*******************************************
ترى المراجل سلم واخلاق واسلوب= تحتاج شخص في المواجيب واعي
يصبر على زود البلا صبر ايوب = ويسطي على الكايد جزوم شجاعي
والحزم في بعض المهمات مطلوب = والعزم والهمه تشد الذراعي
خلك كريم تصير للكل محبوب = وتطرف به عيون لعيبك تراعي
وافزع لمن مسه من الدهر منيوب = اقض اللزوم وسركم ﻻ يشاعي
والوعد اوفه ﻻيجي وعد عرقوب= وجنب عن دروب الحيل والخداعي
وان طاب حظك زان لك كل مشروب = واليا تردى راح جهدك وضاعي
والزهد في الدنيا جميل ومرغوب= ياسعد من يرحل خفيف المتاعي
والجار قبل النفس له حق ماجوب= الدين وصانا لحقه نراعي
واطلب ولي العرش ﻻصرت مكروب = ترى الفرج يأتيك عجل سراعي
واحذر تصير بعرض اﻻجواد شاذوب= عرضك تبي تنهشه غلث السباعي
وكثر الجدل لا شك عيب وعذروب = خلك حكيم ولاتكون اندفاعي
والحقد في قلوب الحسودين مصبوب= اشد من سم الحنش واﻻفاعي
ومنته على طرد المقفين مغصوب = الله خلق كون فجوجه وساعي
ناس على فرقاهم الدمع مسكوب= وناس خساره لو سلام الوداعي
أمر الله الغالب ولاهوب مغلوب = سبحان رب للخلايق يراعي
والعمر معدود و في اللوح مكتوب= والموت ماياقاه درع وقناعي
يارب تغفر زلتي واقدر اتوب= من قبل ينعاني من الموت ناعي
وصلاة ربي عد مامال نبنوب = على النبي واعداد نبت المراعي
راعي مرات
عبدالرحمن بن عبدالله المجلي