أحدث مانزل من أيكوم لأسواق المملكة ايكوم 8000 (المواصفات- والخدمات)

[شقران]

بسم الله الرحمن الرحيم
يظهر لي ان كثير من الشباب استعجلو هذه الأيام في شراء اجهزة الأرسال اللاسلكي ولم يكلفو انفسهم عناء البحث عن الموجود والمزايا والخدمات فلاهم اتعبو انفسهم قليلا وتمتعوا بالجديد والحديث من مانزل بالسوق فاستعجلو كثيراً وراء الموديلات القديمة. ولا غرو ان جميع الشركات المصنعه تبحث عن الكسب السريع فهي تعجل بانزال الجهاز تلو الأخر والموديل بعد الموديل وكل ذلك من اجل كسب سوق المنافسة حامية الوطيس ولذا فانها تدعم موديلاتها الجديده بمزايا مشابهة للأنواع القديمه مع التطوير والإضافات الجديده ولكن الحمد لله انها ظاهره من وجهة نظري المتواضعه صحيه لهواة اللاسلكي اينما كانو.
احدث مانزل لدينا في الأسواق ايكوم ic-v8000

المواصفات:
عام/
الموجات العامله (تغطية الجهاز) ارسال من 136 ميغا هيرتز الى 174 ميغا هيرتز
والإستقبال نفس الترددات.
نوع البث:FM
عدد قنوات الذاكره:207
وضوح التردد:5-10-12.5-20-25-30-50 كيلو هيرتز.
مدى درجة الحراره التي يسمح العمل فيه بها :-10 سي الى 60سي
مدى الطاقه المطلوبه توفيرها له:13.8 فولت .
قيمة سحب الأمبيرات من البطاريه او المحول عند 13.8 فولت
ارسال 75 واط يحتاج 15 امبير
استقبال وضع انتظار يحتاج 0.3 امبير
اعلى قيمة تحتاجها السماعات 1 امبير
مدخل الأريل: so-239 50 اوم مدخل يو اتش اف
الحجم: 150 عرض×50 ارتفاع×150 عمق طبعاً بالملم
الوزن : 1.1 كلجم

نظام التعديل : معادل مقاومه متغير التردد.
الطاقة الخارجه:75/25/10/5 واط
اعلى انحراف للتردد±5.0 كيلوهيرتز على المدى العريض و/±2.5 على التردد الضيق وانتبهو لها النقطه ياهل التداخلات!!!
قمع البث: اقل من -60 ديبي
وصلة المايكروفون (الريشة) 600 اوم
المستقبل /
نظام الإستقبال: سوبرهيتروداين تخاطب ثنائي
الترددات المتوسطه: الأولى 21.7 ميغاهيرتز، والثانيه 450 ميغاهيرتز
الحساسية (عند 12 ديبي سيناد):0.15 µV مايكروفولتج نموذجي
حساسية السيكويلش (الفرار): 0.08µV مايكروفولتج نموذجي
الخيارية (نموذجي) 75 ديبي (عريض) /60 ديبي (ضيق)

[شقران]

مقدمة الجهاز:

1. زر الطاقه: لتشغيل واطفاء الجهاز.
2. زر الذاكره والمراقبه والنداء: اضغط على هذا الزرار لتشغيل قنوات الذاكرهاو لعمل وظيفة النداء او لتشغيل زر المراقبه لقناة الأولوية.
3. مدخل المايكرفون او الريشه.
4. مفتاح السكويلش SQL ويقوم بتغيير مستوى السيكويلش ويقوم بتشغيل الآتونيتور للأشارة اللاسلكية اذا تم تدويره مع عقارب الساعه .
5. التحكم بالصوت: يرفع ويخفض مستوى الصوت
6. زر خيار البانك او المخزن: اضغط على هذا الزرار لأختيار حالة بانك الذاكره اثناء تشغيل وظيفة الميموري. اضغطه لمدة ثانيه واحده فقط لتشغيل نظام البيجر والنداء عندر تركيبك لقطعة النظام الخيارية UT-108
7. زرار الإعداد والقفل : يدخل بك على قائمة الوظائف اذا تم ضغطه ويقوم ايضاً بتشغيل القفل (قفل القناه) اذا ضغط لاكثر من ثانيه.
8. زر الموالفه: هنا تقوم باختيار الموجه العامله
9. زرار كتابة الذاكره: يقوم باختيار قناة الذاكره التي سيتم برمجتها
- يبرمج القناة المختاره اثناء الضغط عليه لأكثر من 1 ثانيه-واصل الضغط عليه وسيقوم بزيادة قنوات الذاكره اتوماتيكيا.
10. قناة المراقبه وتغيير الأسم: اضغط لتشغيل مراقبة القناه التي تريد بحيث يعيدك لها لو خرجت منها حال الإرسال عليها-وفي حالة تشغيل وظيفة الذاكره يقوم بتشغيل اسماء القنوات وارقامها واطفائها على السواء.
11. زر التحكم في قوة الإرسال: كل ضغطه تزيد قوة ارسالك حسب ماهو محدد في الوصف اعلى الصفحه- وبالضغط المطول عليه يقوم بتشغيل نظام الديوبلكس السالب والموجب او السمبلكس.
12. زر النغمة/البحث عن النغمات : كل ضغطه تقوم باختيار وظيفة للنغمات كفك التشفير وبيب الباكت للكمبيوتر وسكويلش النغمات او وظيفة التونويمكن اختيار وضعية الأغلاق- والضغط على هذا الزرار لاكثر من ثانيه يوقف أو يشغل وظيفة البحث عن النغمات والمقصود بالنغمات هي النغمات التي تتم فيها ارسال الإشارة اللاسلكية عن طريق الربيترات او الأجهزة لوحدها لمحبي الأرسال على قناتين. (ديوبلكس)
13. زر باحث الموالفه /نظام الفي اف او الميغاهيرتز: يختار ويشغل نظام الفي اف او او البث على 1 ميغاهيرتز او 10 ميغاهيرتز في بعض موديلات من الأجهزة-ويقوم بالبحث عند الضغط عليه لاكثر من ثانيه ويلغي البحث عند الضغط عليه اثناء عملية البحث عن القنوات.

هناك طريقتين لعمل ريسيت للجهاز عند وجود مشكلة.

طبق احداهما او كلاهما حسب الانسب لك .

الاولى:
من وضع الاطفاء اعمل التالي اضغط على الازرار
[V/MHz (scan)]

وشغل الجهاز اثناء ضغطك على الازرار.

الثانيه:
من وضع الاطفاء ايضاً ابدء بالعملية اضغط الازرار
[set(lock)] و[mw(s.mw)]
ومن ثم شغل الجهاز اثناء ضغطك على الازرار.

[شقران]

المايكرفون الذي ياتي مع الجهاز موديله HM-133v
1- زر باحث الموالفه /نظام الفي اف او الميغاهيرتز: يختار ويشغل نظام الفي اف او ،او البث على 1 ميغاهيرتز او 10 ميغاهيرتز في بعض موديلات من الأجهزة-ويقوم بالبحث عند الضغط عليه لاكثر من ثانيه ويلغي البحث عند الضغط عليه اثناء عملية البحث عن القنوات.
2- زر الإرسال اضغطه للمراسله واتركه للإستماع.
3- زر التحرك فوق وتحت بين القنوات او حتى داخل قائمة الوظائف
4- مؤشر النشاط: يضيء باللون الأحمر عند الضغط على أي مفتاح ماعدا الضغط على مفتاح الوظيفه او مفتاح DTMF-s او اثناء الإرسال.
5- لوحة المفاتيح.
6- مؤشر الوظائف يضي باللون البرتقالي عند تشغيل الوظائفموضحاً انه يمكن الدخول على الوظيفه الثانوية بعد ضغطه- ويضيء باللون الأخضر عند تشغيل نظام DTMF-s ومن ثم يمكن ارسال الإشارة كنغمات دي تي ام اف.
7- زر الوظائف.
8- زر اختيار ذاكرة الدي تي ام اف.
9- زر الوظائف F1-F2 يبرمج ويعاود الإتصال بالراديو المتصل بك عند تشغيل وظيفة النداء
10- زر خيار البانك او المخزن: اضغط على هذا الزرار لأختيار حالة بانك الذاكره اثناء تشغيل وظيفة الميموري. اضغطه لمدة ثانيه واحده فقط لتشغيل نظام البيجر والنداء عند تركيبك لقطعة النظام الخيارية UT-108.
11- زر الذاكره والنداء: اضغط على هذا الزرار لتشغيل قنوات الذاكرهاو لعمل وظيفة النداء

[شقران]

هكذا تكون مؤخرة الجهاز

[شقران]

هذه هي الأزرار بالكامل ووظائفها والآن لنعرج عن ميزه جديده في الجهاز وانا اعرف ان الكثير من الأصدقاء سيقولون لماذا تفشي خفايا الجهاز التي ستتيح لنا الخصوصية.
فاقول ولله الحمد انا الجهاز وضع للإستفاده لاي كان وكلي امل فيمن يقراء هذه النقاط التاليه ان يستخمها الإستخدام الأفضل أو اني ساكون نادماً جداً اني افصحت عنها اذا حدث العكس واستخدمت هذه المزايا عكس ماهي وضعت له.


بسم الله اهم مزيه رايتها في الجهاز هي ميزة خالط الصوت وهذه ميزة لاتوجد الا في بعض الأجهزة الكبيرة والغاليه فارفع القبعه لأيكوم تحية على هذه الخاصية والتي ستريحنا كثيرا وستجعل هناك امكانيه ما من الخصوصية اذا طبقت بالكامل والله يعينكم على احضار المواد من بلاد الواق الواق ان لم تحصلوها في البلد.

نظام خالط الصوت voice scrambler
الأدوات:
ينبغي توفير القطع التاليه لتشغيل هذه المزية وهي اختياريه يعني لاتتعبون الجهاز مافيه هالقطعه يجب شراءها خارجياً
رقم القطعه(..............؟؟؟؟؟؟؟؟؟؟)
-
-
-
-
-
-
-
-
-
-
-
-
-
-
-
-
-
(هاه هذي هي UT-109/UT-110)
ارتحتو!!!!!!!!!!
زين الحمد لله
اسمها وحدة خلط الصوت وبالأنقريزي voice scrmbelr unit
والفائده من هالتشيب انها تقوم بخلط الصوت ويطلع متلخبط غير مفهوم بين المتحدثين.
واقرب مثال على هالوحده مانسمعه في الدوريات والسيناو.
ويجب تركيبها في جهاز المرسل وجهاز المستقبل حتى يتم الإستفاده منها بالشكل الكامل.
هاه وش رايكم مهيب حلوه الفكره ياحليلهم ايكوم حركههههههههههههههه.

تبون عاد وشلون تركبونها تامرون
اعدادت التركيب
1- طفي الجهاز. وامصع السلك من الكرهبه.
2- اقلع ابو المسامير الثلاثه اللي بالواجهه (مقدمة الجهاز بالعربي) وبشويش لاتتهور.
3- نسيت اقول انت تقلع المسامير بمسدس مهوب طع طع لا ياحبيبي مفتاح سداسي مقاس 2ز5 ملم.
4- بشويش ولا تعلم احد انزع الواجهة من الراديو.
5- زين شفت هالبورد

الحلو اللي قدامك شف فيه دويحتين جمب فيش التشيب اللي بتركبها على اليسار بالضبط بتلاحظ ان هالدويحتين لونهن ذهبي ومتصلات من النص بخطيط صغير ههههههههههههههههههههاه قصه من كل الدويحتين يعني الثنتين ولا تقلع الدويحتين ترا بيروح جهازك بخرايطها.
6- كان عندك الكاتلوج بتشوف الرسمه ازين من المغبره اللي انا حاطها.
7- هالحين يابو الحبيب ركب التشيب اللي عطيناك رقمها اول.
8- رجع الواجهة بشويش ولاتقرط سلك السماعه سمعت مني وسنكر الجهاز بالصواميل حقته.

[شقران]

نجي عاد لإعدادت الوظيفه


1- اضغط الزر اللي عليه SET(LOCK) بعد تشغيلك للجهاز.
2- اضغط SET(LOCK) او MW(S.MW) عدة مرات لين يظهر على الشاشة SCG--1 حرك فرارالقنوات بصويبعاتك عشان تختار المجموعه اللي تبي من 1 الى اربعه ولازم خويك يحط نفس الرقم انتبهت ياخلفهم.
3- هالحين اضغط SET(LOCK) او MW(S.MW) عدة مرات لين يظهر على الشاشة SCR.
4- فر الفرار عشان تختار شفرة الخلط . واختر عندك من 1 الى 20 كود
يجب ملاحظة رقم القطعه اللي فوق ماهي وحدة بل ثنتين ايهم تحصل حطها كان لقيت 110 فالكودات فيها 256 كود تشفير وان حصلت 109 فيها 32 كود سداسي.

5- هالحين اضغط التون سكان للخروج من قائمة الوظيفه.

وصلنا للأخير
اعدادت التشغيل
1- رح للقناة الي ترغب في التشفير عليها.
2- قم باعداد الوظائف الأخرى على وضع التشغيل مثل الربيتر تون والتون سكويلش الخ.
3- اضغط BANK(OPT) لمدة ثانيه واحده لتشغيل خالط الصوت (رح تطلع لك (سهمين بشكل دائره على الشاشة)
4- خلاص شغلت التشفير وعيش الخصوصية الي تبي وراسل زي العادي طبعاً لاتصير احول وتراسل واحد ماركب مثلك شريحه تراه مهوب فاهمك ولانتب فاهمه الا اذا فكيت التشفير.
5- عشان تطفي التشفير بابعدي الضغط الزر اللي شغلته فيه وراسل طبيعي ورح تختفي السهمين اللي في الشاشة.
نصيحه اخيره للمستخدمين اياني واياكم تعلمون اصحاب المحلات ولا ترا بيغالون بسعر الجهاز ترا الجهاز سعره معقول حالياً واتوقع بعد هالمقال بيجي مليقيف ويعلمهم ويرفعونه.........يوه البتار معنا تكفى لاتغالون ياخوي بالسعر على الضعوف......... اما انا شريته من بدرررررررررررررررررري.

تقييم الجهاز
الجهاز على قولتهم فريندلي يعني سهل التعامل معه مثل الألفين وميه وجميع الخدمات اللي في 2100 فيه بس زادو عليه نظام النداء والتشفير وقوة ارساله وهذولا عندي مهمممممممممممممممممممه جدا

اتمنى اني افدت واستفدت وسامحونا/شقران

[راعي عنيزة]

تسللللللللللللللللللم يا خلف الايكوم والكنود كلهن

الله يعطيك العافيه عدد ما قطعو الشواحط
الله يعطيك العافيه عدد من قال مداخله
الله يعطيك العافيه عدد من صوت بالعامه ياقرب ندا
الله يعطيك العافيه عدد من طلع خمس وعشرين
الله يعطيك العافيه عدد من نزل خمس وعشرين
الله يعطيك العافيه عدد من جدع العجاج ستيشنه
الله يعطيك العافيه عدد من طقو عليه الاحم وصادرو جهازه

شرح جميل لجهاز اجمل ولكن وحط حدر لكن سبع خطوط

الجهاز مواصفاته مقاربه لمواصفات ال2100 والفروقات بسيطه سوى قوة الارسال
يمكن تعتبر قوة الارسال ميزه لكن انا اعتبرها عيب شرعي

الجهاز يعطي 75 واط واتوقع بالدمي لود انه يعطي اكثر من كذا
ومثل ما تعرف اغلب الامبليفايرات ما تقبل الا 50 واط واكثر من كذا يحرقها
لذلك عشان تراسل فيه بالامبي لازم تحطه على الميد وبكذا ما تكون استفدت شي من قوته

ثانيا فرق السعر حول الف ريال والمواصفات متقاربه وال2100 جميع قطعه متوفره في كل مكان حتى البقالات تجعل 2100 الخيار الامثل يا خلفهم

[شقران]

الجهاز يفرق عن الألفين وميه بالخدمات اما البورد فهو مشابه له كثيرا فلا تحتار في قطع الغيار هذا اولا
كثير من ألامبليفيرات تقبل قوة دخل 75 واط وهذي ثانياً
الجهاز حتى لو راسلت بالميد رح يعطيك اكثر من ثلثي قوة الأمبي وهذي ثالثاً
والأمبي اذا كان مايقبل بتعديل قيمة الدخول بواسطة قطع اضافيه ممكن يتحمل قيمة الدخول لاكن قد تتأثر الترانزستورات وهذا رابعاً ومانصح بهالعمليه.
بعدين سعر الجهاز ياخي مدري من اللي قايلك انه يفرق عن 2100 بالف وانا شاريه ب950 وهذا خامساً.

فكره / معظم وليس كل الأمبليفيرات اللي تقبل خمسين واط مزوده بخافض لقيمة الدخل ولكن ليس كلها عشان ماتقول ورطني فان كانت القيمه للدخول اكبر من قيمة الدخول للأمبي المحدده يقوم الأمبي يتنزيل قيمة الدخلول لحده المسموح او يقوم بالقفل اتومتيكياً وهذا سادساً
على فكره تراي اراسل به على الهاي ومع الأمبي وقاعد يطلع لي 240-250 واط طوال هالأسبوع وهذي سابعا
ويارايح وين مسافرقولي
تحياتي لك يابعدي/شقران

[السمح]

يا سلام شي يبهج النفس هالعرض والشرح .. أنا متأكد إن آيكوم لو تبي تسوي لهالجهاز عرض بالعربية مهيب لاقية أحسن من موضوع مبدعنا " شقران " سلمت والله .. عز الله إني مانيب متندم إني عضو في منتديات يكتب بها مثل "شقران" ..

راعي عنيزة :
والله طلع لنا ريش ولحقت الركب .. وبديت تحكي بالإمبي والواط .. بس ما أدري منين جبت إن الفرق بالسعر 1000 ريال .. كم السعر مهوب 950 مثل ما قال أبوسليمان ؟؟

[shadow=skyblue]تقبل تحيات أخيك السمح [/shadow]

[راعي عنيزة]

ايه هيييييين يا سميحانوه يقالك محرجني

ايكوم 8000 اول ما نزل السوق كان سعره ما بين 1600 - 1400 عاد يوم نزل وش كاري منه
بينما الايكوم 2100 قبل الحج وصل سعره لـ 450 ريال

هاه صار الفرق الف ولا لا يابوتروك


شقردي يا بعد تسبدي وراك ما علمتنا من الاول انك مشتريه وخالص عشان نمدحه وما نحسفك بالعذاريب

تكده بالعافيه وربنا يطرح في برجاته البركه وتصير كلها دبل اوفر ويكفيك شر التقطيع والشواحط

ومدامك جربته عاد بنشدك

شلونه مع المداخلات نفس الاول ولا احسن

ومن فضلاتك تشيك مواصفات الامبي حقي هل هو ينقص ل 50 ولا لع

ارعص على هونك

ويعطيك العافيه

[شقران]

أخوي السمح/بارك الله فيك وفي علومك الغانمه ياخلفهم..
واتشرف ان السمح يسير على هالصفيحه ويدلي برأيه ويزيدني شرف اني انهل من علوم يكتبها اخواني اللي بالمنتدى وخصوصاً اخوي الغالي السمح (ماناصل مواصيلكم يالغالي) وشاكر لك على هالمجامله اللطيفه.
تحياتي لك ياغالي..


اخوي راعي عنيزه انا مدري السؤال موجه لي ولا للشقردي على العموم يابعدهم بارك الله فيك ويجزاك خيرعلى دعاك. اما من ناحية الماخلات فرائع جداً فيه نظام الأتونيتور مريحني بالحيل بنفس الريشه اقصر للتشويش وانزله وشغل الأتوةنيتر عند عدد معين بعد الظاهر 15 يشتغل الأتونيتر فيروح المداخلات ويصفي اشارة البعيد بدون مايلغيها يعني ميزانيه ازين من اليد.

وابو الحبيب امبيك نعم ينزل الواطات الداخله الى اقل من الخمسين واذا ركبت عليه مثل جهازي اتوقع بيدخل له 60 واط او 58 وهذي العمليه تقم بها مكثفات الدخل عشان مايدمر الترانزات لكن المشكله في الهبيله اريلك هل هو يتحمل 250 مدري والله.
تحياتي وبالتوفيق يابعدي.

اخوكم شقران

[الشقردي(العيون)]

مشكور اخوي على اشرح الوافي واتمنى لك التوفيق في كل جديد

[شقران]

وهلابك يالشقردي وجزاك الله خير..

[Saad]

الاخوان الاعزاء : شقران ، راعي عنيزة

يقولون انه نزل بالسوق نوعين للآي كوم 8000
نوع صغير يعني شاشته مقاربه لشاشة الآي كوم 2100
والنوع الثاني شاشته اعرض .

فهل سمعتوا او شاهدتوا مثل النوعية ؟؟؟؟؟؟؟
معذرة على طول الســـؤال وفي انتظار الرد منكم ياأحلى مشاركين في منتدى مكشات

[شقران]

اخوي سعد صبحك الله بالخير..

اجابة على سؤالك لم ارى اي نوع اخر في السوق مخالف لماهو معروض امامك في المنتدى قد يكون احد ما لديه فكره عن سؤالك فيجيبنا مع عدم اعتقادي ان هناك نوع اخر لنوع 8000 مختلف عن اللذي في الأسواق وقد اكون مخطئاً.
اسف ان لم يكن لدي معلومات غير اللتي ذكرت..

اخوي راعي عنيزه عسا ماشر عضو منسحب وش السالفه!

شقران