وش تسوي اذا تعطلت سيارتك فى البر وما حولك احد ؟؟ خطوات للسلامه...ادخل ...شارك

[خــشــــــــــم]

السلام عليكم ورحمه الله وبركاته :
احب اشكر راعي عنيزه لانه فتح موضوع مشابه (هل تساعد المتعطل والا تدعس؟)
من فوائد هذا المنتدى تبادل الخبرات والاقتراحات لتعم الفائده.. الله لا يهينكم مشاركتكم ضروريه..
الموضوع : ما هي الخطوات التي يجب اتباعها في حاله تعطل السياره فى البر وما عندك اي وسيله اتصال وما حولك احد وما فيه اي امل انك تصلح السياره او تطـلعها من الغراز. فى مقطعه.. خلونا نقول فى الربع الخالي او النفود او اي مكان بعيد . وش تسوي ؟؟؟..
ابدا بمساهمتى فى الاجابه حسب خبرتي البسيطه :
0- قبل كل شي اخبر احد من اصدقاءك بخط سيرك التقريبي قبل تمشي ومتى يمكن ترجع
ومن معك ووشي سياراتكم ..ان شاء الله تكتبها بورقه وتلزقها على باب صديقك او
تتركها وراك فى البيت.

1 - لا تسوي طرازان وتبعد عن السياره لان ممكن تستفيد منها كظلال او حمايه لك
من الذيابه مثلا . وبعدين السياره زولها كبير اكبر من زولك يعني ممكن احد يمر
ويشوفها او يشوف جرتها , لكن اذا ابعدت عنها يمكن تصعب ملاحظتك خصوصا
اذا كنت نايم او ..لا سمح الله منسدح غصبن عنك.(( حسب تعليمات ارامكو
للعاملين فى النفود تساني ماني واهم))
2- حافظ على الما (تـقـنـيـن الماء.. وفره ..احسبه بالنقطه.. يعني لا تفنجل .. وتجيك النظافه
اذا معك اطفال او غشما دسه عنهم .. لا يشربون الا عندالعطش الحقيقي مهو الوهمي)..
3- قـنـن الاكل . وهنا تظهر اهميه التمر فى العزبه(خفيف ومفيد وما يخرب).
4- زين لك ظلال اذا معك تيازير او شراع او خيمه .. او دف عمرك اذا انه برد.( اجمع حطب
واجد.. يمكن تطول القعده)
5- استخدم كفرات السياره كوسيله لجلب الانتباه ( الكفر اذا شبيته بالنهار دخانه ينشاف من
بعيد واذا شبيته بمكان مرتفع بالليل ينشاف من مسافات اكبر مما تتخيل) يعني اجلب
الانتباه بالي يخطر على بالك كفر والا غيره.. يمكن ربك يرسل لك احد .
(اي احد يمر انشب فيه حتى لو كنت مغبر وشكلك وسط.. العمر مش بعزء ـه.. لا تستحي..
اذا ما ساعدك اغصبه او خذ رقم سيارته وعلمني عليه)..
6 - تسمع لاصوات السيارات رص اذنك على الارض يمكن تحدد قدوم سياره . شب كفرك
وارقب على اعلى مكان ولوح لهم بشماغك. (او الفانيله البيضا على شان ما يخافون
منك)
7- ولا تنسى الصلوات والدعاء كثر منها . وخل املك في الله كبير ; يعني لا تنهار وتذبح
عمرك بالخوف.Don't Panic , اذاالي معك انهار او فصخ عقله اربطه او اضربه
لما يصحي ويعرف ان الله حق, وعلى شان ما ياثر على الباقين. واذا ما معك غيره, الله
يعينك عليه , اذا ما ربطته خله يروح يدج بهالبران لكن اعرف وجهته علشان تلحقه اذا
جاك احد. والعاده ما يبعد يبتسيله شوي بعيد عنك ويرجع.اذا رجع طبطب على ظهره
وشجعه ولا تستهزي فيه(خطر لانه يعاني من حاله نفسيه(الهلع) غصبن عنه) ودايما
عينك على الما لا يكبه او يشربه كله.. يعني احرص منه .. مهو بعقله.
8- اذا جعت وما معك اكل كل اي شي حولك يتحرك . والي ما يتحرك مثل الاوراق و جذور
القشع والاشجار.(بعض الجذور تنوكل مثل الربحلا)
اغصب نفسك, تصرف , كل من اجل البقاء:-)
الاعمار بيد الله ..كم واحد واحد جابوهم ما بعينهم القطره على حفه الموت . وربي كتب
لهم عمر جديد. واكثر الوفيات فى الي يتركون سياراتهم .
بانتظار مساهاماتكم لعل الفائده تعم.
وسلامتكم ....

[الشقردي]

عز الله انك اخترت الوقت المناسب لطرح مثل هالمواضييع
وقي مثل هالمواقف يحتاج الواحد انه يتحلى باقصى درجات الحكمة

وحط في بالك ان كل واحد وله يوم يعني لو الله كاتب عليك العيشة فانه لابد وبطريقة ما سوف تعيش وطبعا اعقلها وتوكل

اما بالنسبة لاجراءات السلامة اللي ذكرها الاخ خشم ما عليها قاصر

[راعي عنيزة]

مشكور اخوي خشم على ذا الموضوع المهم والمفيد وفعلا نقاطك عمليه جدا ومن الاساس يفضل في الاماكن البعيده عدم الكشته باقل من سيارتين عشان لو تعلطلت وحده تدبرون انفسكم بالثانيه

واحب اضيف اخوي بعد اذنك

- كتابة رمز طلب الانقاذ المتعارف عليه دوليا وهو ( S O S )
وتكتب بشكل كبير جدا لكي تتمكن الطائرات الماره من مشاهدته وللفت النظر ينصح باحراق كفر كما تفضل الاخ خشم وبالتالي يقوم قائد الطائره بابلاغ اقرب جهه حكوميه لانقاذك

- يوجد شيئين هما اهم من الماء والبنزين
الكنود والجارمن فاحرص على وجودهم اكثر من حرصك على اي شيء
فبواسطة الكنود توجه ندا وتحدد احداثياتك والاجواد ما يقصرون
وقد حصلت قصه لشباب في ارامكو كانو خارجين لاخر الربع الخالي بسيارة همر انقلبت في احد السيوف وتعرضو لاصابات واغمي على الاغلبيه عدا واحد تمالك نفسه ووجه ندا وسمعوهم حرس الحدود الاماراتي ودخلو الحدود وانقذوهم
تصور حالهم بدون لا سلكي ؟؟ الظاهر يكونون طعام للذيابه

- قبل ان تذهب ادخل في الجارمن جميع احداثيات المنطقه سواء قرى او محطات بنزين او آبار او هجر فربما تعتقد انك لن تحتاجها ولكن في وقت الطوارىء ربما ستظطر الى المشي الى اقربها اليك

والله خير حافظا والمكتوب لك بيصر سواء كتبت لك النجاة او غير ذلك

ولا انسى اهم نقطه كما ذكرها احد الاخوان سابقا وهي

- اذا يئست من جميع الطرق وايقنت بالهلاك ولن ينقذك احد فعليك بالطريقة السحريه وهي ان
-
-
-
-
-
-
-
-
-
-
-
-
-
-
-
-
-
-
-
-
-
-
-
تصيح باعلى صوتك : انقذذذذذذذذذني يا حليب السعوديه

[الهاوي]

تسلم اخوي خشم يا منقذ 911
ويابعدي ياراعي عنيزة متعودين منك الدرر ......

[الطير]

تحيه طيبه لك اخي خشم المحترم
السلام عليكم ورحمة الله وبركاته وبعد:
موضوع الحقيقه انه ممتاز جدا لاكن لاتغفلون ياناس ان الحقيقه ومعايشة الوضع غير ذلك
فا الانسان حين يكون في البر ومنقطع حاته النفسيه تتغير تغيرغريب لان الموت حار فيصبح لديه عجله غريبه يسوي كذا ثم يغير رايه بسب الخوف الى ان يستنزف طاقته وامكانياته .


الحقيقه اهم شيء في اعتقادي _وربما انه خاطئ _ التريث اجلس قليلا ثم فكر على رواقه ثم نفذ ولاتتردد واعزم على امرك .

ولكم خلص تحياتي .....

[عبدالعزيز الدباسي]

اصلا ليه الواحد يطلع للبر ،،،،،،،، يااخوي اجلس في بيتكم احسن لك وآمن لك

مشكور اخوي خشم على هالموضوع الحلو والنقاط الأكثرمن رائعة ، واشيد ايضا باضافة اخوي راعي عنيزة بان اللي عندهم نية يبعدون عن دروب الجادة يجب ان يكونو اكثر من سيارة

والحقيقة انا اختلف معك في بقاء الواحد عند سيارته ، وحتى لو كانت ارشادات ارامكو

مع احترامي الشديد للشركة ونشراتها القيمة عن الاسعافات الاولية .

فارشادات الشركة عادة ما تكون خاصة لموضفيها ، والموظف حينما يكون في مهمة ويتأخر عليهم يدرون وين مكانه او جهة مقصده .

و وجهة نظري بانه لا بد للشخص المتعطل المشي ((وعدم انتظار الموت))

ويمشى لا قرب درب (مطروق) اي الناس رايحه جايه معه وذلك لامكانية مصادفة شخص آخر تكون اكبر من البقاء في نفس المكان وخصوصا اذا كنتم جماعة تقريباً اربعة اشخاص ، اثنين يروحون مشي مع جهة معروفه مثل (شرق) وياخذون معهم ماء وشين يوكل خفيف الحمل
وايضا وهم يمشون يحاولون يحطون علامة لطريقهم وتكون العلامة متفق عليها من الجميع (الجالسين واللي يبي يمشون)

هذا من وجهة نظري ،،،،،،،، والاختلاف في الرأي لا يفسد في الود قضية

[خــشــــــــــم]

الشقردي
الحكمه ضاله المومن, وفعلا التوقيت يناسب العطله والله يستر على اهل المكاشيت
ويرجعهم بالسلامه. ويا زين الرجال ليا صار جاهز بكل شي لكن ما تخلا من طلب الفزعه احيانا.

سلمت ودمت وشكرا لمرورك وتعقيبك.

[خــشــــــــــم]

حب ي بي راعي عنيزه

هذا المطلوب نبي افكار وخبرات تساعد المتعطل عند اللزوم.ما قصرت والله.
وابشرك ما اطلع الا ومعي اكثر من سياره وكرتون حليب السعوديه.
لكن sos شلون اكتبها بالنفود او بالحره؟ والاهم من يقراها ( لا يغرك الافلام )
اكيد وسائل الاتصال ضروريه جدا مع القارمن واويد رايك بضروره حملها مع كل راعي بر.
ونسخه مطبوعه من الاحداثيات للمنطقه او كل احداثياتك يكون افضل.
لكن موضوعي يفترض عدم وجدو اجهزه اتصال او قارمن او هي متعطله بعد.
مره كان معاي قارمن 2 وانمسحت احداثياته بضغط انتر مع زر التشغيل .
بعدها عرفت انه عيب فى الجهاز وله update فى موقع قارمن
ومن يومها دايم معي نسخه من كل احداثيه مرت على فى شنطه العزبه .

ما قصرت يا خلفهم

[خــشــــــــــم]

اخوي الهاوي , هلا بك ومرحبا بمرورك اللطيف

[خــشــــــــــم]

هلا بالطير
انا معك اخوي يا زين الركاده والرواقه , وفعلا الموقف صعب اذا كان فعلا به درجه خطر عاليه.
فعلا يبيله اعصاب من حديد وعقل متفتح وثقه بالله ثم بالنفس.
وهدفنا فى هذا الموضوع ان الشباب يستفيدون من خبرات بعض فى المواقف الصعبه.
تبادل افكار وخبرات تنفع وقت هالله الله .

وسلمت يالطيب.

[خــشــــــــــم]

استاذي شقردي
ما اختلفنا والله ولا فسدت قضيه بالعكس اضافتك مهمه جدا وفعلا كثير من الناس يمشون ويتركون السياره وانا اسويها فى حاله ان الدرب الممشي قريب واعرفه, وان عليه حركه (مثلا اعرف ان الزفلت شرق او شمالي ... بمسافه اقدر امشيها رجلي, يعني حدي عشره كيلو ), لكن اذا اني عارف ان المنطقه مقطعه ما يجيب البعيد الا الي فى السياره مثل دخان الكفر او ناره بالليل او المحرق ليه اضيع فرصه
استفادتي من السياره خصوصا اذا فيها ماء وازاد يوكل لمده كافيه؟ .

فكره ترك العلامات جديده ومفيده للي يقرر انه يمشي لاقرب فرصه امل.


من حيث نشره ارامكو انا سمعت عنها ويا ليت احصل عليها اكيد فيها افكار مفيده للجميع.


الف شكر لاضافتك المفيده وما قصرت يا شقردي.

[اسير الشوق]

السلام عليكم ورحمة الله .... واشكركم اخوتي على هذا الطرح الجميل.

الموضوع مهم للغاية .... وكم وكم من اناس ذهبوا ضحية الثقة بأنفسهم وبسياراتهم الى اماكن مهلكة ولا يمر بها احد الا نادراً جدأً ..

في نظري من اهم الوسائل التي ينبغي ان تحملها معك في السيارة ..
- جقيبة ملابس يمكن حملها على الظهر مثل حقائب الأطفال ...
- جيك ماء 10
- 1كيلو تمر
- شراع صغير 1×1 قماش مع مسحاة الكشاتة الصغيرة،
- ولاعة او كبيريت,,, ويفضل كبريت اشعال الحطب وكشاف مع بطاريات اضافية .
- بوصلة صغيرة ... بوصلة ميدالية مثلاً .
- خريطة المنطقة التي انت ذاهب اليها مقاس 500،000 او 1،000،000
- اذا وجد جهاز قارمن فهذا افضل شي . حيث تستطيع تحديد الموقع القريب منك ثم الذهاب له مباشرة وخاصة التي تحمل خريطة .


ولا اعتقد ان هذه الأشياء ثقيلة اذا حملت على الأكتاف خاصة اذا كانت الحاجة ماسة لها وكنتم اكثر من شخص..

الماء للشرب منه عند الحاجة ...بطريقة بل الريق حتى يكفي الماء للوصل للهدف المنشود .

الولاعة وكبريت الأشعال لإشعال حريق لتنبيه المارة بالليل لوجودكم وكذلك الكشاف بطريقة الإطفاء والإشعال فهو ينبه المارة بوجود من يطلب النجدة .

بوصلة صغيرة تحدد بها الإتجاه الذي تريد السير له .

خريطة تعطيك معلومات وافيه عن المنطقة التي انت بها - طرق - هجر- ابار- اودية وشعاب حتى تتجه لأقرب مكان يمكن ان تجد نجدة به وخاصة ان بها تستطيع معرف اقرب طريق لك سواء بري او رسمي .

تستطيع عن طريق الخريطة تحديد نقطة ومن ثم ادخالها والتوجه لها

الشراع في حالة لا سمح الله اذا تعطلت السيارة ورغبت في المشي ام تستظل به عن الشمس في النهار وذلك بحفر حفرة بالمسحاة خاصة بالنفود فستجد الارض باردة وتساعدك في حفظ السوائل بجسمك .... فعليك النوم بالنهار والسير بالليل ... حتى يمكنك تحديد المدن والقرى واماكن الناس بالليل عن طريق النار لديهم او الإضاءة التي يستخدمونها .

تذكر ان السير في النهار يتعبك ويشق بك ... ويستنزف كل طاقتك .... بعكس السير بالليل الذي تستطيع فيه السير لمسافة ضعف المسافة التي تمشيها بالنهار .


مع تمنياتي للجميع بالسلامة من هذه الاخطار .


ارجو من الأخ خشم ... تلخيص النقاط الهامة للسلامة اثناء تعطل السيارة من جميع طروحات الشباب حتى تعم الفائدة .

[مـرمـر زمـانـي]

السلام على جميع الاخوة

في الحقيقة هذه اول مشاركة لي في المنتدي

اخي خشم

لكن sos شلون اكتبها بالنفود او بالحره؟ والاهم من يقراها لا يغرك الافلام

تكتب كلمة sos وهية رمز طلب الانقاذ المتعارف عليه دوليا على الارض بواسطة قطع الاشجار الصغيرة بحيث يكون حجم الحروف الطول 18 قدم والعرض 12 قدم وسمك الحرف 3 قدم هذا في النهار اما في الليل فيمكن اشعال النار فيها اما من يقراها فمئات الطائرات يومياً تقطع سماء المملكة وانشاء اللة تعالى سوف انشرمواقع الممرات الجوية فوق منطقة الخليج والمملكة لكي يستفيد منها جميع الاخوان في تحديد مواقها وكم تبعد عنهم وامور كثيرة تتعلق بالطرق الصحيحة لكيفية التصرف في وقت المحن

[الطريفاوي98]

السلام عليكم ورحمة الله وبركاته

ماشاء الله عليكم كلكم والله يعطيكم العافيه



اقول الموضووع جدير بالطرح والمشاركه والله يااخ خشم انك اوفيت ووفيت وايضا بالنسبه للاخوان حجميعاا
الله عليك ياخ شقردي العلامات مهمه جدا
وايضا اخواني فاني قبل حوالى السنه لا يوجد لدي اي وسيلة اتصال ولاقارمن ولاالي الا الله والحمدلله كانت الامور من ناحيه الزاد والماء جيده كان معي جركل 80 ليتر لاني رايح لخوياي الصراحه ان العزبه بالسياره لاني بالبر مااظمن الظرووف ولكن كان احد الزملاء يوصيني بوصيه ويقول ان انقطعت لاسمح الله رح لاقرب طريق ممشي يعني مدكووك وخلك حوله ومعه اللين الله يرسلك سياره ماشيه والا انك تمشي عليه اللين تاصل لك علامه تعرف بها طريققك او احد بيوت البدو او لك راعي حولك لاتستحي رح له يمكن معزبه تكون جيته قريبه ولاتضيع مكان سيارتك ولاتبعد عنهابعيد حتى لونك رحت للطريق المدكوك او الممشي عليه من قبل السيارات0 وابشركم انه لقيت سياره واشرتلها وساعدوني الله يجزاهم بالخير وطلع خراب السياره الصفايه بتاعت البنزيت السفليه ونجيت بعد رحمة الله بي ثم بوصية خويي الله يجزاه ولكل من يقرا بالخير




اؤيد كلام اخوي خشم واخوي شقردي واالله ماقصرتوو كلكم والله ينفعبه العمووم ان شاء الله تعالي ويكفينا القطعات والحمدلله رب العالمين على كل حال



احوكم الطريفــــــــــــــــاوي 98

[ابوفيصل]

اخواني الاعزاء :
السلام عليكم ورحمة الله وبركاته.
الموضوع مهم للجميع لانه ممكن يحدث لاي واحد منا
والاخوان ماقصرو جابو كل شي في هذا الموضوع ولكن لي بعض النقاط عليه
1- قبل الخروج يجب التوكل على الله سبحانه فهو المعين ومن هذه الاشياء قراءت دعاء السفر
2- لاتروح لمكان ماتعرفه او ماراح له احد منكم لان معرفة المنطقة مهم جدا في تحديد المكان اللي انت فيه
3- لاتنسى اذا صارلك التعطل ان تدعوا الله سبحانه بان ينجيك فقد نجا الله نبيه ذا النون من بطن الحوت وان تقول ( لااله الا انت سبحانك اني كنت من الظالمين) وتقول ( امن يجيب المظطر اذا دعاه ويكشف السوء )
4- ظبط النفس وان تعرف ان هذا مقر لك
5- اخذك للاجهزه المعروفه وكذلك الخريطه فهي تعينك على تحديد موقعك وممكن اخذ الاحداثيات نسبيا منها
6- ايضا لاننسا اباءنا واجدادنا في الماضي فكانوا يسافرون بدون راحلة في بعض الاحيان ولكن كانوا معتمدين على الله ومتوكلين عليه وكان الواحد منهم اذا ضاع يشغل مخه شوي وتسلك الامور

والسلام عليكم
وارجو من الله ان لايرينا هذا اليوم