يعني مانلقى الحطب بالسوق ؟! وإلا وش السالفة؟!

[حفرلوجيا]

سلام يالربع
أمس نشرت جريدة الجزيرة خبر عن تعميم من سمو وزير الداخلية لأمراء المناطق باحكام الرقابة على مزاولة الاحتطاب في كافة مراحله بما في ذلك النقل والبيع.
وإليكم نص الخبر الذي نشر في الصفحة الأخيرة من جريدة الجزيرة :

(( وجه صاحب السمو الملكي الامير نايف بن عبد العزيز وزير الداخلية أمراء المناطق بضبط أية مخالفة تتم في مناطق الغابات والمراعي بقطع الأشجار والشجيرات، ومن يقوم بنقلها أو من يقوم بعملية التفحيم أو نقل الفحم بغرض الاتجار به لأهمية المحافظة على الغطاء النباتي الطبيعي من التعديات وذلك بالتعاون مع وزارة الزراعة وممثلياتها في المناطق والمحافظات المختلفة.
وشدد سموه الكريم على اهمية احكام الرقابة على مزاولة الاحتطاب في كافة مراحله بما في ذلك النقل والبيع.
ويأتي هذا التوجيه مع قرب بداية فصل الشتاء حيث يزيد الطلب في المواسم الباردة على استخدام الحطب والفحم المستخرج من الأشجار في مختلف المناطق بالمملكة.
تجدر الإشارة إلى أن مجلس الوزراء أصدر قراراً يحمل الرقم 129 في 19/5/1423هـ يقضي بإعفاء الحطب والفحم المستورد من الرسوم الجمركي ))

أحد عنده علم أو تفصيل أكثر .. خاصة في مسألة البيع .. يعني نبي نلقى بالسوق وإلا لا ؟!
وسلامتكم

[صقر]

كلما دقيت في قاع وتد من ردا الحظ يطلع لي حصاة

ترا توني باني ملحق للشتاء وناوي احط فيه وجار وعلوم ارجال.

...................................

[عروان]

السوق مليان

والتعميم هذا كل سنة يطلع.


ماحولك أحد.

تحياتي

[عبدالعزيز الدباسي]

مثل ما قال اخوي عروان كل سنة ينزل تعميم بهالخصوص ، ،

وتأمل التعميم زين تجد انه يقول ( بضبط أية مخالفة تتم في مناطق الغابات والمراعي بقطع الأشجار والشجيرات، ومن يقوم بنقلها أو من يقوم بعملية التفحيم أو نقل الفحم بغرض الاتجار به )

وهذا ينطبق على الذين لا يحملون (مهنة حطاب) فأي مخالفة بقطع الاشجار لغير هؤلاء سوف يعرضون انفسهم للمسائلة .

هذا من ناحية ، والامر الاخر لو تمر على سوق الحطب وتشاهد اكوام الحطب عندهم ، ومدى ارتفاعها ، ( تقول برج الفيصلية) كان تثق مئة بالمئة ان الحطب كافي لخمس سنوات قادمة.

اضافة الى قرار مجلس الوزراء القاضي بإعفاء الحطب والفحم المستورد من الرسوم الجمركي ، سوف يزيد من كميات الحطب المتوفرة في السوق ، لان هناك تجار (جدد) سوف يدخول سوق الحطب ، ومثلك عارف فيه تجار ما يصدقون باي مشروع ناجح الا ويطبون فيه (وهذا اللي مخليهم فوق فوق - ما يقولون اخلاقيات وعادات-) .

والحين اقولك حط ببطنك بطيخ صيفي ، وحط بنارك سمر صومالي .

[جميل جمال]

صبحكم بالخير يالربع ..

والشهر عليكم مبارك ..

حفرلوجيا اخوي رح لسوق الحطب وتلقى اللي تبي ...

انا امس شارين لي سمر وش زينه من سوق الحطب اللي بالرياض ..

وسعره ما مثله بعد .. مير الحق على نفسك قبل لا يجيك البرد الصدزي همن تظرب الاسعار ..

[desprado]

لا تخفون الحطب واجد وفي اماكن مخصصه للاحتطاب مسموح فيها وفي ناس عندهم رخ حطابة

[حفرلوجيا]

الأخوه صقر .. عروان .. شقردي .. جميل جمال .. desperado .. شكرا على هالايضاحات والمعلومات .. والتحليل الإقتصادي من أخونا شقردي..

[الأشهـــــب]

أحب أطمن الإخوان إن هذا القرار حبر على ورق ، ومثل ماقالوا الإخوان هذا القرار مثله مثل كل سنة .
كما أحب أن أحذر من بعض االباعة الغشاشين والذين ينتشرون بكثرة هذه الأيام في أسواق الحطب .

وللذين يرغبون بشراء حطب هذه السنة من نوع السمرالممتاز جداً ، ولمعرفة التفاصيل أكثر أرجو مراسلتي على البريد الإلكتروني alashhb@hotmail.com
أو عن طريق الماسنجر : alashhb@hotmail.com

وتقبلوا أطيب تحياتي ،،،،،،،،،،،،،،،،،،

[هواوي]

الا وش رايكم يا شباب في حل لهلمشكله

وهواستيراد الحطب من الخارج يعني

سفينه وحده تعبي اسواق الرياض كلها

عموما بالنسبه للموضوع الله يستر لا يتشددون على الحطب لان التشدد ما يصير الا اذا صارت مشاكل فيطلعون حرتهم في الاشياء البسيطه

عموما لو منعوا الحطب اتمنا يفتحون عياده زي الامل لمعالجه مدمني رائحه السمر والرمث والارط وبقيه الشله من الاخشاب الكريمه ((على وزن الاحجار الكريمه ))

والله يا شباب اني اذا شميت السمر انه يتفتح في مخي اشياء ما اادري وشي وخاصه لما تكون فوق طعس بعد المطر والظهريه وما تشوف الشمس من الغيوم والجو ما هو برد بالحيل وبراد الشاهي الي مسود من كثر ما انشوى فوق النار