اهمية خط السير

[مهيلان]

السلام عليكم ورحمة الله وبركاته
ومساكم الله بالخير

الموقف الاول :
ــ يا خالد ترى بنمشي بكره بعد العصر بتخاوينا والا لا ؟؟
ــ ابخاويكم بس عندي شغل ضروري بعد العشاء ؟؟
ــ يعني وشلون ؟؟
ــ يعني اطلعوا وابجيكم الخميس الصباح ؟؟
ــ بس ما ندري وين حنا فيه الخميس الصباح ؟؟
ــ يعني وشلون ؟؟
ــ يعني يا تمشي معنا هالحين والا ما يمديك علينا .
.. يطأ طيء خالد راسه حزنا لانه وده يخاوي ربعه لكن ما
يقدر لانهم ما رسموا خط سير لرحلتهم ..

الموقف الثاني :
محمد وعبدالله وابراهيم وحمد بيطلعون للصمان يوم
الاربعاء على جيب عبدالله gxr الديزل

صلى عبدالله العصر بحارتهم وعبى توانك المويه وشغل الديزل ومشى ... مر ابراهيم وركبه وحمد وركبه ويوم مر محمد لقى معه اخوه الاصغر سطام راعي الهايلكس
همس محمد لاخوياه : اخوي وده يخاوينا ..
تلفتوا الجماعه على بعضهم وبما ان محمد كبيرهم قالوا حياه الله .. بس الموتر مثل ما انت شايف .. عزب ومراقد ومويه واربع ركاب ... قاطعهم محمد وقال ما فيه مشكله موتره جاهز ..
قال عبدالله : عسى معه جهاز ايكوم ؟؟
رد محمد للاسف لكن مهوب ضروري ..

قالوا الجماعه توكلنا على الله بس خله ياخذ المراقد والعزب وكرتون الذبيحه وانزل يا حمد واركب معه بما انه يرتاحلك ويحب سوالفك وبتلقى فرصتك في الشخير بدون نكد

مشت الامور
وبعد صلاة العشاء وهم متعشين و ممسين بخبة العمود بالدهنا
ويوم اصبحوا وبعد الفطور حموا المواتروركبوا
قال سطام لعبدالله وين الوجهه قال : والله ما ندري بس بنتمشى لين يزين لنا المحل ونتغدى
لكن بما ان ما معك جهاز لا تبعد عني وانتبه ترى الصمان متياهه الا ابعدت عن السياره اللي قدامك تراك بتضيع على طول ...
هز سطام راسه وقال الله يستر ..

طبوا الربع الصمان وفرقوا يسار وبعد ثلاثين كيلوا مروا فيضة دغيم فيها ربيع زين
لكن الوقت تسع صباحا بدري على الغدا
قال ابراهيم وش رايكم نتغدى بروضة حسنا قال محمد راي طيب

يالله يا سطام ورانا انت وحمد
طقوا احداثية حسنا قال الجهاز سبعين كيلوا شمال غرب .
اللي حصل ان سطام اول مره يجي الصمان وطارت عيونه بالابل والربيع وحمد كان مانام في الليل الا ساعتين حط راسه ونام .. ومسكوا خط ثاني غير اللي عليه اخوياهم
بعد ساعه تفاجأوا ان الجيب مهوب قدامهم
صحى سطام خويه وقال قم ترانا ضعنا قام حمد يفرك عيونه
وقفوا محلهم نصف ساعه وبما ان حمد ما اهتوى الطلعه من اساسها قال لخويه وش رايك نرجع للزفلت احسن
رجعوا وسالوا البدو وقضبوهم الخط الى الزفلت



الساعه ثلاث عصرا سطام ينزل حمد في بيته بالرياض
وعبدالله وابراهيم ومحمد يتغدون بمطعم بالارطاويه بدون ذبيحه وبدون عزبه ومراقد .!!

++++++++++++++++++++++++++++++++++++++++++++++++++ +++++++


هذي موقفين متشابهه في الاسباب والنتائج وحلها واحد
لكن يجمعها سبب رئيسي
وهو عشوائية الترتيب وعدم تحديد خط سير متفق عليه ومعروف من جميع اعضاء الرحله
في احدى تجاربي اخذت كتاب عن احداثيات الصمان

ورسمت خط سير زماني ومكاني وحددت 12 نقطه امرها خلال الخميس والجمعه وحددت احداثية كل نقطه والوقت اللي امرها فيه
خط السير يبدا من الرياض الى ام رقيبه
ثم افرق يمين صباح الخميس وامر 12 نقطه ما بين فيضه ودحل وموقع اثري يوم الجمعه العصر في الرفيعه
ثم الى الرياض
جميع الاحداثيات تخزن في جميع اجهزة القارمن اللي موجوده بالرحله
ويعرف السواق النقطه اللي حنا متوجهين لها
بهالطريقه احفظ الوقت واستمتع بتنوع المواقع اللي مريتها

هذه دعوه لمراجعة رحلاتنا واكتشاف مواطن الخلل فيها ومدى تاثير العشوائيه على المتعه المرجوه منها ..


* الشخصيات المذكوره اعلاه حقيقيه .

ودمتم سالمين

[شبوب]

السلام عليكم 00


مشكور اخوي مهيلان 00 ولكن انا لي رأي آخر ومن تجربه شخصيه وهو
أن لا تخطط لطلعتك نهائيا الا الوجهه الي تبي تروح له فقط0
وهذه لها اسباب عده أذكر منها على سبيل المثال 00 كل يوم وله اجوآءه
الخاصه به من شمس ومطر وبرد 00 ومنها ايضا فقدان عنصر المتعه والتشويق
اذا حددة برنامج زمني بالساعه واليوم للكشته 0 هذا ما يحضرني الآن 0


تحياااااتي

[راعي عنيزة]

صح لسانك اخوي مهيلان

الترتيب المسبق للرحله والاتفاق على المسار قبل الرحله من اهم اسباب نجاحها

ولا ننسى ضرورة الماب سورس في هذا الأمر ، لانك عن طريقه تشاهد المواقع والطرق وتطبق احداثياتك وتتاكد من سلامتها قبل تتوهق

وكذلك تتاكد من المسافات بين الاحداثيات وتحتاط بالوقت اذا كنت ما تعرف المنطقه ، مثلا قد يكون بين احداثيه واحداثيه 20 كيلو وتتوقع انك تقطعها بالكثير بساعه ، ولكنك قد تصادف وعر واراضي شينه وتقطعها بثلاث ساعات


ومشكور على هذا النقاش الشيق

[عروان]

أحسنت أهو مهيلان

أنا من الناس اللي يخططون لدربهم قبل بداية الرحلة.

ومعرفة القرى والهجر اللي بتكون على دربي حتى لو حصل أمر طارئ أقدر

أفزع لأقرب ديرة فيها خدمات.

وانا أرى أن التخطيط أساس نجاح الرحلة.

شكراً لك