بسم الله ابدأ في الاجابه على اسألتكم واستفساراتكم من خلال تجربتي مع جي ام سي سوبربان 2005 وارد الجميح
اولا .. كثير من الاخوان يتسألون عن الحرارة وارتفاعها اذا وقف السيارة .. وهذا نظام في سيارات شركة جي ام .. ولا راح تنفعك المراوح لو تركبها .. .. وسألت احد المتخصصين في صيانة سيارات جي ام .. وقالي هذا الشيء طبيعي وعادي وهو نظام في السيارة اذا غيرت فيه اقرأ على الجمس السلام.. وهذا الرجال هو مشرف مركز اي سي دلكو للصيانة على طريق ديراب في حي الشفا بالرياض .. فلا توجس خيفه من هذا..
وثانياً.. بخصوص الامبيرات اللي في العداد .. فهذا خراب في المغناطيس اللي يحرك الامبير .. وما ينفع تفصل البطارية كما قال احد الاخوان .. والمشكلة هذي عندي في امبير ظغط الزيت والحرارة والسرعة والار بي ام .. وسألت ودورت عن الحل وقالي مشرف الصيانة ان تصليحها في الوكالة بـ 2000 ريال عند الجميح .. الجميح ما يصلحها عنده .. يرسلها لدبي عند الوكيل هناك .. ويصلحها ويجيبها لك في خلال اسبوعين تقربيا .. واذا تبي تروح لدبي عشان تصلحها .. راح تكون تكلفه التصليح 250 درهم = ريال .. فقط .. يعني الوكالة الجميحية تاخذ 1750 حق المشوار .. او تشتري جديد بـ 1000 ريال بس مشكلته انه انجليزي للموديلات اللي فيها شاشة في الطبلون .. وفيه ورشة في صناعية الشفا تصلحها لك بـ 300 ريال تقريبا ماني متأكد بس انه يجيب القطع من امريكا مخصوص للورشة .. وثمنها هناك 49 دولار .. وكانت عندي صور للمغناطيسات اللي وراء الامبيرات .. لكن الهاردسك اللي فيه الصور .. مايشتغل .. والقطع كبر حجم قرص الكيرم تقريبا وتشبه له ..وكل امبير له قطعة خاصة به..
وثالثا .. الاخوان اللي يتسألون عن الجمس وهل هو عملي وكفء .. انا من واقع تجربتي .. اشوف انه افضل سيارة مرت على تاريخ البشرية .. وهي معجزة الصناعات .. بصراحة الجمس ما مثلة في الراحة والفخامة .. يمشي على الأرض ملكاً .. وهو يفرق عن السيارات اليابانية في كل شي .. اللاند اذا ركبته تحس انك راكب كورلا ولا كامري .. والباترول رغم عشقي الكبير له الا انه ما يرتقي الى مستوى الجمس..
والموضوع مطروح لتبادل الخبرات .. يعني لا تسأل ثم تتركنا .. عطنا اي شي .. اي تجربة لك .. اي سعر للقطع .. اي موقف .. اي .. اي .. اي ..
واعتذر لبقية الاخوان اذا ما قدرت اجاوب على اسألتهم وذلك لانشغالي هالايام ..على العموم اذا عندكم اي استفسار لا تترددون في طرحه ..
تحياتي لكم .. ملك الجمس .. سعد الليالي