موضوع عن الفتك ونطلب رأيك

[الجبخان]

السلام عليكم
تبون كلام الحق واليقين شيك على صفحه الاعطال وشوف تعدد الاعطال وكثرتها مابين التويوتا والنيسان
واترك كلام الناس مع احترامي لجميع الاراء والردود حتى رأيي
بس اوصيك اذا فتحت صفحه النيسان لاتنسى تفضي نفسك لجرد المشاكل والخرابات والله يعينك



واما رايي تويوتا وبس
والله من ديار عبرناه والله من وعر وطيناه والله من شي سويناه بالتويوتا مايسويه المجنون ويبقى ويمشي ويوصلك

[سفاري 9]

الفتك من السيارات اللي تغدر وتورطك وانت في بر ولامكان بعيد واسال مجرب
كم مرة سحبناه فوق 200 كيلو من عطال كهرب
لدرجه ان فيه ثلاث كتاوتات فالدرج احتياط حقت طرنبة البنزين
مع ذلك لو قطع غياره زي قطع التايوتا وتحمله زي التايوتا
والله لزيد على سعر التايوتا فوق 20 الف واشتريه
بس الوكيل مايشجع

[صدى الاطلال]

للرفع!!!!!!

[التعـ King ـديل]

انا نيساني ومريت بتجارب فاشله مع التويوتا ورجعت للنيسان من جديد

امتلكت ولله الحمد 6 فتكات 2003 و 2004 و 2005 و 2007 و2008 و 2009

كل ماذكرته في موضوعك لم اجده في هذه السيارات السته رغم اني من الناس اللي اسافر كثير لمناطق بعيده يعني عادي الموتر يمشي 4000 كيلو خلال يومين او ثلاثه ومن الطبيعي اغير زيت في الشهر مرتين ماصادفني اللي تتكلم عنه ابد مااقولك كذا علشان اثبت لك ان السياره ممتازه لا ولكن من واقع تجربه بينما تجاربي الفاشله التويوتا هدد 94 و هدد 97 و هدد 2003 و هدد 2004 و هدد 2005 وفكسار 2007 وهدد 2013

على طاري التفكك والقربعه تتصورهدد 2013 فاكه وكاله ماشي 6000 ديكوراته تطقطق ؟؟؟؟ بينما الفتك جالده وماشي فوق 250 الف ماشفت هالشي فيه

[سيد النشاما..]

انا جربت فتك 2005 قير تماتيك وحساس دعسة وكتاوت حساس دعسة ورد الفيش وهات الفيش رجعت وبعت الموتر جلس معي فقط 3 شهور وقلت اباخذ قير عادي يمكن اقل كهرب
واخذت فتك 2009 قير عادي ممشى قليل ثم قطع قلبي وحمض بكبدي اهو وطرمبته وهالكتاوت اللي اهم حاطينه تحت الطبلون ..
دينمو الكهرب تم استبداله بجديد
كمبروسر المكيف صلحته ثلاث مرات وكان الموتر وقتها ممشاه حول ال 200 الف
النتيجة ركبته للسطحة مرتين وسحبناه للورشة تقريبا 4 مرات علشان فيش او كتاوت واشياء زي كذا مجرد يفوت كهرباء يمنع السلف من التشغيل
او يمنع الدعسة من عزم الدوران وتحرك السيارة بالشكل الطبيعي وآخر شي صار فيش الطرمبة فيه تفويت كهرب
ميزته الوحيدة انه يجي دفرنسين والموتر شكله كلاسيكي مناسب جدا للبر والمقناص
والباقي خرييط

وكلامي هذا من تجربة ولا عندي مراعاة للموتر .. اشتريت الفتك للبر والقنص ولكن مايجمل الحقيقة راعي توهيقات
بينما للخط والسفريات اشوفه مناسب .. وغالبا مايمدحه أهل السفر والخطوط وأهل المكاشيت الخفيفة هذا مالاحظته والسلام

[منصور ع]

لم ولن يتفقوا على سياره وحده ...

[ظلال السحاب]

بالجيوب الفتك للصحاري مابعده ولا قبله ، نشاط وخف وهو الوحيد اللي يطلع نفسه بنفسه إذا ثولث

وهذا عن تجربة نيسان وتويوتا ... ومايقنع الا من جرب

[حمود 1430]

السلام عليكم

مجرب...البترول من موديل 97 الى 2008فتك
قطع الغيار نار...
الكتوات الي تحت الدرقسون توقع خرابها باي لحظه..تعطلت بالبر بسبتها..حتى اتصلت على احد ملاك البترول الفتك واخبرني بالمشكله لانها حدثت معه بسيارته 2005فتك ونصحني بتغيير كتاوت لونه اخضر وغيرته والا لان له 2سنتان ولله الحمد
الرجه موجوده

[krom_7rb]

السلام عليكم ورحمة الله وبركاته
(الكلام اللي باقوله من واقع تجربه)
باترول98...
ماشي الان فوق 450 الف
الحمدلله لا مشاكل في الكهرب
ولا تفكك ديكورات ولا قرقعه
في البيبان مثل ماتقولون
مع ان استخدامي(للجبال)
راحه مافيه زيها في باقي السيارات
ولا حتى صوت هواء...
باترول 2001...
مع ولد عمي مشى(ماشاء الله)
فوق 900 الف....
وهو راعي مقناص وطرد ارانب في الحرار
ولاواجهته اي مشاكل...
ومولف له افياش كهرب ولمبات وثلاجه
....
من الداخل نضييييييف حيل
ماشاء الله تبارك الرحمن
.............................
بكل اختصار ...
لا مشاكل كهرب
ولا هربده مثل مايقول بعض الناس
______________________
الهربده سمعه قديمه للنيسان وتناقلوها الناس
___________
هدد2001
مع واحد من اقاربي لايقنص ولاشي
الداخليه متكسره ومهربده
وتسمع صوت قرقعه في البيبان
مشاكل في الكهرب
القزاز بعض الاحيان ينزل وبعض الاحيان لا
يعني على كيفه
الثلاجه خربانه ....
المسجل خربان ...
العدادات خربانه ...
صوت هوا لامشيت فوق 100
وفوق هذا كله ماله قطع...
بالله تصدق ان هذي المشاكل في تويوتا
_______________
جكسار 2013
مطلع من الوكاله ...
اذا اخذت به بطناج اسمع القرقعه
تحس انه بيتفكك
________________
اختصار الموضوع
كل واحد واهتمامه بموتره
وانت احكم من تجاربي
عشان تعرف ان النيسان موتر مافيه مثله
(رأي)

[صدى الاطلال]

للامانة ملكت ثلاث سيارات جيوب نيسان
2 ربع بابين الاول ربع موديل 98 مكينة 4500 والثاني ربع 2009 فاكه وكاله مكينة4500
1 طويل 4أبواب شريته ماشي 30الف مكينة 4500
وللامانة سيارات تنومس وتبيض الوجه ، يعيبها ضعف العزم فقط ، ويعلم الله ان الربع 98 جلدته 5 سنوات لاأرقب فيه الا ولا ذمة وماعمره خذلني أو توقف بسبب عطل نهائياً.
وهذا المتصفح خاص بالسؤال عن مكينة 4800 للباترول ، ولا يوجد مشكك في قوة هذا المحرك ، ولكن السؤال عن اعتماديته وتحمله.
بمعنى هل يتحمل الاعمال الشاقة جداً كخطوط وسفريات كاستعمال عادي مو تفحيط وهربدة واضافات وووو مع مراعاة الصيانة الفردية له من قبل صاحبه كزيوت وسيور وبواجي وووو بغض النظر عن استغلال الوكالات أو انعدام الوكالات نهائيا في بعض المحافظات ، لانني من خلال متابعتي للردود وجدت من يثني من خلال تجربته ولكن تجربته على مكينة 4500 وهي غالبا لايوجد بها أي نوع من التعقيدات الكهربائية ومتعلقاتها كحساسات وقسامات وووووهذه المكينة رغم ضعفها الشديد الا أنها أثبتت وجودها كجودة واعتمادية وتحمل.
فالسؤال حول مكينة الفتك الكبيرة4800 نظرا لكثرة الحساسات والدوائر الكهربائية.وهل تحمله مثل المحرك الغلبان 4500 ، والا بعد كم سنة تبدأ الاعطال ومشاكل الحساسات والافياش والكتاوت وووو
جزيل الشكر.

[تكفوووون]

الموضوع قديم جدا قبل لا اشتري الفتك ب 4 الشهور
موتري سوبر سفاري موديل 2005 شريته سنة 2008 و كان ماشي و قتها 63ألف و حاليا ممشاه اكثر من 450ألف ولو كان الفتك 2015 ينزل بيج من داخل كان بعت موتري و شريت موديل السنة
اتحدث عن تجربتي لانه الوضع مختلف عندنا في الامارات قطع غيار الفتك رخيصة جدا و مثال على ذلك في نهاية الشهر الماضي كنت رايح لأبها و انا طالع من الخرج دعمني واحد و شرد و انكسرت عندي المنظرة الجانبية يوم وصلت لأبها سألت عن سعرها ب 480 قبل و قبل لا اشتريها اتصلت على محل قطع غيار في مدينة العين حصلتها ب 315 فرق كبير و قس على ذلك باقي القطع
و اللي يقول الموتر فيه و فيه انا اللي اشوفه بأن الناس قامت ترجع للفتك و بطلب أكبر و اكثر من أول و دليلي أي واحد يقدر باخذ له لفة على معارض العين و ابوظبي و ايضا يشوف التريلات المحملة على خط الغويفات تصدير للمملكة
المشكلة الوحيدة اللي اعاني منها في الفتك اصوات الديكورات الداخلية فقط

[مكسر الشداد]

الفتك سياره لا يعرف قيمتها الا من اقتناها جديده اما تروح وتاخذ لك قرنبع من المعارض مال منه الي باعه ثم تجلس تتذمر منه فهذا غير منطقي ،،،،
كل السيارات تعتمد على الاستعمال كيف،،
الفتك مريح هادي مع الخط نشيط يتحمل في الصحرى والوعر ،،مع الوقت مايٱذي بمقصات،، وجلد مقصات
الموتر بطنه مرتفع صداماته تتحمل صدم الرمل والشجر ،، والكثير من الميزات الي مايقدرها الا راعي البر صحيح ،،،،

[abutalal200]

السلام عليكم
أخي الكريم وفقك الله لما يحب ويرضى على عيني وراسي والله كل كلامك وما أقول من كلامك شيء نهائي
أنا ملاحظ موضوعك من عام 2008 ونحن الآن في 2015 موديلات 2016
على العموم ما ألحظه من تفاعل الأخوة ( لا تعصباً ) انهم مره متحمسين وانا يمكن أكون أحدث واحد فيكم لحد الآن لأني توي داخل عالم النيسان اللي ما كنت مقتنع فيه عشان الهربده والحراره نهائي
توي شاري لي فتك 2005 سوبر ( على قدي ) ماشي 70 الف بس ما شاء الله الموتر كان مخزن وكنت خايف منه لدرجة ما تتصور وخصوصاً لمن كانت سيارتي السابقه اف جي 2009 وفكرة اني أغير من تويوتا لنيسان كانت مره مزعجتني لكن انجبرت والله عشان ضيق الاف جي وما لقيت سيارة غير النيسان وهذا ثالث شهر السيارة معي يعني شهادتي مجروحه فيه بس بقول لك شيء والله والذي لا إله إلا هو لو يصير اللي يصير ما عاد أفكر في غيرك يالفتك ولا أستخدم غير النيسان ماهو تعصب بحكم اني مستخدم جديد بس يا أخي سيارة مريحه جداً وقوية وعملي وكل كلام الاخوان اللي قالوه يريح ويثلج الصدر فعلا يخليني أقبل وبقوة على النيسان الفتك فتك وأنا أخوك لو قالوا اللي قالوا هذا أنا ماخذ موديل قديم ولكن الحمد لله وفقني الله انه نظيف لحد ما وليتك تدري بس والله خذيته من راعيه الأول ولا أدري وش فيه ومسكت فيه خط على طول فوق ألفين كيلو كفراته منتهيه وحالته حاله لأنه كان واقف ومشيت عليه مشي ما تتوقعه في البدايه كنت متخوف سيارة ما أعرفها وكفراتها يعلم فيها الله وما إلى ذلك بس أنا اشهد ما شاء الله موتر يعطيك ويطربك بالخط وسياره تتكل عليها
للحين ما غيرت فيه شيء ولا شكيت من شيء واستخدامي في النفود واجد على هون سيارة جباره بمعنى الكلمه هذا وانا ماخذ 2005 فما بالك لو خذيت جديد وش بيصير يا شيخ بإذن واحد احد ما أغير غيرها سيارة من احدث للأحدث .. اعذرني اخوي كلامك ما أشكك فيه وصحيح ميه بالميه وتقبل مروري ولك فائق احترامي بس هذا هم الشباب قالوا اللي عندهم ومن واقع خبرتهم
اشكرك