طير حر وافي للبيع..

[نداوي حائل]

بسم الله الرحمن الرحيم

اخواني الاعزاء ..... للبيع طير قرناس


عمر الطير .... ثنو بيتي والعام وحش بكر


حجم الطير .... العرض 17.5 راهيات والطول 17 ايضا


لون الطير .... حمر صافي مجاهيم رش خفيف بحزام الريش والجميع يجمع انه منقولي


علوم الطير ... الطير فاعل العام وحش في مالي خارج المملكه والسنه هذي بيتي ثنو فاعل ايضا في مالي


الطير من طيور احد الشخصيات المعروفه بالرياض والخرج .


جناح الطير وركاته .... جناح الطير طيب طيب كل مازاد عليه الجرد كل ماعطاك جناحه مع ارتفاع الصنعه


والطير لا يزال فيه طبوع الوحش ولاهو راكد بالسيارة ولا على الوكر اذا


جيته اماعلى اليد فلا يتحرك وانتى تتمشى فيه .


الملواح والحمام .... يلعب على الملواح ويطرد الحمام على اوله بجناح يبي جرد بس وتشوف الطيب .


العلف والطبوع ..... العلف حار ولا يكفيه شي ومع القصر فيه كوشة بسيطه من واقع الحراره ولكن


مايضايقك ابد مع فك الحمام مثل ما قلت طبع الوحش لاتزال في حالة النزول بهدوء


وبعيد السيارات ما ينقل العلف .


الحالة الصحية ..... ما فيه الا عافية ولا انقد عليه بشي نهائي مع انه فحص المستشفى قبل شهرين بعد عودته


من مالي والطير سليم .

التواصل والصورة ..... الطير في حائل والرقم بعد اذن المشرفين 0555185600 ابو عبدالعزيز

[alajmi110]

ما شاء الله تبارك الرحمن

الطير طيب وسرته زينه الله يبارك لك

عليه شي من ألأسوام من قبل ؟

[صقار الأسياح]

هل الطير مسيوم قبل

[صقار الخبر]

اخوي افتح السوم 3000 ريال شرط الفحص بس مع التوصيل

الخبر (( الشرقيه ))

[صقار الخبر]

اخوي هل فيه ريش موسر او مكسور ؟؟ هل طاح من ريشه شي بالوقت هذا ؟؟

[صقار الأسياح]

3100 بدون توصيل انا اجيك في حائل

[فزااع]

ماشاء الله تبارك الرحمن...

الله يرزقك البيعة الطيبة..

[راعي الجير]

الله يرزقك بالقيمه اللي تروعك من كثرها عزالله ماخليت شي والطير على حسب كلامك يبي له شوي مقابل ويغدي من احسن الطيور

[قرناس حائل]

ما شاء الله تبارك الرحمن ابو عبد العزيز

عليه سوم ولا لا ؟

واذا لك حد علمنا الله لا يهينك

كم له الطير جاي من مالي ؟ بعدين ما شاء الله عليه ما يبي جرد اذا هو قانص هالسنة

تقبل تحياتي

[نداوي حائل]

بسم الله

اخواني الاعزاء الله يعافيكم حضور ودعوات وسوامه

اما عن السوم كثر خيركم ياخوان والله يعافيكم نبي من الله اكثر لو انه بخسه شوي لكن سوم هذا ولا فيها شي

اما نظام السوم عموما والله ياخوان تجيني سومات على الجوال مدري انا اعتقد انه لازم تبان للاخوان في المنتدى

عشان الكل يدري فيها ،
عموما هو وصل معي على الجوال (7500)ريال وللعلم البيع قريب ولا هو بعيد

والله يوفق ويجعلنا عند حسن ظن الجميع

قرناس حائل
شكرا لك والله يعافيك والطير جاء من مالي قبل شهر ونص تقريبا وبعدين الطير ترحيله من مالي الى مورتانيا ومن بعدها الى المغرب ومن بعدها الى السعودية تأخذ وقت طويل وعند الوصول اخذن فتره في المربط ما دعوها يعني يحتاج الى جرد وتنزل ومثلك عارف .... حنا نتعلم منكم الصقاره وغيرك المعلم اخي الكريم

وشكرا للجميع

[أبو نوير]

عزالله انه طير طيب ويا هنياله اللي بياخذه

وانت يا راكان طيب ولا يجي منك غير الطيب

[نداوي حائل]

ياخواني
السلام عليكم ورحمة الله

ارجوا المعذرة على التأخير و افيدكم بأن الطير انباع على احد الاخوان في المنطقه الشرقيه

والله يوفقه و يربحه انشالله

اتمنى من الجميع و لو شفهيا الدعوات له بالبركة و الربح والله يوفقك يابو فيصل .

شكرا لكم

[alajmi110]

الله يبارك لشاري والبايع

يستاهل ابو فيصل الله يبارك له

[محمد النفود]

الله يبارك لبو فيصل عزالله طيراً ينصفط والله يعوضك بخير ياراكان.
والله يوفقكم جميع.

[هماش]

الله يبارك للبايع والشاري
ويطعمه من صيده