س: أين تباع أدوات صيد السمك بالتحديد؟

[بن نويشر]

السلام عليكم ورحمة الله وبركاته

في الحقيقة أود معرفة أين تباع أدوات صيد الأسماك كالسنارة والشبك وغيرها من الأدوات الأصلية وليست التقليدية أو التجارية وحبذا في مدينة الخبر ؟

أرجوا المساعدة وتقبلوا تحياتي ،،

[رحال]

مساك الله بالخير اخوي العزيز (( سنيدي )) وحياك الله معنا عضو في مكشات وإن شاء الله انك تفيد وتستفيد .

بالنسبة لسؤالك :

افضل محل اخوي سنيدي موجود على خط الدمام الخبر السريع وينقاله (( الخريف )) هو محل كبير وفيه كل اللي تتمناه من عدة البحر . واكثر المحلات اللي في الدمام او الخبر تاخذ بضاعتها من هذا المحل .

اتمنى اني قدرت اساعدك
وتقبل تحياتي يالغالـــــــي
اخــــوك بوخليـــــــفـــــــه

[بن نويشر]

أخوي ((رحااااال)) عزا الله انك ما قصرت ووفيت واستوفيت وجزاك الله كل خير ورحم الله والديك .

وجعلك تصيد من حور العين الكثير والقارئيين ((قل أأأأأأأأأأأمين)) ..

[غواص الخليج]

انا صراحه شفت محلات الصيد عندنا و كلهاماعندها شي يسوا للأسف و غالية علي غير سنع فمثلا عندك سيهات ارخص من الخبر و لكن العيب بالمشوار ولكن انا دايم عندي روحات لدبي فمعظم عدتي من هناك لئنهم عندهم تشكيلة ما تخطر علي البال و غير الأسعار فمثلا ريش اللفاح هناك بعشرين درهم و نفسهم بالخبر ب خمسين ريال و البلود الكيلو ب 3 درهم و عندنا بعشرة ريال

[عبار درب]

فيه محل الدوسري على الشارع العام في الخبر وسط البلد انا اعاملهم دايم وبضايعهم جيده من حيث التنوع والأسعار وتراهم سمحين في التخفيض الو الذراع بس

[Bo Rashed]

حياك الله اخوي سنيدي

بالنسبه لسؤالك فانا انصحك اذا كنت بتشتري اغراض كثيره انك تروح لسيهات او القطيف لكن اسعارهم ارخص واترك لك حرية الاختيار

اما اذا بتشتري لك كم خيط وبلود شوي فتقدر تروح لمحل يعقوب الدوسري بالخبر وهو بنفس الشارع اللي فيه مركز الشعلة القديم

انا شخصيا اسوي بلودي في البيت بس اروح اشتري الرصاص من المحرقه او سوق الخرده اللي بجنب خضرية الدمام واذوبه واصبه في القالب وما يكلف الا قليل

تحياتي للجميع