وطيت قفرا بين عرق وجناديل=تو الخرينق بايلن في سهلها
باين بها النوار عقب المماحيل=بيدا يلوفح بالدعايب ثعلها
قلت انعزل فيها عساها تساهيل=يومين والثالث عسى البال يلها
ارقد خلاوي عن خطا القال والقيل=اخير من بعض الديار وفللها
معي زهابي من قدور ومعاميل=ونار السمر عندي تمايل شعلها
والملقمه عبيت ماها شهاليل=لجل الهراري يستوي لي عملها
من دوني الجرذي درج رافع الذيل=نثايلن حول الخفاره دملها
واعقابن ابرق فوق ذيك المطاويل=لقا العلف بين الشعاف وجبلها
قلت اطلب لزادي من الصيد واقيل=وابحث عن ارنب راكده في دحلها
اشتلت بارود وعلى الكتف دربيل=واقص الاثره في شجاير عبلها
ومصباحها جيته برفق وتماهيل=وامزهب البندق وفرت حجلها
يوم انفجت للضلع يرمز بها الحيل=عطيتها النيشان رش وقتلها
خليتها زادي بذيك المداهيل=والنفس بالدنيا الهي كفلها
سبحانه اللي رازق الذر والفيل=كل الخلايق جود فضله شملها
يفني مع الايام جيلن بعد جيل=حتى الملوك يزيلها عن دولها
ما يبقى غيره والليالي دواويل=والروح من ذنبن تزايد زملها
بين الرجا والخوف يوزن لها الكيل=عسى الولي يمحا معاصي زللها
والادمي باخراه في جنه او ويل=اما حياة الخير والا عللها
اما حدايق مثمراتن مظاليل=والا سعيرن كل كافر نزلها
ما فيها غير العسر والضيق والميل=فيها صعودا كل نفسن ذهلها
يالله عفوك يا مزيل البهاذيل=يا واحدن سبعن عوالي قفلها
يا مستوي بالعرش باين ولا زيل=يا مرسي جبال الوطا عن خللها
يا مرسل الفرقان موصله جبريل=باوامرك وحي الرساله حملها
راجيك يسرن بالسنين المقابيل=وفي جنة الفردوس نلعق عسلها
واريد عفوك قبل يوم الزلازيل=في ساعتن ما فيها مالن وبلها
ما فيها غير الفصل وكسب المحاصيل=خسران فيها منهو صد وجهلها
( يوسف الخليفة )
رد مع اقتباس
المشاركة الأصلية كتبت بواسطة نديم همه
