يا مرحبا بالجميع
هذا موضوع من زمان وهو يقرقع في قلبي وودي أتكلم عنه، ولكن ماكان ودي أحط الموضوع إلا وأنا حاط كل إلي في قلبي.
( الموضوع يحتوي العديد من الصور لذلك آمل منك عزيزي القارئ الإنتظار )
ليش الونش مهم؟
غالب الناس يعتقدون إن الونش فايدته لراعين السطحات أو إلي يطلعون الناس من الغراز ولكن هذي نصف الحقيقة، فمثلاً خل نقول إنك رجال طلعت للبر تتمشى أنت و أهلك أو أنت بالحالك ثم غرزت السيارة لاسمح الله ولا حولك أحد إنتظرت ساعة، ساعتين ماشفت مخلوق و يمكن يمر واحد و يسفهك.
أو خل نقول إنك كنت رايح تتمشى بعد مطرة و طحت في طين و نفس القصة وش السواة أنت معك الواير ولكن ماتقدر تطلع السيارة لوحدك ( يمكن تقدر إذا كنت هلك هوجن أو أندريه العملاق ) إذا كان معك الونش تربطه في أقرب سدرة أو غيرة و تتل عمرك.
كيف تختار الونش المناسب؟
فيه بعض الناس الله يهديهم ، يحسبون كل ما كانت قوة الونش أقوى كل ما كان أفضل. هذي القاعدة صحيحة نوعاً ما ولكن كل ما زادت قوة الونش زاد حجمه ، و إذا زاد حجمه تبي تبلش وين تحطه.
بالنسبة لأهل الشيصان ما عندهم مشكلة لأن الصدام كبير فيقدرون يركنونه عليه. لكن هنا تجي مشكلة ثانية : خل نقول إنك شريت ونش 5.5 طن وهذا على ما أذكر أقوى الموجود و ركبته فوق الصدام صحيح إنه يبي يكون بكبر الصدام ولكن لأن حجم الونش كبير حبتين لذلك يبي يمنع دخول الهواء للمكينة، وهذي الحركة تولد حرارة دائمة للسيارة.
في نظري القاصر أعتقد إنه من 3.5 إلى 4.5 طن هن أفضل شئ بسبب الحجم المناسب و السعر المناسب.
ايضاً فيه شئ ثاني:
فيه نوعين من الفرارات إلي تكون قدام الونش الأولة هذي
أو هذا
انا افضل الثاني لأن الرول يسهل مرور الكيبل على الجوانب، أما الأول فما فيه هذي الميزة.
تركيب الونش:
طبعاً صعبة إنك تبي تركبة لوحدك، لذلك غالباً ما توديه لأحد الورش المعروفة بتركيبه سعر التركيب غالباً يكون 800 ريال، 300 ريال شغل يد و 500 للقاعدة إلي تبي تشيل الونش. يتراوح سمك هذي القاعدة من 5 ملم إلى 10 ملم ولكن أهم شئ هو التلحيم لذلك إختاروا ورشة تلحيمها زين.
هذي صورة لها
لك طريقتين للتركيب عموماً: الأولى إنك تركبه على الصدام، والثانية إنك تخفيه داخل الصدام وتفتح لك فتحه في الصدام عشان يطاع كيبل الونش.
جهاز السحب:
فيه طريقتين رئيسيتين لتشغيل الونش: الأوله عن طريق القير ، و الثانية عن طريق جهاز السحب. أنا عن نفسي أستخدم الثانية لأنها تعطيني حرية أكبر.
ملاحظة مهمة:
غالب الورش إلي تركب الونوش تحط أصابع البطارية الموجب على الموجب و السالب على ماص السيارة، وهذا خطأ وقعت فيه و بغيت أعشش بالبر ذيك المرة. يجب أن يكون الموجب على الموجب و السالب على السالب.
إذا كنت في البر و غاصت السيارة في الطين وش تبي تسوي، طبيعي تربط الونش في أقرب شجرة حولك، ولكن إذا كنت في الطعوس و غرزت السيارة وش تبي تسوي؟
هنا تجي فايدة الأطناب، وهذي الأطناب هي مثل أطناب الخيمة ولكن مواصفات ثانية، يعني الطول متر و السمك 5 سم. الموجود في السوق عندنا طوله متر ولكن سمكه 2 أو أقل وهذا ينعفط مع أقل شد. ولتسهيل دخول الطنب في الأرض و ثباته تحط لولب على أوله .
طريقة وضع الأطناب:
يوضع الطنب ثم تضرب الراس بمطرقة ثقيلة ( أنا أستخدم وحدة ثقل الراس 6 كيلو ) ثم لامنه وصل للمروحة ابد ابرم المروحة في الأرض، تبي تلقاه يغاص في الأرض ويثبت أهم شئ إنك تغرسه لأقصاه ( في الصور ما ركزته لأقصاه لأني كنت طالع بالحالي و ذبحنى العج ) ثم تربط شنكار الونش في الشنكار المربوط الملحم في الطنب.
هذي المقاومة جيدة و تقدر تسحب السيارة الخفيفة بس، إذا كنت تبي تثبيت أكبر يبيلك طنب ثاني، تحط الطنب الأول موازي للطرف الأيمن للسيارة و الثاني موازي الطرف الثاني ثم تجيب لك واير و تفره على الطنبين بحيث يكون شكل مثلث ( راسين على الطنبين و الثالث على السيارة ) مثل كذا
أهم شئ إنك تطق الأطناب في أرض صلبة، يعني تطقها على راس طعس ما ينفع.
إذا ما كان معك طنب ولا حولك شجرة، تقدر تفك الإستبنه و تحفر لك حفرة عمقها متر تقريباً ثم ترمي فيها الإستبنه ولا تنسى تربط الشنكار فيها ثم إدفن الكفر. وسم باسم الله و توكل عليه.
إذا كانت قوة الونش 3 طن، فأنت تقدر تزيدها إلى 6 طن عن طريق بكرة.
بعض النصائح الأخيرة:
للمحافظة على الونش لا بد إنه في كل مرة تستخدمة تصف الواير جنب بعض مثل الصورة هذي
إذا كنت تبي تسحب سيارة مغرزة لا بد تسحبها من ورى أو من قدام عشان تتفادى ميلان الشاص.
تأكد إنك شاد الواير بعد من تنتهي من السحب، عشان ما يرتخي عليك و أنت تمشي.
إذا أرخيت الواير و سحبته انتبه تسحبه لآخرة، لابد إنه يكون لاف على الأقل لفتين على مكينة الونش ولا من المحتمل إنه ينفلت.
إنتبه تعفط واير الونش لأنه يخربه.
إذا كنت مغرز في شعيب وكانت حولك شجرة، لا تلف واير الونش على الشجرة، إربط أي واير ثاني حول الشجرة ثم إربطه أو أشبكه في واير الونش.
أتمنى تستفيدون من الموضوع، و تستمتعون في قراءته مثل ما إستمتعت أنا في إعداده.
15 نوفمبر 2015 - 16:514 نوفمبر 2015 - 21:27
 |
رد مع اقتباس
كا مل والكامل وجهه..................
