بسم الله الرحمن الرحيم
والله يقاصرنا ويقاصرهم بالاحسان وأعوذ بالله من الشيطان الرجيم
الجن حقيقه وصارت معي مواقف كثيره معهم بس الحمد لله عدت على خير
والواحد لازم يذكر الله ويتعوذ بالله من الشيطان ويقرا المعوذات وما يشوف شر
من القصص العالقه في ذهني كنت جالس في غرفتي الساعه 4 الفجر
واسمع امي تطق الباب وتصوت علي سطام سطام
قلت خير ان شاء الله واطلع وافتح الباب ما فيه احد؟
والاقي ممر الغرفه مظلم واطلع للصاله مظلمه واروح لغرف الوالد بابها مصكر؟
قلت يمكن في المطبخ ولا لقيتها تعوذت من الشيطان
ويوم اصبحنا لقيت الوالده وقلت يمه انتي طاقه علي الباب؟ أمس؟؟
قالت لا ليش؟ قلت ابد شكلي اتوههم ما ابي اخوفها
وقصه ثانيه امشي في الحوش رايح للملحق والله يكرمكم تعرفون غطيان فتاشات المجاري
لها صوت اذا مشيت فوقها المهم توي ابفتح باب الملحق
والا اسمع صوت واحد واطي على الغطاء حق المجاري اكرمكم الله
واسمع تسحيب نعول اكرمكم الله ووقف شعر جسمي قلت بسم الله الرحمن الرحيم والتفت ولا لقيت احد
وفيه استراحه لنا في حوش الابل الي في الحاير يا اخوان هالقصه غريبه
كان فيها مطبخ وكنا نهجرها بالسنوات ونرجع المهم رجعنا لها ولقينا باب المطبخ مفتوح ولقينا حمامه قماري معششه فوق رف المطبخ
وتوها طايره بتطلع مع الباب مسكها السواق وقلنا له اتركها قام يستهبل الهندي
يطالعها وقال يبغى روح (تبغين تروحين) والله يا جماعه قالت اييه بصوت مسموع
الهندي رماها وقام يرتجف
والكثير من القصص حصلت بس هذي الي اذكرها
والله يحفظ الجميع واشكر لك موضوعك اخي الكريم الربذي
ولي عودة باذن الله على الموضوع