قبل ما تشتغل المشاعيب والعجر والعصي ..... ادخلوا !!

[حيمود]

السلام عليكم

اخواني ..جميعنا في هالمنتدى يجمعنا حب شيء واحد وهو ما سمي به المنتدى ( الكشتات ) سواء من يحب منظر الربيع والبر والسهر تحت نجوم السماء بعيد عن العمران وبعضنا يهوى الصيد والقنص باشكاله ..انتم وانا وهو عندما نجتمع مع بعض في مكان واحد متقابلين الا في ساعات النوم ..واحياناً حتى في النوم يؤثر احدنا في الاخر من ناحية نومه مثل الازعاج
قد نكون نمارس اشياء تضايق الاخرين من فرض راي او كلمة جارحة او مزح ثقيل او سواليف ( ماصله:D )

ما حداني لطرح هذا الموضوع ..نبي كل واحد يكتب اللي في قلبه الاشياء التي يراها وتسبب له نوع من الضيق قد يسكت عنها وتسبب له الضيق او قد تكرهه في رفقه هذا الشخص مرة اخرى وقد يكون خسر شخص هو مكسب
نبي كل واحد مر به او حدث او يحدث له او يعتقد انه يسبب له الضيق او للاخرين ولكنه يصعب ان يصارحهم به خوفاً من تأثرهم سلباً وانقلاب نفسيتهم في الرحله ..والكثير راحوا ورجعوا وكشتتهم نكد بسسبب ما او تجد احدهم يرجع ويصر في داخله انه لن يكررها معهم او مع فلان او حتى اسلوبه الذي يتبعه في الرحلة مع ربعه بحيث تكون الرحلة او الكشته ناجحه

لماذا الموضوع ..؟؟؟؟؟؟
قد اكون انا او انت او هو يمارس مثل هذه الاشياء وعندما يقرأ انها تسبب الضيق للاخرين فاننا قدمنا له معروفاً باننا صارحناه بشيء يضايق الاخرين فيه ويصعب عليهم مصارحته
وبذلك يزيد الود والالفة والتفاهم بين الاخرين وبيننا وربعنا

هاه وش قلتوا بالموضوع ..؟؟

يا اللع عاد نبي همتكم ..الطلعات جايه ان شاء الله

ولا تبخلوا علينا برايكم ..!!

[ابو عمر اللاحم]

بارك الله فيك يا اخي حيمود الصراحه موضوع في الصميم ويعتبر جلسة مصارحه بحيث ان الواحد يعرف عيوبه ويحاول يتجنبها ، لتكون الرحله اكثر راحه ومتعه . ذلك اذا خلت من هذه لمنغصات التي يرتكبها بعض اعضاء الرحله ودون قصد منه .
واضن ان من ما ينغص الرحله : فرض الراي مثل ان يطلع واحد ويفرض رايه على مكان معين اوطبخ معين او اتجاه معين المهم عدم فرض الراي بالعصبيه. كذللك المزح الثقيل الذي يمس شعور الاخير ويضايقهم. وايضاً التنبله والاتكالية الزائده .

الف شكر يا حيمود على طرح هذا الموضوع الذي يدل على شعورك النبيل .

وفي الماثورعن امير المومنين عمر بن الخطاب رضي الله عنه قوله: رحم الله امراءا اهداء الي عيوبي.

تحياتي ،،

[قتال]

السلام عليكم ورحمة الله وبركاته ،،،

بارك الله فيك أخوي حيمود على هذا الموضوع الجيد .. أو كما قال أخي نهار أنه في الصميم ..

عزيزي كل رحلة تكتشف أشياء جديدة في ربعك حتى وإن كانت علاقتك معهم قديمة بالحيل ..

فالعيوب موجودة في كل البشر لكن عيب يتجاوز عنه وعيوب مالها علاج أبد ..

فالكشات يتجاوز عن عيوب ربعه قدر المستطاع وأذكر هنا المثل القائل :

من خلا رفيقه من أول زله خلاه الزمان بليا صاحب .. أو كما يقال ..

أما عن عيوب اللي أجدها دائماً وتتكرر في أكثر الرحلات ..

1 - الإتكالية .. تجد الواحد منبطح ويبي الناس تخدمه .. وليا جاء تغسيل القدور حط راسه ونام .. وقس عليها باقي الأمور ..
2 - حب النفس .. إذا لم تناسبه الرحلة تلقاه كثير الحنه ، يالله مشينا .. ما تسوى الطلعة .. نبي نروح لهلنا .. ما في صيد .. حر .. رطوبه .. ولا يسكت إلين توديه لأمه :D :D
3 - الأنانية .. عاد هذه مشكلة وقد مر علي واحد الله لا يوريكم .. يبي الطلعه كلها لحسابه واللي يونسه ، ولا عليه من باقي الناس .. أهم شي هو يستانس وينبسط حتى وإن عكر جو ربعه .. فتجده يمشي القروب كامل على كيفه ويصر على آراءه حتى توافق كيفه ..

كل ماسبق عيوب تترقع وينصبر عليها .. لكن شف غيرنا وش حصل له .. يقول لي واحد من الجماعة أنه كشت مع أخوياه في العمل لسوريا وكانوا على مجموعتين .. يقول كل ماقمنا الفجر نصلي لقينا خويانا في الخيمة الثانية ولا سكارى .. عاد هاذي وش تسوي فيها .. ربعنا الأولين أبوهم للجنة :D :D

[حيمود]

السلام عليكم

هلااااا وغلااااا اخوي نهار ..يا جعل ليلك ونهارك على ما تمنى ويرضي ربك

اشكرك لك المشاركة القيمة ..واللي نهدف منها الى استخلاص بعض النتائج في موضوع مستقل ان شاء الله , بحيث تكون شبه قواعد او مواصفات للشريك الناجح في الرحلات

ارجع لمشاركتك

* فرض الراي ..... وهو عصب الرحلة ونخاع نجاحها بعد :D في الصميم فكثير ما يكون فرض الراي على الاخرين هو شرارة التأزم , وقد ينقاد لك الاخرين في رايك ولكن ثق انك وضعت خطاً تحت شخصيتك فهم رجال لهم الراي وقد يكون منهم من يلتزم الصمت وهو يملك الحكمة اكثر

*المزح الثقيل ..... وهذي المصيبة فالبعض يعتقد انه بمجرد ان يمزح فكل مزح مقبول .. وهو تلقاه اذا ما جاء شوي وياخذون عمره مع الطلعة من الفرحة وهو عند نفسه فاكهة الرحلة ومونسهم

*التنبله والاتكالية الزائده:mad: ..... وهذه مشكلة المشاكل فالبعض يعتبر نفسه ما طلع الا يوسع صدره بدون ان يكلف نفسه مساعدة الاخرين في طبخ او غسل او ..او ..ليش يا اخي ..الناس مثلك في بيوتهم محشومين ينطبخ ويغسل لهم ويرفع ويحط عنهم واللي يعملونه من طبخ وحمل وطوي ليس لانهم يحبون هذا الشيء بل لانهم اهل مرؤه وخفة نفس والا البعض منهم تجد الشعر الابيض اللي في لحيته اكثر من شنب هالكسرة المتمدد تقول سلق مكسورة رجلها

تحياتي

[حيمود]

السلام عليكم

هلاااا وغلاااا واسفهلت وامطرت

مرحباً اخوي قتال ..

شاكر لك تعنيك ومشاركتك مع تشجيعك

ارجع لمشاركتك ..

1 - الإتكالية ..وهي مشتركة مع اللي قالها اخونا نهار

2 - حب النفس ..يا والله اللي في الصميم وانت فسرت لي شي كنت اشوفه احياناً قدامي ..لا ويبدأ يحن تقول عياله ما شاري خبزهم وحليبهم الا هو ومن كثر حنته وتاففه يخلي الرحلة من اضجر الاوقات لو كنت في ابهى روضة ويخلي ارفقاه يعنون ويرجعون مئات الكيلومترات وهم ما خذوا حقهم من المتعة بسبب حبه لنفسه ..اللي عنده ظروف طارئة معذور ..لكن واحد طالع معكم على انها خمسة سبعة ايام وفي الثالث يبدأ يحن يعني ما عرفت بظروفك الا اللحين ..

لكن جبتها ..وعليك حلها :rolleyes: الحل مع هالعينات كيف يكون ونمسكه الدرب مضبوط ..( خدمة خاصة خارج الموضوع :D )

الأنانية .. وهذي بعد مصيبة وكنه طالع يمتع نفسه مع ان الرحلة اكيد الواحد ما يكون راضي لكل اللي يصير فيها وعليه انه يقدم تنازلات سواء في المكان او الاكل او البرنامج اليومي او .......

======================

هههههههههههههههههههههه ســـــــــــــــــــــــــ كـــــــــــــــــــ ا ر ى مره واحدة D :D :
الله يخارجنا ..اقول ..هذولي قوم عليهم الحد ..وينك يا الخيزرانه لو بعامود الخيمة ويقال لهم صح في سوريا ..بس ما عندنا يا امه ارحميني :D

مشكور وان شاء الله نشوف مشاركات اكثر بحيث تكون النتائج شاملة اكثر

[حيمود]

السلام عليكم

كنت اتمنى ان يكون هناك مشارات اكثر ..حتى تكون نتائج الموضوع انجح

واعتذر الى اخوي ..نهار

واخوي ..قتال

لان الموضوع كما قلت في راس الموضوع سيكون هناك موضوع مستقل للنتائج التي ظهرت من هذا الموضوع

وستكون اضافتي ومشاركتي ( رايي في السلبيات التي اشاهدها ) في موضوع النتائج

وسننتظر حتى نهاية الاسبوع
فالربما فهم البعض الان القصد من الموضوع
اما من كان معه رفقه او اصحاب داخل المنتدى ويتحرج من ذكر ذلك فله العذر

تحياتي

[شقران]

اختيار موفق ياحيمود.........

بالاضافة الى ماخطته انامل مشرفنا قتال وحبيبنا نهار .......

تدري متى بلشت ......يومن طلعت مع واحدن برباره يعني بالعن له مسجل!!!!!!!!!!!!!!!:p :( :p
كله كوم وتسكيته كوم يعني ........يهون فرض الرأي ............وتهون الانانية..........ويهون كل منغصات الرحله...بس يسكت شوي ذالبرباره..........

خصوصا اذا جيت تصيد اسالك بالله وشلون بتركز قلي........:D :D :p (افلقني تركز ولاتصيد يوالله الا ماتغديتوا:p :p

rolleyes: :rolleyes: آأأأأأأأأأأأأأأأأأأأأأه ...............توبه

اخواني تنبيه لاحد منكم يطلع مع ثرثار والله ان يطفش ويخلي البر ويعود.شكرا حيمود

[قتال]

تدري متى بلشت ......يومن طلعت مع واحدن برباره يعني بالعن له مسجل!!!!!!!!!!!!!!!:p :( :p

:D :D :D

[ميراج]

الاخ حيمود السلام عليكم

الله يعطيك العافيه على هالموضوع الحساس اللى هو موضوع الخوه وهو صراحه
موضوع طويل

أنا أكثر مايضايقنى إذا تخاوى مجموعة رجال شرواكم فى رحلة مقناص وهالرجال
فيهم من عمره 50 سنه ومن عمره 45 سنه ومخاويهم شاب مابدى يقنص ويطلع
للبر إلا من سنتين او ثلاث إذا جو الرجال الى عندهم خبره يعشون يدورون المراح
الزين الى فيه ذرا ويتمارونه قبل الليل لو يقرص احد ولاهم يعرفون وين أقرب طريق
يوديهم للخطوط الفحول الى توديهم الدير ( مهوب كلش gps ) ويدورون المحل الى
فيه حطب.
ماتدرى إلا نقز هالشاب وعترض على مكان المعشى وقترح محل شايفه قبل شوى
وغير مكان المعشى وجاملوه الر جال ومشوعلى رايه.
هذا الله يهديه يرفع الضغط

[حيمود]

السلام عليكم

هههههههههه

اضحك الله سنك , وجعل وناستك دوم ما هيب يوم

اضحكتني اخوي شقران ..من شافني قال مهبول :D

اجل .. (( يومن طلعت مع واحدن برباره يعني بالعن له مسجل!!!!!!!!!!!!!!! ..)) شفها اعجبت قتال بعد
(( اسالك بالله وشلون بتركز قلي ..) :D اقول تبي الحل عطه كيسة حب ماااااااااااااااااااااالح وقل قشم خله اذا بغى يتكلم ينشف ريقه بس لا تبعد بالماء لا يفطس عليك الرجال وتروح فيها :D

اجي للجد ..نقطه مميزة لان البعض يعنقد ما دامك طلعت للبر يعني اقرق صحيح ان السبوطي ..( تراه ما هو مؤلف ..اقصد الساكت ) شوي يمللك من الجلسة بس الشيء القدر زين ..لذلك لي تعليق على هالنقطة في النتائج

تحياتي لي اخوي شقران

وشاكر على المشاركة

[حيمود]

وعليكم السلام اخوي ميراج

نقطة في محلها ..

وهذا ما نعايشه كلما طلعنا ..تجد احدهم يحرج الاخرين برايه ..ويتنازلون له اكراماً للاخرين ولكي لا يتنكدون في طلعتهم ..مع الان الامور في الكشتات والقنص ترتبط بشيء هااااااااااااااام هو الخبرة

ولا زلت اذكر انني في كل طلعة استفيد من افعال الاخرين حتى في مسألة وضع ال
طنب وربط الحبل وامور كثيرة جداً ..حتى صرنا ننقل الخبرة اللتي استفدناه لمن هو اقل منا خبرة ..وهذه الدنيا
فالصقر حتى لو طار من عش ابويه ما هو بالتاكيد انه قادر على الصيد

تحياتي لك اخوي ميراج ..

ونقطه هامة

سيكون التعليق عليه في النتائج اشمل ..ان شاء الله

تحياتي