استمع لمراسله بين الرياض وعنيزة - 310 كلم ;)

[راعي عنيزة]

سلام علاهم

بالخير يالربع

استعموا لمراسلة حدثت اليوم بين ملك الشبكات وملحط القنوات شقران افندي في الرياض
وبين العبدلله الضعيف راعي عنيزة في مدينة عنيزة DC

والمسافة بحسب ذمة الجارمن 310 كيلو متر

واريل الاخ شقران هو توجيهي كوش كرافت دبل
واريل راعي عنيزة دايموند ستيشن سيار

يعني الطيب في ارساله والا ارسالي انا خرطي

وقد استقبلته اوفر و 11 برج وبيزي
يعني الارسال يروح ويجي مع الهوا


للاستماع ارعص تحت

http://130.94.173.239/22/longdist.ram

واذا ما اشتغل حمل الملف من تحت
http://130.94.173.239/22/longdist.rm

[شقران]

الظاهر ان السيرفر حقه خربان والا ان الدعوى يبيلها عندي ابديت للريلبلاير على العموم عافاك الله وياشباب تراني استقبلته والشهاده لله 11 برج ثمن 9 ثمن دحدر لين بوزي قفل الجو الظاهر وارسال راعي عنيزه مسكت مايحتاج
تحياتي لك ياملك البران
اخوك/شقران

[شقران]

باذن الله ياخوان اللي يواجه صعوبه يروح لها الرابط ويطبق ماهو موجود وسيعمل التسجيل لديه انشا الله
ارعص بشويش
مع شكري وتقديري لراعي كيف على هالأنشوده واستفدنا بعد فيها انا وراعي عنيزه والأخوان انها صلحت الريلبلاير (شفت بس جمايلك) يارعي كيف الله يهديك بس يارعي عنيزه وتبي مقاطعه لابوناصر صدز انك حبيب

[راعي عنيزة]

هلا والله كنج الشبكه

حطينا رابط لتحميل الملف بالكامل للي عنده مشاكل في اتصال الريل بلاير

وترى ذاك المالغ الي يقول ترانا في المسا ذا راعي كيف متنكر بصوت جيزاني

ويقول الشاعر :
لا تحسب ان الارسال يا زين مني**** ارسالي ترى يعكس لك الارسال منك
مثلك القمر والشمس كنك وكني **** اعكس شعاعك واسهر الليل عنك

[القناص]

سلام يا راعي عنيزه ولو اننا محنا قد المقام اشوفك ما رديت على رسالتي الخاصه لك

مليون سلام مراقبنا العظيم شقران
مليون مبروك على الترقيه
عقبال الترقيه اللي على بالي

وبعدين ما شاء الله عليك الله يزيدك ولا ينقصك قوه اللي مراسل 700كم والامارات ما تصعب عليه 350كم للقصيم..


بالتوفيق وياليت اللي مطفين النور يدخلون ويسمعون مشاركاتهم وتسجيلاتهم
وينك يا سكود ويا غالب و .................

اقنعهم يا شقران

سلام ومبروك وعقبال ال CLUB

[راعي عنيزة]

هلا والله بالقناص يا بعدي مقامك فوق الراس والموضوع منتهي لي من زمان ومابالخاطر الا كل ود ومحبه

وترا مراسلة القصيم اصعب من الامارات يا خلفهم

الامارات عندهم رطوبه تخلي الارسال يحط رجله وما يعوقه الا الشديد القوي

اما القصيم فماهنا الا غبار وجفاف وناس شهبان لهبان وكثر خير الارسال ان عدى 15 كيلو

[القناص]

سلام عليكم

الحمدلله والصلاة ةالسلام على رسول الله

اما ما ذكرت يا اخوي راعي عنيزه عن الرطوبه في الامارات فهي لا تتعدى 50 كم عن البحر داخل اليابسه
اما الباقي فهو جفاف Xجفاف
يعني ان لم تكن مراسلة الامارات اصعب فهي بالتاكيد ليست اسهل من مراسلة القصيم.
هذا رايي والله اعلم ولاايش رايكم يالربع

[أيمن]

عمل أكثر من رائع ..
مشكورين يا جماعة على هالمشاركة الطيبة ..
لكن يا ليت كان معلن عنها حتى يحصل لنا الشرف بلقياكم ..
وبالنسبة لها المراسلة كانت إشارة راعي عنيزة ضعيفة بالحيل لا تكاد تفهم ..

بانتظار تكرار هذه المراسلة مرة أخرى ..
تحيتي

[راعي عنيزة]

القناص
50 كيلو بس ! مدري يا بعدي حنا ضبان مانبخص الا بغبرة نجد
نترك الراي للشباب
ولو اني اعتقد انه مهب صعب انك تراسل اي مكان بعيد ولكن الاصعب هو ان تسمع صوت ابوسليمان وتقاوم سحره وجاذبتيه <<<< افتحو الشباك لشقران تراه طار








هلا والله ابوحمد

يا بعدي ابو سليمان مبعد المسجل عشان ما تسمعون صوتي همن تبلشون و تجيكم حلوم شينه وكوابيس
تراني اراسل في الموتر كثر خيره الي وصل ذي المسافه يا بعدي

وانشالله الجايات اكثر ويكون لها اعداد مسبق ويجتمع اكبر عدد من الاخوان في المنتدى

[شقران]

مساكم الله بالخير جميعاً..

أخوي وجاري الغالي /القناص الله يبارك فيك وهذا شرف كبير واتمنى اني اكون عند حسن ظنك وحسن ظن الجميع بي انشاء الله وياربي يسمع منك في خصوص الثانيه ياخلفهم.

مافيه شك بصعوبة مراسلة الأمارات وهذا مانختلف فيه يابعدي ولكن الا تظن ان القصيم في غبه مقارنة مع مثلاً شويه او الدوادمي او حتى حفر الباطن او قل حريملا مع انها قريبه ولكنها صعبة المراسل فالمناطق الثلاث الأولى والحمد لله نجد هناك سهوله في مراسلتهم بينما القصيم وحريملا نجد صعوبه والسبب لايخفى عليك عوائق الجبال اللي بحريملاء وعائق انخفاض القصيم على ماعتقد مقارنة بالمناطق المذكوره .
الشاهد ان المراسله ممتعه والشي الممتاز فيها ان اخونا راعي عنيزه كان في سيارة واريل ستيشن سيار وامبي 200 واط لذلك هي مميزه وانا ياخي العزيز اجد ان مراسلة بهذا الشكل صعبه مقارنة مع اخوان حبايب علينا في قطر والا الأمارات ولا الكويت واالشرقيه وعندهم عده وثابتين وارايل تجهيزاتها مثل اللتي عندنا ان لم تكن افضل وليس ذلك انقاصاً في حقك او حق اخونا راعي عنيزه. ااااااااااااااااه بس ليتني مسجل راعي القريات والا راعي عفيف اللي راسلتهم من مده كان ياشيخ تستعجب وتجد المتعه في مراسلة هوؤلاء لان مسافاتهم بعيده جداً وعوائقهم اكثر وتجهيزاتهم لاتصل ايضاً الى نصف تجهيزات اخوانا جميعاً على العموم اتمنى منك مشاركتنا انت والأخوان جميعا الأسبوع القادم بمشيئة الله الساعة الرابعة والنصف يوم الخميس لمراسلة راعي عنيزه والأخوان في منطقة القصيم وكل المنطقة الوسطى الشمالي منها باذن الله والدعوه مفتوحه للجميع للمشاركه والمراسله.

(دعوه لسراييفو وسكود وا لراكد وغالب وابوعبدالله وكباكا وبقايا انسان والقرش وابو بندر وابو مروان والسواح وشامان وابو شرقه وذيب الليل وابو سعيد والأيكوم وراعي الشاهين والهيثم وغيرهم من خانتني الذاكره في وضع نداه على ترددات الهواة وجميع الأخوان اللي مطفين النور ويراسلون بعيد للمشاركه بناء على طلب اخونا القناص واخونا ايمن وجميع من يهتم لهذه الهواية الناشئة في بلدنا الغالي ليشاركونا بارائهم وتسجيلاتهم في المنتدى لتعم الفائده انشاء الله).

اخوي الغالي ايمن /مسيت بالخير حفظك الله ودعوه خاصة لك ياغالي بتشريف تردد الهواة للمراسلة على التردد التالي 146050 او التردد 146000 او التردد 145850 وذلك الأسبوع القادم يوم الخميس بمشيئة الله الساعة الرابعة والنصف عصراً ونحن متواجدون بمشيئة الله في اوقات الأسبوع بدون موعد محدد ولكن من يظهرمنا فيه الخير والبركه الله يجمعنا على الطاعه.

اخوي راعي عنيزه ياخلفهم عافاك الله وماقصرت وهذي من عاداتك انك تحل المشاكل ياخلفهم .
وعدنا انشاء الله على خير يوم الخميس القادم وياربك يفتح الجو ازين ونتراسل جميع.
تحياتي لكم جميعا/شقران

[راعي عنيزة]

يا بعدي شقران بعد ذانك بنحط دعوة عامه للشباب في موضوع مستقل عشان نكسب سماع اكبر قدر من الاصوات الطبيه للرجال شراوك يا خلفهم

[شقران]

وتسلم ياخلفهم نسأل الله التوفيق لنا جميع//شقران

[شقران]

والحمد لله رب العالمين