السلام عليكم ورحمة الله وبركاته
هذي يمكن اول مشاركاتي برفع صور لمنتدانا الغالي مكشات وهي بحقيقتها مداعبة لمشاعر من يشاطرني حب الجموس والشفرات وخاصة قطع عشرة او البليزر ...
يستغرب البعض انه رغم عدم تجاوزي 30 سنه عمراً الا اني اعشق هالفئة المتينة من السيارات والكثير ينظر بعين الاستغراب ولسان حاله يقول "" وش حدك على القرادة يالمقرود ""
ولكن يمكن مايلومني احد لاصرت انحدر من اصول دوسرية وربيت وانا اشوف انواع واشكال من الجموس تخترش حول بيوتنا او خيامنا ورغم رومنسيتي وحبي للقصيد الا اني يصيبني جني وتدمع عيني لاسمعت قصيد بالجمس ( ياربي لا تبلانا )
وعلى قولة القايل
ياركب اللي جاهز(ن) للمطاريش= جمس(ن) حمر كم طرشةً قد طرشها
عليه سواق عيونه مغاطيش = شايب ومبطي في عيونه غطشها
يمشي من الحوطه بوقت المغابيش = وعبا من اطرف شيشه من شيشها
وعدل رفارف موتره بالشواكيش= وتله على الخط الشمالي جمشها
واليا ترادى جريها قال ذا ليش؟= دبل لها ثم بالثلاثه نعشها
واليا ذكر له مركز(ن) فيه تفتيش = خريت كم من غبشةً قد غبشها
مجرب مسرى الغداري مع الحيش= ولو داس له بيضة حمّره مافقشها
راح اعرض بعض الصور الخاصة بمواتري واركز على قطع عشره ويمكن احمس بعض الناس بطرح مالديهم عن معشوقهم رغم ان المعشوق لايصح وصفه للناس ولا ابراز محاسنه J
هذي صورة للبليزر العودي والي بعته للاسف وراعيه مابخص الموتر زين ... ويوم جيت ادوره عنده عقب سنه وتلني الحنين له تل قالولي انه باعه
وهذي صورته قبل تعديل لونه واول ماشريته ... وعلى فكره ... الي يشتري بليزر فلايبخل عليه ويكرمه بتغيير القطع الاستهلاكية اول مايشريه ثم باذن الله يرتاح 4 سنوات وهذا واقع تجربتي.
هالرحلة كانت بشعيب الجفير وصاحب اليوكن 2001 قال قبل مانمشي ... ماودك تركب معنا وتريحنا من هالقرمبعة ... ومايدري ان الاقدار ماهي على الكيف وان البليزر بيتله هو ويوكنه من الغراز.
هذي جمعة ود ومحبة لي ولصاحب الدوج عقب مهايط بالعمل ويشهد الله ان الدوج ماقصر الي وصل معي هالمحل
وهذي صورة طخيمان ... شفر قطع عشرة موديل 81
عليه فلتر هواء ايدلبروك نيكل الظاهر هذا اسمه وهدرز امريكي مجلوب من امريكا مع دبات رياضية ومخرج له شكمانين وعليه جنوط نيكل 10 انش مع كفرات شاهين اكبر حجم.
صورة ثانية وعرض جانبي وتشوفون شلون اللون الرصاصي راكب مع الاحمر
ما للشدايد الا اهلها ومن حكم تجارب سابقة فالجموس والبليزرات مشهود لها القوة في الاراضي الطينية وباجتياز الشعبان اذا ضبطت امور كهربتها طبعا وبهالرحلة بالذات كان معي اشكال واصناف من الجيوب الحديثة وكان كل همهم حسبي الله عليهم ان ونيتي يطفي ويجون يسحبونه مع اني سحبت كثير منهم في غير زمان ومكان وكان منهم فتك 2003 للعضو ... ولا خلونا نستر عليه.
هذي الصور رد على الي يقول ان الجموس حدها دوار العويضة شرقا وتفتيش القدية غربا وهي بروضة
هذي صورة تذكارية لي مع الجمس وتقبلوا مني اجمل تحية وناطر تعليقاتكم ومشاركة اهل الجموس
15 نوفمبر 2015 - 16:514 نوفمبر 2015 - 21:27
 |
رد مع اقتباس
المشاركة الأصلية كتبت بواسطة Abu Saad
... اثاريني ناسي هالعلوم مع الجموس
