15 نوفمبر 2015 - 16:514 نوفمبر 2015 - 21:27 منتديات مكشات


::::::: تابعونا على تويتر مكشات :::::::


مرحبا بكم في منتديات مكشات

::::::: تطبيق مكشات للأجهزة الذكية :::::::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية
النتائج 1 إلى 9 من 9

الموضوع: ديوان الشاعر نديم المجره

  1. #1
    تاريخ التسجيل
    Jun 2005
    المشاركات
    4,759

    ديوان الشاعر نديم المجره

    الشاعر نديم المجره
    من الشعراء المتميزين
    قصائد جزله ومعاني راقيه ساهم مع البقيه
    في اثراء خيمة الموروث الشعبي في مكشات
    بالعديد من القصائد المميزه
    وهذه بعض قصائده
    نتمني منه المزيد
    .




    .ياخوك ياكثر البلا والمصايب
    --------سود الليالي بالغثا مستتمه
    أن عشت ورتك العجب والعجايب
    ---------عزي لمن سود الليالي تخمـه
    إلى اقبلت ترقيك متن السحايب
    -----------وإلى ادبرت ترديك في غب جمه
    باقبالها تفك عسر النشايـب
    ----------وبادبارها ترمي عليك المطمـه
    لعاندت تصبح تقل وجه شايب
    -----------ولطاوعت0 طفلٍ يغاغي على امه
    عيت تطاوعني عساها الذهايب
    --------------قلبتها في كل صوبٍ ويمه
    لابـد ما يـومٍ تـهـب الـهـبـايب
    ----------وتجلي همومٍ بالحشا مدلهمه

    (نديم المجره)





    .





    إلى ضحكتي تضحك الانس والجان
    -------------وإلى زعـلتي يزعـل الكـون كـلــه
    يادرةٍ عــزة عـلى كــل الاثـمـــــــان
    ----------------بالوصف عن كـل الدرر مستـقـلـه
    يافـرحــةٍ تـبـسـمـت بـيـن الاحـــزان
    ------------------يافــرجـةٍ بـيـن الـشـدايد أمــطـلــه
    ياكـف شـهـمٍ مـدهـا يــم غــرقـــــان
    ------------------باخـر رمق من تحت الامواج تـلـه
    يادمعة الـتـوبـه عـلى خــد نـدمــــان
    ------------------تـحـدرت يـومٍ سـمـع خـف من الله
    ياضـوح بـرقٍ لاح بـعـيـون بــدوان
    ------------------تـباشروا عـقـب السـنـيـن الـمـغـلـه
    ياجـرعةٍ عـذبه على حـلق عـطشان
    -------------------أمن الضما عجزت أعـظامه تشلــه
    ياصـحـةٍ جـت مـقـبـلـه يـم وجـعـان
    ------------------أربـع سـنـيـنٍ ثـاويٍ فـي مـحـلـــــه
    يالـذة الـغـفـوه عـلى عـيـن نـعـسـان
    ------------------مـره تـلف الـعـيـن ومـره تـفـلـــــه
    يافـيضةٍ عـشبه غـدى اشكال والوان
    -----------------------بالسدر عن شمس الظهر مستظلـه
    يانـسـمـةٍ تــسـلـلـت بـيـن الاغـصان
    -----------------------يـاوردةٍ مــن شــمــهــا مـايـمـلــــه
    صرتي ورب البـيت للـزين عـنـوان
    -----------------------كـنك شـعـاع الشمس والناس ظـلـه
    لو قـسمـوا زينك على كـل الاقــران
    --------------------كـفى وفـاض ومابـقي شـَيـَنْ لـَلـــْه
    ماهـمـني غـيرك مـن العالـم انـسان
    -----------------------من بـيـنهم وسـط الحشا مسـتـحـلــه
    يارب سـهـل دربها ويـن مـاكـــــان
    ---------------------وخـل الحـياة بـوجـهها مـسـفـهـلـــه
    يارب وفـقـهـا عـلى كــل مـيـــــدان
    --------------------يارب لاتـجـعـل حـيـاتـه مـمـلــــــه
    أعـيـذهـا بالله مـن كـل شـيـطــــــان
    -------------------واعـيـذها من كـل نـفـسٍ مـضٌـلـــه
    أستغـفـر الله واحمده عـالي الـشــآن
    -------------------------أن شـاءَ 0 يغـفـر كـل ذنـبٍ وزلــه



    .



    مناسبة القصيده :

    كنت ازور مدينة عرعر بشكل مستمر نظرا لوجود والدي بها وبعد وفاة الوالد (يرحمه الله) أنقطعت عن زيارتها لفتره طويله وعند عودتي لها والمرور على بيتنا ( الذي كنت اراه جميل قبل وفاة الوالد) أكتشفت انه لم يكن جميل بتاتاً 00 فهاجت مشاعري وقلت هذه الابيات التي أرجواان تحوز على رضاكم 00000









    يا دار كنتي جنتي من لظى النـــــــار
    واليوم ما لك في حشا الصدر قيمـــــــه
    غلاي لأهل الدار وإلا أنتي أحجــــار
    من عقب ما رآحوا غديتي عديمــــــــه
    ما لك غلا بالقلب يا كود تذكـــــــــار
    أبكي إلى شفت الرسوم القــديمــــــــــه
    أتذكر أهل الدار واللي بها صــــــــار
    عقب العمار أمست خراب دميمــــــــه
    أثر الغلا يقلب حجر عرعر أزهــــار
    يقلب عجـــاج الجــــو بالعـــين ديمـــه
    حتى سوافي رملها تصبح أمطـــــــار
    تصبح كما غيـــمٍ تناثر رزيـمـــــــــــه
    لجل الغلا تعمى عن العيب الأبصــار
    وفعل الردى يصير بالعين شيمـــــــــه













    نديم المجرة



  2. #2
    تاريخ التسجيل
    Jun 2005
    المشاركات
    4,759

    رد: ديوان الشاعر نديم المجر


    لا تفرح إن الوقـت أسعدك وأعطاك
    لابــد مـا ســود اللـــــــيالي تبكيـــك
    دنــــــيا تقلـــب علــها مـــاتــولاك
    تمسي عزيز وتصبح من الصعاليك
    إلى أقبلت تخفي عيوبك عن أعداك
    وإلى أدبرت تظهـر عيوبك لأهاليـك
    اغنم من صروف الدهر كانه امداك
    قبل اللحد عن ظاهر الارض يخفيك
    وترى التشكي للمخاليق يشــــــنـاك
    * يحط من قدرك ويفـرح أمـــعــاديك
    وكـثر التـشره يجعـل الناس تجـفاك
    * ولا عــاد تلـقى بيـنهـم من يـخـاويك
    والـجـاهل احـذر لاتجـادلـه يـبـلاك
    في كـلـمـة بين الـمخاليـق تـعـمـيـك
    واحـذر تـهـزا يـافـتـى بخلق مولاك
    تـشـوفـهـا ياقـرب قـريـبٍ يـوالـيــك
    ولاتفرح بزودٍ على الحق وان جاك
    زودك ترى نفصٍ على حق ذولـيـك
    لا تأمـن الدنيــا تـرى الوقـت فتــاك
    لجا الفـدر كثـــر الحـذر ما ينجيـــك






    الطـفـل لامن خاف أمه تخـمـه
    تحـمـيه مـن شــر الـزمـان وبـلاويه
    بس البلا لاصار خوفه من أمه
    وين المكان أللي على الأرض ياويه
    جيت التجي به واتذرى بكمه
    من بين خلق الله جيت التجي فيه
    لكن لقيت الداهيـه والمطمـه
    ان البلا اللي صابني من اياديـــه

    .


  3. #3
    تاريخ التسجيل
    Jun 2005
    المشاركات
    4,759

    رد: ديوان الشاعر نديم المجره

    تكفين عن برد الشمال أحضنيني
    خليني أغفى بالحضن مثل الأطفال
    تكفين من دافي حنانك عطينـي
    البرد عذبني وليل الشتـا طـال
    مدي لي احبال الرجا ساعدينـي
    زودٍ على ما بي علي الدهر مال
    يابنت من وهم الخيال أنقذينـي
    أبغى أحدد موقفي والصبر طـال
    لمن طريتي غصب تبكيك عيني
    ما أقوى أرد الدمع يابنت لسال
    إلى متى عن وصلكـم تمنعينـي
    الهجر عقب الوصل يابنت قتـال
    لا تبعدينـي دام قلبـك يبينـي
    قطعت لجل أعيونك الاف الاميال
    أما عطيني الحـق وإلا أتركينـي
    أعيش من بعدك على هافي الجال

  4. #4
    تاريخ التسجيل
    Jun 2005
    المشاركات
    4,759

    رد: ديوان الشاعر نديم المجره


    ياقـايلٍ تكــفى00 بتكــفى شـقينـــا *** ياما لجـل تـكـفى لقـيـنا الـمضـــــــرات

    ياما لجل تكــفى نـزلنـا ورقـيـنـــــا *** وياما تجـشمنا الدروب الصعـيـبـــــات

    كـم ليلـةٍ لعـيـون تـكـفى ســرينــــا *** لعيونها نسري على غـيـر مشهـــــات

    ياما حـمـلـنـا ارواحـنا في يديـنــــا *** والعـمـر مايـاقـاه كـثـر الـمـــــــدارات

    كـم غـاليٍ من شـان تكـفى عطينـا *** نعطي ولانحسـب حساب الخســــارات

    تـكـفى تـرى تـكـفى دمـارٍ عـلـيـنــا *** تكـفى دمار اهـل الـكـرم والمــــروات

    وان قـلـت تكـفى قـلت ابشر وجينا *** نجـيـك لو دونك بـحـورٍ غـــزيــــــرات

    نـســوق لـجــلك كـل شيٍ ثـمـيـنـــا *** نجـيـبـهــا بالـمال والا الـوجـاهــــــات

    عـلى الـبــلا نـصـبر إلى من بلينــا *** نصبر على شيـل الحمول الثـقـيـــلات

    لاتـسـتـغــل الحـلم والـطـيب فـيـنــا *** الحـلم له حـــزه وللـطـيـب حـــــــزات

    كـم جـاهـلاٍ لعـيـون تكـفى نصيـنــا *** وكـبرت بعـين الجاهـلين التفاهـــــات

    الـجـهــل أعـيَـى كـل طـبٍ مكـيـنـــا *** من عصرادم لـين عصر الحـضـارات

    اخــشـى عـليكـم سـاعــةٍ تعترينـــا *** نسرج بها خـيل الجهـل للـجـهــــالات

    دام الـدواء جـهـلٍ عـلى الجاهلينـــا *** نجهل جهل اعوام في ظـرف ساعات

    ياللي تـقـول الـحــزن خـيـم عـلينــا *** الحـزن بعض احيان للـنـفس ملهـات


    (نديم المجره

  5. #5
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر نديم المجره

    هذه القصيده موجهه للاستاذ / سعودبن عبدالرحمن الكردي قائد رحلتنا في اجازة الربيع1431هـ الى فياض شعيب الخشبيه (50كشرق لينه) ورغم التوسلات الا انه رفض تمديد الرحلـه.
    آمـل ان تنـال استحسانكـم :



    ياسـعـود تكـفى لايفـكـون الاطــنـــاب
    ياسعـود تكـفى قـلهـم بـس لـيـلـــــــــه


    نـفـسي تـشـلع كـل ماشـلع مـنـســــاب
    طـواري الـفـرقا عـلـيـنا ثـقـيـلـــــــــه


    يـومٍ طـويـتـوا فـرشـكــم خـافـقي ذاب
    كـن الضماير وسط حـر الـمـلـيـلـــــه


    ياسعـود شفي من هـوى البر ماطـاب
    خلوا حـبـيـس الـدار يبرد غـلـيـلـــــه


    يكفـيه من طـول السنه صكت الـبـاب
    ويكـفـيه من طـول السنين الـمـحـيـلـه


    خـلوه يسـلى عـن هـمـومه والاتـعـاب
    ويـسـج رجـلـه بالـفـيـاض الظـلـيـلــه


    والصبح يشرف له على راس مرقاب
    ويـشـم ريح الشيح وسـط الـخـمـيـلــه


    خـمـيـلةٍ خـضـرا تـقـل مابهــا تـراب
    فيها الزبـيـدي مثل راس الـنـثـيــلـــه


    وريح البختري والنفل وسط الاعـشاب
    يــشــفـي قـلـوبٍ بالـحــنـايـا عـلـيـلـه


    وباللـيـل حـول الـنار تلـتم الاصحـاب
    وتـبـدا الـسـوالف والـعـلوم الجـمـيـلـه


    وكـن الكـواكـب فوقـنا والقـمـر غــاب
    جـمـرٍ تـنـثـر في مـهـب الـمــسـيـلـــه


    بالبـر نـسـلى عن هـوى تلع الارقـاب
    اللي عـلى شـوفـه نـسـوق الـجـلـيـلـــه


    ونسلى عن هـمـوم المدينه والانـشـاب
    ومـن لا سـلى بالـبـر سـيـلٍ يـشــيــلـه


    يالله طـلـبـتـك يالــولي رب الاربــاب
    تـديـم انـعــامٍ عـلـيـنـا جـــزيـــلـــــــه


    وتغفر ذنـوب اللي من الذنب قـد تـاب
    يارب وفــقــنـا لــدرب الــفــضــيــلـه


    والخاتمه صلوا عـلى سيد الاحـبــاب
    رسول رب البيت راعـي الـوسـيـلــه



    احمد بن عبدالرحمن العريفي
    (نديم المجره)

  6. #6
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر نديم المجره

    المناسبه:
    في يوم الخميس الموافق 4/3/2010 اتصل علي الاخ / سعود الكردي(ابويحيى) والاخ / غيث الغيث من منطقة (الاقرع) و(الحنظليه) بين عرعر والجوف وذكرا لي انهم الان يستمتعان بمناظر ورود الربيع بما في ذلك ورود الديدحان.
    وبعد المكالمه مباشره ولدت هذه القصيده التي آمل ان تنال استحسانكم:



    هـنيكم ياللي (بالاقرع) تدوجـــون
    بين الـزهـور اليـانـعـه والـنـديـــه




    وانا ادوج بالخبر تقل مـجــنـــون
    ولا لي على ترك الخبر مـقـدريــه




    ياغيث قلبي في هوى البر مفـتون
    وعيني تمنى شوفة الـحـنـظـلـيــه




    ياغـيث تـكـفى لبويحيى تـقـولـون
    ضاقت على ولد العريفي الـفـضيه




    قولوا خويك حـالته دون في دون
    وجـروح قـلـبـه يابويحيى خـفـيـه




    قولوا حبيس الدار لازال مـغـبـون
    من فـكـت الاطـنـاب ذيك الـعـشـيه




    والله مانسى يوم للـفرش تطـوون
    والحزن ضافي تقل بشت اجوديـه




    ياشـيـن ذاك الـيـوم يومٍ تـشــدون
    عـزالله انه صـار يـوم الـوذيــــــه




    نفسي تمنى مجـلسٍ به تـقـهـوون
    مع تمرة اهل الجـوف والشاذليــه




    وسوالفٍ يطـرب لها كل مـحـزون
    بالبر تـسـلى كـل نـفـسٍ شـقـيــــه




    ياسعود ورد الديدحان لاتـوطــون
    عـنـدي تراها يابويحيى حـظـيــــه




    صبوا عليها الماء قبل لاتـعـــدون
    خلوها تزهر بالـفـيـاض الـعــــذيه




    وان كـنـتـم لذيك الليالي تـحـنــون
    انا حـنـيـنـي تـقـل صـوت رعـديه




    قولوا . ولا للـرد منه تـحـــــرون
    إن رد . رد بـفـعـل . ذيب السـريه




    والخاتمه ياللي حضرتوا تـصلـون
    عـلى رسـول الله خـيـر الـبـريــــه



    احمد بن عبدالرحمن العريفي
    (نديم المجره)
    ***********************
    ***************



    وبعد المكالمه ارسلت لهم الاربع ابيات الاولى من القصيده.
    فرد الاخ / سعود الكردي بهذه القصيده:


    سـلام ياللي للـشـمـال يـتـمــنــــون
    اهـل الـقـلوب الـصـافـيات الـنـقـيـه



    لو انهم كانوا على السيف يمشون
    لا شك رغبتهم هوى الـحـنـظـلـيـه



    يبون عـقـب العـصر للجال يرقـون
    وعـقـب المغـيـب الـدلة الـشاذلـيـه



    يالـيـتـهـم ياغـيـث يـمـي يــمـدون
    ولشوفهم ياغيث روحـي شـفـيــه



    واسري بهم بالليل لارضٍ يحـبون
    يطرق بها الغـربي فـيـاضٍ عـذيـه



    القلب يطرب به ولو كان محـزون
    واحلى ليالي العمر روحه وجـيــه



    سعود بن عبدالرحمن الكردي

  7. #7
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر نديم المجره

    هذه القصيده عزاء بالمرحوم له بأذن الله / طارق بن ابراهيم بن عبدالرحمن العريفي




    وقفت عند القبر والقبر حاويــــــــه
    ..........................................وانا الآسى والحزن كله حـويـتـــه


    وقفت اطالع تربة القبر وابكيـــــــه
    .............................................وماحـدٍ كـثر طارق قبل ذا بكـيتـــه


    بكيت من تبكي اللـيالي مبـاديــــــه
    .......................................بكـيت من هـو هـقـوتي لهـقـيـتــــه


    والله لضم اتراب قبرٍ ثوى فيـــــــه
    ........................................والله لبين كـل حـسٍ خـفـيـتـــــــــه


    ياقبر لو تدري من اللي انت طاويه
    .......................................كـل الكرم والطيب بلحـدك طـويـتـه


    يارب تلهم بالصبر قلب واليــــــــه
    .......................................قلبٍ يقـطـعه الآسى لطـريـتــــــــــه


    يالله طلبتك من لظى النار تنجيــــه
    .......................................يارب تجعل جنة الخـلد بيـتـــــــــه




    احمد بن عبد الرحمن العريفي


    (نديم المجره)

  8. #8
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر نديم المجره

    احب عرعر واهـل عرعر .. واحب من هو سكن فـيهـا


    واحب من هو عليها مـــر .. واحب من حب اراضيـهــا


    من حبها اشوفها كـالـــدر .. يازينها بعـين مغـلـيـهـــــا


    والبوصله يـمـهـا تـشــــر .. سبحان من هو مـقـديهـــا


    عسى الشمال كلها تمَطـر .. مزنٍ من الغيث يسقـيهـــا


    والديدحان بارضها يزهر .. يضفي عليها ويكـسيـهـــا


    واليٍ ولاها سلالة حـــــر .. بالعدل حصن مبانـيـهــــا


    بالطيب اطيب من العنبر .. ياحضها بطيب وآلـيهـــا


    سيفٍ سليلٍ بوجه الشـر .. وخيرٍ على كل اهاليهـــا


    تواضعه بالشمال يذكــر .. كالشمس محدٍ يخفـيهــا


    عساه يسعد بطول العمر .. مع صحةٍ يهتـني فيهــا



    احمد بن عبدالرحمن العريفي
    (نديم المجره)

  9. #9
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر نديم المجره

    من دون ولد الطريفي حمود *** جنب عن البر ودروبــه
    انا اشـهــد انه سلـيـل فهـود *** ناره مع الفجر مشبوبـه

    لـو الـحطـب مابـقـابه عـود *** ولع لك النار في ثوبــــه
    يجـود بالـنـفـس والمـوجود *** يعطيك ماتحمل جيوبــــه
    فيـه الـوفـا والـنـقـا والجـود *** انقا من طعوس مشذوبـه
    يلـومـني في غـلاه مـقـرود *** اسود من الصاج عرقوبه

    (نديم المجره)

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •