رابطة ملاك الباترول (من موديل 98 وفوق)

[adil33]

سجلوني معاكم امتلك سوبر سفاري موديل 98 واي خدمة عن مشاكل السوبر سفاري او الباترول بشكل عام انا حاضر ان كان هنا او برساله خاصه

[sands]

سجلني معاك
الاول باترول 92 بابين وبعته
وبعدين باترول موديل 99 بابين ايضا
واللحين باترول 97 ربع سوبر سفاري
وعلى بركة الله

[adil33]

ملاحظة مهمة جدا ...يوجد عطل ربما يحصل مع البعض وهذا العطل لا يحصل في السيارة الا مع الملفات فاحيانا تسير وتواجهه دوار او كبري وتتجه يمين داخلا الى الكبري للدوران حتى تتجهه الى طريق اخر ثم فجاءة تبدا السيارة بالتقطيع لمسافه معينه ثم يطفيء المحرك وتتوقف السيارة وفي هذه الحاله تبدا لديك الشكوك بان هناك عطل كبير في سيارتك ولكن للتنبيه فان السيارة ليس بها عطل لكن مع الدوران انتقل البنزين من جانب الى اخر من التانكي وجلست طرمبه البنزين بدون بنزين وتصيبها سخونه مؤقته ولا تتحمل ان تعمل كما كانت فتتوقف عليك السيارة فارجو من يحصل معه هذا الموقف ان لا يذهب الي اي ميكانكي ويضع سيارته في يده وهي سليمه تماما ما فيها شيء .... كل ما في الامر اترك السياره دقيقتين حتى تبرد الطرمبة وتكون السيارة في وضع معتدل حتى يقوم البنزين بتبريد الطرمبة وتوكل على الله واكمل مشاوريك بامان باذن الله

[ابو سوبر]

سجلني معكم وانا اخوكم
اعشق الباترول عشق
سياراتي كلها باترول
78 وانتم خابرينه شراع الي الدبل عصوين
83 ربع ابو خطوط حمر
85ابوخطوط خضر
89تمتيك ربع
و
و
و
لين وصلت 2003 فتك
تعديت العشرين باترول
واعتز بلمشاركه

[راعي بيشة]

إلا عندي سؤال مهم جداً

انا معي 2007
مكينه 4500

وعندي مشكله في السيور وبالذات حق الدينمو اكبرهم

قبله يتقطع مع العلم ان السيور وكاله والشغل مظبوط

اللي يخبر له سالفه يذكرها لنا تسود نلقى فايده ملينا من التغيير

والوكاله لا الحمراني ولا الجبر كل واحد يقول جب قروشك قدامك ونشوف وش السالفه والوقت بيبطي عندهم

وانا ما عندي وقت جامعه وغثا


مشكورين مقدما

وين adil33

شف موضوع الرجال وانا خوك

والا بقية الشباب

[D I K T O O R]

سجلنا

باترول ربع 2000

[راعي بيشة]

الحقيقة يا شباب لفت نظري للتنظيم الأخ حامي الخبرا جعله يسلم ومن يسمع

فنبي تنظيم مثلا: صفحة يجمع فيها أفضل الورش للباترول سواءً في الرياض أو القصيم أو الدمام وغيرها وتحت هذا العنوان عناوين فرعية

ورش تربيط

ورش تجهيز ببطارية إضافية وماطور هوا ومحول وتثبيته ، وهلم جرا


وصفحة فيها أشهر وأكثر أعطال الباترول :

مثل الكتاوت وغيرها ، والكلام عن مشاكله بشكل عام الحرارة والصرفية .. وهلم جرا

وأهم التجهيزات للباترول

أفضل كفرات أفضل ،

جنوط

معرفة الفروق بين السفاري والسوبر سفاري والسياحي

وغير ذلك فليت حدا الشباب يفهرس لنا تنظيم للصفحة وأنا أشوف إن سوبر فتك أو بقية الشباب اللي ذكرناهم هم أعرف منا بالأمر فليتهم يشوفون كيف التنظيم


بعدين ذكر الأخ حامي الخبرا موضوع وجود عضوية للرابطة ف التوقيع وأنا أشوف الفكرة ممتازة ولكم الخيار

[قرم العيال]

سجل عندك
سوبر سفاري 2005

والله يقويكم

[adil33]

إلا عندي سؤال مهم جداً

انا معي 2007
مكينه 4500

وعندي مشكله في السيور وبالذات حق الدينمو اكبرهم

قبله يتقطع مع العلم ان السيور وكاله والشغل مظبوط

اللي يخبر له سالفه يذكرها لنا تسود نلقى فايده ملينا من التغيير

والوكاله لا الحمراني ولا الجبر كل واحد يقول جب قروشك قدامك ونشوف وش السالفه والوقت بيبطي عندهم

وانا ما عندي وقت جامعه وغثا


مشكورين مقدما

اخي الكريم مشكلتك في البكرات اما بكرة الشداد او الدينمو احتمال تكون جاتها ضربه او دقه شاكوش فالسير وقتها رايح يتآكل مع الاطراف وتبدا تخرج منه خيوط شوي شوي وبعدها يضعف وينقطع

[تناساني]

سجلني بالرابطه بس لا تربطنــا


باترول 1999م ربــع (سياحي) أبيض





.

[راعي بيشة]

نصيحة ياهل البتاريل والأمر ليس خاص بالباترول

حط لك مفتاح سبير ف الموتر في مكان سري

حصل لي موقف رفع ضغطي

[بلاتين]

مشكلة المفاتيح مشفره مايشغله الا حق الوكاله والوكاله يعطيك مفتاحين تستخدم واحد وتحط سبير في محل امن حتى لا يضيع ...
وممكن تفصل مفتاح لفتح الباب فقط يصير نحيف قص الدائره الى تكبره وحطه بالمحفضه (البوك)...

[عاشق النفود 111]

جزاك الله خير أخي الفاضل

موتري صالون سياحي Gl‏ ‏2008

أسأل الله أن يعطينا خير سياراتنا ويكفينا شرها

وأي استفسار عن أي شيئ أنا حاضر أجيبكم من خلال تجربتي لسيارة ** ما عدا الاعطال الله يبعدها عنا.

كنت ناوي أفتح موضوع بعنوان تجربتي مع الباترول السياحي الجديد. لكن دام هذه الرابطه موجوده فسوف ادلو بدلوي هنا إن شاء الله .. لست خبير ولكن من خلال التجربة.

وش رايكم الي مر بعطل بسيارته وصلحه يذكر لنا نوع العطل وكيف تم تصليحه وكم التكلفه **
أيضا توضيح قيمة قطع الغيار لاصلي والتجاري إن أمكن **

حتى يستفيد الجميع ولا يلعبون علينا راعين القطع والورش

هذا مجرد رأي مني و ماترونه هو الانسب..

ننتظر الترتيب للموضوع لنبدأ

حفظنا الله وإياكم من كل مكروه

[راعي بيشة]

مشاكل وحلولها منقوله من الموضوع الشهير الذي أبدعه الأخ المترو عفا الله عنه
إن شاء الله تكون بداية جيدة في مشاكل الباترول

الموتر باترول 98

المشكلة رجة في الدركسون

الحل بعد ماحست بالصناعية فترة طويلة وغيرت كل شي ولانحلت المشكلة

خرط راس العكس للدفرنس الامامي

ورجع الموتر قطة وحدة كنه وكالة .

2

انا عندي سفاري فيه صوت في المروحه وكان قومته ثقيله وصرفيته قويه اشوي لاكن لاكن لاكن تجي السالفه
قمت بفك تماتيك المروحه لقيته ثقيل اشوي مهب اشوي ثقيل مره رحت لم القطع غيار اخذت تماتيك التيما من الولات وركبته بعدين
راح الصوت وراحت صرفيت البنزيم وخف الموتر مره . بشرط يكون التماتيك اصلي وكاله بس عيبه سعره غالي بس انشهد انه يستاهل
فيه نوع عند الموسا بعنيزه كرتونه اصفر زين بس معرف اسمه رخيص . والتجاري لايقربك ابد مهما صار .......
المشكله الثانيه هي مسعدات قدام زفت من موديل 98 حتى 2001 رخوه مره قمت بمصعهن وحطيت مسعدات جيب ربع من 2001 وفوق ....
المشكله الثالثه هي رجه في الطاره عند أي مطب في الطريق عند كل السرعات غيرت مساعد الطاره ما تغير شي . اشارعلي واحد جزاه الله خير
قال رح لم ورشة الفيز ببريده الصناعيه يحل لك المشكله قام العامل بتركيب مساعد لا الطاره ثاني جنب الاول حق البلد وراحت المشكله الحمدلله .. .........................
واللي يبي علوم ثانيه منقصر معه صرنا خبره .... وسلامتكم

3

اخوي عنده با ترول 92 اذا اسرع ووصل 100 يرج الدراكسون رجة تروع ويطول وهو يرج لمين تهدي شوي وش طلع السبب وذا شي مهم جدا لازم ننتبه ونشيك عليه دايم السبب (مساعد الدركسون ) مبوش وبغى يقلبنا والله ستر

4

ياشبااااااااااااااااب الي سيارته نيسان ينتبه من الكهرباء وخاصه البليتيين والله انه مخثه واذكر مره انا قانص مع شباب وفجئه طفت السياره هي نيسان سفاري والمشكله البليتيين ثم لو الله ثم جونا ناس رحنا فيهااااا

5

السلام عليكم ورحمة الله وبركاته

صارت لي بعض المشاكل وعملت صيانه ومن باب الفائده نذكرها

السيارة نيسان باترول 99

المشكله الاولى

تهريب زيت من اسفل المكينه من عند بكرة السيور من الصوفه

الاصلاح

تغيير الصوفه مع خرط البكره

المشكلة الثانيه

صوت طقة اذا لفيت الدركسون للاخير يمين او شمال

الاصلاح

تغيير جلب عمود التوازن وتربيط رمان الهوب من الدفرنس وترصيص ارض ووزن اذرعه

6

السلام عليكم ورحمة الله وبركاته

ياجماعة الخير انا عندي سفاري99 صار فيه رجه مهيب طبيعيه تجي اذا اكلت لي مطب او اذا اسرعت

رصصت الكفرات لكن مافيه فايده ورحت لم ورشه وقالي مساعد الدركسون وشريته 160 ريال وشغل يده ب50 ريال..... صحيح ان الرجه راحت بس باقي منها شي بسيط وش الحل تكفون ....وتراي انتظر ردكم يا لأ جواد....

7

السلام عليكم ورحمة الله وبركاته
أنا مرت علي مشكله وأكيد مرت على الكثير من أهل الباترولات موتري باترول موديل 95 كان عندي رجه شديده مع صوت (عرير ) أول ورشه جيته قالولي ترصيص رحت ورصصت ما تغير شي ورجعت وغيرولي صليبات العمود الخلفي مع العلم ان موتري فيه فرارات غيرنا الصليبات ما تغير شي وكل يوم يزيد الصوت واحس الصوت وسط السياره يعني عند العمود وكانت الرجه تزود بعد 100 إلى 140 ك وتخف بعد 140 وتزود مع الدوس وقام يضعف عزم الموتر يوم بعد يوم وبعد مضي ثلاث شهور وانا من ورشه بورشه وما خليت شي ما سويته إلا درجت إني غيرت العمود الكردان ولا تغير شي وبعد هالمده مريت واحد سعودي بورشه أعرفه من زمن قال ما فيه إلا حل واحد نغير الدزق والصحن والكلتش ونشوف قلت سوى اللي أنت تبي السياره بين إيديك غيرت الدزق والصحن والكلتش وبعض الجلد والربل اللي حولهن وابشركم رجع موتري تقل جديد راحت الرجه والصوت ( العره) وزان عزم الموتر وصارت قومته قويه وانحلت مشكله شيبت براسي

ولكم اجمل تحياتي,,,,,,

8

أنا حصل معاي عطل وهو عدم اشتغال التانكي الاحتياط للبنزين
وسيارتي باترول 99
قالي كهربائي إفصل راس البطارية ثم ركبها وراج يرجع ويشتغل
وفعلا حصل معاي واشتغل ولما سألته عن السبب قال إن العطل اللي عندك إلكتروني في الكمبيوتر
واذا فصلت راس البطارية ورديته فتكون سويت إعادة تشغيل للكمبيوتر ويصلح نفسه بنفسه
مثل الكمبيوتر العادي لا ابتلش الرجال فينا وتوهق بعطل
نقز الريستارت كأنه ما يدري
ويحل مشكلته

9

السياره باترول 1997
العطل نفضه في الدركسون مابعد السرعه 80كم
رحت للعظيب وقالو خرط هوب امامي وخلفي وتغير الجلب وتغير المساعد الدركسون
الحل هو
غيرة مساعد وصار وكاله بدون خرط ولا تغير جلب.

10

شباب مساكم الله بالخير
سيارتي باترول 2004 تنقص موية الاديتر دايم ولا هنالك تهريب في السيارة وفحصتها اكثر من مره والنقص كل 800 كيلو مقدار القربة مليانة
المشكلة انه ماهنالك تهريب في السيارة ولا في الاديتر ولاهناك مويه بالزيت ولافيها تبخير غير طبيعي في الشكمان
ممن لديه الحل او ورشه مضبوطه يفيدنا الله لايحرمكم الاجر

السلام عليكم
اخي الفاظل هذه المشكله حصلت معي وهي تغيير غطاء الرديتر الوجه الخاص فيه ينقرص وبحكم الحراره يتبخر الماء من الرديتر بدون ان تلاحظه هذا من حكم تجربتي التي مرت علي نفس المشكله ،،،،،،،،،،،

11

بسم الله الرحمن الرحيم

اخواني الكرام
السلام عليكم ورحمة الله وبركاته

اولاً احيي اخونا الغالي ( المترو ) على طرح مثل هذا الموضوع الرائع واللي استفدت منه الشي الكثير وبصراحه اصبح لدي خلفيه عن الاعطال وطريقة اصلاحها والظاهر راح افتح في القريب العاجل ورشه انافس وكالة نيسان .

نأتي للمفيد :

عندي سفاري موديل 94 طبعاً بخاخ وبعد 6 سنوات حافله بالانجازات بدأ الموتر يحس بتوعكات صحيه كثيره والظاهر ان ايامه الاخيره قربت .
المهم :

كنت ماشي على الخط راجع من الدوام وبدون سابق انذار تعطلت السياره وانا امشي رديتها ثاني والحمدلله مشت معي وصلتني للبيت بعدها بغيتها تشتغل قالت احسن لك روح جيب لي سطحه .. قبل لا اجيب السطحه قمت اتعبث وادور من هنا ولا من هنا سبحان الله سلك مقطوع او اي شي لكن للاسف مالقيت شي جبنا سطحه وركبناها وديتها الوكاله قاموا بالتشييك عليها عن طريق الكمبيوتر وطلعت عندي هذه الخرابات :

1- غطاء الديلكو سعره 190 ريال سعر الوكاله -------------------NI-22162-52H20 CABLE SET
2- اسلاك بواجي السعر 246 ريال سعر الوكاله ------NI-22450-37J28 CAP DISTRIPUTOR
3- فلتر هواء سعره 93 ريال سعر الوكاله --------------- NI-16546-74S00 ELEMENT ASSY
4- بواجي السعر 60 ريال سعر الوكاله ------------------------NI-22401-21B16 PLUG-SPARK
5- منظم هواء السعر 1791 ريال سعر الوكاله لم يتم كتابة الرقم في فحص الوكاله
6- هوز الهواء وسعره 224 ريال سعر الوكاله ----------NI-16578-37J00 HOSE AIR DUCT

بعدها قلت للوكاله سلام عليكم اخذت الموتر طبعاً على سطحه وديتها ورشه كبيره وهي الصقر والراجح وشيك عليها الميكانيكي واتصل علي بعد يومين وقال السياره جاهزه رحت للورشه وقلت وش اللي في السياره ؟؟ قال هوز الهواء كان مقطوع جزء منه طبعاً هوز الهواء رقم ( 5 ) اللي سعره 224ريال غيرته والحمدلله انحلت مشاكلي ورجع الموتر مثل اول .

بعد 10 شهور تقريباً حسيت بأن الموتر مو صافي وبدأ يطلع دخان اسود وعزمه ضايع يعني لو اركض اسبقه وصلت للبيت بعد عناء طويل اليوم الثاني اتصلت بنفس راعي السطحه ( صرت عميل ) اعطيته الموتر وقلت له خذها لنفس الورشه الصقر والراجح بعد التشييك اتصل فيني وقال الموتر جاهز قلت وش اللي فيه قال غيرنا لك البواجي فقط .

بعدها بشهرين تقريباً رجعت الحاله مره ثانيه وهي خروج الدخان الاسود والعزم يصير ضعيف ولابد اسفط على جنب لأنها ماتمشي ماتستقبل بنزين بعد شوي تصفى لحالها وكأن شيئاً لم يكن اخذتها للورشه شيك عليها بالكمبيوتر وقال كل شي عندك مضبوط ماعدا منظم الهواء قلت اكيد منظم الهواء قال والله هذا اللي طلع عندي .

هنا الزبده هل اغير المنظم سعره يصلخ 1791 ريال سعر الوكاله ولا يوجد حل ثاني مع العلم اني غيرت طرمبة البنزين وصفاية البنزين والبواجي واسلاك البواجي وفلتر الهواء يعني كل شي غيرته وباقي اثنين لم يتم تغييرهم وهم :

1- منظم الهواء
2- غطاء الديلكو

هل تتوقعون المشكله منهم اخاف اغيرهم ولاتنحل المشكله هل حصل لأحد مثل هذه المشكله ؟؟
قصه طويله كتبتها على عجل ولا ثلاث صفحات ماتكفيني

الرجاء عدم اهمال مشكلتي بارك الله فيكم .

اخوكم بوخليفه

12

انا معي جيب باترول 99 سلقه

اشغلني صوت الباب اللي ورا يصرصر ويطلع اصوات قمت ببساطه بلف مرابط الباب بتيب امريكي حق الكهرب والحمد لله راح الصوت نهائيا

13

السلام عليكم ورحمة اله وبركاته

نوع السيارة سفاري 2003م

العطل / في البداية توقف الراديو والمسجل والمكيف وظننته عطل فيوز ولكن بعد أن تحركت بالسيارة مسافة حوالي عشرة كيلو مترات فجأة توقف المحرك .
أدرته ولكنه لايستجيب وانطفأت جميع الأنوار التي في الطبلون ولكن البطارية كانت سليمة 100%
توجهت إلى الوكالة ( الجبر ) فكانت الإجابة في اليوم التالي بأن السلف يحاج إلى تغيير ( وافقت مع عدم القناعة ) .
تم تركيب السلف الجديد ولكنهم فاجئوني بأن حساس الماكينة أيضاً يحتاج إلى تغيير ( وافقت ) على ذلك .

الحمد لله السيارة الآن تعمل بصورة ممتازة ولله الحمد ولكني حتى الآن غير مقتنع بتغيير السلف إذ توجهت إلى أحد الكهربائيين وذكرت له ما حدث ولم يقتنع بتغيير السلف .

ما يهمني في الموضوع أن السيارة الآن تعمل والحمد لله أما المال يذهب ويعود وغير مأسوف عليه.

14

أنا عندي عطل وهو عدم اشتغال التانكي الاحتياط للبنزين

وسيارتي باترول 98
وصدفه فصلت راس البطارية وركبتها رجع ويشتغل ولكن بعد ما فرغته في التانكي الرئيسي وعبيته بعد فتره ولعت لمبة التناكي الاحتياطي وفعلا اذا فصلت راس البطارية ورديته يسوي نفس الحركه

وش الحل في المشكله

15

هنا ما ذكر حل بس قلت أحطها يمكن عادل والا حدا الشباب يفيدنا

السلام عليكم يا أعضاء مكشات الكرام

حتى لا أقع بين فكي العمالة الأجنبية والمحتالين منهم
قلت مالها إلا رجالها بيدلوني على أقصر الطرق للحل :

الموتر: باترول سفاري SJL
الموديل: 2000 م

المشكلة الأولى
صرفية البنزين غير معقولة
أعبي التانكيين تمام وما يمشيني إلا 500 مع الركادة والمسايس!!
أغلب الشباب يمشيهم حول 700 - 750 كلم
وش القصة؟

المشكلة الثانية
يوجد بعض الأحيان وبعد إيقاف الموتر بعد سفر صوت واضح في الكلتش أثناء الضغط عليه وعند التعشيق ورفع الرجل عن الكلتش يروح الصوت، تحصل في الريوس والأول والثاني .
وش العلم؟

المشكلة الثالثة
يوجد رشح زيت من صوفة الدبل، وبعض الأحيان أشوف بقعة مكان السيارة منها ، هل لها حل؟ وهل لها ضرر خصوصا وأني عايرت الزيت وما شفته ناقص ؟


الله يجزاكم خير ردوا علي ولا تسفهوني
ولمن أفادني الدعاء بالتوفيق والسعادة في الدارين

فمان الله

16

معي سفاري98 وغيرت طرمبة البنزيل من محل ابن شبيب حسبي الله عليه وطعلت تجاري ورجعت له وبعد الاخذ والرد والكلام غيرها لي وشرط علي ان لا اعود له مرة ثانية.

لكن المشكلة ان الثانية مثل الاولى .

بعد كذا ذهبت بالسيارة الى الوكالة وتم اصلاحها بقطع اصلية.

===================
حصل تهريب ماء بشكل متزايد ووجدت المشكلة من قطعة لي صغيرة للماء بين المكيف والرديتر وهذه خطيرة لأنها تؤدي الى فقدان الماء وارتفاع الحرارة بشكل خطير .

17

عطل أعجبني

الموتر : جيب نيسان
العطل: ضعف في دفع هواء المكيف
كان السبب بعد الكشف: وجود ريش حمام وقمري في فتحات التهوية...وتم تنظيفها ..وأصبح الهواء قوي جدا والحمد لله

18

السياره : باترول 2002
المشكلة : تهريب صوفة عكس خلفي
السبب : زيادة زيت الدفرنس من قبل بنشرجي غبي
ازلت الزايد من زيت الدفرنس وخف التهريب ولم يتوقف
السؤال : هل اتركة ام اغير الصوفه وكم يكلف وهل الافضل التغيير سمعت انه يسبب حنه بالدفرنس

19

بالنسبة لمشكلة مشرفنا ( رحال ) فقد حدثت معي وحلها كالتالي :
اخوي الكريم /رحال
السلام عليكم ورحمة الله وبركاته
انا صارت معي نفس المشكلة جيب سفاري بخاخات موديل 95م ( تقطيع ودخان اسود وعزم مافيه ) حصلت المشكلة بعد غسيل السيارة بستم حسب ما يبدو لي وكما اكده المهندس وحذر من غسيل السيارة بالبستم وقال يخرب الاجزاء الكهربائيه ، المهم شخصوا الخراب بأنه المنظم الخاص بالهواء وسعره مثل ماقلت بالوكاله 1700 وشوي ولا يوجد الا في الوكاله
رحت للتشليح وتراهم نصابين يقولك بخمسمائه وبعضهم بتسعمائه بس تراه مايشتغل كما يجب ياخذونه من واحد ويبيعونه على آخر واخذت كم واحد وارجعه يقول المهندس ضعيف يعني يشتغل بنسبة 40% يعني يمكن بعد شهر واو اكثر يجاوب معك ونصحني بدفع المبلغ وشرائه من الوكاله
وآخرتها شريته من الوكاله بالسعر اعلاه ولكن ارتحت وسافرت عليها الى الجنوب وزي الحلاوه والحمد لله
آسف للإطاله
وشكرا

20

المشاركة الأصلية كتبت بواسطة وحداني ومبسوط
يا جماعه أنا طرحت مشكلتي قبل أسبوع والأخوان في المنتدى ما قصروا وأنا إن شاء الله بعد أسبوع تبدأ إجازتي وناوي أخليها بالصناعيه أين يضبط الموتر وباخذ آراء الشباب كلهم لين يزين الموتر والمشكله هي :
عندي جيب سوبر سفاري فتك موديل 2002م أتوماتيك
قبل شهرين تقريباً وبدون أي مقدمات شغلت السياره أبروح مشوار بعد ما مشيت ما غير القير
( ما ينقل من نمره لنمره ) وقعد على أول تعشيقه لين قام يحن بعدها وقفت الموتر وأتصالات مع هالعالم بعدين
طفيت وشغلت من جديد ورجع الأمر طبيعي يعشق من أحسن ما يكون ... المهم صار يجيني هالأمر بأستمرار يعني الموتر حامي أو بارد ماله وقت معين ،،، رحت للوكاله دخلته عندهم كشفوا بالكمبيوتر قالوا السياره ما فيها شي زودوا زيت القير وغيروا كتاوت طلعته من عندهم رجع زي ما كان رجعته لهم ثلاث مرات بعدها تحت ضمان الشغل الأول وفي كل مره يقول الكمبيوتر ما فيه شي قال المهنس نغير الحساسات ونشوف بس ما نضمن الشغل يزين أو لا ما عليهم مسؤوليه ( للأسف هذي وكالاتنا )وما زال الحال على ما هو عليه
أفتوني يا جماعه أحد صارتله هالمشكله ودلوني أذا فيه ورشه تعرف لهالأمور .
وتقبلوا تحياتي
إذا أحد عنده راي أو تجربه أو نصيحه فليدلي بها مشكوراً


راكب اللي لا مشى يسهي سهياني .... ما يداني رجل سواقه تنوشه
( هذا الفتك عطيب الضرايب )

السلام عليكم ورحمة الله وبركاته

مساء الخير لجميع الخوان في منتدانا الموقر وأنتهز هذه الفرصه لتهنئتكم بحلول شهر رمضان المبارك وأقول كل عام وأنتم بخير وبارك الله لكم في شعبان وألحقكم رمضان وجعلكم ممن يقضونه بالصيام والقيام ويجعلكم من عتقائه من النار
أما في ما يخص مشاركتي السابقه والتي تتعلق بمشكلة قير الفتك فقد نصحني أحد الأخوه بإدخال سيارتي الى ورشة العلاج بالرس وقمت بتسليم السياره لهم وقاموا بالتشييك عليها وأتصلوا علي بعدها بيوم ونصحوني بإدخالها بوكالة نيسان بالقصيم وتكفلوا بإدخالها للوكاله عن طريقهم بسبب وجودي بالرياض وقاموا مشكورين بإدخالها للوكاله وأخبروا الوكاله بأنني قد أدخلتها لوكالة نيسان بالرياض وأفادة الوكاله أنه لم يتم أخالها لكمبيوتر الوكاله بالرياض ( شف لعانة وكالة نيسان بالرياض عشان ما يتحملون المسؤوليه ) المهم أكتشفوا الخلل وهو العلبه الخاصه بحساسات القير وقيمتها 3800 ريال تقريباً غير شغل اليد وبعدها دخلت الواسطات والجاهيات وقاموا بأخذ القطعه من أحد القيور المعاده للوكاله بقيمة 2300 ريال مع ضمان لمدة ستة أشهر وحتى تاريخه لم يحدث شيْ ولله الحمد مع أني ذهبت بالسياره لطايف , مكه , المدينه , ينبع, الإمارات , صلاله ولم ألاحظ أي شئ ولله الحمد

أحببت أن اطرح الحل للفائده

21

أسد نجد

معي نيسان دوخني باالحرارة وكلفني أكثر من خمس الآف منها خرط الراس وتغييرة من الوكالة
ورديتر من الوكالة +مروحتين +تماتيك المروحة +المروحة+خراطيش وووووو

وفي النهاية الحرارة طبيعية لكن الأنبير (حساس الحرارة ) خربان

عسى أن تنحل مشكلتك

وقد بكون من الرديتر يبي له تغيير كما قال هناك في الموضوع المذكور

22

الاخ/ ابو ريما صاحب الفتك 2005
اذا انت من اهل الشرقيه انا انصحك تروح للمركز السعودي
للبخاخات في الدمام وهو موجود في الخضريه وهو معروف في الخضريه
وهم متخصصين في امور السيارات المعقده مثل البخاخات وغيرها

صارتلي مشكله في الفتك حقي مشابهه للمشكلت موترك ووديته لهم
ورجع الموتر من احسن ما يكون


اذا احتجت شي لا يردك الا لسانك
تحياتي للجميع/4800vtc

23

المشاركة الأصلية كتبت بواسطة دندشه
السلام عليكم
انا عندي سفاري موديل 1992 اذا لفيت الدركسون يسار يصير فيه صوت ونه كنه مافيه زيت مع العلم أنه فيه زيت
وش السوات لا هنتو

عطوني وش خرابه لاهنتواااااااااااااااااااااااااااااااااااااااااااا اااااااا

اخوي العزيز الله ولي العلم صوت الونة اذا لفيت والزيت موجود ولا فيه نقص يعني اصلاح مراوح المراوح الى جوا العلبة فيها خراب وانصحك انك ما تركب اصلاح لأنها نادر تنجح دورلك علبه زيت من التشليح وجربه وبتوفيق

24

السيارة باترول 98 المشكله ميعان الظفيره حقت النور الامامي السبب لاني حاط نور 100/80 الحل غيرت النور الى النور الاصلي حق الوكاله

25

رجاء خاص جدا المساعدة.. باترول 98 تجمر القزوز بشكل خطير
دخلتها معظم الورش ومافيه فائدة
غيرو القزوز / والكنديسة كاملة / وزنو البلوف / وفكوا صدر المكينة ووزنوه كم مرة ,,, ماخلووو حيلة ولا طريقة ,,,,,
النتيجة ,,,,,,,,,,,, مازالت تجمر !!!!!
نويت أبيعه وخايف يكون فيه خطر على اللي يشتريه !!!!
الرجاء المساعدة المساعدة يا أهل الخبرة ,,,, على الايميل
jeel4all@hotmail.com
او يرسل لي جواله على الخاص

وهنا مشكلة ف الباترول وحلولها 0 0 0 0 0 0 http://www.mekshat.com/vb/showthread.php?t=36856

وتعبنا والتعب راحة معاكم يارابطة الباترول

[NissaN 1990]

سجلني أنا والأطخم اللي بالتوقيع وطبعاً موديله 1990 وسلامتك أنت والحاضرين