15 نوفمبر 2015 - 16:514 نوفمبر 2015 - 21:27 منتديات مكشات


::::::: تابعونا على تويتر مكشات :::::::


مرحبا بكم في منتديات مكشات

::::::: تطبيق مكشات للأجهزة الذكية :::::::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية
النتائج 1 إلى 7 من 7

الموضوع: ديوان الشاعر خالد الوقيت

  1. #1
    تاريخ التسجيل
    Jun 2005
    المشاركات
    4,759

    ديوان الشاعر خالد الوقيت

    الشاعر خالد الوقيت من الشعراء المميزين
    انظم لمكشات واثرى صفحة الموروث ببعض القصائد الجميله
    ونتمني منه المزيد
    وهذه بعض مشاركاته التي وصلتنا وبانتظار البقيه
    -1-
    هذي قصيدة هم ذكّّّروني كتبتها قبل سنوات لما انتصف الوسم ونزلت في شريط هبوب الشمال بصوت ابو عبد المجيد واليوم انقلها تفاؤلاً ولعلّها تعجبكم ..

    الوسم قرّب يالصبيحي نصــــــيفه .... والجو خبرك والمراميث يبّاس
    وذنوبنا غطّت بياض الصحـــيفه ...... لو تنحسب ياصاحبي ماله قياس
    يارب لاتجعل خـــــــطانا نكيفه ...... ياواحدٍ عدله للانــــسان نبراس
    يا الله بمزنٍ هايلٍ في صــــــــفيفه ...... لاشافه الشايف تبـشّر بالاوناس
    برقه يشوق المستخيل برفيــفه ...... ورواعده ترزم مثل صوت الاجراس
    اسبوع ما ياقف علـــــينا وكيفه ...... يودع مساهيب الخلا كلها اوطاس
    من عقبه الاوطان تصبح مريفه ......وتلبس من صنوف الحيا زين الالباس
    غرضك خوّة كل نفسٍ شـــريفه ..... اهل الشكاله والجـــــماله من الناس
    لاجوّا في دِعْـبٍ نظيفٍ غريــفه ...... والورد باطـــــرافه من الريح مِيّاس
    ثم اضرموا بالرمث نارٍ كثــيفه ...... وداروا حواليـــها على الزل جِلاّس
    وصفّوا بها صفر الدلال الهديفه ...... اللي مباهـــــــرها تعايط بالانفاس
    فنجالها يبرد غليلك رهيـفه...... عقب الغثا ويصحْصحك عقب الاعماس
    وسوالفٍ في كل فنٍّ طريـــــــفه ...... ماهي سوالف كل غـــــاوي وهلاّس
    هم ذكروني في ليال النشيـــفه ...... واخذي بها من سجّة العمر مرواس
    ايام ربعي للمـــطارد لهيفه ...... تضرب على التأخير باخماس واسداس
    تال الشهر والجيب تسمع وحيفه ...... يم الحزيم ويـــم نزّاح الارماس
    اديار لو هي يالصبيحي مخيفه ...... لاهل الولع خابر تباسيط واوناس
    ذكرى لها عيني تهامل ذريفه ...... والقلب يسبح في بحر كل هوجاس

    .
    -2-
    حبيت أعايدكم ياربوع الوفا في بيتين واقول لكم كل عام وأنتم بخير وامتنا بخيــــــــــــــــــــــــــــــــــــــــــ ـــــ ــــــر.


    كل عام وانتم ياهل العرف في خيـــــــــــــر
    أيامكم زينه والأوضاع زينــــــــــــــــــــــه
    أقولها وهموم قلبي طوابيــــــــــــــــــــــــــر
    بالعيد نفسي ياربوعي حزينـــــــــــتـــــــه
    لكن عسى اللي في يديه المقاديـــــــــــــــر
    يرفق بقلبٍ ماترفّّـــــق ونينــــــــــــــــــــه
    لاصاحت الذكرى تنفّض كما الطيــــــــــر
    واحتار مابين الهموم وحنينـــــــــــــــــه
    الله يبدّل وضعي واوضاعكم غيــــــــــــر
    ياهل العلوم الطيّّبات الثمينـــــــــــــــه
    ويردم لكم غر المزون المزابيـــــــــــــــر
    اللي يهوّل يوم يمطر غشينـــــــــــــــه
    الوسم حل وننتظر للتباشـــــيـــــــــــــــر
    شمال من لينه لحد الدفينــــــــــــــــــــه
    ودي اشوف الربع مثل المذاعيـــــــــــــر
    لا حل جوٍ مبطيٍ في سنينــــــــــــــــه
    مكشات مزحومٍ مثل زحمة السيــــــــــــر
    الله يجيب الغيث يامهتويــــــــــــنــــــه
    واختامها كل عام والربع في خيـــــــــــر
    امورهم زينه والأوضاع زيـــــــــنـــــه


    .

    -3-

    متى على الله تنطفي جــمـرة الصيـف
    ويهـب مــن صــوب الشـمـال الـبـرادي
    ونشوف بيض المزن بالجو تـــصافيف
    ومـيـض بـرقـه مـثــل قـــدح الـزنــادي
    لا هــلّ سيـلـه بالـحـزوم المجـافـيـف
    أقـعـد جـمـال الأرض عـقــب الـرقــادي
    وصار الثرى مابــــين حبـران وطريـف
    زلٍّ مـزخـرف فـــــــــاق صـنــع الأيادي
    هناك أبستأنس ويكـــــمل لـي الكيـف
    مـع رفقةٍ يمـــــشـون غـايـة مـــرادي
    لامـن شكيـت الـهـم قـامـوا ملاهيف
    ثـم وجهـوا صــوب الشـمـال الـشـدادي
    يـبـون بالقـطّـار عالي المـــــشار يف
    وإلا ورا الحرة بــذيــــــك الــوهـــادي
    لامــن جلسـنـا بـيـن حـمـرٍ مقـايـيـف
    عقـب العـصـر واللـيـل أقـبـل يـهـادي
    وهـبــت علـيـنـا بـــاردات الهفـاهـيـف
    عـطـره مخـلـط بـيـن نـفلٍ وكــــــادي
    يازين لا مـــــدّت زوالٍ مـنـاظـيــف
    ثــم صـفـف الوِلاع حــــــول الرمادي
    صفـر الـدلال اللـي بهـا ناعـم اللـيـف
    والـتـمـر قِـــرّب تـــوّ وقـــت الـجــدادي
    صـفّـوا ومــدّوا ينتـقـون السـوالـيـف
    سـوالـفٍ بالـصـيـد مـــا هـــي دوادي
    في مجلسٍ ماكـــــــــــــدروه الملاقيف
    ما غير ربعٍ صــــــــــــــادقين الودادي
    وقــت الـرخـا ربــعٍ كـــرام مـوالـيـف
    وعنـد العسـر يعجبـك صـبـر المـهـادي
    يا مر لي عصـرٍ جمـيـل تـــقـل طـيـف
    شـرقٍ عـن المظــهـور باتْلـى جمـادي
    عصرٍ مضى واليـوم مثـل الخذاريـف
    مـــازال يـحــرق لاذ كرته فـــــــؤادي
    حوّل على قلبي خفيـفٍ كمـا الضيـف
    وروّح وأنا أصـوّت بآثاره وأنــــادي
    هذا هوايه يالرجال الغـــــــــــطاريف
    لو يكثر القــــــــــــولات أهل النقادي
    لـكـن يكلفـنـي مــن الـشـوق تكلـيـف
    شـمـة ذعـاذيــع الـهــوى بـالـبـوادي
    ولا اظـن باسْلـى لـو تـزود التعانيـف
    حـب الـخـلا بالقـلـب قـصـرٍ مـشـادي
    .
    -4-
    .
    هذي قصيدة الوسمي شاركت فيها العام هنا بمسابقة مكشات وحبيت اعيدها يوم قرب الوسم الله يجعله موسم خير للمسلمين ..
    .


    متـى تبـي تـذعـذع هـبـوب الشمـالـي .... وتـبـدا مطـالـيـع الـمــزون الثـقـيـلات
    مـتـى يـبــي يـجـنّـا ســـواة الجـبـالـي .... لا عـرّضـنْ مابـيـن صــاره وابـانــات
    بروقـهـن مــن تـحـت لـهـن اشتعـالـي ... وحس الرعد فيهن يجلجل بالاصـوات
    لا ذكّــروهـــن عـاشـقـيــن الـخِـيـالــي ... وجابـوا خبـرهـن قـبـل هــذا بفـتـرات
    ســوّوا لـهـن بالـنـت نـــوع اتـصـالـي .... ومرّوا على الياهـو ومـرّوا بمكشـات
    وشافـوا صورهـن قاطعـات المجـالـي .... وحطّوا لهن مـع شيّـة الـرب حـروات
    والـى اقبلـن طـاروا لـهـن باعتجـالـي .... على الجيوب اللي مع الدرب عجلات
    مثـل المحـب ان جـاه بـالـدرب غـالـي .... يطيـر مـن شوقـه لنصـف المسـافـات
    ويـوم اوصلـوا واستملسـن بانهمالـي .... كـــزّوا لـنــا تبشـيـرهـم بـالـرســالات
    هــذي امـانـي سقـتـهـا مـــن خـيـالـي ... وارجـي مـن المولـى تحـوّل حقيـقـات
    ويسقينـا مـن فضلـه عـزيـز الجـلالـي ....اللـي بحـر جــوده يـفـوق المحيـطـات
    يــاالله يـــاربٍّ عـلــى الـنــاس والـــي .... يـاعـالــمٍ كــــل الامـــــور الـخـفـيّــات
    نـرجـيـك يـاسـامـع دبـيــب الـنـمـالـي .... تـرسـل عليـنـا مــن توالـيـك رحـمـات
    يــمّــك رفـعـنــا صـوتـنــا بـالـسـؤالـي ... يـوم ابتـدا الوسمـي وجالـه عـلامـات
    اســق الـديـار الـدارســات المـحـالـي .... واحـي الدعـوب اليابـسـات السنـيّـات
    يازيـن لا قالـوا تــرى الــرس سـالـي .... وواد النسا من حدري الجسْر كد فات
    هـنــاك ابسـتـانـس ويــرتــاح بــالــي .... واشفق على نظـم البيـوت الجزيـلات
    واســج سـجـة دالــه الـقـلـب سـالــي .... ماضاع له في سوق الاسهم فليسـات
    لاسـقـت جيـبـك يــم هـــاك السـهـالـي .... شرقـيّ الاريــل بـيـن عـبـلا ورامــات
    وهــــي منـاقـعـهـا ســــواة الـلـوالــي ... تبـرق وتعكـس صـورتـك كالمـرايـات
    وعقـب التمشـي جيـت فـي دوّ خـالـي .... تسـورب شغيّاتـه كمـا زحــف حـيّـات
    واوقــدت لــك بـالـرمـث نـــارٍ تـلالــي .... ريحـة نـدا رمـثـه تـفـوق البـخـورات
    وفرشـت مـن حـولـه ثــلاث الـزوالـي .... اللـي علـى الجالـس تفصّـل مقـاسـات
    وصـفّـيـت فـيـهـا مـهـدفـات الــدلالــي ... وضبطـت بالبـن اليمانـي لــك اســواة
    وفنـجـال شــايٍ خــادر الـلـون حـالـي ... مـثــل الـدعـايـه لاتـذوّقــتْ رشــفــات
    ومعـك مــن الـربـع الـقـروم العيـالـي .... اثنـيـن بالحِسـبـه ..وبالـفـعـل مـيّــات
    وافـيـن مـاهـم مــن هــواة االـجـدالـي .. صـافـيـن بـالـخــوّه عــلاقــه ونــيّــات
    كـلامـهــم مــثــل الــقــراح الــزلالـــي ... لا ذاقـه الظامـي عقـب طـول مظمـات
    لحـظـة صـفـا فيـهـا زمـانـي صـفـالـي .... للنـفـس لـــذّاتٍ .. وللـعـيـن مـجــلات
    ويـزيـدهـا لا غــــرّد الـطـيــر عــالــي .... وهبّت علينا من طرى النـود نسمـات
    تنسـيـك لــو سـاعـه هـمـوم اللـيـالـي .... اللـي علـى مثلـي لـهـا نــوع غــارات


    وسلامتكم .

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    .
    -5-
    .
    .
    احبابي اعضاء منتدى مكشات تحية ملؤها التقدير والأحترام ..
    يطيب لي أن أسجل أول مشاركة شعرية باسمي الصريح والتي آمل أن تنال على إعجابكم .
    وسبب القصيدة أني خرجت من الدوام قبل عامين يوم الأربعاء وكان الجو ماطراً وكنت مشغولا في الخميس والجمعة فرأيت أمامي جيب شاص ومعه الطير والفرش بالحوض فتبعتهم حتى خرجوا من الديرة ورجعت وبنفسي المقناص فكتبت هالقصيدة :


    انا اليا من شفت طرادة الصيد
    على الجيوب محمّلين العفوشي

    أجرّ من بين الحنايا تناهيد
    وأحسّ راسي بالهواجس يدوشي

    ودي بخوتهم ولو راحوا ابعيد
    انا غرامي في مخاوى الطروشي

    لو لامني بعض الرجال المقاريد
    أهل النميم مثلّمين العروشي

    ناسٍ تبدّي في قفا الناس ... وتعيد
    تدور من كثر الهذاريم بوشي

    وانا احمد الله ماعليّه مناقيد
    الجيب جيبي والدراهم قروشي

    ولا عِلْتْ بالدنيا على زيد وعبيد
    مغنيني الله عن خطاة الدحوشي

    عذروبي اللي اعترف به هوى البيد
    هذا الذي لاطراف جاشي ينوشي

    لا هام غيري بالبني المناهيد
    هيف الخصاير ضافيات الرموشي

    فانا هيامي وسط هاك الجراهيد
    من حرة عويرض الى ام الحنوشي

    مداهلٍ لو هي وعور وتناكيد
    ناطى بها سود الحصا والفروشي

    إلاّ انْ حبـــّه داخل القلب ويزيد
    حيثه مساريح الظبا والوحوشي

    اسلى بها لاجيتها باوّل العيد
    مع رفقةٍ للصيد مثلي عطوشي

    اهل المودّه ... صادقين المواعيد
    ما فيهم اللي لاختلفنا يهوشي

    لو جيت أحسّبها سنينٍ سراميد
    وانا عليها آسوق غرّ الجيوشي

    ناخذ عليها بالخرامس تراديد
    ونرمي بها فوق القفوش القفوشي

    آثارنا في خدّها والمطاريد
    مثل الوشوم الثابته ... والنقوشي

    واختامها ياجِعْلها للرواعيد
    وعسى عليها ما تكف الرشوشي


    -6-
    بناء على طلب بعض الأخوة قمت بتسجيل قصيدة الوسمي ووضعتها هنا ..

    آمل أن تحوز على رضاكم ..



    .
    .
    وهذا رابط القصيدة ..
    http://7doood.net/up/download.php?fi...497e1319b3.3gp



    وسلامتكم .




    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي





  2. #2
    تاريخ التسجيل
    Jun 2005
    المشاركات
    4,759

    رد: ديوان الشاعر خالد الوقيت

    يامـل لقلـبٍ مالقـى لـه مــداوي=يضيق بالحاليـن .. بسـط وغرابيـل
    من طلعتـي وامـره عليّـه عمـاوي=و ما لي عنه .. لو بيّح السدّ .. تبديل
    مـرٍٍٍٍٍٍّ اقـول اللـي يصيبـه سمـاوي=وبعض الطبايـع بالبنـادم مجاهيـل
    ومـرٍّ اقـول مسبّـقـات الـبـلاوي=اللـي لهـن بيـن الحنايـا مخاييـل
    والظاهر انه بس فاضـي .. وغـاوي=مايعجبه صبـح الخلايـق ولا الليـل
    ياقلـب لا ياخـذك سلـم الـجـلاوي=اللي اليا حـطّ الرحَـل بـادر الشيـل
    واذكـر طراوينـا وهـاك المنـاوي=بيـن السفاجـه والقـلالات والنيـل
    من شانهـا عدّيـت راس الشفـاوي=وجرّيت عذبات القصايـد .. مواويـل
    يازين ياللي لي مـن النـاس هـاوي=انـا قنصتـك فـي شغايـا فراطيـل
    غرب الشطون وغرب هاك الحـراوي=شرقي حبيب وشـرق وادي مراحيـل
    يوم اعرضن لي و صاح فيّ النخـاوي=الصيـد قِدْمـك يابعيـد المنـاويـل
    تليـت انـا الجكسـار تـل النـداوي=وزرقتهن من قبـل عَسْـر المداخيـل
    وطلـع عليهـن بالكـلاش الهـواوي=ورماهن الاولـى .. وزلّـن معاجيـل
    ورجعت قال الربع ويش انـت نـاوي=قلت المعـدّى بيـن هـاك الجناديـل
    وعدّيت لين القـاع صـار متسـاوي=وامسن يمين الجيب مرمى المحابيـل
    وصحنا يابو حسـان حـذراك تـاوي=هات الثنيـن وكمّـل الكيـف تكميـل
    وعطاهن الصالـي ولا هـو امـراوي=ولولا القدر مهّلّهن ... ذاقـن الويـل
    وعقب ادبرن قمنـا نديـر الحكـاوي=وانّاقـش التضييـع ونحـط ونشيـل
    ثم اتصـل فينـا الرفيـق المخـاوي=وقال ابشروا .. جبنا الشبب يالمشاكيل
    ارويّــةٍ مــن طيّـبـات الاراوي=بانٍ شحمهـا فـي حشاهـا تراهيـل
    طحنا بها في وسـط شِعْـبٍ خـلاوي=مستامنه ترعـى القـرَظ والنوافيـل
    قلنـا كفـو يـا جعلكـم للغـنـاوي=عاداتكـم طـرح البـدون المجافيـل
    وجينـا لمتكـى طيبّيـن الـعـزاوي=والنـار حيّـه والهـلا والمعامـيـل
    وتكاملـت مابيـن طابـخ وشـاوي=ومابيـن نشمـيٍ يسـوق الفناجيـل
    هـذي وناسـة كـل قلـب شقـاوي=وهـذي تعاليـل القلـوب المعالـيـل
    واللي يبـي يرفـع علينـا دعـاوي=باللوم ويفطّـن هـل القـال والقيـل
    قلّـه يكّفينـا المسـيـل النـحـاوي=اللي كفى البيت المعظّـم مـن الفيـل

  3. #3
    تاريخ التسجيل
    Jun 2005
    المشاركات
    4,759

    رد: ديوان الشاعر خالد الوقيت


    القلوب الطمطمية


    الله اعلـم بالقلـوب الطمطميّـه



    .......... لا سرت في غيّها مسرى السباعي

    لا تعلّت مـن ثنيّـه فـي ثنيّـه
    .......... ثم جاتك في حـدورٍ و ارتفاعـي

    ترتدي لك كل يـومٍ ثـوب نيّـه
    .......... واتّلـوّن مثـل تلويـن الافاعـي

    مـرةٍ تَبـدي عليـك بمرحميّـه
    .......... وتنتخي بك لاجل تحقيق المساعي

    واتّمسكن بين هذي وبيـن ذيّـه
    .......... حيلة المحتال في لبـس القناعـي

    ومـرةٍ غاراتـهـا بالمكرهـيّـه
    .......... تبتلش به بالهجـوم وبالدفاعـي

    إتّفرعـن لا نصتـك بكـل هيّـه
    .......... واتّشبّع وهي ما هي والشباعـي

    سقمها اللي مجتويها النرجسيّـه
    ..........في سبيله كل مغضـوبٍ مطاعـي

    والبلا ياكثرهـم وسـط البريّـه
    .......... ينخرون المجتمع حتى النخاعـي

    لو يفكّر كل خـويٍ فـي خويّـه
    .......... ظنتي ينعى الا خوّه فيـه ناعـي

    لا يغرّك في لهيـب القيـظ فيّـه
    .......... وْ لا بروقه لو تشوقك بالتماعـي

    بِعْدهم سلوى النفوس الاجوديّـه
    ......... وفقدهم ينسيك تعذيـب الوداعـي
    لو تسوق الرِّجْل وسط المهميـه
    ......... ابتعد تسلم من فنـون الصداعـي

    ان قدرت تجنّـب الـدار ودويّـه
    .......... لو تعبر البحر من دون الشراعي

    بس لا تصبـح بياديهـم ضحيّـه
    .......... العرب ظاميـن للهرج وجياعـي

    .


    .

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

  4. #4
    تاريخ التسجيل
    Jun 2005
    المشاركات
    4,759

    رد: ديوان الشاعر خالد الوقيت

    يا بوحمود النايفات الطويلات .
    مدهال من مثلي ومثلك معنى

    مدهال راعين القلوب الشقيات
    اللي مع الذكرى القديمه تحنّا

    ناسٍ لهم غربي مداخيل سجّات
    فيها اقطفوا من كل ميناس فنّا

    والى اذكروها هلّت العين عبرات
    والقلب من بين المعالي قونّا

    هيهات ترجع ياابيض الوجه هيهات
    دونه لواميع السراب تثنّى

    طرفي لذكراها قضى الليل مابات
    يسهر يناجي طيفهاويتمنى

    سهر يناجي طيف هاك الخيالات
    اللي اذبحنّا بالهوىواسحرنّا

    ايامنا فيهن تقافنْ عجلات
    مثل الخيول مكاظمات الأعنّا

    غرب المعظّم ..يم هاك القرارات
    والأريل الكشاف ..للغرب عنّا

    مع رفقةٍ ن كاسبين الجمالات
    عرفٍ وبخصٍ ..ثم هيلٍ وبِنّا

    واليوم تاخذني من الهم زوغات
    وتاتيني الأفكار ..منّاومنّا

    جالس واقلّب من عنا الوقت صفحات
    مع كل صفحه اشتكي واتعنّى

    شفت الليالي كيف صارن عجيبات
    واوّل يدورنْ بس ...مايزملنّا

    اوّل نحسب انّه سحايبْ خفيفات
    نرجي مطرهنْ وانْ هفنْ ماازعلنّا

    واليوم خطّنْ في سمانا علامات
    والظاهر المقصود فيهنْ حنّا

    من لاقرا غرّ المعاني والآيات
    تقول في دنياه صعب ايتهنّى

    وقفت اطالعهنْ ..دقايق وساعات
    لما تبيّنْ غيبهنْ وانجلنّا

    واثر الحقايق واضحاتٍ جليّات
    ادنى نظر ينبيك عن غيبهنّا

    سفينة الدنيا تجوز المحيطات
    وحنّا بوسطه نحسبنّه وطنّا

    لو شنّت الدنيا على الشيخ غارات
    ماغرته ..لو فوقه الصوت غنّا

    حيثه عرف موّالها بالبدايات
    واليو ساكن خافقه مطمئنّا

    لو كان لعقول التجارب اعارات
    ولاّ الفتى ينظر بعين المسنّا

    اظن ماناطى على الجمر مرّات
    ولا نعطي التقدير للي غبنّا

    والطِّفّي اللي يعتبرنا محطات
    نصدف عنه لو قال فيناوثنّى

    وراع الوفا نجزيه ودّه مودّات
    ونعوّضه ..يوم الوجيه اخدعنّا

    وان كان في قلبه ملامه وشرهات
    ناتيه بالأعذار لو هو تجنّا

    مادام له بالقلب سابق معزّات
    نسأل عنه ونجيه لو غاب عنّا

    شنهي حلاة العمر دون الرفاقات
    خطرٍ على اللي يعتزلهم يجنّا

    خصٍ رفيقٍ عاش وياي فترات
    ووقف معي يوم النوايب عصنّا

    هذاك قلبي له حدايق وجنّات
    مهما يسوّي بالحشا مستكنّا

    هذي سوالف سقتها بالعبارات
    لولاك ماغنيت موالهنّا

    واسلم عدد برقٍ سرى فيه ومضات
    لاشافها المولع سواتك تهنّا

  5. #5
    تاريخ التسجيل
    Jun 2005
    المشاركات
    4,759

    رد: ديوان الشاعر خالد الوقيت

    .................
    اغتراااااب
    ــــــــــــــــــــــــــــــــــــــــــــــــ






  6. #6
    تاريخ التسجيل
    Jun 2005
    المشاركات
    4,759

    رد: ديوان الشاعر خالد الوقيت


  7. #7
    تاريخ التسجيل
    Jun 2005
    المشاركات
    4,759

    رد: ديوان الشاعر خالد الوقيت


    ..............
    ............
    .
    .

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •