غرفة نوم على صندوق الونيت - صور

[Bo Rashed]

الحمد لله والصلاة والسلام على رسول الله
السلام عليكم ورحمة الله وبركاته

اعجبتني فكرة البرتبل اللي واضح بالصورة وخصوصا حركة المكيف والماطور، يوم شفته تذكرت سموم البر ورطوبة البحر وودي اسال اذا ينباع مثله بديرتنا واعتقد والله اعلم ان ممكن ان الواحد يبنيله شي زي كذا ولكن بطريقة فنية ومحترفة.





وفقكم الله
تحياتي

[Bader-M]

هذه الحركه
تصلح في امريكا
ولكن هنا
ما اعتقد
ياقلبي
زيت البر طقت الخيمة و الحوسه والغبره
.........
تقبل تحياتي

[مهند]

لاحظت شي رهيب
ان الغرفة مرفوعه فوق الحوض يعني تقدر تستخدم الحوظ لاغراظك الاخرى
-------------
وترا اسمك ياBo Rashed طالع شي على خلفية الونيت وموزونة 6/6
والله حركة

[الباهي]

اما هالي مصممها اكيد انه مروق الطاسه

[Bo Rashed]

اخي الكريم طاير بالعجه
والله ادري ان البر ما يصلح الا بالخيام والغبره والعج ولكن متى بالربيع وابيك تروح بالصيف البر ما راح تقدر من الحر والسموم واحيانا كبار السن لا يتحملون الحر في اخر الربيع لذلك يحتاجون للمكيف على الاقل وقت النوم
والناس المعروف انها ما تطلع البر الا وقت البراد اما انا وغيري الكثير ما اوقف طول السنه دائما كاشت في شتاء او صيف لذلك احتاج المكيف وخصوصا في طلعاتي للبحر واللي جرب يمكن يفهم كلامي

اخي الكريم مهند
بالفعل هناك مساحه خالية تحت الغرفة يمكن اسغلالها لوضع الاغراض او حتى تانكي للماء
واهم شي ان حركة الاسم اعجبتك

اخي الكريم الباهي
اللي مصمم هالغرفة شركة وهي تنباع جاهزة ولكن لايمنع ان الواحد ياخذ الفكرة واكثر شي عجبني فيها هالمكيف الصغير اللي يشتغل على الماطور بس وين تلقاه

بارك الله فيكم
تحياتي

[مهيلان]

مشكور ابو راشد على الصوره

اضن الفكره ما تصلح عندنا
لانها مع اول بطناج .. بتلقطها من الارض متكسره ..

مشكور ولاهنت

وعسى السياره لك والا الاسم لواحد غيرك

[شاهد عيان]

عموماً الفكرة جيدة ...

لكن ألاحظ إن الماطور قريب جداً لغرفة النوم ... يعني أنواع الازعاج .

شكراً لك يا أبوراشد ..

[عقيد القوم]

الله يعطيك العافية يا ابو راشد

لكن عندي ملاحظة

أضن والله أعلم هذه السيارة مخصصة للطرق الأسفلتية فقط

والدليل لو نظرت إلى الصورة أسفل المكيف تشاهد رأس القاعدة التحذيرية الفوسفورية (لونها برتقالي) التي يستخدمها أمن الطرق عند نقاط التفتيش واحيانا تستخدمها شركات صيانة الطرق .

[Bo Rashed]

ما شاء الله عليكم ما بقى عذروب ما طلعتوه
ولكني اعذركم لان اللي شاف على الطبيعه ماهو مثل اللي شاف الصور

اخي الكريم مهيلان
الشغله مرتبه ومحبوكه والشركة اللي صنعته حطت في حسابها المطبات والغرفه تراها مثبته صح بصواميل وتحتها جلد تحميها وتمص اي صدمه واذا الواحد محمل مثل هالشي ليش يسرع العجله من الشيطان وانا شفت مثلها واقدم منها فوق الجبال يعني كلت مطبات لما قالت بس وما جاها شي

اخي الكريم شاهد عيان
الماطور اذا جيت تشغله تنزله من السياره وتحطه بعيد وترجعه مكانه اذا بغيت تحرك

اخي الكريم عقيد القوم
ما لك لوى الرجال بس خايف زيادة على ماطورة واذا نزله حط العلامه التحذيريه بجنبه عشان محد يجي ويخمه مثل ما سويت انا في احدى المرراريت

وفقكم الله
تحياتي