الله لا يهينكم وصف طريق التنهاة والصمان .... وافضل الاماكن هناك ..

[ريح الخزامى]

السلام عليكم ورحمة الله وبركاته


بسم الله الرحمن الرحيم


اخواني مساكم الله بالخير في الوقت اللي انا كاتب(ن) الموضوع فيه

بس حبيت استفسر الله يعافيكم وين اطلع للتنهاة معه انا اعرف الخط اني اطلع من عند محطه خزام لين تجيني لوحه بعد التفتيش مكتوب عليها الصمان والتنهاة خط يجي على اليمين وانا متجه يم المجمعه افرق معه وابتل بس وين اطلع معه عقبها مع اني ودي اعرف وش افضل الاماكن هناك وهل توصل لها المواتر العاديه مثل الهايكلس وغيره لان مامعنا جيوب انا طالعن لها بس من مبطي فوق 8 سنين ولا هنا وقت اني اروح لها كل فتره مكاشيتنا قريبه علشان كذا ناسي الطريق ولا لي روحات لها

واذا ممكن احداثيات الاماكن الزينه هناك او فيضه طيبه وحليله وفيكم الخير والبركه وماخاب من استشار وفيكم الرجاء مايخيب

والعلم عندكم واللي له بخص يعلمني وش الاماكن الزينه اللي فيها فياض تستاهل ان الواحد يجلس فيها حول الاسبوع وزود لاننا ناوين نجلس انشالله حول الاسبوع ان شفنا الامور جايزتن لنا كملناها لاخر العطله

ولامانع من الاحداثيات لان معنا ماجلان s40 يمشي الحال

وجزاكم الله الف خير

[الشاقي]

وصفك مضبوط .. استمر مع الخط اللي ذكرته الين يجيك دوار خذ الدوار ورح يسار ولا تاصل آخر الخط بعد الدوار لأنه بينتهي ببوابة خاصة بالملك الله يخليه لك .... قبل ماتاصل البوابة ادخل يسار
وبالنسبة للمواقع بهاك المنطقة فيه حفر العتش كل اللي حوله زين

[النبراس]

بالنسبة لروضة التنهات ما تبي دلولة لأنها واضحة من الخط .
والطريق زي ما ذكرت بعد المفرق اللي يروح للصمان والتنهات تقريباً حول التسعين او اكثر المهم بتمر الحفنه وبعدها بشوي بتمر محطة الدوار وعندها مركز شرطة المهم إذا تبي الصمان تروح يمين وإذا تبي التنهات روح على طول 16 كيلو وانت واصل وما تحتاج احداثيات لانها مسورة بصبات .
أما بالنسبة للصمان تحتاج احداثيات إذا تبي فياض متطرفة لأنك لو تمشي مع درب الصبات راح توصل للفياض اللي على الطريق طبعاً على بعد 20 كيلو المهم انت انتبه للجهات وانت ماشي وإذا معك جارمن خذ احداثيات وادخل بس لا تنسى تسجل إحداثية الطريق يعني الزفلت . (الصمان هل يومين مليانه ماء يعني الهلكس ما راح يوديك إلا بصعوبه ) وفي الأوقات الثانيه الهلكس ماله مثيل (معه هلكس ) .
أما التنهات الكامري توصل لها
وانصحك بكتاب الشبنات عن الصمان.

[رحاااااال]

السلام عليكم ورحمة الله وبركاته
اظيف على الاخوان انه يوجد شعيب اسمه محارق في حفر العتش, هذا جنة
الله في ارضه. لا يفوتك تارك تبي تن...... اذا شفت الشعيب.
وكذلك عندك شعيب الطيري ايضاً.

[رحاااااال]

السلام عليكم ورحمة الله وبركاته
اظيف على الاخوان انه يوجد شعيب اسمه محارق في حفر العتش, هذا جنة
الله في ارضه. وكذلك شعيب الطيري.

[رحاااااال]

السلام عليكم ورحمة الله وبركاته
اظيف على الاخوان انه يوجد شعيب اسمه محارق في حفر العتش, هذا جنة
الله في ارضه. وكذلك شعيب الطيري

[مهلاش]

السلام عليكم ورحمة الله وبركاته،،،

حي الله النشاما

وش اقول وش اخلي وش ازيد وش انقص ماخليتو لي شي اقوله جزاكم الله خير يالمطانيخ ، بس حبيت اضيف شي بسيط الا وهو ان لروضة التنهات طريقين :
1- طريق سريع ( دغري ) : وهو زي ماتفضل الأخوان طريق الصمان التنهات المعرف .
2- طريق غير سريع ( ملتوي ) : وهو طريق للمروقين ، وهذا الطريق ممتاز جداً لأنه يمر بعدة فياض وينتهي بالصمان الا وهو طريق شعيب الشوكي من تمير وهذا يطلع على فيضه قبل شعيب الشوكي على يدك اليمين ( أفطر فيها وتقهوه وريح ظهرك ) ثم بعدها شعيب الشوكي ( اضبط غداك فيها واعدل راسك ببيالة شاهي وطلق رجلينك اشوي ولا تبع وضف عزبتك وخلك معي ) اطلع من شعيب الشوكي وخذ يمين مع الخط تبا تجيك محطه على يدك اليمين بتل بعدها تجيك هجره ادخل وسطها تبى تلقا بنشري حطه على يدك اليمين واطلع من الهجره مع حط ردميه بعد 300 متر تبى تشوف لك مضرب اخطوط واجد مع سهلة زي كفك حط رجلك معها بعد 20 دقيقه 50 ثانيه الى وانت مبنط في شبك التنهات وبعدها ان بغيت تروح لصمان الطريق واضح .

والسلام خير ختام

[ريح الخزامى]

بسم الله الرحمن الرحيم

الشاقي ,,,رحال ,,, النبراس ,,, مهلاش


ياعز الله انكم ماقصرتوووووووووووووووو والله يجعلكم في الجنه ووالديكم ووالدينا وجميع المسلمين ياحي ياقيوم
ماقصرتوا وغيركم مهوب مقصر

انا خابر الطريق من مبطي من عقب روحتنا ذيك السنه اخبر المحطه اللي في الزاويه اللي عند الدوار
( شارين منها يوسف افندي وفصفص ) ومركز الشرطه اللي لاتوجهت شمال وخليت المركز على يدك اليمين الظاهر ان الزفلت ينقطع على طول ويوقف عقب الدوار وبعدها ردميه هذا اللي اخبره ومخيمنا كان عند المخيم حق المجاهدين نمر من عندهم لاجينا ندخل المخيم والحمدلله انا من النوع اللي لا مريت مع الخط لو هو وسط صحراء اعرفه ولا اظيعه لو اجي عقب كم سنه واللي مذكرني الدوار ومركز الشرطه اني مرتن طالعن من ابي المحطه حول الساعه 9 باليل وامشي بالموتر لحالي من زود الهبال الا واشوف قبل الدوار من يم جهه المركز طابور اسطبات سيارات ورى بعض قلت وش هالقطار اللي في هالمنطقه ماخبرت انه يمر من هنا من زود الذهانه اول ماجاء على بالي قطار وكل ماقربت يم الدوار كل ماراحت الانوار لين وصلت الدوار ولا شفت شي الا هاللي انا اشوفه اهل بسم الله الله يجيرنا انا مدري وش صار عقبها الظاهر اني راجعن للمخيم امشي مافي بطن الموتر والحمدلله الامور ذاك اليوم سيطرنا عليها وفكنا الله وتيسرت الامور ولله الحمد

وانتم ماقصرتوا والله يعافيكم بس اذا ماعليكم امر ابي فيضه قريبه فيها ربيع الواحد مايتحسف على العنوه
وانا اخوك يامهلاش حنا من ربع اجدع عدتك وضفها لاجيت تمشي شغلنا شغل عجز اذا ربضنا ربضنا يالله نقوم

[مهلاش]

السلام عليكم ورحمة الله وبركاته

ابشر لعيناك طلاباتك أوامر ياريح الخزامي ولا يهونون الربع

أقرب فيض حسب طلبك بدون عنوه عندك سلمك الله فيضة الفوطه وفيضة السليمانيه وفيضة العليا

والسلام خير ختام ،،،