تربيه الفري ؟؟

[جارح العين]

السلام عليكم ورحمه الله وبركاته
حبيت اسالكم عن الفري الي عمره رباه وانتج عنده
هل يتاقلم بالاسر وينتج ؟
عادي احطه مع الحمام اذا ابيه ينتج ؟
وكم يستغرق يوم او اسبوع عشان يتاقلم مع المكان ؟
ويعشش بسطول زي الحمام ولا على الارض ؟
وكم اسبوع يرقد على البيض حتى يفقس ؟
وانتاجه زين ولا قليل ؟
والله لا يهينكم الي عنده معلوومات زياده لا يبخل علينا !!
واسف على الاطاله..!
وبانتظار ردودكم ...

[صقر البحيرات]

يسرني اني اول واحد يرد على موضوعك
اخي الكريم إذا كنت تقصد الفري البلدي ( الي بالسوق ) هذا ينتج
انتاج لابأس به
انا ربيت واحد بالبيت وتعود على الجوء وصار يطلع من القفس ويتخم ويحوس بالبيت من المطبخ لصاله يمتر بها البيت ليومك هذا
وصار ياولد على كيفك ..............من قبل رمضان الماضي وهو عندنا
لكن قبل 6 سنوات كنت مربي (حمام) وحاط معه ( قطا ) ( قميري )( فري )( دجاج ) حديقه ماهو ؟؟؟
وسويت عزل ( كنه مستشفى )عزلت الفري عن الحمام لان الحمام حفر روسنه ونتفنهن وذبحن
عزلتهن على شان يتكاثر مثل باقي الطيور
سويت البيئه الخاصه وجمعت الفري البري والبلدي الداجن
ما اخفيك الفري البري ما طولن وماتن عنيدات ما ياكلن بهن بلى يضربن عن الطعام
وبقن البلدي
وكل يوم اخذ منهن اطعم الطير ( طير عمي ) ولحق على القطا والقميري
البلدي يبيض لكن ما حصل فرخ او رقد على البيض يبيض ويمشي على الرمل
ما يحتاج تنك ( سطووووول )
هذا اللي عندي اتمنى اني اعطيت المطلوب
والشباب ما يقصرون
سوف اتابع معك هذا الموضوع
وشكراااااااااا

[جارح العين]

الله يعطيك العافيه اخي صقر البحيرات (وفي بحر بعرعر ههههه)
ومشكووور على تجاوبك السريع

[صقر البحيرات]

هلابك يالغالي //////////
بحر فيه بحر بس مابه ماء ههههههههههههه
البحيرات /// اسم ارض او فلاة في هضبة الحماد الواقعه بين عرعر وطريف /// عرفتها الحين ؟؟

[pass2love]

جارح العين

الفري ادا عندك مزرعه او مكان واسع تشتري فري من السوق

ويعتمد علي اكلي الدخن ولا يكلف

ويرقد علي البيض وينتج طيب

والافضل تشتري فقاسه كهربائيه لحضن البيض

وتري فيه انواع منها رخيصه
اول مايبيض الفري تحطه فيها ويفقص

تحياتي

[* الــــفــر قــــد *]

الأخ جارح العين

توقفت عند موضوعك ( تربيـة الفري ) وأحببت أن شاركك الموضوع لمروري تجربة تربية الفري البلدي وعتقد أن مدينة تبوك
هي المنطقة المشهورة بتفريخ الفري وتصديرة من زمن بعيد .
وعن طريق ماكنات التفريخ .
وهو بالون العادي الرمادي المخطط بالأسود وبالون الأبيض ...
المهم تجربتي لتربية الفري كانت قديمة من زمن بعيد وبعدد بسيط
جدأ من الفري لايتجاوز الــ 14 أنثى الفري و 6 من الذكور .
أشتريتهم من السوق المحلي للطيور . وعملت قفص لهم في البيت
2×4 متر وأشتريت كيس حبوب مخلط يحتوي على الذرة والفتمينات المجروشة . وبعد أسبوعين أخذت بعض الأناث تبيض وبعد شهر أصبحت تبيض كلها . يعني كل يوم من 10 - 14
تقريباً . ولكن ملا حظتي هي أن الفري يبيض ولا يرك على بيضة
في هذه الفترة جربنا أكلة وهو لابأس بهه ولكن ليس مثل بيض الدجاج .
ويقال عن بيضة عند البعض أنه يفيد لحساسيه الربو والله أعلم .
طرأت لي فكر ماكينات التفريخ وشتريت ماكنة تفريخ ووضعتها في
زاوية من المخزن . وهي على شكل صندوق عرضة متر وأرتفاعه
45 سم تقريباً الرف السفلي به ماء و الرف العلوي مقسم لخانات
ليسع عدد 50 بيضة تقريباً والى 1500 للمكينة الأكبر حجماً. ومزود بدرجة حرارة تكون ثابتة على37
وكنت أضع كل يوم في الماكينة حسب الموجود من 10 الى 12 بيضة
وبعد أنقضاء 16 يوم يفرخ البيض الذي وضعته أولا . وفي اليوم الثاني
يفرخ البيض الذي وضعتة في اليوم الثاني إذاً كانت الطريقة خطاء .
وفي التجربة الثانية : أجمع البيض كلة ثم أضعة في الماكينة.حتى يتم
تفريخة كله وفي نفس اليوم .
بعد التفريخ نقلت الفراخ الى صندوق خشبي عرضة 60 سم وطوله
1:50 متر . موضوع على الأرض ومفتوح من الأعلى .وعصى تحمل
لمبة 100 وات للتدفئه . وإنا به ماء .
ثم تنثر الحبوب داخله والفري لايحتاج أم لمعرفه طريقة الأكل هو يتعلم
فطرياً بنفسة . وخلال أسبوعين تنقل الفراخ . الى القفص . وهلم جرى

[كاري]

ماشاء الله اخوي هام السحايب اتوقع إنه كفى ووفى ..
بس ابقولك معلومه : إن الفري البلدي المعروف مشكلته إنه يبيض ولايرقدعلى البيض ومثل ماقال اخوي هام السحايب اشتر فقاسه تكون صغيره على قدك ..
وبصراحه قبل فتره كنت افقس بيض الفري . اشتري البيض من التحسين اللي بالملز اللي حول استاد الامير فيصل بن فهد كنت اشتري منهم الطبق بـ7ريال فيه 18بيضه ونسبة تفقيسه 70% بصرااحه ممتاز بس فيه مشكله إذا فقس البيض وطلع لك الفراخه إنك لازم تحافظ عليهن وماتلمسهن علشان مايموتن وتحطهن بكرتون كبير اوقفص وتحط معهن لمبه صفراء .. وفي علاج(نسيت اسمه وبإذن الله اجيب لك اسمه) ممتاز لجميع الطيور تشتريه من البيطريه لونه احمر يجيك مثل البودره هذا الله يسلمك تحطه للفروخه مع الماء مضاد للامراض ويقي الفرخ بإذن الله من الامراض اللي تجيه واللي تقضي عليه وسلمك الله أسأل مجرب ولاتسأل طبيب..
اتمنى إني افدتك تقبل تحياتي اخوك / كاري

[جارح العين]

الله يعطيكم العافيه كفيتو ووفيتو وماقصرتوا
بغيت اسالكم اذا فقست البيضه كم يبيله حتى يكبر الفرخ يعني نموه سريع ؟
والفقاسه دورته قبل كذا ومالقيته وين القاه عند محلات الاجهزه .
والبيض احط بيض الي نشتريه من السوبرماركت عادي(دجاج)
الله لايهينكم...

[الأجودي]

بسم الله الرحمن الرحيم
السلام عليكم ورحمة الله

اخوي جارح العين مساك الله بالخيرات
الاخوان ماقصروا باللي علموك فيه واختصارا لما قالوه هو انك تشتري طيور السمان لإنتاج البيض فقط والتفريخ يكون اليا
والسبب ياطويل العمر انا اعرفه ومن خلال خبرة 15 سنة ان الطيور المنتجة بواسطة الفقاسة لايمكن بحال من الاحوال يرجن على البيض ويحضنه حتى يفرخه وجربت هالشي مع الدجاج والبط والفري ولا ادري سبحان الله ما السبب
عشان تضمن ياخوي انتاج طبيعي انصحك تشتري السمان ولما يبيض تجمع بيضه وتحطه تحت دجاجة واذا فرخن تاخذهن من الدجاجة وتربيهن لحالهن بهالحال هالافراخ اذا كبرت بتحضن البيض زي ماهي بالطبيعة
والطريقة تراي انا بنفسي جربتها ووصلت لقاعدة وحده
الطيور المنتجة بواسطة الفقاسه الالية لايمكن تحضن البيض

[جارح العين]

مشاء الله عليك يالاجودي اسم على مسمى
شي ماجا ببالنا الان الفري الي نشتريه من السوق كله انتاج الالي
بيض الله وجهك وماقصرت.....

[waleed_458]

الطيور المنتجة بواسطة الفقاسه الالية لايمكن تحضن البيض

اخي الكريم اللأجودي المعلومة غير صحيحة سلوك التحضين غريزي في الطيور وليس مكتسب

[الأجودي]

السلام عليكم ورحمة الله
اخي الكريم وليد حياك الله واسأل الله سبحانه وتعالى ان يكون ماتقول هو الصحيح وان اكون مخطئا
لكن طوال 15 فعلت فيها المستحيل لم استطع ان اجعل طيرا منتجا آليا يحضن البيض حتى وصلت لما قلت
اخي الكريم ان كنت جربت ذلك بنفسك ورأيته بعينك فارجوا منك اخباري وجزاك الله الجنة
تحياتي اخي

[صقر البحيرات]

الله يعطيكم العافيه جميعا
اشكركم اخواني على هذه المعلومات
والفضل يعود لصاحب الموضوع
تحياتي لكم ومازلنا متابعين

[جارح العين]

الله يعطيكم العافيه وماقصرتوا
ومشكووور اخوي صقر البحيرات

[كاري]

السلام عليكم ..
هذا الدواء الذي وعدكم به من قبل ..
اسم الدواء:فاليمايسين على شكل بودره حمراء..







وهذه فقاسه خاصه بي .. فقست فيها بيض دجاج ونجحت معي وفقست ايضا قبل فتره بيض سمان ونجحت معي
بكل صراااحه ممتازه هالفقاسه .. سعرها تقريبا 450 إلى 500 ريال سعودي ..
تشيل من 55 إلى 60 بيض دجاج..
والسمان تشيل كميات كبيره تقريبا فوق 100 بيضه ..
توجد هذه الفقاسه في الصيدليات البيطريه ..النوع إيطالي..














هنا تلاحظ فتحات الشبك كبيره جدا على بيض السمان فذلك ترهم عليه شبك فتحات صغيره علشان مايطيح البيض





وهنا ايضا يوضع في اسفل الفقاسه فرشه او اي قطعة قماش علشان مايتعوجن (رجلين) الفراخه ..
وتلاحظ في نفس الصوره بقايا بيض السمان بعد التفقيس ..










اتمنى إني افدتكم ..
تقبلوا تحياتي / كـــاري,,