دلوني لأفظل طريق للصمان

[موادع الشرقيه]

السلام عليكم ورحمة الله وبركاته

كيف الحال؟ إن شاء الله طيبين

اخواني المكشاتية بغيت استفسر منكم

انا من سكان الشرقية (الدمام) ولاعمري رحت للصمان وإن شاء الله بروح لها هالسنة إن شاء الله
لأ ن دائماً طلعاتي النعيريه والسفانية وما جاورها وأحياناً مجهوله (قرب الحريق)

وابي منكم تدلوني على اقرب طريق الصمان وأحسن الأماكن فيها وكم كيلو تبعد تقريباً من الدمام


شاكر ومقدر لكم

[صوعان]

اخوي موادع الصمان بعيد عليك مو قريب
لكن اقرب طريق لك عن طريق النعيريه ثم قريه العليا ومنها الى الرفيعه (جراره سابقا) هذا الصمان
وان بغيت الفياض الزينه اطلع من الرفيعه الى اللهابه مزفلت ومنه روح غرب من الـ 20 كيلو الى الـ 30 وتبدا الفياض

[هايبر]

الطريق الافضل مثل ما ذكر أخوي صوعان المسافه تقريبا 300 كيلو من الدمام .طبعا تعرف طريق النعيريه إذا عديتها كنك متجه للحفر بيجيك تقاطع وعليه لوحه كبيره ( يمين الخفجي سيده الحفر يسار العليا والرياض ) تتجه يسار كنك رايح الرياض وتبتل سيده لين تجيك الرفيعه لوحتها واضحه طبعا لازم تدخل الرفيعه وتعبي بنزين ضروري حتى لو بنزينك ناقص شوي لازم تفلل الخزانات .طبعا الرفيعه في وسط الصمان تقريبا وبعدها تحدد وجهتك .

الأماكن الزينه صعب تحدد لك الوقت هذا لأن ما ندري كيف بيكون الربيع فيها بعد كم شهر بتبان اكثر.لأن كل فيضه تختلف من سنه لسنه حسب المطر.

نصيحه مهمه :
لا تروح بدون جي بي إس و سياره ثانيه .
مع تمنياتي لك بالتوفيق

[ابو عمر النوح]

مساك الله بالخير أخوي موادع الشرقية
الشباب ما قصروا في الوصف و بالنسبة للأماكن الزينة على حسب المطر و الصمان تقريبا يقسم إلى قسمين الصمان الشمالي و أهم روضاته الحاصبيات و ما جاورها و وصفها و إذا وصلت خط الحفر ــ المجمعة و أنت جاي من النعيرية ادخل يسار كأنك رايح للمجمعة و إذا جاك الخط اللي على يمينك المتجه إلى رفحاء الروضات على يسارك و الصمان يحده من الغرب خط حفر الباطن
و جنوب شرق الصمان و هو الذي وصف لك الأخوان و من روضاته المشهورة روضة شقران و ام المصران و المعترضة و الهجيريات و غيرها كثير .
علما أن الصمان قد تجد فيه روضة غير معروفة و الربيع فيها خيالي و أحسن من المشهورات لأن قليل من يعرف الروضة فتجدها روضة بكر و ما مشت عليها السيارات و الناس .
و آسف على الإطالة ، تقبل مروري .