اي فرصه (نمزح مثل ماقال) فنحن واياكم في انتظار الصور وانا على ثقه بأن لها الدور الفعال في توضيح الطرق الصحيحه لحل هذه المشكله .
ابوعادل وكما اشار المشرف الغالي بأن يقدم اي عضو مالديه .
في حالة الدخول في مناطق رمليه خفيفه فأي سياره سوف تجتاز هذه المنطقه دفع خلفي دفع امامي لاعلاقة للسياره بل المسأله تتعلق بالسائق بالدرحه الاولى .
فلابد من التركيز اكثر فعندما تعلق السياره فلا يقوم السائق بالضغط على دواسة البنزين محاولا اخراجها فهذه غلطه كبرى بل التوقف لرؤية ماهو الوضع اولا فاذا لاحظ ان اجزاء السياره السفليه عالقه بالرمل فلا نفع حتى وان كانت السياره دفع رباعي .
اولا:ـ لابد من ازالة الرمل من تحت السياره ، وتخفيف الهواء في الاطارات وبحدود.
ثانيا :ـ تحريك السياره وبهدوء الى الامام والى الخلف بدون الضغط كثيرا على دواسة البنزين والاستمرار بهذه الطريقه اذا كانت السياره تتحرك .
ثالثا :ـ هناك وسائل مساعده ومن الطبيعه وذلك بوضع اي قطع من الاشجار والخشب وما شابه ذلك فان كانت السياره دفع خلفي فتوضع امام الكفرات الخلفيه ولكن لابد من الحفر قليلا امام الكفر لكي لاتكون عائقا لتحركه .
ابوكاسر

[شارع 20]

أنا أقول احسن شي اذا أنت بليل اذا معك فراش تحط را سك وتنا م ومن أصبح أفلح

[الزعيم]

السلام عليكم
الاخوة المشاركين
موضوع هادف لمحبين البر والطعوس مشكورين ويعطيكم العافية

بخصوص الدتسن يوجد ما يسمى ( الشفاط) يسحب على درجة صغيرة وتوضع السيارة في النمرة 3
وتدفع السيارة بالايدي
طريقة مجربه في نيسان الدتسن 85 موديل

الاخ المدير شكر خاص موفور بالتحية
نسأل الله السلامة للجميع

[محمد العنزي]

ماققدر ازود على اللي قالوا لااخوان ...


فكفوا ووفوا .. ما عندي الانقطه وحده حبيت اضيفها لكن سبقني اخوي المدير وقالها .؟؟

الا وهي مااااااااااااطور الهواء .. لأنك الياخففت لهواء وطلعت بامر الله من التغريزه ..

بتروح تدور على الهواء اللي انت ضيعته قبل شوي .. وتبدا كل شوي .. ياليت .. ياليت .. ولو سويت كذا .. ولو جبت الماطور .. ونسيت الهوز .. و..و .. و .....................

وسلالالالالالالالالالالامتكم ...

والله لايوريكم مكرووه ...

وتحياتي ..

[المدير]

مشكور اخوي الزعيم ولك تحية خاصة من أرض القصيم وياهلا فيك وتحية لكل الإخوان

[ابو حسام]

شرح وافي أخي المدير
بارك الله فيك

[المدير]

والله احرجتونا اقول روحوا عساكم ماتغرزون ولاتعلق مواتركم بالنفود وعساكم للوناسة

[أبو عادل]

طيب أنا الحين بعت الهايلوكس وشريت كامري لا وبعد تماتيك

[الفهد454]

اظاهر تتطنز ويانا انت اللحين الشباب شادين حيلهم واخرتها تقول بعت الهايلوكس وشريت كامري اجل لاطبيت في تغريزة ومريت انا حولك عزالله اللي ماطلعتك ولا راح اطلع ولا راعي كامري.

[أيمن]

الله يعطيكم العافية جميعًا ..

أخوي أبو عادل ولا يهون الجميع ..
هذا الموضوع اللي وعدتك به، وهو مكمل لما طرحه الإخوة، وعذرا للتأخر في إدراجه :
http://www.mekshat.com/pix/upload/images5/mk5_kraz_0.gif (http://www.mekshat.com/vb/showthread.php?s=&threadid=21086)

تحيتي

[سنتافي]

السلام عليكم


والله بصراحه من جد موضوع مهم وخاصه اذا كنت لحالك اذكر مره كنت بالشرقيه وكان معي حوض الفورد الرينجر 98 دفع خلفي المهم ما ادري وشلون مسكت معي اروح تحت الجسر حق الملك فهد والله اول مادخلت كل شي زين تمام ما دريت الا الموتر بدى يحفر غرزت نزلت حفرت اشوي الا الما طالعلي بلشت الارض طينه وش اسوي المشكله انه حتى الجوال ناسيه في السكن يعني مره والله وربي هداني قمت القط من الحصى الين مامهدت الطريق وطلعت الموتر بالريوس ومن يومها وهذيك المنطقه هي التحدي بالنسبه لي وسلامتكم


http://tinypic.com/xvdcj