الموظوع قديم ماهوب شوي بل كثير
حتى صاحب الوظوع شاهد عيان لا نعلم اهو من الأحياء فندعو له ام من الأموات فنترحم عليه
الله لايفجعنا في اي حبيب من حبايب مكشات
المهم
من افظل واحسن واعجل وانسب وافود الأكلات خصوصاً للقناص
الي عجل او بيجلس في مكان وبيطول ولا يبي زود حركه وخرفشه
اقول له عليك (( بالشعثه ))
وهي تعتبر اكله ولا احلى منها وتتحمل اي الضروف سواءً مطر حر برد رطوبه كلها تمشي معها ولا تتعفن ولاتخرب
واعظم ميزه فيها انها تطول ما تخرب
يعني تجلس معك شهر شهرين ماتخرب
وانصحك تجهزها بالبيت قبل ماتروح وتآخذها معك مكيسه بأكياس
وأفظل شي خل كل كيلو مثلاً في كيس وغلفها بأكياس اللف التغليف
طريقة أعدادها
اولاً حضر كلاً من
تمر مكنوز وافظل شي استخدام نوع النبت
ثانياً / أقط مطحون او نظير كل ناس يسمونه باسم
ثالثاً / سمن بري
طريقة الإعداد سهله جداً
كب الأقط على التمر المعبوط طبعاً تطلع الفصم او العجم من التمر وترميها وتعبط التمر مع الأقط وتكثر اقط وتكب عليهم سمن بري طبعاً لاتكثر مره من السمن يكون بمقدار متوازن وتعبط الين يختلط ببعض
ثم عليك بالعافيه غلفها وخذها معك
تعتبر مغذيه ومفيده وتكفيك عن وجبات وطبخات كثيره بالبر خصوصاً لمن هو يقنص الجبل او وعر ولا يبي الثقل على نفسه
وهذي الأكله قديمه جداً
فأجدادنا يأكلونها من قديم ويأخذونها معهم بأسفارهم
وهي تسمى
(( الشعثه )) وهي التمر المعبوط مع الأقط والسمن
واذا ماوجد سمن وصار اقط وتمر بس فتسمى (( البعثه )) بالباء
والله الموفق
هذه اكلتي المفظله بالمقناص
محبكم
راعي الهــدد