اللي يبي يركب بوصلة ودرجة حرارة للباترول والباثفندر <<< صور

[أبو مسفر]

السلام عليكم ورحمة الله وبركاته
كل عام وانتم بخير ،،،، وعيدكم مبارك
اشتريت باترول سفاري وكما هي عادة الوكلاء عندنا في السعودية البخل بأقل المواصفات ولا يوفرنها الا للسوبر سفاري فقط وبعض الفئات من الباث فندر
مالقيت فيه لا بوصلة ولا درجة حرارة للجو مع انه سيارة مخصصة للبر ولا غنى فيها عن البوصلة
وفكرت اني ارهم بوصلة ومقياس درجة الحرارة مثل شد البلد ولقيت ان بوصلة السوبر سفاري او الباثفندر هي اللي تركب .
أولا :
ذهبت للتشليح واشتري لنبة ببوصلة ودرجة حرارة لكن للاسف بدون فيش وهذه غلطة اخذتها بـ250 ريال ويوم جيت ادور فيشها بحلت كل من رحت له يعيي يقول هذه ظفيرة كاملة ما نقص لك الفيش لحاله ودورت في محلات قطع الغيار فيش يركب لها وما لقيت
واطيح على ابن حلال قصها لي بدون اي تردد .
ثانياً :
رحت لكهربائي جيد وفنان وشبك اسلاكها باسلاك انوار المسجل من دون قص فقط تجريح واصبح نور البوصلة يولع مع تشغيل السيارة وعند توليع الانوار تخف اضاءة البوصلة مثل شد البلد .
ثالثاً :
اخرج الكهربائي سلكين لحساس الحرارة من عند رجلين المعاوني وقال لوك جايب الحساس كان شبكناه ؟
واروح ادور في التشاليح على حساس الحرارة والقاه بين 70 الى 30 ريال ويعطينيه هاك الهندي بـ عشرة ريال ولكن من دون الفيش ايضا وهذه الغلطة الثانية .
وعذرهم يخرب الظفيرة
الصور

صورة اللنبة اللي فيها البوصلة ودرجة الحرارة

صورة حساس الحرارة ومكانه خلف الشبك الامامي ومعه حساس ثاني مدري وشهوله ؟

صورة أسلاك بأفياش مغطاة ببلاستيك للعزل تدخل في الحساس لازم يكونن طوال من المترين وفيها

صورة الاسلاك مركبات بالحساس

صورة الاسلاك بعد تركيبهن وتثبيتهن بمدنيل فاين ثم لف عليهن بالشطرطون للتثبيت حتى ما ينصلن

ثم وصلت الاسلاك بالسلكين اللي اظهرهن لي الكهرباي وكانت النتيجة مع طلوع الشمس صباح : 6/12/1429 هـ
لاحظوا البرودة

* آخر نقطة هي تغيير لون الاضاءة من الاخضر الى الاحمر مثل لون الطبلون
وهذه بسيطة عند محلات موجودة في الغرابي
ولاحقين عليها ان شاء الله
والله الموفق

[لن أمل من العطاء]

مشكور وما قصرت اخوي

ومجهود رائع

وتصوير جدا رائع

[ابوعقل]

ماشاء الله عليك

الكهربائي اللي انت مودي السياره عنده

شاطر

والشغل نظيف

[.أبوعبدالرحمن]

ماشاء الله مجهود تشكر عليه


الله يهنيك به

[شروكي ربع]

جميل جميل جدا ً ..

الله يعطيك العافية ..

بالنسبة للقطع تباع تجارية او مالها الا التشليح ؟؟

وبالنسبة لتركيبها قصقصت من التندة شيء ؟؟

والموتر وشو ؟؟ باث ؟

ماشاء الله عليك حتى وأنت تشتغل مرسم

[..: ابو يوسف :..]

السلام عليكم ورحمة الله وبركاتة

اولا كل عام وانت بخير اخوي

والله يعطيك العافية على الشرح والصور

بس عندي استفسارممكن :-

معي باترول ربع 2006 لو بغيت اركب نفس الي سويتة ممكن تضبط (بحكم انه مالها اساس او قواعد)

الكهربائي ياليت توصف لنا مكانه لان ماشاء الله شغله نظيف

والله يعطيك العافية على هالمشاركة لاني بصراحة اتمنى انه يكون عندي في السيارة

مقياس لدرجة الحرارة كما في الشد بلد لكن المشكلة اني ماتوقعت انها تركب وكنسلت الفكرهـ

آسف على الاطالة

وشكراً

[أبو مسفر]

الاخوة الافاضل :
لن امل من العطاء
أبو عقل
أبو عبدالرحمن الصفيان
بيض الله وجيهكم على الثناء
ومشكورين على مروركم الكريم

الاخ شروكي ربع
والله الاغراض مالها الا التشليح وما يوجد تجاري يركب مثل شد البلد
والتندة ما قصقصت منها شي والموتر باترول سفاري 2005وهي تركب على بعض الباثفندر من موديل 2005 وتحت
والباترول من 98 الى 2009 اما الباترول الستاندر اللي ماله لنبة فوق المراية مدري هل هو جاهز للتركيب أم لا .

[أبو مسفر]

الاخ عاشق جيب
اذا كان موترك ماله مكان للنبة اللي فوق المراية

لكن فيه اللي افضل منها وارخص واكثر توفراً في التشاليح واسهل في التركيب .
اشتر مراية جمس من موديل 2000 وفوق ومعها حاملها اللي يلزق فالقزازة ( قطعة حديدة صغيرة ) وأهم شي لا تنسى الفيش اللي يجي فيه ستة أسلاك و طلع لها من التندة سلكين للكهرباء
ودور لك حساس للحرارة مثل اللي انا حطيت للباترول واشبكه وثبته في مقدمة السيارة خلف الشبك
وتصير مراية 3×1 = مراية تماتيك خافض لانعكاس الانوار + بوصلة رقمية + مقياس للحرارة
وعلى فكرة المراية هاذي تصلح لآي سيارة مهما كان نوعها

[المهتوي]

موضوع ورائع وشغل ممتاز .........

انا يا الغالي معي مثل موترك سفاري 1 2005

هل يحتاج اغير الديكور(اللنبتين والدرج) اللي فوق بواحد حق رقم 2 ؟؟ وإلا تركب البوصلة على نفس الديكور الأول ؟؟


وشكرا مرة أخرى ........

[الصامل1111]

يعطيك العافية ماقصرت

[المميـز]

ماشاء الله تبارك الله

شغل مرتب ونظيف

الله يعطيك العافيه على هذا الشرح الراائع

على فكره اتوقع الحساس الثاني يكون للبوصله

هم حساسين راكبين جمب بعض ونفس الشكل

====

بس عندي سؤال لعل اجابته عندك ان شاء الله

انا معي باترول وفيه مقياس الحراره والبوصله

ولكن يعلق على اتجاه واحد وعلى درجة حراره وحده !!!

وش الحل معها ؟؟؟

مع العلم اني فكيت الحساسات ونظفتها ونفختها ورجعتها ولا في فايده !!!!

ياليت اذا عندك حل تعطيني اياه تكفى

وانا ناوي اغير الحساسات بحساسات جديدة

بس شورك وهداية الله

[السراب9999]

ابو مسفر
الله يعطيك الف عافيه ومشكور على هالمعلومه
بس ممكن توصف لي الكهربائي او تعطين رقمه وتقبل خالص تحياتي ..................................

[ابو مكازي2002]

عشت تسلم يمناك ما قصر علي الشراح التفصيلي يعطيك ربي الف عافيه

[بدوي جنوبي]

الله يعطيك العافيه ابو مسفر
جهد مميز

صنعة في اليد امان من الفقر
وصلي الله علي نبينا محمد

[أبو مسفر]

المهتوي
نعم لازم تغير الديكور وتستبدله بديكور سوبر سفاري فقط وليس سفاري 2 أو باثفندر من 2005 وتحت
لأن البوصلة ودرجة الحرارة ماتركب على االديكور الأول ولازم تاخذ الفيش حتى لو قال لك بيخرب الظفيرة

الصامل
ويعافيك اخوي وعسانا أفدناك وأفدنا أخواننا في هالمنتدى

المميز
الله يعافيك
جرب اخوي انك تبدل الحساسات مع بعظهن أوتفصل البوصلة ودرجة الحرارة وترجعهن مرة ثانية
يمكن يصلحن

السراب 9999
ويعافيك اخوي الكهربائي هو فلب اللي في السحابين في رياض الخبراء اللي يصلح مثبت السرعة

ابو مكازي 2002
لا شكر على واجب

مشرفنا الغالي
بدوي جنوبي دايم تشجيعك لنا هو المحفز لأعضاء مكشات اللي استفدت منه ومن أعضاءه الكثير مقابل القليل اللي قدمته