أي أنواع فراش الدرويش أفضل ؟؟؟ (فرو ، بولستر ، مخمل)

[محب الفتك]

بسم الله الرحمن الرحيم

أهني الجميع على هذا المنتدى المبارك ..
وأشكر جميع القائمين عليه من مشرفين وأعضاء ..
أود في هذا الموضوع أن أسأل عن فراش الدرويش ..
لاحظت أنه له عدة أنواع ، والمطلوب منكم - بارك الله فيكم - إفادتي بـ:

- أي أنواع فراش الدرويش أفضل ؟؟؟
فرو ولا بولستر ولا مخمل ؟؟

ولكم وافر الشكر والتقدر والاحترام ...

[موادع 1]

من وجهة نظري انحش عن الفرو
لانه يجمع الرمل والاتربة
والبولستر ممتاز ولا يعلق به الرمل
اتمنى اني افدتك بشي طال عمرك


ابو نواف

[خلاوي 111]

أول شي

ياحياك ياأخوي بين إخوانك بالمنتدى

أما بالنسبة للدرويش أنا ماجربته

جربت طال عمرك نوعين

الأول نوع تنزاني ويفصل عندنا بمحلات المقناص ...إحرص على أنه يكون تنزاني درجة أولي ...وقميته 250إلى 300 ريال ...


أما النوع الثاني فهو للسنيدي ...وإسمه فراش الخليج بصراحه ممتاز بس إنه المقاس العرض أصغر يمكن 4أو 3 سم ..وأنا أخذته بالصيف بغير موسم 250 بعد وترى يجي معاه زي الطربال شنطه للفراش ...


إن شاء الله إني أفدت لو بالقليل .....


كل التحية لك ....

[أبو أديب التميمي]

400 ريال سعر الفراااااش , كنه غويلي ,,,,


ما أدري عن اللي بيضبط له فراش يقدر يغسلة قطعة قطعة ((شراع تنزاني و مخدة ومطرحة من النوع الزين وبطانية) ثم يلفها على بعض ويربطها بحبال أو سبته نشاب. أتوقع أنها أفضل ... وبتختار الشي اللي على كيفيك!!

[راعي المستوي]

السلام عليكم
حياكم الله
بالنسبة للدريويش فهو ممتاز وخاصة البولستر
انا عندي واحد لونه اخضر دافئ جدا وانا فيه خارج الخيمة وبدون مشاكل
وانصحك فيه

[أبوسلطان1]

يامحب الفتك فراش الدريويش يدفي بس المشكله في حاجتين الأولى كبر الحجم (الوذافه) والثانية الفرو يمسك فيه الرمل يسمونه الجملي .

[بلاتين]

فراش الدرويش ممتاز ويدفي وانت بدون خيمه الى جربته تبطينه جيشيه ممتاز جداً وفيه تبطينه زيتيه ممتازه .
ميزاته ماتشيل هم البرد ابد مري جداً
عيوبه : ياخذ مساحه كبيره في السياره وثقيل .

سعره 300 الى 330

موفق خير

[عاشق السيل]

الفرو : دافي جدا ومريح في المنام ،، لكن عيبه ثقيل ويجمع الرمل وتنظيفه متعب ،،

المخمل : برضو يمسك الرمل ودفئه مش ولابد ،،

البولستر : ناعم وسهل التنظيف وخفيف الوزن ،، لكنه مهب ذاك الدفى !!

نصيحتي لك ومن القلب لاتاخذ غير البولستر وطق بجامتين وتنام بأحلى دفى وريح نفسك من تجميع الرمل وثقل الوزان وتراه معي من عشر سنين وأنواع الكرف وما اشتكيت منه ولله الحمد !!

وتقبل مروري يالغالي ...

[الدهاس]

اولا: يامرحبا فيك بين اخوانك

ثانيا : اتوقع الاخوان ما قصرو كلن عطاك رايه والاخير انت وما تحب

[xl7]

أخوي أبو فارس
فراش الدريويش ما ينفع أبد الا اذا انت من محبي الحجرة وخصوصا ما بين الحدقة وأم رضمة

[الشاهين2004]

فراش الدرويش دافي بس عيبه كبر حجمه انا معي فراش المقناص من 4 سنوات بلوستر دافي ووذف ومعه جراب له

[محب الفتك]

أشكر الجميع على ردودهم النافعة
وجزاكم الله خيراً

[kaaaatm]

بصراحة الوليستر وبس


له عندي من اربع سنين ولسى ما تغير

وبصراحة تنسى حجمة اذا نمت به بالليل

[محب الفتك]

مشكور على الرد
طيب البولستر حار في الصيف ولا لا ؟؟
ووش فرقه عن المخمل ؟؟
ولكم جزيل الشكر

[حامدي السيح]

اخوي انا عندي الدريويش بولستر وممتاز جدا ودافي بالشتاء وبالصيف جيد وانصحك فييه