ابغى اغير بطارية السياره وش تنصحوني به يا النشاما

[الدرندس]

السلام عليكم

انا عندي هايلكس 2005 وما قد غيرت بطاريه الوكاله الى الان وتنصحوني اغير اي نوع ؟
وش المقاس المناسب؟وهل حقت وكالته 55 امبير ؟واذا غيرت اكبر 70 80 امبير تضر ؟

ارجو الافاده..................

والسلام

[بن محفوظ]

ركب 55 امبير اي سي ديلكو .. ممتازه

وهي الافضل لدي ..

وزيادة الامبير يسبب ذوبان الاسلاك الي ما تتحمل ...

واذا قصدك علشان لمبه او غيرها .. ركب بطارية ثانيه خاصه بالمبات..

وخل البطاريه الاصلية لتشغيل الموتر ..

وفقك الله

[طحنون]

بعد اذانك يا بن محفوظ
تركيب بطاريه اكبر سعه لالنبير ما يأثر على السياره لان البطاريه عباره عن تخزين للكهرباء والسياره تأ خذ حاجتها من الكهرب والزايد يتم تفريغه عن طريق منظم الكهرب الكتاوت وبالعكس كل ما كبرت البطاريه كل ما ارتاح الدنمو من الشغل وبتلاقي ان الدنمو قلت الحنه اللي فيه
وبعدين اي سي دلكو كلها سنه وبيخرب (يعني ركب جديد)
ابحث عن الياباني الاصلي بس تراه غالي
ولا يفوتك بطاريات (باقادر) لانها نفس اللي تجي من الوكاله يعني اورجنال اصلي بس غاليه والغالي قيمته فيه

[escape_man]

انا من راي اخوي بن محفوظ

من سنين وانا ما اركب الا اي سي ديلكو وتعيش معي سنة ونصف الى سنتين

وكنت من شرايينها من يوم كانت برخص التراب وانت كرامة

بالنسبة لمقدار الامبير فانا من مشجعي الترهيم والتعديل الااااا في اي شيء يمس الكهرباء

دائما حريص على وشيقولون الوكالة ... حتى انارة السيارة الداخلية والخارجية وانوار الطبلون

اشتريها من حرصي من الوكالة.

ركب هدرز .. غير المكينة .. امش بدون قير ... لكن الكهرب نصيحتي ركب طبق الاصل والخواجات اعرف

[الدحبول]

إيسيديلكو ركب 70 -78 امبير
ترى الياباني مهيب زينة برغم من إنه طول بس الله يعينك على التعبية

[بو بندر]

ايس ديلكو راح

[طحنون]

انا من راي اخوي بن محفوظ

من سنين وانا ما اركب الا اي سي ديلكو وتعيش معي سنة ونصف الى سنتين

وكنت من شرايينها من يوم كانت برخص التراب وانت كرامة

بالنسبة لمقدار الامبير فانا من مشجعي الترهيم والتعديل الااااا في اي شيء يمس الكهرباء

دائما حريص على وشيقولون الوكالة ... حتى انارة السيارة الداخلية والخارجية وانوار الطبلون

اشتريها من حرصي من الوكالة.

ركب هدرز .. غير المكينة .. امش بدون قير ... لكن الكهرب نصيحتي ركب طبق الاصل والخواجات اعرف




طيب اخوي هل السي ديلكو بتخدم مثل مايخدم الاصلي هاذاي المده يقول صاحبنا ان السياره مديل 2005
وانت احسبها السي دلكو استخدام في اصعب الضروف مايطول اكثر من سنه

[حمد808]

ركب
nbc
80امبير عليها ضمان سنة وثلاث شهور وتقعد سنتين بالرحة
افضل من ايسي دلكو زين اذا كملت سنة

[.أبوعبدالرحمن]

nbc


هي اللي ما سكه السوق وتخدم

ايسي ديلكو طاح كرتها صارت تتعب معك بسرعة وخصوصا اللي حاط لمبة بر

[سفاري نجد]

انصحك أخوي بأكسايد صناعه كوريه من عند التميمي نهاية طريق النهضة شمال ،،،

كد ومد افضل بكثييير من اي سي ديلكو مبرمجه سبحان الله على فترة الضمان 15 شهر وتنتهي ،،،

اكسايد جربتها افضل بكثييير ضمانها 18 شهر وتعطي أكثر بإذن الله ،،،

[برادو]

السلام عليكم

رفع الأمبيرات أبد مايضر السياره بالعكس يعطيك قدره أكبر وعمر أطول أسأل مجرب أنا دايم ارفع امبير البطاريه ب 10 أمبير والبطاريه يالله لك الحمد أنساها بالراحه 3 سنوات. توكل على الله

[hekloz]

أضم صوتي لأخوي / أبو عبدالرحمن الصفيان

هي من الأنواع الممتازة في السوق واسألني أنا عندي محل بطاريات في الملز ( دعاية للمحل ) :)

[الدرندس]

شكرا الى من قرا الموضوع وادلى بدلوه
وكذالك شكرا لمن قرا الموضوع ولم يدلي بدلوه
يعني نتوكل على الله ونركب 80امبير ما فيها ان شاء الله ضرر على السياره او الدينمو او الاسلاك؟

[نمر بن حثلين]

ديلكو من تالي لك عليه

ركبته وعليه ضمان 12 شهر ويوم كملت 12 شهر واسبوع وتخرب :confused:

[بن محفوظ]

يا أخوان .. ترى كهرب الموتر له تأير على البطارية ..

يعني يجيني واحد يتفلسف بالموتر ويركب لي كبوس و كتاوت ومراوح تبريد

وشق وبعج بأسلاك الكهرب ثم يركب بطارية واذا خربت قال : البطارية تعبانه

انا كان معي ددسن 2000 بخاخات من يوم شريته الى عام 2006 ماركبت عليه الا بطاريتين اي سي ديلكو..

واهم شي متابعة البطارية مع كل غيار زيت ..

[escape_man]

طيب اخوي هل السي ديلكو بتخدم مثل مايخدم الاصلي هاذاي المده يقول صاحبنا ان السياره مديل 2005
وانت احسبها السي دلكو استخدام في اصعب الضروف مايطول اكثر من سنه


والله يالغالي ... البطارية من الاشياء الهامة الي احرص على تغييرها سنويا لانه لها عمر افتراضي محدد بضمان

12 شهر... فماتفرق معي واجد اي نوع .. هذا علشان اكون صريح جدا معك.

عندي بليزر وجمس قطع عشرة وباث كل بطارياتها اي سي ديلكو ( ادمان )

ومن تجربتي تعيش سنة ونص باراحة لكن انا غالبا الباث اغيرله قبل سفرتي السنوية.

وهل هالماركة افضل من غيرها فهذا شي انتوا اخبر مني فيه وربما اكثر تجربة

[برق السما]

طيب لو ركبت 44 امبير هل لها ضرر !!

هذا شي الشي الثاني صراحه انا مجرب بطاريات golden ماشاء الله ماشيه معي مضبوط ولها اكثر من سنتين ,,

[وسيـع البـنايد]

حسب معرفتي ( القاصرة ) إن نقص الإمبيرات ماله تأثير
لكن الزيادة لها تأثير على الأسلاك وعلى علبة الفيوزات .. أما أنواع البطاريات الـ ACDelco
جيدة لكن الفترة اللأخيرة ماعاد هي مثل أول وصناعة محلية والأخوان المجربين ويطرحون الأنواع لنا
الله يجزاهم خير

[وسيـع البـنايد]

على حسب ماسمعت ان السياره اذا كانت قديمه تركب لها امبير اعلى يكون افضل فما ادري هل هذا الشي صحيح

اللي عنده معرفة لا يبخل علينا