أبيات مما قيل في السياره ....

[سلطان العضيدان]

السلام عليكم ورحمته الله وبركاته :

ادخل الشعراء وسيلةالنقل ضمن أشعارهم واكثر الوسائل التي ادخلوها هي :
السيارة وهي مايسمى((الونيت)) ويصف الشاعر سرعتها او اعطال بها او قوتها.
ونتطرق بها الموضوع الى بعض من الابيات فيما قيل بالسيارة :

الشاعر سعد بن جدلان الاكلبي. يصف بالسيارة وصفا رائع يقول:
يا راكب اللي صممته الولايـــات **** الى امريكا فالمصانع تصبه
تصميم شركة (كلهان) الخواجات **** مورده من(يون يرك)ونصبه


كذلك الشاعر حميد الذيابي في وصف (جي . ام):
ياراكب اللي حرف (جي . ام) يزهاه **** لادق سلفه غادي له هديري
مفــحوص الباككس والـــزيت معماه **** ومعلق بين القزوز السبيري
لادق سلــفه والبـــساتن مصــــفاه **** قامت بلوف النار تزفر زفيري


الشاعرة بخوت المرية توصف السياره حيث تقول:
ياحن قلبي حن(ماك) مع الطلعات **** لاعشقه بالعادين والدبل جـــره
حمله ثقيل وحملوه فوقه البايبات **** وراعيه يدعس بانزينه ولاسره



عبد الله بن عبار جاد وصفه في السياره والابيات توضح ذلك:
ياركب اللي عارف مبلغه بــيش **** عزاه للمفلس يمره على ماش
مايشتريه اللي امــــوره تناويش **** متعند راعيه يبي الثمن كاش
ما زاودوا به بالحراج المغاشيش **** ولادخل التصليح في وسط الاوراش
يجري كما التيارلا راكب الفيش **** والا كما لمع المصور بالافلاش


كما يقول الشاعر حمود العازمي هذه الابيات يشتكي فيها من اعطال السياره القديمة :
يامن يصفي لي السكراب **** لا عاد انا مبتلي فيها
القير مع بديها خــــراب **** ماهوب في خير راعيها
ماعاد تروي من الشراب **** دايم تبي ناس تسقيها

يصور الشاعر حامد الهديبي حنه قلبه حيث يقول:
انا حن... قلبي.. حنة الجيب ابوقيرين **** ضرب له غراز وفارق القار والراحه
ضرب له نفود وتو جيبه على التمرين **** سرى من الكويت وبافي الضلع مصباحه


اما الشاعر الكبير بندر بن سرور فيقول عن الفرت:
يااهل الونيت اللي يبا مشتل البيب **** مادق صدره بالخطوط الغزيره
يوم ايتخثع في.... محيل الاداعيب **** يشدي تخثع جادل في الغزيره
لاتجربنه مايبا الفرت تــــجريب **** قد جربه بالبيت الابيض خبيره

وهذا مااستطعت جمعه وعساها يالنشامى يعجبكم ويحوز على راضكم

والسلام خير ختام ...................... تحياتي لكم

[السمح]

إي والله أعجبتنا الأبيات المنتقاة عن السيارات وحسن الاختيار الواضح ...

واشهد إنك ما قصرت ، وهذي عاداتك يابا العوايد ...

[سلطان العضيدان]

تسلم ياخوي السمح والف الف شكر لك
ابشر بالمزيد يابعدي ولاهنت

[أيمن]

تسلم يا غياض لاهنت ..
لكن لي طلب ياليتك تجيبه ..
أبيات سعد الأكلبي وين ألقها كاملة ..
تراي أدورها من زماااااااان !!

تحيتي

[عاشق الصحراء]

لا دق سلفه و البساتن مصفاه*** قامت بلوف النار تزفر زفيري.

عشت و الله

[سلطان العضيدان]

وهذي تكملة قصيدة سعد الاكلبي......

يقول:

يا راكب اللي صممته الولايـــــات **** الى امريكا فالمصانع تصبه
تصميم شركة (كلهان) الخواجات **** مورده من(يون يرك)ونصبه
أكبر مكينه.... ســقطـت لـلونيتات **** خمسة صفر واحد ودبة ودبة
مايصدر الا عن طريق الـوزارات **** حتى (سبيراته)تجي في سطبه
بالجدول السري خذته الــــوكالات **** مديرها وقع وعاهد بربه
صدفه طلع بالواسطة والــحيالات **** ثم قيل ياسواقه اخذه وغبه
ساعة فتح بابه عطـوه السويكات **** شغل وللما ...مع قزوزة يكبه
قام يتسمع وش تقول الــقزوزات **** لاهي تقول : ابغاك ماما وببه

هذا اللي استطعت جمعه من قصيدة الشاعر ( سعد الاكلبي )
والف الف شكرا لك على التفاعل يامشرف ايمن

[أيمن]

تسلم يا بعدي والله جبتها ..
وللمعلومية كان منيب واهم فإن الشاعر الأكلبي يقالانه وافته المنية بجوار جمسه الاحمر ..
له قصيدة ثانية أحفظ منها بعض الكلمات وليس الأبيات في وصفه للجمس ..
يقول واصف سرعة الجمس: من سرعته يأدب نجوم السما بكبوته
وكنت أبحث عن القصيدة المتضمنة لها البيت .

تحيتي

[سلطان العضيدان]

اللي يقول يااخ ايمن:

يازين الجميحي لا سـرى والعباد خفوت **** يبي لازم متماكنه قبل لا يفوته
على هجعه الساري وسجة هل البيلوت **** لاقام يتقلب تحت رجلك تقل حوته
يقوس مع اللفات كنك تشوته شـــــــوت **** يشادي المظلي نازل مع براشوته
حماره مع نور القمر كنه الــــــــــياقوت **** تعد النجوم المرقبه فوق كبوته
برفقه.... خوي صافي معك حتى الـموت **** اذا جر... صوته ينجلي الهم من صوته
يداري على سجتك من هرجة السـربوت **** وغلطتك عنده داخل البحر مزتوته

مادري هي هذي الابيات اللي تقصد ولى لا .......؟

[أيمن]

يا سلام عليك يا بعدي .. لا هنت ..
والله ما تصدق وشلون كنت أدور عليها لكن مصدرك هل هو شريطه اللي قالها فيه، أو له ديوان معين متداول ؟
عمومًا كثر الله خيرك، وزادك علما وعملا وبرا وتقى ..

تحيتي

[سلطان العضيدان]

تسلم يامشرف ايمن واهم شي رضى الجميع يالغالي
وانت تامر وحنا نطامر
.
.
.
.
ولى انت اشر وحنا نقشر

[أيمن]

ما يامر عليك عدو ..
وقدرك محشوم يالغالي ..

تحيتي