الدفاية اللي تشتغل على الغاز ؟؟؟

[تابير]

صبحكم الله بالخير
أمس مريت على أحد محلات الكشتات عندنا بالكويت ولقيت دفاية تشتغل على الغاز
ولونها برتقالي وصناعتها باكستانية وشكلها حلو ومبين عليها انها دافية حيل
سؤالي : هل في أحد جرب هذي الدفاية ؟
هل هي آمنة في البيت ؟ مايتسرب منها غاز مثلا ؟
تعرفون الغاز إذا تسرب وأنت ماتدري تصير مشكلة كبيرة
اللي عنده علم في هالدفاية يفيدنا جزاه الله خير خصوصا اني سمعت عنها انها دافية وأوفر من الجاز (الكيروسين)
أشتريها والا لا ؟؟ ذبحني البرررررررررد في البيت السيراميك مايقصر يخليك تجمد صح ههههههه

[أبو براك]

بصراحه انا ما افضل استخدام دفايات الغاز في البيت بكثرة وذلك لخطورتها على الاطفال

بس دامك تريد استخدمها فانا انصحك بهالنوعية وهي يابانية الصنع

[تابير]

أشكرك أخوي أبو براك على ردك الجميل
في سؤال كيف خطورتها على الأطفال يعني شنو الضرر الممكن حصوله من هالنوع من الدفايات ؟
والدفاية اليابانية هذي من وين أحصلها ؟

[أبو براك]

خطورتها يكفي انها تعمل بالغاز

يعني اي سقوط لها يمكن تسبب مشكله لا سمح الله

ومكان الشراء بصراحه شريتها من فتره في احد زياراتي لحفر الباطن تقريبا 180 ريال او

190 ريال اذا ماني غلطان

واعتقد انها متوفرة بكثره ووكيلها شركة الزهراني

اغلبية الاخوه ينصح بدفاية الجاز (الكيروسين ) يابانية الصنع

شاهد هالرابط يمكن يفيدك

http://www.mekshat.com/vb/showthread.php?t=171266

[جيبي جايزلي]

السلام عليكم ورحمه الله وبركاته
اخوى تابير افضل دفايه وآمن فى المنزل هى دفايه الشرايح الزيت وبالتوفيق

[راعي اليتامى]

بصراحه انا ما افضل استخدام دفايات الغاز في البيت بكثرة وذلك لخطورتها على الاطفال

بس دامك تريد استخدمها فانا انصحك بهالنوعية وهي يابانية الصنع

هاذي صناعتها صينية وليست يابانية

صحيح مكتوب على الكرتون صناعة اليابان

بس لما تشوف الاستكر اللي على الدفاية

تلاقي مكتوب مصنوعة في الصين

وسعرها من 150 إلى 180 ريال...

[مكشاتينيو]

صراحة اخوي تدفي المكان وممتازة

[أبو براك]

يوجد نفسها صيني وسوري طبعا كلها تقليد

ولكن التي بالصوره يابانية الصنع والبعض يعتقد انها مصنوعة

في بلدة اوكرانيا احد جمهوريات الاتحاد السوفيتي السابقة اقتباسا من الاسم

ولكن هي بالصحيح صناعة يابانية

وكيلها في المملكه شركة الزهراني

وهاذي صور للاستيكرز من تحت تبين صنعها في اليابان




وهاذي صورة اخرى على الجنب لاسم وكيلها في المملكه

[تــــوني]

يا جماعة

الصناعات تطورت

دفاية زيت على الكهرب ولا احسن منها
ولا تخاف على صغار والا كبار وريح راسك ... وكبر الوسادة

مجربة وآمنه بإذن الله

ولا تاخذ الا الياباني وفيه نوع يجي فيه مروحة صغيرة كنها مروحة كمبيوتر ولا احسن منها تدفي لك المكان وانت مرتاح

بالتوفيق ترى الغاز اغلى من الكهرب

[الربذي]

ممتازه بس خطره يمكن الطفل يلمسها ولا شي اذا كان صغير قد تسبب حريق اذا طاحت لان مافيها امان

رائعه تدفي بس تحت الملاحظه وطبعا لازم تطفيها قبل النزم مهم جدا جدا لانها تسبب الاختناق زي الفحم
وفيه ناس يسوون عليها الشاهي !!!! تخيل يسوون الشاهي والحليب ويتدفون

انا عندي وحد يابانيه سعرها 180ريال ةحلوه تصلح شاهيك بل غداك او عشاك بالكلتم مامثله اذا كنت في خيمه او مكام يسحب الرائحه
فعلا تدفي واشكر اخونا لايراده الصوره كنت ابحث عنها 0جزاه الله خير..............

[تابير]

أشكركم أخواني على التفاعل مع الموضوع وأنا فعلا من المكاشيت اللي في المنتدى الرائع
في ملاحظة يا أخوان على دفاية الزيت انها بالغرفة تخلي ريجك ينشف بالحيل اذا نمت
وان شاء الله نشوف الدفاية الزينة ونشتريها

[ابوفهيدان]

تابير دفاية الزيت لازم يكون جنبها طاسة فيها ماي

[شقردي ثاني]

انا بحثت في محلات الرياض عن دفايات الغاز الحجم الكبير ولا اشوف الا مثل هذي
واعتقد ان تدفيتها بتكون ممتازه قياسا على دفايات الجاز
لكن عيبها ان برميل الغاز بيكون خارجي وهذا فيه خطوره اذا صار في البيت اطفال مع اللعب والركض لا قدر الله يسحب لي الغاز وصير بلاوي، ولهذا السبب تركت شراؤها واستمريت في البحث عن دفاية الغاز النوع الاكبر الذي يتم فيها وضع برميل الغاز في بطنها

أما هذه التي تسأل عنها اخي الكريم فقد فكرت في أن أقوم بتحويلها من دفاية غاز عن طريق البرميل الكبير إلى أن أجعلها ذات وقود بعلب الغاز الحجم الصغير ذو الاستخدام مرة واحدة حيث اتخلص من جرجرة برميل الغاز الكبير في الغرف

[غريب أطباع]

بصراحه انا ما افضل استخدام دفايات الغاز في البيت بكثرة وذلك لخطورتها على الاطفال

بس دامك تريد استخدمها فانا انصحك بهالنوعية وهي يابانية الصنع

عندي زيها لها اكثر من اربع سنوات استخدمها بالبر دائما امنه واستخدمها بالبيت عند انقطاع الكهرباء ما شفت منها شيء الكلام على اللي بالصوره فوق اليابانيه اما الباكستانيه ما اعرفها

[ولد وايل]

بالبيت خذ دفاية الكهرب ابعد عن هذه النوعيه لخطورتها على الاطفال