تحركنا من الرياض الساعة الخامسة عصراً باتجاه الصمان وللاسف كثرة الوقفات عند المحطات عطلتنا قبل ما يدركنا الليل ، على انها مهوب العادة اني اوقف كثير لكن اخويانا اللي في السيارة الثانية كل شوي طاري لهم طاري الى درجة انهم ناسين قاعدة اريل الأيكوم ، وقاموا يدورون في كل محطة قدامهم ،،، ما لكم بالطويلة ، ،،،، مشينا سلمكم الله الين وصلنا اخر عروق الدهناء عند جو الحجلاوي ، وامرحنا لليلتنا هناك ومن يوم اصبحنا توجهنا شمال غرب ومرينا كل الفياض اللي قدامنا من ام الهيمان _ دغيم _ ام قرين _ ام طليحة _ الزلعاء ،،، ويوم جت الساعة ثلاث العصر ، وقفنا وصلينا ، وزينا الغداء ، وامرحنا ليلة الجمعة هناك ،،، ويوم اصبحنا توجهنا لباقي الفياض اللي على طريقنا باتجاه الغرب اكثر ومن ثم الجنوب ، ومرينا على حسناء ورديفتها ودليل ، وطبعا نمر على فياض صغيرة الحقيقة ما اعرف لها اسم ومرينا على اكثر من جو مربع والامكان روعة بكل ما تحمله الكلمة من معنى ما شاء الله تقول ملعب قولف
اللهم لك الحمد الصمان كله سايل وجايه مطر عظيم الفياض مليانه والدروب مالك ممشى معها ، وكانت سبب في بعض التأخير اللي حصل لنا ، لانك لازم تدور لك درب ثاني وتبعد عن وجهتك بعض الشىء على العموم التقطنا لكم كم صورة من عدة فياض مختلفة وكلها حول بعض .
من الاشياء اللي المميزة في الرحلة واعطتها حلاوة ان كل اليومين شمس مشرقة ، فتخيّل الفياض مخضّره والماء من كل الجوانب والشمس ساطعة على المكان ، ، فتظهر لك روعة المكان وجمال الطبيعة وحسن المنظر ،،، ومن هنا لا تستطيع الا ان تقول سبحان الله ، والحمد لله ، وتبارك الله احسن الخالقين .