متوهق بالكفرات و ابي الفزعه

[متوهق جديد]

السلام عليكم و رحمه الله

يا الربع تراي توهقت ويبيلي اشتري للجيب الباثفايندر2005
كفرات جديده بس اني ما ادري وش اشتري لاني اول مره اغير الكفرات وابي النصيحه

الكفرات الاوله هي البريدجستون حقت شد البلد اللي بالحيل قاسيه

وناوي واحد من الاثنين ياالميشلان او الدانلوب اللي يجي كبير و عريض
وابي النصيحه الله يعطيكم العافيه

[راع الكرم]

الميشلان لا يعلا عليه كد ومد وعندك اليو كو هاما

[مكحل الحنشان]

انا عندي الدنلوب اللي يركب على البرادو اللي يجي اكبر من كفرات شد البلد
انا ماشي عليه الا الحين 35000 وزي العسل ماشاء الله
واذا خربن كفراتي بركب نفس الكفرات مره ثانيه
وتراهن بالحيل زينات بالرمل

وشوكرنن

[متوهق جديد]

الله يعطيكم العافيه

اخوي راع الكرم

الميشلان الافضل ما فيه طقه عصى

اليوكوهاما مشكلته انه ينفصخ سلام سلام لانه بالحيل الين الكفرات

اخوي مكحل الحنشان

ابي اسالك عن الدانلوب وش رايك فيهن بالتطعيس لاني بصراحه راعي مراقى لاني سمعت انهن يحكن بالرفرف بالطعوس

والله يعطيكم العافيه

[مساعد99]

الكفرات الممتازة يااخوي
انا اقول المشلان مافيها كلام
والثاني يوكوهاما ليين وزين وانا ركبته في سيارتي وجلس اربع سنوات والنقشة ماتغييرت ولله الحمد

ولكم تحياتي

[أبــ تميم ــو]

الله يعفو عنك يا (أبو ناصر) دااااايم متوهق ..
@@أمزح معك@@


ودي أفيدك في الثنتين لكن ما جربت الا الدانلوب ..

بالنسبه لتجربتي مع الدنلوب كفر جيد جداً لكن الأفضل منه بالنسبه (للنفود) خاصه الهانكوك لينه وممتازه ..
وأذكر أن فيه تصويت في المنتدى لأفضل كفرات .. وحصل هانكوك على الدرجه الأولى ..

ارجوا أني خدمتك ..

تقبل مروري ..

أخوك/
أبــ تميم ــو

[بواردي الدلم]

تبي نصيحه لاتغير المقاسات حقت الوكاله اما الكفرات يمدحون ميشلان

والبرجيستون انحش وانت ابخص يابس بقوه مال امه داعي

[.أبوعبدالرحمن]

انا مركب حاليا يوكوهاما نفس مقاس البرادو والله حلو وعريض لكنه يزلق كعادة هذه الشركة وان كنت ماخذ ماخذ خذ دنلوب والناس مجربينها يعني لو تلاحظ وانت في الشارع اي باث او برادوا تلقاه مركب دنلوب لان سعره معقول ولا هوب مثل الميشلان وايضا لين وليونته وسط لا هيب مثل الميشلان ولا الهانكوك وروعة في النفود وتتحمل الحرارة والحمل والله يكتب لك اللي فيه خير

[برنو بيشة]

أنا مركب البرجستون وماجربت غيرهن من يوم شريت موتري على الزيرو إلى ألحين 200000كيلو وأنصحك بهن
وعمرها 2-3 سنوات وتغيرهن حسب إستخدامك

[ابوعبدالله220]

والله وانا اخوك كنت محتار مثلك
وكان لي تجارب ممتاااااااااااازه مع اليوكوهاما أيام الهايلكس الله يذكره بالخير
كنت ما أغيرها الا كل اربع سنوات

ويوم أشتري الباث الكفرات اللي عليه يوكوهاما وممتاااااااااااازه جدا

ورحت اليوم للغرابي وركبت يوكوهاما مقاس 265/65/17 أكبر وأعرض من حقت الوكاله
سعرها 390 للكفر الواحد

وسعر الدنلوب اليوم 450 والميشلان 550 والبرجستون 540

[ابوعبيده]

يالنسبه لراعي الخطوط والفياض والربيع وش افضل له .. في الطعوس قليل جدا ..

[ابو؟؟؟]

يالنسبه لراعي الخطوط والفياض والربيع وش افضل له .. في الطعوس قليل جدا ..

الميشلان بدون كلام

واخوي متوهق تبيالكلام اللي يجمد علي الشارب
اذا كنت راعي خطوط ميشلان
واذا كنت تدخل البر علي خفيف ركب ميشلان
بس اذا كنت تدخل بر دايم الدنلوب حقت البرادو ممتازة

ويوكوهاما ما عندي خبر عنها

وسلاتك

[تيمون2]

الشهر مبارك علي الجميع
والله الشباب ما قصرو شف إلي يخارجك ونا أخوك
أن كانك راعي نفود واجد دور الين ألي هو الهنكوك - أو الدلنلب -او يوكهما
ونكانك راعي - خطوط - وسفريات وسرعه خذ مشلان أو برجستون
وبقولك معلومه كل ما أرتفع الكفر فهو أحسن في النفود بس لاتتعدي 70أرتفاع لأنه يحك
أهم شي اليونه في النفود وشكرآ

[وليدة حرب]

السلام عليكم ورحمة الله وبركاته
أولا مبروك عليكم الشهر الفضيل ...
أم بالنسبة لسؤالك أخوي عن الكفرات , انا من نا حيتي ارجح كفرات دنلوب لأنها الين من المشلان ثاني شي ارخص قيمة . صح ان المشلان سمعة وصناعة بس العيب فيه كنه حصاة إذا خذتالك 3 شهور ولا اهنا فرشة اذا نسمتها يعني غثا في غثا
وان كانك ما اقتنعت ركب كفارت شد البلد البرجستون .