الربع الخالي

[هواوي]

كلنا نعرف الربع الخالي ونسمع عنه الغرائب وانا من اكثر الناس المغرمين بهذه الارض الغريبه القاحله

رغم اني ذهبت اليها اكثر من مره او بالادق مرتين ولاكن لم اخرج عن الازفلت ومره ذهبت الى الفاو وانا هنا ارجو من الاخوه اللذين يعرفون عنه معلومات كاحداثيات اماكن معروفه

وهجر او صور لرماله ادراجها هنا للاهميه

كما لا تبخلو عنا بالنصائح والتحذيرات ولكم تحياتي

[miokly]

تحياتى لك انا

اسعد الله مساك

الربع الخالى له قصص وماسى ليعشها الا من ذهب الى ذالك المكان الموحش المهجور الذى اذا صكت عليك النفد فكرت فيها وللعلم لم امنى بفرصه للذهاب هناك مع ان قريب لى اشار الى للذهاب هناك هذه السنه ومن افضل اوقات الذهاب هناك بعد انتهاء المربعانيه او على اخرها لما ذكره لى قريبى ويقول لى انهم اذا ارادو ان ينامو لاينامون الا ان يربط فرشه ثقيله نوعا ما فى احد الجيوب ويسحبونها تضليلا على مكانهم اللى هم فيه علشان محد يشوف سير الكفرات بالنفود ويروى لى انهم ما ينامون جميعا الا كل واحد فى جهه ورشاش كلاشنكوف معه حسبا من قبايل صيعر ودهم واللى معهم عيار 50 على الشيصان عساك ماتشوفهم بس ويقول كل يوم ننام بمكان ونجرجر هالفرشه الين الله يستر علينا ونرجع بس صراحه قمه الاسراف يجيبون معهم حول 100ارنب وارنب متقطعه كل اذانيها حلم مادرى وش تاكل هناك شكلها على الهوى مثل الضب المهم ان نويت المسير توكل على الخبير وجهز نفسك ولا تقل السيارات عن ثلاث سيارات ولا جيت بعهن الين يجى الموسم اللى بعده

ولك منى ولجميع الاخوان ازكى سلام

عزالله طرحها ولد عمى براسى يوم اقول ايه ويوم اقول الله لايعنينا ولكن الصدق شى مابه عناء مابه وله
العناء تدرى وش هو العناء ،،،،،،،،،

[نجم سهيل]

سلامي لأخوي انا وحبيب قلبي ماوكلي,

انا من النلس الي ماراح للربع الخالي لكن ناوي انشا اللة بس تقفون افزعوا بالمعلومات واحداثيات المواقع وانسب طريق لة وكيف ندبر الموضوع مع اخوانا راعين الشيصان وال 16 ملي الي فوق اللة يستر منة.

في انتظار الاخوان للفزعة.

وسلامي للجميع

[فتى البراري]

في البداية..
أود ان اسجل معاناتي مع ذكر اسمك..(أنا)..
في سياق الرسالة كما هو الحال..
مع اخواني باقي رواد المنتدى..
لذلك في بعض الحالات سوف استبدل اسمك بالأنا..
اذا لم يكن لديك مانع..
بالنسبة لموضوع الربع الخالي..أخوي الأنا..
فإني لم اذهب الى هناك من قبل..
ولكن يوجد هناك كتاب عن رحالة انجليزي..
هذا الكتاب ممتع جدا ويصف جميع دروب ومسارات الربع الخالي..
والهجر الموجودة فيه..
هذا الرحالة قام برحلته قبل حوالي ستين سنه ..
الا انه في آخر الكتاب يوجد ملحق..
باحداثيات اهم المواقع في منطقة الربع الخالي من آبار وهجر وقرى وشعبان وغيرها..
هذا الكتاب يدعى(الرمال العربيــــــــــــــة )..
وهو مطبوع في الامارات وعلى ما اعتقد على نفقة الشيخ زايد..
لكن في هذه اللحظة لايحظرني اسم الكاتب ..ولكني اعتقد انه (ولفـــــــــــرد ثيسجر)


أرجو ان يفيدك ..

أخوك نهاش..
فتى البـــــــــــ الرحالة ـــــــــراري والقفار

[miokly]

سلامى واحترامى لك يا انا ولفتى البرارى ولكل الاعضاء

السلام عليكم تسئل عن الاحداثيات بالنسبه لقريبى فانت لن تصدق لو اقول لك بانهم يذهبون بدون اجهزه تحديد المواقع وبدون ايضا اجهزة لا سلكيه لن لهم مايقارب الخمسة عشر مره يروحون ويجون وبالله العظيم ،،،،،

ولكن ان كان طرى لى ورحت معهم هالسنه ( والله ان لا تكلمت فيها احس شعر راسى يوشوش يخوى من التعب ولعنه الخير بمشوارهم فابشر وانا لاجيب لك احسن خبه للارانب (اونقره) للارنب
وياويلك لو تروح فى وقت ماهو وقت شتاء وبرد ترى ماودنا نخسر واحد مثلك وعلى العموم ان بغيت جارمن ولا ايكوم لا يردك غير بريدى
ولك منى اطيب الاماسى باحلى التباسى
اخوك العزير باى

[عاشق البر]

بالنسبة للرحلة الى هذا المكان فهي ممتعة لمن يحب النفود فهي جميلة جدا فلقد ذهبت قبل سنتين في المربعانية وكانت درجة الحرارة في نجد ذلك الوقت ما بين 5 درجات و12 درجة تقريبا وعند وصولنا الى بداية النفود بعد ما قطعنا 200 كيلو جنوب تقريبا من حرض وصلنا الى محل يسمى ندقان وكنا نتوقع انها هجرة او قرية صغيرة وفوجئنا انها وايت لتعبئة البنزين للسيارات المارة ويوجد بها مياه كبريتيه لايمكن شربها فرائحتها كريهة جدا والملاحظ ان درجة الحرارة هناك كانت تتجاوز 25 درجة وواصلنا رحلتنا ودخلنا تقريبا 350 كيلو متر تقريبا وكان الجو يميل الى الى الحرارة في النهار وكنا نتظلل بالسيارات . اما بخصوص القطاعين فلم اسمع شيء حول الموضوع ولكن الحرص واجب وهناك اشياء ضرورية لابد اتباعها اذا ودكم تروحون للربع الخالي وهي :
اولا : عدد السيارات لايقل عن اثنتين
ثانيا : لابد من اخذ بنزين كافي في حالة الضياع او تغيير المسار المحدد مسبقا
ثالثا : يفضل ان تكون جنوط السيارات ( شمبر ) حتى يمكن رقع اللستك هناك لذلك لابد من اخذ عدة الرقع كاملة
رابعا: اخذ عدة اصلاح ويفضل ان يكون في الخويا احد يعرف بالكهرباء والميكانيكا حيث ان امكانية سحب السيارة مستحيل مستحيل مستحيل مستحيل يا جود السيارة اذا فكت عمره في بعض المحلات حيث ان الرمال التي تشبه الطحين كثيرة هناك ( الرابضة )
خامسا : هناك طرق ( جاده ) تمشي عليها السيارات يفضل عدم الخروج عنها حيث انها تكون افضل الطرق الممكن عبورها للوصول الى هدف بعيد .
سادسا : عدم المبالغة في حجم الفرش الخاصة بالنوم ولا البسط حيث ان دراجة الحرارة معتدلة والارض نظيفه ويمكن النوم عليها براحة تامة والاستفادة من مكان الفرش بوضع بنزين وماء وفير .

سابعا : اخذ الاجهزة اللازمة ( قارمن + ايكوم ) لكل سيارة .

لاتنسى تأخذ معك كاميرا فوتوغرافية لتصوير جمال المنطقة والاشجار الموجودة هناك وخصوصا الارطى والغضاء في بعض الاماكن حيث ان حجم هذا الشجر هناك كبير جدا ولايمكن وصفه فالمشاهدة افضل

اخيرا اتمنى لك ولكل قاصد لتلك المنطقة التوفيق والسداد .
هذا ماعندي تقريبا عن الموضوع وان كان الموضوع يحتاج الى شرح مطول فهناك تفاصيل لم اذكرها .

ارجو المعذرة اذا كان هناك قصور

تحياتي لكل رواد المنتدى من اعضاء وزائرين

[هواوي]

اشكر جميع الاخوه على التجاوب

وصراحه امنيتي اني ازوره لاني مغرم فيه بشكل غير طبيعي

وللجميع الشكر والتقدير

[أيمن]

وبارك الله فيكم ..
ولو إنها متأخرة ..

لكن الحقيقة موضوع يستحق الرفع وزيادة الإثراء ..

[مساعد]

عز الله انكم ماقصرتم بالعلومات ياشباب بس ودي اعرف لية مايمدحون لحم الارانب الموجودة بالربع الخالي؟انا ماعمري قنصتها ولاجربت طعم الصيد منها لكن قريب انشاءالله.

[مساعد]

صوره قديمه من الربع الخالي

[الصقار10]

الاخوه الاعضاء
مساعد ، ايمن ، هواوي ، عاشق البر ، ماوكلي ، فتي البراري ، نجم سهيل الكرام

السلام عليكم ورحمة الله وبركاته ،،،

أنا من مرتادي الربع الخالي كثيرا مع العلم أن لي اكثر من خمس سنوات لم اذهب الى هناك . الرجاء من الاخوان الذين يبحثون عن احداثيات ذكر طريقهم او جهة الدخول و المنطقه التي يريدون الدخول عن طريقها للربع الخالي لكي اتمكن من تزويدهم بلاحداثيات المناسبة مع العلم اني قد زرة الخرخير اكثر من مره ويتوفر لدي الاحداثيات .

[أيمن]

ويعطيك العافية وما قصرت ..

ويا حبذا لو تفرد موضوعك هذا إلى موضوع جديد، تذكر فيه نبذة عن طلعاتك للربع الخالي، وكذا تذكر أفضل وأهم الأمكنة فيه، وتذكر إحداثيات المواقع، وغير ذلك مما يمكن أن نستفيد منه ..

ولك جزيل الشكر
أخوك

[مساعد]

مشكور ياالصقار وعز الله انك ماقصرت....ولكن ماقلتلي لية مايمدحون لحم الارانب فيها؟

[ذيب الصمان]

السلاام عليكم

ولله شباب كفيتو ووفيتو ولكن ودي اذكر نقطه مهمه جداا جدااا جداا بما انكم تبون السلاامه هناك

انكم انشالله اذا وصلت وتعديت التفاتيش وبديت تدخل بر شوي توقف على جنب

وتفك الوحات وتفصل فيوز( القاطع ) انوار الاسطبات الي ورا والفرامل وتحط طين على

العاكس الي عند الاصطبات الي وراى طبعا واذا كان ودك تفصل نور الطبلون افضل

وما تخلي الا انور الامامي فقط وكذالك عند الانتها من الصيد او حاولو يكون جلستكم

مو قع منخفض ( نقره ) وحاول عدم ارتفاع النور كثير

وعند المراسله في الاجهزه انتبه للي تراسلهم اذا كانو مو اخوياك مع انهم قليل هناك

وانتبه من انوار السيارات الي حولك ولا حظها وجعل لك الف شك وشك اذا جاك ضيف غريب هناك

ويقولون العمر واحد ولموت يفرق عن موت والغدر اخس موت

وانا ما كتب هذا الكلام علشان اني اقولك ان مرعبه لا بس الشواص الي تشوفهم في ندقان

وغيرها من غير لوحات وراعيها وسخ لابعد الحدود ما ودي تكون سيارتك مع اشكاله

وانا ما كتبت هذا الي بعد ما مرور بعض اخوياي بمثل هذي المشاكل ,,,,,

وشكرا



الصمـــــ ذيب ــــــــان

[هاف-66]

السلام عليكم
انا عضو جديد في هذا الموقع " الخلاب " و الفريد من نوعه , اشكر من اعماق
قلبي لجميع القائمين عليه وكذلك الاخوة الاعضاء , و بالنسبة للربع الخالي
يوجد كتاب قيم اسمه " رمال الربع الخالي " للأديب المعروف/ عبدالله بن خميس
وهو عبارة عن تدوين لرحلتين قام بهما الي الربع الخالي قبل حوالي اربع سنوات
وقد دون فيه اسماء رمال الربع الخالي و كذلك بعض المواقع المعروفة وغير
المعروفة , عموما هذا الكتاب كما اسلفت قيم للغاية و مفيد جدا .
و السلام عليكم .