متوهق وابي الفزعه

[متوهق جديد]

السلام عليكم و رحمه الله

اخواني انا توهقت و شريت باترول سلقه 2006

و طلع فيه المشكله اللي بالمكينه اللي كل 2006 موجود بها

والصراحه اني متراوي ابيعه لاني لقيت موترين جيدات

واحد منهم جمس قطع عشره 2005 اوتوماتيك والدبل ازره

والثاني باثفايندر 2005 قير عادي

وش تنصحوني فيه وانا ما معي الا 70000

[راس الرعيلة]

حياك الله أخوي

على البركة ما شريت

أخوي ممكن أسألك وش البلا اللي بالمكينة 2006

لأني أعرف أكثر من واحد أشتروا هذا النوع سلقة 2006
ولا يشكون منه أبد

ممكن تشرح لي المشكلة بالضبط؟؟؟

آسف على إزعاجك

[سداااااح]

بالنسبه لي انا ارشح الجمس

[عاشق نفود عنيزة]

الصراحه ما به بلا بس انه عزمه ضعيف بالنفود والسرعات العاليه

يعني بالثاني بالنفود ينام عزمه بسرعه

[بريد5]

مابه طقة عصا

مدام الباث نظيف واستعمال حشمة


خذه وانت مغمض لا مهوب مغمض بعد وانت على الوسااادة

توكل على الله وخذه لانه موتر حق مكدة ويصبر

[فهووودي 7991]

انا شايفلك جمس غماره شاص الطويل العادي مو القصير قير توماتيك علاق وقير الدبل ارضي افضل من الأزرار لأن الأزرار كثير ناس يشتكون منه مره مايشبك الدبل على مزاجه ومره يخرب الأزرار نفسها وذا جيت تسحب شي ثقيل مايشتغل الدبل


ومواصفات السياره لونه ابيض ومديله 2001 وسيم من راعية 28000

ووفر قريشاتك وخله للبر ولا اشتر بالباقي قريشاتك موتر ثاني لجوى البلد لدوام ولا العزايم زيادت الخير خيرين


الملاحظات الي انا شفتها في السياره طبعن على الوقفه ماشغلته ولا جربته الوجه مرمل شوي وفي بعض القطع مصدي وفيه زيت نازل من القير والفيبر حق الصندوق يبيله تغيير اشك انه من حقات ارامكو الشرقية بس صراح له نضره في الوقفه يبيله لمسات بصيطه ويطلع الموتر ولا احلا منه


وهاذي صورته


http://www.mekshat.com/pix/upload/images44/mk47429_q1.jpg


ان جازلك عطيتك رقم راعيه ولاتنسانا بالسعي

[متوهق جديد]

الصراه انه مشكلته طويل

وانا بالرياض وتعرفون الرياض والزحمه

وانا الصراحه باداوم فيه بطريق المطار

[فهووودي 7991]

الصراه انه مشكلته طويل

وانا بالرياض وتعرفون الرياض والزحمه

وانا الصراحه باداوم فيه بطريق المطار

اجل انصحك بالبافندر

افضل من الجمس يبيله صيانه دايمه ولا هوب حق مشاوير دايمه اذا تبيه بر خذه لاكن مشاوير وعلى بر ما أنصحك فيه

[الفعفعي]

الجمس بلاويه واجده ..
والباث تفككه عجل..
والله أن حصل تزين موترك عز الله أنه هو الغرض..
ولا عليك بددسن دبل.. ربعنا كلهم معهم ددسن دبل ولا أحسن منه .. وقيمته 60.000
عز الله أنك تبي تدعي لي..
والله أني أبشتري واحد هالأيام..ولا أعرف أحد ذمه..
وتأكد زياده من الشباب
1/برق تميم
2/أبـ تميم ـو
3/ سرهيد الساحات العربيه
4/أب و ا ر و ى
و..و..
:::::
أما الجمس ما هنا أسرع من طقة ثيره ومكينته..
واحد من الشباب معه واحد 2005 قطع 25 وكاله راح يم الرمله ما مشى إلا 4200 ويطق عليه القير.. واسمه عبد الهادي وهو أحد أعضاء المنتدى..

والقصص واجد عن الجموس يعني نقص*نقص ..
:::

والباث خفيف وزين بس فيه مشكلتين..
1/ يتفكك بسرعه
2/مكيف واحد يعني اللي ورا بالصيف (دفا)..
أما بالنسبه لقطع الغيار فالجمس غالي (بالنسبه لتويوتا ونيسان)
والباث حليله قطع غياره-غويليه-
والله يعينك..
والربع يبي يفيدونك إن شاء الله..

[متوهق جديد]

الله يجزاكم خير بس

ما بعد جزمت الصراحه :(

[أبــ تميم ــو]

مساكم الله بالخير جميعاً..
أولاً أشكر أخوي الفعفي..
والددسن ما عليه خلاف..
زين في الخط وفي البر وفي النفود..
وبالنسبه لرايي أن الجمس مثل ما قال أخوي الفعفي نقص * نقص
أما الباث زين في الخط وفي البر وفي النفود..
لكن مثل ماقال أخوي الفعفي ..
مكيفه وسط يعني اللي ورا يحتر .. مع أني منب أواديه..ولا أشغله لا في حر ولا برد..
وصرفية بنزينه على علمي أنها أكثر من السلقه..
وبالنسبه للتفكك ما أدري والله أخوي الفعفي جيد في ذا الأمور خابره راعي معارض ومواتر..

على كل حال استخر قبل تسوي أي شي

[أبرق الشقيقة]

الباث فاندر لاتعداو غرض رووووووووووووووووووووووووووووق

[مكشات عنيزه]

والله ما نقدر نفتيك بالعلم الاكيد وحنى ما نعرف مشكلة الباترول
عطنا المشكلة ويمكن نلقاله حل
او نشور عليك بأحد المواتر الي محتار بينهن
وانا الصراحة اول مره اسمع ان الباترول 2006 فيه مشكله
يمكن بس عندك المشكله

[متوهق جديد]

يا عزيزي مكشات عنيزه (http://www.mekshat.com/vb/member.php?u=57638)
انت الظاهر جديد بمكشات ولا دريت بالمشاكل اللي صايره بالباترول 2005 وفوق

المشكله اني لا مشيت بالطريق ما يتعدى 160 الا بشق الانفس

اذا جيت ارقى طعس يموت عزمه بالثاني حتى لا جيت ماخذ عزم ماله فايده

تخيل سلقه 99 يطلع علي بخط و تطعيس وحتى الهايلكس و الددسن ما اشوف الا غبرتهن:(

[الدحبول]

الجمس بلاويه واجده ..
والباث تفككه عجل..
والله أن حصل تزين موترك عز الله أنه هو الغرض..
ولا عليك بددسن دبل.. ربعنا كلهم معهم ددسن دبل ولا أحسن منه .. وقيمته 60.000
عز الله أنك تبي تدعي لي..
والله أني أبشتري واحد هالأيام..ولا أعرف أحد ذمه..
وتأكد زياده من الشباب
1/برق تميم
2/أبـ تميم ـو
3/ سرهيد الساحات العربيه
4/أب و ا ر و ى
و..و..
:::::
أما الجمس ما هنا أسرع من طقة ثيره ومكينته..
واحد من الشباب معه واحد 2005 قطع 25 وكاله راح يم الرمله ما مشى إلا 4200 ويطق عليه القير.. واسمه عبد الهادي وهو أحد أعضاء المنتدى..

والقصص واجد عن الجموس يعني نقص*نقص ..
:::

والباث خفيف وزين بس فيه مشكلتين..
1/ يتفكك بسرعه
2/مكيف واحد يعني اللي ورا بالصيف (دفا)..
أما بالنسبه لقطع الغيار فالجمس غالي (بالنسبه لتويوتا ونيسان)
والباث حليله قطع غياره-غويليه-
والله يعينك..
والربع يبي يفيدونك إن شاء الله..
العذر والسموحة ونخوك
في هذي انت مخطي
الجمس قطعة متوفرة ويابلاش والتويوتا متوفرة وسعارها معقول
إما النيسان ماقدر أفيدك

[برنو بيشة]

الباث وماتندم أنا معي 2002 على يدي من الوكاله والحمدلله عز الله أن موتر بتاع كله
واليوم طالع عليه قانص وتو داخل البيت وشفتك حيران وقلت أفتيك يالنشمي بما يرضي الله

[طارق الحربي]

اخوي متوهق ياليت تراجع الخاص

[رعد2000]

اخوي والله الصاراحه مامن خبره بس توكل على الله وعليك بالبافندر

[راعي الهـــدد]

ياغالي ....

والله انك ماتورطت ....

واحب اقول لك ... ترى معك موتر الكثير يتمنآه ...

انا معي اخو موترك .... والله ماشفت منه شي شين

نصيحة لاتفرط به ....

واذا انت بتفرط به فلا تشري جمس ترى والله بتندم ... خذ نصيحة مجرب ...

الجمس بختصآر عنده استعداد مايوقفك بالديرة .... بس عنده استعداد يصير نذل بالبر ويوقف بك...

انا مجرب له ... وشريت بها وبعت .... ووجدته مريح الجمس وقوي نوعاً ما ...

بس عيبه

واحد ... انه كبير حجمه ... وهذا مايناسب راعي الطرد والجبل ...

وانه يوقف بك زي سلام عليكم وفي احلك الضورف
...

نصيحة موترك مابه ولا عذروب واترك عنك كلام الناس

ركب ياي استرالي ومساعدات اولد مان

والله ان تلاقي معك مدرعة ..... ههههه

وركب تانكي ماء وطبق داخلي وسلة عليوة ان رغبت بالسلة ...

بعدها تعال وقل لي وش معك من موتر ...

وفقك الله .... مستعد بخدمتك بالي تبي ونخوك ...

[عاشق الشامخات]

السلام عليكم ورحمة الله وبركاته


والله ماازود على كلام الاخوان شي بس حبيت اوضح انه الجمس من خلال معرفتي البسيطه به انه راعي نكبات:no2:
وأما الباثفيندر فهو موتر عند خويي واحد ومشاء الله مايشكي منه ابداً بس فيه عيب انه يتفكك ....


وأما الددسن الدبل فماشاء الله عليه عندي واحد موديله 2005 موتر بكل ماتعنيه كلمة موتر ( ولا تراه راعي فزعات بعد ) :D :D خشعت شوي


وعندي سؤال للأخ ابوتميم ولايهون الحاضرين عن انسب الجنوط الي تتركب على الددسن الدبل والتجهيزات المتوفرة والله يوفقكم ،،،


تقبلوا تحياتي،،،

[المميـز]

هلا اخوي متوهق

انا ودي اعرف وش البلا اللي طلع معك بالموتر

انا اعرف ناس معهم اخو موترك ما اشتكوا من شيء ابد !!!!!!!!!!!


ياليت لو تقول وش البلا اللي انت شفت ؟؟؟؟؟؟؟؟؟؟



واذا انت ملزم على البيعه

خذ الباثفندر وغيره لا تدور

[فهووودي 7991]

ازود على كلامي وعلى الأخوان بنسبه لقطع غيار الجمس اسعاره معقوله ولا هب غاليه انا عندي جمس ونيت قطع 25 موديله 97 ولا ازين منه بس يبيله واحد راكد ولا تشب عليه ولاتسحب احد بدبل الخفيف اسحب بثقيل ودايم اشيك على الأذرعه والمقصات وربله عكس لأنه دايم يبس ويطلع الشحم برى وهاذولي من الضروريات القطع الي تشيك باستمرارهاذا بنسبه للجمس

اما الباث قطع غاليه وسمع اغلب الناس يشتكون من طرمبت البنزين وسعره غاااااااااااااااااليه بس ماني متأكد

تبي شوري ونصيحتي وانشالله راح تدعيلي وراح يأيدوني اخواني الأعضاء تاخذلك وانشالله راح تقدر عليها في السبيعن الف الي معك جيب لاند كروزر ولا ازين منه وسيع وكشخه تبيه بر خذه تبيه سفر خذه تبيه للدوام وللعزامي يواجه وزين ولا ازين منه انا كان عندي لاند قير عادي وبعته وتندمت على بيعته ورحت شريت واحد ثاني قير توماتيك وانا افضل وبشده القير العادي افضل من التوماتيك بمليون مره

[أبــ تميم ــو]

أخوي عاشق الشامخات ..

سأفرد موضوع في خيمة اسيارات وتجهيزاتها..عن الددسن الدفرنسين..
وسأدعم الموضوع بالصور قريباً إن شاء الله..

[متوهق جديد]

يا عزيزي مكشات عنيزه (http://www.mekshat.com/vb/member.php?u=57638)
انت الظاهر جديد بمكشات ولا دريت بالمشاكل اللي صايره بالباترول 2005 وفوق

المشكله اني لا مشيت بالطريق ما يتعدى 160 الا بشق الانفس

اذا جيت ارقى طعس يموت عزمه بالثاني حتى لا جيت ماخذ عزم ماله فايده

تخيل سلقه 99 يطلع علي بخط و تطعيس وحتى الهايلكس و الددسن ما اشوف الا غبرتهن:(


هذا اللي يقهر

[متوهق جديد]

تبي شوري ونصيحتي وانشالله راح تدعيلي وراح يأيدوني اخواني الأعضاء تاخذلك وانشالله راح تقدر عليها في السبيعن الف الي معك جيب لاند كروزر ولا ازين منه وسيع وكشخه تبيه بر خذه تبيه سفر خذه تبيه للدوام وللعزامي يواجه وزين ولا ازين منه انا كان عندي لاند قير عادي وبعته وتندمت على بيعته ورحت شريت واحد ثاني قير توماتيك وانا افضل وبشده القير العادي افضل من التوماتيك بمليون مره


هذا الراي لو ان اللاند رخيص شوي ما كان احد اشتكى:(

[رجل كريم]

السلام عليكم و رحمه الله



اخواني انا توهقت و شريت باترول سلقه 2006


و طلع فيه المشكله اللي بالمكينه اللي كل 2006 موجود بها





وعليكم السلام ورحمة الله وبركاته:

اخي الكريم واضح انك تعرف ان بالباترول عيوب وكذلك كثير من الاخوان يعرفون انه مليء بالعيوب .. اجل ليه الكثير من اعضاء المنتدى ينصحون به ؟ ومسوين له دعايات في الطالع والنازل ؟ مو مشكلة سووا له دعاية وامدحوه بعد بس لازم توضحون عيوبه عشان محد يشتري السيارة وتطيح في كبده ويقوم يدعي على احد الكتاب او الاعضاء .. من اطلاعي في المنتدى كثرة الشكاوى من اصحاب هذي السيارة ,, :confused:

تحياتي ..