ثم اشتريت واحد ثاني مثله مستعمل طبعا - لكن إستعمال حشمة – وكان عليه شد كامل وشراع - وجلسات فوق - وسله على التنده .
أول شيء سويته شلت نصف الشد والشراع ، وحطيت فيه العدة حقت البر.
وبديت أروح لكل مكان أحيانا مع بعض الأخوان والأقارب وأحيانا لوحدي إذا مالقيت أحد .
ومن هنا راح أقول لكم عن مغامراتي المكشاتية ...
كان ياماكن ... قبل لايجي قارمن وماجلان ...
كان فيه منتدى أسمه مكشات .. فيه كل شيء عن الرحلات ..
وكان فيه عضو أسمه .. دغيم 1
راح أقول لكم عنه قصص كثيرة .. مغامراته .. لكن ..
..لاتقلدونه .. لأن التقليد يضر .. خذو عبره .. واستفيدوا منها .. وفي كل مره راح أقول لكم
وقفه .... وفي كل وقفه قصة ،، والغالب أنها طريفة ..
وعشان ماطول عليكم راح أبدأ بـ
الوقفة الأولى
كانت الأجواء ماطرة والأرض رويانه وروضة الخرارة مليانه مويه
وكنا في شهر رمضان المبارك – الله يلحقنا وإياكم خير – ويرزقنا صيامه وقيامه .
كان معي الونيت الهايلوكس 76 ، قلت لجاري :- ودك تروح معي للخرارة نشوف الماء ونرجع .
قال أنا عازم على الفطور رجال ، وأخاف نتأخر ، قلت : لا ياشيخ ، وينا وين الفطور ، أبد نطل على الخرارة ونرجع على طول والوقت توه طويل .
قال : توكل على الله .
ركبنا السيارة وطلعنا متجهين للخرارة ، وصلت النفود قلت له : بفرق من هنا أقرب ونزلنا في نقره الله يجيركم لاعب السيل في أطرافها ومالها مطلع إلا اللي نزلت منه ورفيع .
والله مشكلة ، حاولت أطلع بشتى الوسائل ماقدرت ، وكل شوي أسوي وزنيه للبلاتين لأنه يلذع من كثر الجور على الموتر عشان يطلع ، وإذا وصل قبل النهاية وقف ، مافيه عزم .وبنشر الكفر وغيرته مع أني أشيل معي دايم 3 استبنات
المهم جاري قرر يروح للأزفلت مع انه بعيد شوي تعرف نفود ، وصايم .
وبعد أن قررت أن تكون آخر محاوله ، وفق الله وطلعت وسبقت جاري .
المهم ركب ورحت مع الجهة الثانية ، وإلا أردى ... لكن ربك ستر ماجلست كثير .
طلعت بسرعة .
طلب جاري أروح للرياض خلاص قفلت معاه مايبي يشوف الخرارة
بعد عدة محاولات وطلبات وافق أروح للخرارة مع الطريق الممهد قبل لايسفلت
وصلناها وشفناها ورجعت على طول .
وصلنا الرياض بعد آذان المغرب بلحظات ، وكان أهل جاري منشغلين عليه وينتظرونه عند الباب ،( وأنا مسكين ماحد ينتظرني .. متعودين أطلع وارجع أي وقت ) المهم من الزعل نزل من السيارة وصك الباب بقوته التي رزقه الله إياها
وقال : الشرهة ماهي عليك الشرهة على اللي يروح معاك .
..............................
.jpg)
.jpg)
رد مع اقتباس
المشاركة الأصلية كتبت بواسطة غالي
..
