أستشارة بخصوص شراء اللاند كروزر من قطر أو الأمارات

[أبو فيصل]

أخواني الأعضاء و المشرفين مطلوب( مساعدة ، رأي أو تعليق)

أنا أفكر حاليا بشراء GX (هدد) جديد من قطر أو الأمارات ولكن تيقى هناك علا مات أستفهام

مثلا
1. المقعد الأمامي مفصول أو غير مفصول
2. فيه ثلاجه ولا مافيه
3. الجنوط أي نوع
4. فيه دفرنش أمامي مثل ما سمعت أو بس في الديزل
5. فيه فتحه في السقف أو لا
6. فيه مثبت سرعه أو لا
7. فيه ديكور عاج أو لا
8. فيه هزاز أو لا
9. كم القيمة بالريال القطري أو الدرهم
10. هل يجي شنطه أو أبواب
11. هل صحيح الجمارك السعودية لا تشمل موديل 2002 و 2003
12. أخيرا الرجاء تزويدي بالتلفونات (البريمي، الفطيم ، وكالة اللاندكروزر في قطر)

معليش طولت الأسئلة شوي بس ما ودي أتعنى أبي فرقا الجميل وهي ما تسوى

أخوكم أبو فيصل

[elshamri]

حتى تلفون ما حصل

[الدلولة]

أنصحك قبل ماتروح لقطر أو الإمارات مر على معرض اليحى بالرياض أو بريدة عنده كل الجيوب التايوتا من VXR إلى GX بما فيها الهدد مواصفات لايعلى عليها وأسعارهأقل من الإمارات وقطر 0
أنا كان عندي هدد 2002 شاريه من عنده بـ 121000 ريال وقبل ماأشريه منه إتصلت على قطر قالولي 127000 ريال قطري يعني بحدود 130000 ريال سعودي غير مصاريف سفرك والجمرك وأفضل منهم بثلاث مواصفات وهن :-
1 - حق اليحيى فيه دفلك والقطري مافيه 0
2 - ريموت أبواب والقطري مافيه 0
3 - الفرامل الخلفي فحمات والقطري قماشات ومن المعروف أن الفحمات أفضل من القماشات بالبريك 0 إجابة أسئلك
1 - المقعد الأمامي مفصول 0
2 - فيه ثلاجة 0
3 - الجنط حديد مقاس 17 إنش 0
4 - مافيه دفرنس أمامي ألي فيه مقصات 0
5- فيه فتحة بالسقف 0
6 - مافيه مثبت سرعة 0
7 - فيه ديكور عاج 0
8 - حق اليحى فيه والقطري والإماراتي مافيه 0
9 - ذكرت لك الأسعار علماً أن القطري والإماراتي أسعارهم متقاربة 0
10 - يجي شنطة خلفية لكزس 0
11 - تشمل بس الفرق إن السيارة ألي داخلة قطر أو الإمارات بعد 1 / 1 / 2003 بإمكانك إنك تجمركه بأحد ها الدولتين يعني بك بك الجمرك 0
12 - ما فين تلفونات 0
أرجوا أن أكون قد أفدتك 0

[قتال]

السلام عليكم ورحمة الله وبركاته ،،،

أخوي أبو فيصل .. حياك الله ..

إن كنت تبي جديد فلا يوجد فرق بالسعر أو فرق بسيط ما يستاهل العنوه .. وتشتري من بلدك أفضل حتى تحتفظ بالكفالة .. أما إن كنت تبي تشتري مستعمل فالقطري والإماراتي أرخص .. بس أحرص على أنك تاخذ رقم الشاصي وتتأكد من مواصفات السيارة من الوكالة قبل لا تشتري .. لأنه يوجد غش في مواصفات السيارة وخصوصاً بين GX والـ GX-R ، فمواصفات GX في قطر تعادل في كثير من المواصفات GX-R في الكويت والسعودية .. وكذلك GX-R تعادل في كثير من مواصفاتها لـ VX-R ، فبعض ضعاف النفوس يقوم بتغيير ألوان الرفارف وبعض الموصفات ويغير العلامات ويبيعك الـ GX على أنه GX-R وتراه ما يبين إلا للعارفين بمثل هالسيارات .

كما أوصيك أنك تحرص على أن السيارة من الوكالة وليست تجارية وارد اليابان والتي تجي طارتها ( الدريكسون ، السكان ) يمين ويحولونها يسار .. لأن كثير من السيارات المحولة لا توجد لها قطع غيار ..

هذا حد علمي والله أعلم ..

[أبو فيصل]

الدلوله عز الله أنك وفيت و كفيت الله يرضى عليك

قتال ما قصرت ومشكور على النصيحه

الصراحه كل ما أ ضرب على التلفون و أ كلم سنافي شرواكم يتبين لي أمور كثيره و بعد لا قمت أحوس في الشبكه العنكبوتيه يتبين أمور كثيره غافلين عنها

أثرنا ما نصلح في التجاره مادام السوق ماهو واضح لين تطمر فيه.

تحياتي للجميع

أبو فيصل