تحياتي للجميع...!!!
هالموضوع شيق وفكاهي ومفيد بطريقة اعداد كبسة الرز باللحم بقدر الكاتم...!!!
وللأمــــــــــــــــــــــــــــانة
الموضوع منقول صوراً وكتابة للفائده بدون اي تغيير او تصرف من موقع الاثله...!!!
__________________________________________________ __
الموقع عرق الاثله
الكاتب عرق الاثله
وهذا الموضوع
تعريف الكاتم للي مايعرف
هو زدر(قدر) له طباقه تربط بقلواز وفيه شقيق محطوط فوقه صفاره تبترم وتصوفر وفي روايه تنشنش اذا قام يطبخ وله عروتين ((ممسكتين )) الزين منه مصنع في ديرة بلاتيني (سب )
وطريقة اعداد الكاتم سهله وماتاخذ وقت
طريقة اعداد اللحم مع الرز
.الطريقه الاولى (وهي المتبعة في الغالب ) <== والله اني ذرب في الحكي هههههههههههه
ضع قليل من الزيت في قاعة القدر وشب النار اللين يحتمي ثم جب بصل مقدطع وحطه على الزيت ثم خله ينحمس وانت طبعا تقلبه بالملعقه
وبعد ذلك اخي واختي الكريمه نضع الماجي على البصل عشان يخلي لون البصل اشقر ثم حط الطماط ان صرت تبي طماط ولا ماله لزوم
ثم حط البهارت والدارسين والهيل والفلفل الاسود (الفلفل والهيل مايصير مطحون ) و الملح والليمون الاسود وقلبهن مع بعض اللين يتداخلن
ثم جب قطع اللحم وارجمهن في القدر وقلبهن مع بعض وخل اللحم ينحمس شوي مع الكشنه
وبعد ماينحمس يجي دور اضافة الماء والماء له وزنه تبي لها توضيح
لازم تكون في البدايه محدد كمية الرز يعني بالكاس
مثلا انت عازم لك 4 اشخاص يكون مقدار الرز اربع كيسان رز (كاس جبن او مثل حجمه )
<---- ترا الكاس نحسبه لشخص اللي ضرسه جيد ماهوب تقولون واجد وتبلشونا
ووزنة الماء تحدد من هنا يعني
4 كيسان رز يقابلها 6 كيسان ماء
<=== معادله احفظها
او 5 كيسان زر يقابلها 7كيسان ماء
يعني تزيد بكاسين مويه عن الرز
نرجع للقدر
نضيف 6 كيسان مويه على اللحم (لاني ابا احط 4 كيسان رز ) <-- شكلكم دختو ههههههههههههههههه
طبعا الحين اسكر غط الكاتم اللين اسمع الكاتم توشوش صفارته ومن يوم تبدى توشوش الصفاره ابدى احسب له
اذا صارت اللحمه للحمة تيس صغير يعني ماهوب كبير
ياخذ وقت 15 دقيقه اذا صرت تبي تكبس اللحم مع الرز
وياخذ 20 دقيقه اذا صرت منت كابس اللحم مع الرز
طبعا حنا نبي نكبس اللحم مع الرز يعني ابا اخليه 15 دقيقه ثم بعد كذا نفك الصفاره حقت الكاتم ونسكر عنه النار
ونخليه شوي اللين يطلع بخار القدر ثم نفك الغطا و هنا لو تذوق المرقه ملحها زين ولاتزودها ثم نحط الرز ( يفضل غسل الرز )
ونسكر عليه ثانيه ونشب عليه النار اللين تبدى صفارة الكاتم توشوش ونحسب له 13 دقيقه الى 15 دقيقه
ونقصر على النار ونخليها ضعيفه (من يوم يبدى الكاتم يوشوش ) عشان مايحترق الرز ويجي فيه قراره
وبالهناء والعافيه ياحلو انت وياه <---- اشركونا في البركه ان صار فيه مكباس قريب ..
مابعد عبثت به ايدي العابثين
ياحلالات من يتربع في وسطه
مابعد شبعت من تمقله الى الحين
جاهز للاقلاع ولم السماط
اثار الجريمه