السلام عليكم ورحمة الله وبركاته
حياك الله يا ابو صالح وما طلبت شي يا الغالي
هذي خريطة بسيطة لمنيفة توضح لك افضل اماكن الصيد وهي العلامات الخضراء ومرقمة حسب احسن المواقع يعني 1 هو احسن مكان وبعده 2 وانت ماشي، طبعا الخريطة هي للمنطقة بعد ما تلف من خط الكويت وتدخل لفة منيفة وتمشي شوي
عموما منيفة معروفة بكثرة الدرادير او الخارور او السايور وهو مجرى ماء البحر في حالة السقي والثبر وهي احسن اماكن تحدق فيها واكثر هذي الدرادير هي عند المكان 1 و 2 وهذي من احسن الاماكن لصيد الشعوم والسبيطي وانا صدت فيها شعوم وسبيطية كبار وسمان
الهامور حاليا قليل تلقاه على السيف في منيفة وانت وحظك والمكان الي صدنا فيه الهوامير هو رقم 8 لكنه تغير وجربناه مره ثانيه ومافيه صيد وخبرك البحر ارزاق فما انصحك تتعب نفسك ركز على الاماكن 1 و 2 و 3 و 4 هي اضمن شي انك تصيد فيها والارزاق بيد الله
المكان رقم 3 هو احسن مكان تصيد فيه على السقي وانا و2 اخوياي صايدين فيه ما لا يقل عن ثلاجة في ليلة وحده شعوم وقرقفان ولكن على السقي بس وحطيت خيوط مد فيه صدت سبيطية كبار وواجد ولكن فيه بعض اللخم والهريريه وهو يكون ورا عدامه مرتفعه وهذي العدامه يطلع تحتها حميض اذا ودك تاكل لك شوي
المكان رقم 6 هذي حفرة كبيرة عند معمل ارامكو المهجور واحيانا يتجمع فيها السمك وتصيد فيها صيد تمام ولكن احيانا تخلى من السمك وانت وحظك لكن ما يمنع انك تجرب
الاماكن 5 و 7 بعيدة شوي لكن فيها احيانا شعم زين اذا لك خاطر تتمشى في الربيع دق سلف وجرب
بعد مركز سلاح الحدود في شركة القصيبي للصيد يبيعون ثلج بس انت وحظك اذا سمح لك العسكري انك تدخل، والماي لا تنسى تاخذ معاك لكن عب المطارات في محطة ابو حدرية او راس الزور عشان يخف على الموتر واحيانا يجي وايت يعبي ماي في منيفة بفلوس طبعا
العلامة الصفراء: هذا مخيمنا اذا احتجت اي مساعده او نقص عليك اي شئ فلا تتردد ابد وروح للمجلس وانشد عن واحد ينقاله ابو جبر عنده لومينا رصاصية تراه نشمي ويعرف منيفه شبر شبر وبينبسط اذا لقى احد يحدق معاه بس قوله انا جايك من طرف ولد اختك ابو راشد وان شاء الله ما راح يقصر معاك
لا تنسى تدور فقع ترى منيفة ارضها معروفة بالفقع واكيد بتشوف ناس قاعدة تدور
( احذر ) منيفة ترى فيها صبخ اقشر فانتبه من اي صبخه ولا تغامر وانتبه من الرمل والتغريز
اخيرا ادعو الله ان يوفقك في هذه الرحلة ويرزقكم من فضله وان يحفظك من كل مكروه، واي استفسار انا حاضر.
وفقك الله
تحياتي
رد مع اقتباس
