شيروا علي وش اشري من سيارة

[فارس البيد]

اخواني الاعزاء

السلام عليكم ورحمة الله وبركاته

اتمنى من أهل الخبرة أن يفيدوني

أنوي شراء سيارة دفع رباعي ومحتار في نوع السيارة المناسبة

ما بين (المقفص تويوتا) و(سفاري نيسان) من موديل 96 وتحت

والحقيقة ما همني الموديل أو الشكل حتى لو تكون موديل 86 اهم شيئ تؤدي المطلوب في البران والجبال

يعني يكون قوي وبس

اتمنى ان تفيدوني من ناحية الاسعار وقطع الغيار وقوة الدبل والخدمة والسعر

أو شيروا علي بالأفضل من بين جميع السيارات

ولكم سلفاً جزيل الشكر

[مخاوي قناص]

السلام عليكم اشير عليك الباترول الين واريح وتلقاه موديل نضيف وبسعر معقول تقبل مروري مخاوي قناص

[عاشق السيل]

كلها عينين براس ،،

النيسان : أريح وأخف نفس وأنشط وأرخص سعر ،،

التويوتا : أصبر وأرغب عند البيع ومتماسك أكثر وأقل صرفية ،،

والاختيار لك وتقبل مروري يالغالي ...

[ناوي نيه]

عطني كم سيولتك وابشر بعزك

[سعد777]

اذا ودك تاخذ وراعي جبال وطلوع وعر وصعب وميلان وغيره
خذاللي فيها دف لوك سواء نيسان او تويوتا انيسان حسب علمي من موديل 91 او 90 وفوق فيها تراء يجي يوم تحتاج للدوف لوك وتحسف وتندم
وبالمختصر المفيد للدوف لوك كأن معك 20 رجال يدفون الموتر اذا تعلق على الكفر يعني كفرتين علقت في الهواء وصارت تدور بدون مايمشي الموتر يجي عمله مهمته هنا وليس على بطن الموتر لأن السياره اذا تعلقت على بطنها وصارت الكفرات كلها تدور في الهوى ماينفع لا دبل ولا دفلك ولا غير الا سحب

[فارس البيد]

بيض الله وجيهكم وما قصرتوا

وشاكر لكم جزيل الشكر

[ww4ss]

اخي العزيز لاتدور غير ملك البراري وقاهر الصحاري كروزر اف جي Fj

[ww4ss]

واذا اردت معلوما عن ال اف جي كروزر اخل على الرابط الموجود في توقيعي

[بارود برنو]

شنب ابو شراع .............دام انه للجبال

حتى لو تبيه يمشب بدون سواق يمشي ؟؟؟؟؟؟؟؟؟؟؟

بس الله يعينك على المطبات
وترى ابو شراع هو اف جي كروزر
بس الاف جي ماينفع بالجبال
يروح قطع غيار

[بواردي الدلم]

دور لك باجيرو تراه ثقه وقوي ولك وللزمن

[فارس البيد]

يعطيكم العافية وما قصرتوا

وكل مقترحاتكم بحطها بعين الاعتبار

ولكم جزيل الشكر

[مخاوي الذيابه]

عليك بالربع نيسان من 91 و أنت طالع ..

أنا أشهد أنها مواتر ..

بس فيها عيب أنها مفككه يبغالها تربيط ..

الله يعينك ..

لانك ما بتلقى موتر في ذا المديل موب مجلود ..

آمل أن أكون قد أفدتك ..

[رياح السعيره]

نيسان 91 و أنت طالع

النيسان كله زين بس مشكله صرفيه بنزين

[.أبوعبدالرحمن]

ان بغيت موتر قوي ونشيط وقليل صرفية ويمسك سعره في البيع ويطربك لا تبعد عن التويوتا


وان بغيت موتر خفيف وهواوي رح للباترول ولكن يعيبه صرف البنزين