من منكم هجم عليه حيوان ؟؟

[حسـام]

عندنا بعيـر قعـود مجهم مايطرحونة عشرة رجاجيل فكيناة وقة البرد عشان يضرب النيــاق . و بنرجعة لشبكة وهو مايبي يرجع احــاول فية احـاول فيه ويلتفت علي ولسان حالة يقول انقلـع لا اكسـراعضامك .اجيه منا اجية منا مافية فايدة وهو صوة هديرة اذا احـد فوردمة يخلع القلب بس نشبة لة ترجع لشبكك يعني ترجع . وهو يتناصاني كنة مدرعة والا دبابة يااااايارب ستـرك ..وطبعا تخبرون ماعندة انصاف حلول يعني مايفكك وباقي فيك عرق حياة ينبض .وقولة خلااااص اانا اسف كنت امزح معك وخلاص اقعد على كيفك لا ترجع لشبكك ههههههههههه . وانا عايف عمري ؟ خلاص طال عمرك اقعـد على كيفك وانا اسف هههههههههه وماعليش كان فورة دمك


لبعض الضيوف زوار المنتدى
بعير قعود .. جمل ذكر
مجهم .. اسوداللون
يضرب ..عملة التزاوج اوالتلقيح

[أبو فيصل 2012]

الله يعطيك الف عافية على هالموضوع...

من ناحيتي كثيييييييييييير اللي هاجمني..

أولها ثوور منطلق وهايج وجت فوق راسي المسكين
وخارروف نعيمي فسقااان مهجن مع ساكني مادري وش معه بس بثر
ونحل حارشنا الخليه ونعووولك ياولد..
وبعير حاقد علي من زماان كنت ارميه برمان يابس وحصى من فوق السور وحصله مسكتي كنت فووق رحوول ودخلت مراح البعير وطرد وراي انا والرحوول شوي واطيح...


الطريفة اللي تمنيت اني ملتقطها..

كنا طالع نرمي درج




رميت جول ارضي المهم خويي اللي معي راح يلقط اللي الطيور..
يوم جاء يمد يدهـ على وحده وانا اشوفه من بعيد ومستغرب
يراوي كانه يبي يمسك شي وخايف منه
يوم دريت اثره درج صويب جناح وينقد خويي مادريت الا خويي يفرك هاج والدرج رافعه جنحانه
وتطرد ورااه وتعضض ثوبه مت ضحك من شكله بوسط الخلا وليش متروع مادري بس طلعت المراجل هههههههههههههههههههههههههه

الله يذكرك بالخير..

وتحياتي..

[حسـام]

نفس البعــير المجهم هجـم وهجوم قوي جدا وعنيف جدا سبب حالت استنفـارفالموقع
فجئة بدون مقدمات وكان هادي جدا ومفكوك وقاعد يتمشى في الموقع وتوة ماخذا الوجبة حقتة ومبسوط وماعنده مشكلة
ثم اتجة الى غرفة متحركة على كفرات فى الموقع .وصوتة كان يوحي بغظب شديد وتعكر في المزاج
وماندرى ويش السالفة يمكن احد من الصغيرين ازعجة ودخل الغرفه .والا يبي احد في الغرفة
.المهم البعيرماعد يمكن التفاهم معة اوترجيعة خلاص الاخلاق خربانة عندة
ولاكن بعدالتحقق تبين انة كان يشوف صورتة في قزاز النافذه حقة الغرفه ويحسبة بعير ثاني
وتعرفون بعيرين اذا تواجهو لازم اتذابحون يا ذابح يا مذبوح
قلنا خلا ص غيرو القزاز العاكس هذا عشان يرتاح ويصدق ان مافية بغير ثاني

[رجل المرور]

ذكرتونا بالمواقف . مانسـآا موقـف حصلي مع قعـود توه هـآيج عند الــبل .. وقتها شتويه وبردن اقشر ..
اي ولله قبل لايشق الصبح كلمني الوالد الله يطيل عمره .
قالي يابوك فك الناقه ودخلها عند الجمل خلــه يضربها . الكلام هذا الفجريات ماطلعت الشمس زرااق .
المهم دقيت سلف ورحت للمراح . ويوم وصلت الا الجمل كاسر الشبك ويحاول يطرح البكره وهي رافضه الفكره ... المهم كلمت الوالد . قالي ادخل الجمل الشبك وبعدها لحقه البكره ..

المهم انا معي عصا واضرب الجمل وهو مادرا عني هايج و مغير يزبد . اخذت انا وياه تقريبا ربع ساعه نتداور بوسط الشبك يمين يسار يسار يمين .. المهم مع الحماس والضرب . زلت رجلي .
بوسط حفره تخبرون المراح لابد من حفر الجراذي . المهم بس رفعت عيني ولا الجمل عيني بعينه .
والله يافلان يوم شفته هلون . يمار مابه واحد اثنين . الزبنه يولد . الكلام هذا بثواني
وبيني وبين نفسي طبعا . المهم اخذت فوق تحت ولا التفتت وانحاش الشبك عني تقريبا عشر خطوات .
والله واركضض بحيلي كله يوم وصلت الشبك . واتذكر انه ثلاث لفات من الارطه .
ايييه والله البلشه لايمديني اطير واجي من فوق . ولايمدي اجي بالنص ولا يمديني انزل من تحت .
اللحين انا افكر وانا اركض . قلت يولد خير الامور اوسطها . والله وغمض عيوني والله واطير بين الارطه الثاني والثالث . والله ويفكني ربي بس طلعت وسم بالجبهه وبالراس وباليدين . المهم سلمني ربي منه . ومن اصبحنا نتجمع انا وابوي وثلاث من عمامي ونكسر عنه العجاري ..

[RKO]

كنت بالاستراحة وكانوا جيراننا عندهم 5 سلق ولا اعرفهم كميانة كثيرة مجرد سلام

المهم صار عندي اتصال مهم وطلعت من الاستراحة وعند الباب أكلم . فجأة شفت ال5 سلق يركضن علي ووقتها ركضت ابدخل الاستراحة وأنا اصدم الجداار ,,

وافضيحتي ..

والسلق يطردن صيدة أو صاحبهم يعلمم ولا طقوا لي خبر هع

[أبوفاطمة]

انا هجم علي اسدين و اربعة نمور

ومسكتهم كلهم ودبغتهم ومسكت الباقين بذيولهم و فريتهم فريتهم فريتهم ورميتهم بعيد وهربوا


الحمد لله ماجاني شي بس مخش صغير من الاسد في اصبعي لما دخلت يدي بـ فمه عشان اكسر انيابه

[عشق الجبل]

هههههههههههههه اجمل موضوع

[Aboamani]

صراحه ابداع قصصكم ههههههههه


واكثر القصص عن الكلاب وانتم بكرامه اشوف



قصتي يوم اني كنت صغير عمري 13 14 حولها

موصتني الوالده الله يطول بعمرها اخذ من عند جارتنا حاجه

المهم جهزت نفسي ولبست جزمه رياضيه لاني اعرف ان عندهم كلب شين وقوي عين لدرجه انه يجي الصبح عند بيوت الجيران ملقوووف

لما وصلت بيتهم وطلع لي ولدهم وسلمت عليه وقبل ما اطلب طلبي

طب فيني ابن اللذينا اثاري مزاجه مب حق هواشه يبي يلعب << ومالقى غيري ههههههههه

وانا احط رجلي واهو وراي ماشي 200هههههههههههه والله العظيم من السرعه ضربت بجدار الجيران اللي اقبالهم واضرب بيت ثاني (جدار الحوش) ههههههه


وبالاخير استجمعت قواي وعطيته لكمات على شوووتات لي ما فكه الله مني


وعاش هذا الكلب لي ماعجز حتى سنونه طاحت والله العظيم

كان اغرب كلب مر على القرية ^_^

وبعدها مات وعاشت القريه بامن وسلام << حكايات لاتنسى
خخخخخخخخخ

[سبع الخلا 911]

السلام عليكم ورحمة الله وبركاتة
قصص رائعة جدآ
اما انا امس سارتلي قصة طيرت قلبي من مكانة
اتصل علي ولد عمي وقالي انا مزهب القهوة تعالي قلت ابشر عشر دقايق واجيك
كان معي جيب سفاري ربع وصلت يمة وانزل من السيارة والدريشة حقت السواق فاتحة المهم واتكي عندة وعلوم وسوليف الى الساعة تقريبآ 11بالليل..
المهم استأذنت منة ومشيت قبل لاصل السيارة كنت مسرح افكر يوم قربت وحطيت ايدي على يد الباب ولا هذاك القطو ناقز بحلقي يعلم الله اني صلبت مكاني صابتني ام الركب هههههههه
عزالله واركب الموتر واعشق بواحد قسم بالله ان رجولي الي على الكلتش ترتعد هههه من الروعة.

[BDER-C1]

مسيتم بالخير ..
ياطيبوه يا السوالف الطيبه ..

عندي سوالف كثيرة بعضها صارت في وبعضها بحضوري والحمدالله كلها سلامات يالله لك الحمد

من السوالف كنا نبيع الحلال بموسم الاضاحي قبل 6 سنين اوعلهيا زود ان ماخاب ظني .

وكانت عندنا خرفان " نعيم "حدود 60 وعليها صاكين عليها بالشبك بالماقفه "مبسط السوق "
والي داخل الشبك 5 منا الي يمسك ومنا الي يبيع
الموقف الي صار
كنت ماسك لي خروف واقتاداه للباب الشبك للزبون
وما حسيت الا بالخبطه لي بظهري تقال مرسيدس يمشي طبلونه ومركب لها قرون
وغيبت علي الدنيا انصرعت الا وظهري كله دم
ويشتلوني الربع وعلى اقرب مستوصف
والحمدالله جات سليمه الفحوصات والاشاعات
والحصيله = كدمات وجروح يالله لك الحمد
والله العالم اني نويت هالخروف نية قشره

لكن القضيه سجلت ضد مجهول والخرفان دخلت ببعضها ومحدن شافه وهذي السالفه .

وسلامتكم .

[demax]

الله يكفينا ويكفيكم الشر

وارجوا من الاخوه الانتباه عند التعامل مع الحيوانات والحفاظ على الاذكار لأن ماتدرون يمكن بها جني بسم الله ولا شيء

[am8008]

المواقف كثيرة ....لكن موقف مع ثعبان اسود صار ما أنساه طول حياتي بدون ذكر القصة ....

[أبو فيصل 2012]

تذكرت موقف وياكثرهن..

قبل يمكن 3 سنوات..كنا بالاستراحة المهم..قام واحد من الشباب اعزكم الله يبي الحمام..
المهم كنت انا ابي الحمام بعد يوم شفته قام وانطلق بسبقه وصار يركض هوو ودفني ع الجدار ودخل يضحك وصبخ الباب حق الحمام ومفتاح اللمبة كان برا قلت اجلس بالظلام..ههههههههههه

المهم مادريت الا اسمع صراخ وتصبيخ قلت شكله دخله جني ههههههههههههههه
وماتسمع الا مياااااااااااااااااااااو بخخخخخخخخخخخخخ
اثره منحشر مع بس (قطو) هههههههه والحمام صغير يالله يالله طلع متروع هو والبس ههههههههههههه سرواله بين رجليه قسم الي يوم اضحك عليه..

[معاذ العلي]

والله سوالف حلوة مرة مرة .

بس الحمد لله ما يسجل علي هجمات إلا أتذكر وحده .

كنا قانصين للدخل والجرجس المهم نزلنا حول مزرعه نبي نرقد . وابعدنا بالبر بس اننا حول المزارع .

المهم طول الله اعماركم أولا حنا ثلاثة انا نمت وخويي الثاني نام وخوينا الثالث نام بوسط خيمته الصغيرة الفردية
المهم أن ما دريت وانا بسابع نومه إلا والتسلب (الكلب) فوق راسي بشبر ينبح أنا معي سليب باق حق البر
والله يالربع أنه ينبح بقوا ما عنده فوق راسي وانا اقوم متروووووووووووووووع تعرقون غاط بالنوم والكلب ينبح فوق اذنك وش بيكون موقفك يعني . بس

[ذئب نجران]

أنا مرة كنت عند البل وكان في قعود وجي وراه ويتهبدني من 5سنين
من اربع اسايع تهبدتني ناقة