هل تكشت وحيدا ؟

[غواص الساحل]

الكشتة لحالك مصيبة الله لا يبلانا،،
يعني لو صار شيء الله يستر، ولا جاك أحد، آدمي ولا غيره.....
واحد صعب يتصرف....

بس أحيانا للضرورة أحكام،، يعني مسافر بديرة ثانية، أو زي هيك ممكن بس نادر جدا....

[أبـو فـايـز]

شي جميل جدا, بس ما اسميها كشتة,
طلعة في الليل غالبا ماتتجاوز 3-4 ساعات
تصفي المخ وترد الروح وترجع تحس انك تغيرت

[وائل علي]

احب الكشتات مع الشله

[ناصر الدهمشي]

لحالي كشات
ماظنتي

ممكن طلعت صيد او مشتهيلي فنجال
على راس ضلع طنخه لحالي بنفس اليوم وارجع عادي لكن كشته
تاخذ اكثر من يوم ماظنتي

لو قدر الله صارلك شي محد درى عنك

يازينها مع خوياك على الدين ومستانسين

تصير لها ذكرى بالنفس وماتنساها

الله يجيب الامطار والخير ان شاء الله

[ابو نايف التميمي]

كشته من الصبح للمغرب لحالي مافييه مشكله

لكن كشته كم يوم بدون رفيق.. مستحيل جدا

[hosam99]

اذا كنت في غريه اكثر طلعاتي لوحدي يحتم عليك عملك ولا اذارجعت لديره اشطب على الوحده ولا الي في ديرتة ويطلع يكشت لحاله مع احترامي له اذا ضاقت عليك الوسيعه اقعد في بيتكم .

مشكور اخوي على الموضوع

[الصمت البليغ]

والله انها مش بطاله


انا مره طلعت بلحالي ولادرى عني احد ابد وجوالي على الصامت ولا رديت على احد وانا متعني هالحركة

قعدت يومين بلحالي ومستااااااااااااااااااااااااانس وترددت في الرجعه بعد ارجع ولا ما ارجع

انا كنت ما اايد هالشغل بس جربته الصراحه انه جاز لي


اعرف شخص يطلع اسبوع او اقل لحاله ولا فيه الا العافيه

كأنك تصف حالي ياااااااما طلعت والجوال صامت أو مقفل ,, واااااااالله يلوم اللي يلومك يوم تقول جازت لك ,,,,

بالنسبه للموضوع : أنا ماهوب بس أؤيد الفكره !! أأأأنا شخصيا من يفعلها بنفسه ,,,

أأما بالنسبه ل اللي يقول ان اللي يسوي هالحركه انه مريض نفسي ,,, هههههههه والله حزنت شوي ,,, قلت أفااااااااا طلعت مريض هههههههه لكن صدقت أخوي سيد الجو مايعرف طعمها إلا اللي جربها ,,,, طبعا بعيدا عن التحليل الفلسفي والتصنيف للبشر هذا كذا وهذا كذا ,,, والبعض يخلي الصحيح سقيم والسقيم صحيح ,,, بتجاوز كل هالامور وببدا بذكر بعض الاسباب اللي تجعل الشخص يعمل هالحركه أحيانا خلال فترات متقطعه : -

أولا : الطلعه لحالي مابتكون قريبه يعني بتصير مغطه شوي . وبيكون فيها مغامره,, وتخبط وضياع شوي,, شوي مب واجد ثم يركد الراس ,,, ثم أبدا ثاني مره أجي هالمكان من طريق ثاني . ومره تصيب ومره تخيب ويامحلاها اذا صابت وثبت المكان بالراس .>استرسلت ^_^

أيوه فأقول ان هالاشياء لما يصير معك واحد بيربشك وبيقول ضعنااااااااااااااا بنمووووووووت ,,, وبيلخبطك وبيشوش فكرك ,, وبتجلس شايل همه وهم أهله لو قدر الله وصار شي .

وكل ماجاء خط بيقول هذااااااااا هو خط البلاد امسكه يعني بيسبب أرق ,,

لكن يوم تصير لحالك : من اين مايممتها تتوكل على الله وكل ماشفت محيل كايف تجلس وتبورد فيه ,,وفنيجيل زايد عويديه وبراد شاهي ,, وتلقيط عويدات ,, وتطلق العنان لنظرك ولفكرك ولجسمك .

وسبق وقلت بويتات متواضعه جدا ,,
أضعها بين ايديكم :

دعاني طيب الذكر وتممت العزيمه ,,,, قلت المكان؟وقال ف...... الموعد
احذر توخر ترى للوقت قيمه ,,,, قلت الضيوف؟ قال منشاك والمولد
اطلع مع.....وعد لك كم خطيمه,,,, وخل الجمر في قلب عاذلك يوقد
وانتبه تختار صاحب لانخوه ولاشيمه,,,,خله وغيره من البشر ألفين يوجد
,
,,
,
الى اخر القصيده اللي فيها ذكر اسماء واشياء تخصني .

توخر = تتأخر ,,,,, عاذلك = اللي أبلشوني ومستغربينني اطلع لحالي .

والسلام ختام .

[ابوباسل111]

لا اصتكت في وجهك الدنيا ..

انص البراري بلحالك ..

ترها تبعد الضيقة .. وفيها فوائد من حيث التأمل ومراجعة النفس ..

ويا كثر ما سويتها ..

لكن تكون قريبة من الديرة وتكون ساعتين ثلاثة لا اكثر ..

ولا نستغني عن الرحلات الجماعية ..

تحياتي لك

كلام سليم اسويها مره او مرتين في السنه
تقدر تقول مراجعه لنفس

[الدبابة]

السلام عليكم اخواني الكرام

مارايك بالكشته وحيدا ؟ هل تؤيده ؟ وما سلبياته ؟ وهل له ايجابيات ؟ وما اسبابه؟

انا ارى انها غثاء وهم وليس بها اي متعه وكذلك لها عواقب وارى ان يقعد الواحدببيته اصرف مع العلم اني اعرف اشخاص يقولون لي بانهم يكشتون لحالهم

ابي رايكم ؟

وعليكم السلام ورحمة الله وبركاته

موضوع النقاش جيد تشكر عليه حفظك الله

لا أؤيد كشتة الشخص وحيداً لأسباب مختلفة منها عدم وجود منجد عند وقوع مكروه لاقدر الله (والحافظ سبحانه وتعالى) إلا إن وجدت أسباب تدعو إلى ذلك

بالنسبة لإيجابياته وسلبياته فهي مختلفة حسب تفكير الشخص وميوله ؛

بالنسبة لي من الإيجابيات ضرورة وجود من يسامرني ويساعدني ويشاركني في تجاذب أطراف الحديث وفي كل أمور الكشتة خاصة طبخ الصيد وأكله

أما السلبيات فهي الخوف من حدوث مكروه للشخص لاقدر الله ؛

وغير ذلك الافتقار إلى وجود روح التعاون والمشاركة والتآلف لأن الكشتات تقرب بين طلابها

أما عن أسباب كشتة الشخص وحيدا ؛ فأقول ان لكل شخص أسبابه الشخصية ؛

بالنسبة لي اعتقد أن الشخص يلجأ لها ربما لسوء حالته النفسية أو لمراجعة أوراقه أو لرغبته الشديدة في الذهاب في ذلك الوقت ولم يجد الصاحب

رأيي في هذا لابأس به لأن كل منا يحتاج للإنفراد بنفسه قليلا وهذا ليس عيباَ أو مرضاَ

بالعكس أراه بمثابة غسيل للنفس من الهموم شريطة ألا تزيد الكشتة الخلاوية عن بضع ساعات وإلا انقلب إلى ضده

بحفظ الله

[المجهول1]

مافيه شي احسن من الطالع للبر الحالك

انت حر نفسك مافيه احد يفرض رايه عليك

اتروح الى المكان انت تقرر الذهاب اليه

تتحمل البر الحالك

بس ابشرط انك ماتتهور في الماكن الصعبح او الاجوا الممطره

طبعاً هذا ريئي الشخصي

دمتم

[تركي0500]

الاخ اصغر مكشاتي صادق اذا كان اللي تعرفهم من نوع الشخص اللي يقوله ..

والواحد على حسب نفسيته ..

بعض الاصحاب بدال ما يونسك في الطلعة يضيق صدرك ويصير علة ..يضطر الواحد بعض الاحيان يطلع لحالة وش يسوي يقعد ما يطلع..
و الواحد بعض الاحيان اخوياه ما يقدرونه خاصة اذا كانت الطلعة بموترة او يدفع اكثر منهم او اللي معه نايمين محد يقوم ولا يزين شي لا وبعضهم يتأمر وليته زين بعد :d

اذا الواحد اللي حولة كلهم كذا يروح بلحالة افضل..

[كتاب]

لا بأس أن الانسان يخلط بين الأنواع كلها - لوحده - مع الأسرة - ومع الشباب

جميل أن الانسان يطلع لوحده بين فترة والثانية ويقعد يتأمل ويتفكر في ما حوله في هدوء وصفاء بال
فيشوف نفسه هدأت وراح ذاك التوتر والقلق وتأمل في ما حوله وهو يسبح ويهلل

كنت أطلع سابقا لوحدي بين فترة وفترة
بس المفروض الواحد لا يبعد - يظل يم الزفلت لو غرزت سيارته يقدر يطلع على الخط وهذا اللي كنت أسويه سابقا . مكان قريب من الخط بس يكون ورا طعس أو مسافة مشي ربع ساعة تقريبا

وهذا النوع من الطلعة لا يشترط يكون بعيد في البر . ساعات كنت أطلع مكان قريب من البلد بس يكون صباح الجمعة مثلا والجو حلو فيالناس كلها نايمين وما حولك أحد . وأنت يا أما على الكورنيش أو حديقة عامة ( وتكون فاضية ) تستغلها في المشي على راحتك أو تاخذ معاك فطور وشاي والحمد لله رب العالمين

أما كلام الناس فمن زمان وأنا صافط كلام الناس على جنب
أنا ولله الحمد ما أتدخل في شئون أحد و لا أحد له حق يتدخل في شئوني
وراحة البال ووساعة الصدر من حقي ما دمت لا أوذي أحد ولا أتعرض لأحد

[FT8sa]

اختلفت الآراء , اللي يقول مريض واللي يقول ماهنا ازين منها واللي واللي

ملخص الحديث إن الكشتة اكثر من يوم ماتنفع ابد لا الشرع ولا العقل يؤيدها , للسلبيات اللي ذكروها اخوان واللي الى الان ما تم ذكرها وممكن تكون مغيّبه عنّا دام انها مكروهه

اما قضية اللي يقول مريض نفسي , وبالمناسبه من خصائص المرضى النفسيين انه يطلق الأحكام جزافا , فـ اللي يقول مريض نفسي بسبب انه ماهضمها هذا مريض نفسي بعد
<<شفت كل من طقت معه قال مريض نفسي , ليه مانقول حنا بعد :d

زبدة الموضوع ان الطلعة الخفيفه ام يوم ولا ّ كم ساعه اشوف ان مافيها بأس دامها قريّبه ولا بأس بالبعد بالقدر المعقول

اما اسباب الطلقعة وحيدا ً هذي لو قيل الف مجلدات ماظنتي بتعوق معي

لكن اهمها ومثل ماقالوا الأخوان الخلو بالنفس ومشاكلها والبعد عن إزعاج المدينة وايضا ً قرقة من يتصف بالقرقه

ولا انت رايح عشان ترتاح ويجي واحد يشغل بالك , ومهما كان ماينفع يروح ثنين وكل واحد في وادي , هنا مرض نفسي <<أمزح طبعا ً

عموما ً انا افضّلها (اقصد الطلعات الخفيفه)

واما كلام الناس فـ محد(ن) يسلم منه , اللي مايعارض الشرع ولا العقل الصحيح فـ مافيه اي اشكال

اما قضية انه يعارض رأي مجموعة او فئة من المجتمع ولازم امشي عليه .. فـ منيب ملزوم برأي احد

ويعطيكم العافيه

[الستانس]

يحليلكم يا بشر :d

هههههههههههههههههه

حلوه اثر معنا بالمنتدى جن؟

[أبوعمر العجمي]

موضوع يحتاج نقاش لي عودة