ماهو استهلاك البنزين لللاندكروزر جي اكس ار 2 موديل 2003؟

[ابو حسام]

السلام عليكم ورحمة الله وبركاته
كان عندي فورد اعبيه بمبلغ 55 وهو 8 سلندر ويمشيني 400 كم.
الحين اشتريت GXR 2 موديل 2003. اقوم بتعبئة الخزان الكبير بمبلغ 83 وبالعافيه يكمل 450 الى 500 كلم مع العلم انه 6 سلندر فقط.

هل يعتبر هذا الاستهلاك للبنزين طبيعي ام لا؟؟
والا خوه الذين ليدهم لاندكروزرات هل من الممكن ان تعطونا بعض البيانات في استهلاك سياراتكم؟

وجزاكم الله خير

[الدبل الثقيل]

السلام عليكم ورحمة الله وبركاته
حياك الله ابو فيصل
استهلاك البنزين تقريبا طبيعي لكن فيه زيادة شويه واهل الGXR يعلمونك ان شاء الله
لكن هناك عوامل تزيد في استهلاك البنزين منها
1التغيير بين النمر عند اكثر من3000 دورة للمحرك(اذا كان قير عايدي)
2 وجود احمال ثقيلة في السيارة
3 وجود تعديلات على المحرك

واذ كان الجيب قيرعادي لا تقوّمه في الاول .. قوّمه في الثاني طبعا اذا ماكانت السيارة محملة.وغير هذا لاتسرع فوق 120 ترى كل مطرود ملحوق والعمر اغلى شيء ومايضرك لوتأخرت ساعة.. السرعة كلها مصايب اما لا قدر الله حادث او ضرب كفر اوقسيمة من امن الطرق وقبل هذا كله اثم ومعصية لله ثم لولي الأمر..... وترى السيارات اللي6سلندر عموما والجيوب خصوصا معروفه بصرف البنزين .. احمد ربك انه مامعك باترول يشفط في البنزين شفط
هذا اللي يحضرني والأخوان يكملون الباقي
وجزاك الله خير...

[قتال]

السلام عليكم ورحمة الله وبركاته ،،،

أخوي أبوفيصل .. مبروك الموتر وجعله مركب العافيه .. فعلا كما قال أخوي الدبل الثقيل فأنا أضم صوتي لصوته .. ماشاء الله عليه ما خلا شي ما ذكره ..

[ابو حسام]

الدبل الثقيل وقتال
بارك الله فيكم على الردود القيمه
وفي انتظار اصحاب الجي اكس ار 2

[صالح السليمان]

هلا ابو فيصل

بس ودي أسأل الصرفيه اللي ذكرتها وسط الديرة والا بسفر

وبعدين انا عندي في اكس آر 8 سلندر يمشي بالطريق 500 كلم بالراحة (التانكي الأساسي)

[ابو حسام]

شكرا لردك أخوي صالح
المسافه التي ذكرتها في في السفر
وحقيقة استغرب ان الفي اكس ار ما شاء الله ولا قوة الا بالله يمشي صاحبه 500كم على الرغم من كونه 8 سلندر

حقيقة اخذة السياره للصيانه وقالولي الصرفيه طبيعيه ولكني حقيقة غير مقتنع.

[الفجر]

السلام عليكم

هناك امور تتعلق بصرفية البنزين

وبما ان السيارة جديدة فأعتقد ان اهم سبب هو نقص الهواء في الكفرات

وهناك اسباب اخرى ذكرت مثل السرعة وطريقة السواقة فمثلا هناك سائق هادي وهناك سائق اسرع منه وهناك سائق يقحص وهكذا


وفي الطريق هناك سبب آخر وهو اتجاه الهواء وقوته والحمولة الزائدة

وقد لاتكون الحمولة زائدة ولكن !!!

تكبر من حجم السيارة كيف؟؟ مثلا تكون الحمولة على السلة

وايضا في الطريق هناك سبب آخر وهو دعسة البنزين

هناك بعض السائقين دعسة وحدة وهناك البعض الآخر متذبذب

هذا والله اعلم

اخوك الفجر

[ابو حسام]

كلامك جميل اخي الفجر
ولكن لا اعتقد باي حال من الاحوان ان يصل استهلاك البنزين في جي اكس ار 2 مثل استهلاك ال في اكس ار.

وشكرا على المداخله

[شبوب]

الله يطعمك خيره ويكفيك شره


بالنسبه لصرفيه انا يمشين داخل المدينه ( 530 كيلو ) واعبيه بـــــ 75 ريال 00 ولكن سواقه
عدله 000 ومع الخط طال عمرك اذكر مره طالع من الرياض يوم بقى على الهلاليه 10 كيلو
ولعة المبه الكلام هذا ونا امشي 150 والمكيف شغال

[ابو حسام]

الله يجزاك خير أخوي شبوب
المعذره كم يبلع بعد الهلاليه عن الرياض؟؟
اخوك غشيم بهالمناطق. جاين من ديرتن بعيدتن مرةن بالحيل :)

وهل موترك جي اكس ار 2؟

[محبوب الجميع]

الاخ الكريم ابو فيصل اضم صوتي للاخ الدبل الثقيل من اسباب تؤدي الى زيادة الاستهلاك مع اضافة زيادة حرارة الجو وتشغيل المكيف وانا اجد ان 450 طبيعي ان يالله يوصل 420 بالعافية وهومثل سيارتك بس 2000 المديل

[ابو حسام]

مشكور اخوي محبوب على الرد

[راعي الفزعه]

الاخوان المشاركين اهلا بكم :
:D احب ان اقول لكم ان عندي باترول سفاري موديل 91 ، اعبيه 85 ريال
ويمشيني حوالي 520-550 كلم بسرعة معتدلة حوالي 100-120كم اذا كنت في سفر .
واحيانا اعبية 20 ريال ويمشيني 150 كلم اذا كنت داخل المدينة .
واكثر الناس يعتقدون ان الباترول السفاري يشرب بنزين كثير هو اعتقاد خاطئ
ملاحظة:
امبير البنزين اذا نزل تحت الخط E من مدة يكون باقي بنزين كثير في التانكي
حوالي 20-25 لتر وهذا احتياط حيث ان سطح التانكي واسع وكبير .
انا جربت ذلك ...

والله الموفق ،،،،،،،

[ابوقاسم]

والله الجماعة ما قصروا والكلام المفيد قالوه........بس اعتراضي على كلام الاخ الدبل الثقيل عن الباترول ...........................حتى لو كانت الشائعة انه يصرف بنزين او على ما قال يشفط شفط ترى الموديل الجديد 2003 وانت طالع اقل سيارة دفع رباعي تصرف بنزين مع ان قوته اعلى من ال فكس ار...
هذا 280 حصان وهذا250حصان..........
وتركد يخوك محنا عايفينك واهلك يبونك

وفي حفظ الله

[Y&Y_4X4]

اخوتي الأعزاء

كل الكلام الي ذكرتوه صحيح

وانا اضيف اطال في اعماركم انه فعلا ال GXR يصرف بشكل رهيب وخصوصا اذا زاد الحمل والسرعة انا من خبرتي سويت اختبار مشيت بالتانكي الكبير حول 500 كم الا شي بسيط والصغير 300 كم تقريبا الا 20 كم بس السرعة ماتعديت 110 كم بدون مكيف حمل عادي وأغلب الخط ماكان فية ( به ) ذاك الهواء القوي

لاكن الموتر الصحيح يلعب بالتانكي لعب في غير هذه الحالات

والي يبي الزين يصبر على ماجاه ؟؟؟

[mohamad1121]

السلام عليكم ورحمة الله وبركاته

لاندكروزر vxr التانكي الصغير وبسرعة 130 من الخرج الى الرياض روحه ورجعه وقبل الوصول الى الخرج في طريق العوده وقبل الخرج بعشرين كيلو متر انتهى علما بأن المسافه من البيت للعمل 99كيلو متر .

والله المعين.


ابوكاسر

[الفجر]

السلام عليكم

يإخوان السيارات اللي مكاينها كبيرة المعروف إنها تصرف

واللي يقول ان اللاند كروزر ما يصرف يكون مخطي

والله اعلم

[الباهي]

بصراحه ماحسبتها كم

بس اهم شي ان صرفيته اقل من النيسان السفاري لان النيسان
يشفط البنزين شفط مثل الملهوف:D

[قناص رماح]

من الاسباب اللي تأثر على زيادة صرفية البنزين :

1ـ فلتر الهوى اذا لم ينظف بعد كل طلعه للبر فهو سبب رئيسي لزيادة صرفية البنزين .

2ـ نقص الهوى في الاطاراتوخاصه في الجيوب .

3ـ كبر مقدمة السياره مما يزيد من مقامتها للهواء مثل الجيوب والجموس واجهيتهن كبيره بس الشي ذا

الواحد مايقدر يعدل فيه .

4ـ الاهتمام بالسياره من ناحية النظافه والصيانه والتشحيم .

5ـ زيادة الحموله أو وظع بعض الاحمال في اعلى المركبه .

6ـ ترفيع وجه السياره او تنزيل مؤخرة السياره .

7ـ قيادة السياره بذوق وعدم زيادة السرعه .

8ـ اتجاه الريح اما تكون معك وتقلل من صرفية البنزين او تكون ظدك وتزيد من صرفية البنزين.

9ـ اذا كان الكلتش عندك متآكل اكيد تبي تزيد صرفية البنزين .

10ـ تغيير البواجي وفحص اسلاك البواجي والديلكو والكويل كل سنه على الاقل للتأكد من صلاحيتهن .

هذي بعض الاسباب اللي تزيد من صرفية البنزين ارجو اني فدتكم بالموضوع ،،،،،،،،،،،،،،،،،،:good:

[سيرفر]

اقوال ياشباب انا عندي جي اكس ار 2002 الله لا يحرمنه ويعمي عنه قولو امين ديزال جرب ولن تفكر انك تغير سكبه وركده وبلاش 45 لتنكين مسافة 800 كيلو ها وش ريكم مهوب مسرف قولو مشاء الله لا يغلون الديزل