لماذا أخترت هذا الأسم المستعار بالذات ؟؟ ... أدخل وشارك من فضلك

[الضاري]

بسم الله الرحمن الرحيم
الأخوة أعضاء وزوار منتدانا الغالي مكشات…
السلام عليكم ورحمة الله وبركاتة
لاشك أن أي عضو في منتدانا أو في أي منتدى عندما يريد التسجيل والأنتساب في منتدى يحاول أن يرمز لنفسة بأسم مستعار يحبة ويريدة …
وسؤالي هو/ لماذا أخترت هذا الأسم المستعار لك؟؟؟
أبدا أنا – أخترت أسمي (( الضاري)) لأني من صغر سني وأنا أحب هذا الأسم وغير ذلك من الأسباب ..
أرجو من الجميع المشاركة ولكم جزيل الشكر..

[صقر]

اخي الضاري

السلام عليكم ورحمة الله وبركاته

شكرا على طرح الموضوع

والاسم كما تفضلت يكون محبب له ولذلك يتم اختياره

انا اسمي صقر اخترته تفاعلا مع منتدى مكشات ومعناه غني عن التعريف.

وبما انك فتحت الموضوع فانا اناشد اخواني الذين يريدون التسجيل :

1- ان يختار اسم عربيا
2- ان يكون الاسم سلس على اللسان والكتابة ايضا.
3- الا يكون الاسم سيئا او ذو معنى ردئ.
4- ان لايكون اسم مكرر لعضو في المنتدى
5- ان يكون الاسم عبارة عن كلمة واحدة (جزء واحد)

وشكرا لك

بارك الله فيك......

[راعي الطويلة]

الأخ العزيز

الضاري

تحية وتقدير لشخصكم الكريم ... وموضوعك جداً جميل ... وأحب أن أسآل الجميع ... كم مرة وفقت مستفهم عن بعض الأسماء وماذا تعني ؟ أو ما هي علاقتها بمكشات ؟

كما أحب أن أشكر الأخ صقر على ما قدمه من نصائح في مجال أختيار الأسم .

فالعلاقة يجب أن تكون مرتبطة أو على الأقل قريبة ....

واليك سبب أختياري لأسم (( راعي الطويلة ))

يوم كان عمري 11سنة بدى الوالد الله يحفظه يعلمني الرمي وحمل البندق وبعدها بسنة اصطحبني معه في أول مقناص لي (( الوالد من يومه يحب القنص والصيد .... والله كاتب عليه حب الخلا وطرد القنوص )) المهم كان بندقنا - بلجيك طويلة (من القديم) وخرازة برنو - وكانت طلبتنا الوبر ... وصلنا للمكان المطلوب وما صدقت أن الوالد يبي يصيد وبر من بعد المسافة وجلسنا ننطر خروج الوبار وبعد مدة ليست بالهينة خرجوا ثم أن الوالد قال هات البلجيك .. المسافة بعيدة والخرازة ما تصل ... ورمى وصاد ولله الحمد قالي رح جبه ومشيت حوالي نصف ساعة في ذيك الجبال اللي الله لا يحدكم عليها لين وصلت وجبته .

ومن يومها وأنا اسابق الوالد على البلجيك (( عجبتن)) فما كان من الوالد في يوم من الايام ألا أن سآل وين ...
قالوا خذ الطويلة وراح يدور قنوص ...
عاد من زعله على قال عساه ما يصيد هذا الموذي ... يوم سالته الوالدة من الموذي قال ... راعي الطويلة ...

ومن يومها يأخوان وأنا ما أفرط بهذا الأسم ..

أنا آسف على الأطالة بس ما عرفت أختصر ...

أخوكم

راعي الطويلة

[معمرها]

......بسم الله الرحمن الرحيم........

سلام عليالكم ورحمة الله وبركاته .............

ــــــــ:: يعطيك ألف عافيه اخي (((( الضاري ))))

انا اخترت عباره ((( معمر البندق )))
لاكن كانت اكثر من 11 حرف
واختصرتها الى
*(((( معمرها ))))**
اي معمر البندق

شـــكـــراُ

[ميراج]

الاخ الضارى حياك الله

موضوعك ممتاز الله يعطيك العافيه

أنا سبب تسمية ميراج كان عندى طير سميته ميراج طرح الحماد الطير هذا بالنسبه للطبع والفعل

أنا صقار من 25 سنه ما مر على مثله وفوق هذا كله سبوق قليل الحبارى اللى يضيعها قنصت بالطير هذا

5 سنوات ما طلع طير قبله الا مره وحده ولاكان عندى نيه ابيعه بأى ثمن يوم جاء هاك اليوم ولاى قانص

فى فيحان ونلقى ناس قانصين من أهل الشمال وعندهم جرة حبارى جديده مرينا من عندهم وسولفنا حنا وياهم

وقلنا نبى نتفرج على الهدد قالو الله يحييكم وساعدنهم فى قص البارى وقلت لهم انا ابا اطلع ولانيب هاد بس

ابا احدد جهة الحبارى قالو معنا طيور تطلع المهم كشفت عن طيرى وبعد دقيقتين طلب طيرى وعلمتهم بالجهاز

لاأنهم يقصون بعكس محل الحبارى ما صدقو طيرى ورحت على يمة طلع طيرى ولقيت جرت الحبارى هريب

وكلمتهم وجونى قال شايب معهم ان طارت وحل طيرنا تراك مسموح بالهدد أسرع من ها الكلام وتطير الحبارى

ويهدون عليها فرخ والله مهوب شين المهم راحت عليه انا من اول الهدد وانا اسوق مع الحبارى والحق طيرى

ميراج ويعلقها بعد 6 كيلو عزمناهم على المعشى وتعرفنا عليهم وقعدو يتحوفون الطير وقلت مهوب للبيع

لقيتهم فى سوق الرياض اخر الموسم وتغدو عندى قال واحد منهم حنا ما جيناك الا علشان الطير حده وكثر

وطلبونياه طلب وهم رجال يستا هلون شرواكم خذو الطير وأرسلو لى اكثر من قيمته ولاكن عجزت انساه

كل ما جيت على اثر حبارى ذكرته وهذا سبب التسميه وسلامتكم

أسف على الاطاله

[أبو داحم]

وأنا سبب أختياري لهذا الأسم هو أن جدي الله يحفظه كان مايسميني ألا أبو داحم من يوم صغري وسسب تسميته لي بهذا الأسم هو أن واحد من أعز أصدقاءه كان راعي بر وراعي مقناص فيوم شافني أحرص على الصيد وعلى طلعات البر قال أنت من اليوم أبو داحم وألى هذي الساعه وهو مايسميني ألا أبو داحم وهذ الكنيه معجبتني حتى أخوياي ما يسموني ألا أبو داحم ولهذا أخترتها أسمي في المنتدى

[^eid^]

السلام عليكم ورحمة الله وبركاتة
تحية طيبة للاخوه الاعزاء
اشكرك الاخ العزيز ضاويعلى الموضوعالطيب.
ام أنا وأعوذ بالله من من كلمة أنا فهو أسمي الحقيقي (عيد) ولكن وجود عضو بنفس الاسم وكتبته باللغة الانجليزية eid .
وشكرا.

[Najd^Prince]

بسم الله الرحمن الرحيم


بصراحه موضوع جميل بفكرته الجديده و هذا الشي مو غريب على عضو

من أعضاء مكشات زي أخوي الضـــــــاري .

وبصراحه أعجبتني قصه (( راعي الطويله )) .

أما سبب إختياري لهذا الاسم (( Najd^Prince )) :

سلمك الله انا إنسان بطبعي أحب نجد و أهلها ,, ومن يوم ولدت و أنا فيها (( هذا شي ))

والشي الثاني ممكن تقول عني مغرور (( لحد يصدق بس )) و هذا يبين في الجزء

الأول من اسمي .

ولاني محب للغه الانجليزيه كتبته بالانجليزي وعلى شان شكله حلو بعد .

وســـــــــــــــلامتـــــــــــــــــــــــكم

[جلوبلستار]

انا اخترت اسمي لأنه يشتغل في أي مكان ويفك الأزمات ويتصل في أماكن يعتبر فيها الجوال العادي أقل من مجرد لعبة( ماله أي فايده ) صح انه قديم لكن يمشي الحال .

[الجنوبي]

بسم الله الرحمن الرحيم
صراحه موضوع اكثر من رائع .ويبث الموده والمحبه بين اعضاء هذا المنتدى.
ونشكر الاخ <<<<<< ضاري>>>>>>>>على طرحه...
وسبب اختياري لهذاالاسم( الجنوبي)
هو لوجودي بهذا الجزء الغا لي من وطننا الحبيب.بما فيه من طبيعه فاتنه تئسر الفؤاد.
وتبهج الزائر والمصطاف.............

[al-nashmi]

اخونا الضاري....

مساك الله بالخير........والعافيه والمسرات.

اخواني اعضاء مكشات...... لا هنتوا....

بالنسبه لي :


النشمي


هذا الاسم كان يطلقونه علي الشباب من قديم ولا اسمي الحقيقي ....... عبدالله.

وكنت مره طالع جهه لينه وسمعت واحد ينادي بالجهاز ويقول انه متعطل هو وخوياه ودخلت معهم عبر الجهاز وصفوا لي مكانهم ورحت يمهم وساعدتهم .... وجبت قطعه غيار لسيارتهم...... والمنه لله .

والحمد لله الي قدرني على خدمتهم...وكانوا اثناء وصفهم لمكانهم ينادوني بالجهاز يالنشمي..... وهم مايعرفون عني شئ

هذا الكلام اول ما استخدمت الجهاز الاسلكي....


وبعدها ......صار هذا نداي...........وتخاويت انا وياهم يومين....طبعا انا في مكان وهم في مكان ثاني بس
عبر الجهاز لين رجعت للرياض وهم بقوا في ذيك المنطقه........


وفي يوما مبارك تعرفت على موقع مكشات وسجلت بهذا الاسم .... واسأل الله القدير ان يكون لي من اسمي نصيب..........



وتقبلوا تحيات اخوكم/ النشمي

[الضاري]

بسم الله الرحمن الرحيم


هلا وغلا بالصقر
وعليكم السلام ورحمة الله وبركاتة
لاشكر على واجب وفعلا أسمك غني عن التعريف ..
ومشكور على ملاحظاتك من أجل أختيار الأسم..
والشكر لله..
والله يبارك بالجميع.

ّّّّّّّّّّّّّّّّّّّّّّّّّّّّّّّّّّّ~~~~~~~~~~~~~~~ ~~~~~~~~~~~~~~~~~~~~~~~~~~~~~~~~~~~~~~~~~~~~

هلا وغلا براعي الطويلة
ومشكور على الأطراء الجميل وبصراحة كم مرة أستغرب من أسماء بعض الأشخاص في المنتدى ؟؟؟
وياعلك تسلم ومشكور على مرورك يالغالي.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~
هلا وغلا بمعمرها
وعليكم السلام ورحمة الله وبركاتة..
والله يعافيك وياعلك تسلم
ومشكور على مرورك يالغالي..
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~
هلا وغلا بميراج
والله يحييك ويطول عمرك
وبصراحة قصة أسمك معاناة قرأتها اكثر من مرة وفي كل مرة يزيد حزني على طيرك أكثر..
وتسلم يالغالي على هالصفات الرجولية النبيلة والله يعوضك بطيرا أفضل من ميراج.. قل آمين
وياعلك تسلم أخوي.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~
هلا وغلا بأبوداحم
ومشكور على مرورك يالغالي.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~
هلا وغلا بـعيد
وعليكم السلام ورحمة الله وبركاتة.
والشكر لله
ياعيد بأي حال عدت ياعيد....
ومشكور على مرورك يالغالي.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~
هلا وغلا بـ Najd^Prince

الله يسلمك ويطول عمرك..
ومشكور على مرورك يالغالي.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~
هلا وغلا بجلوبلستار
فعلا كلامك صحيح..
ومشكور يالغالي
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~
هلا وغلا بالجنوبي
مشكور والله يزيد المحبة والغلا بين الجميع
والشكر لله يالغالي..
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~
هلا وغلا بالنشمي
الله يمسيك بالخير والعافية والمسرات
وفعلا نشمي على أسمك يالغالي
وأسأل الله أن يكون لك من أسمك نصيب.

[نسيم الليل]

السلام عليكم ورحمة الله وبركاته,,,,

انا اخترت اسم نسيم الليل من بيت شعر اعجبن وغناه الفنان خالد عبدالرحمن وهو :

لاقبل نسيم الليل له خيل وركاب=وله في طلوع الشمس عز ومهابه

وسلامتكم

اخوكم

نسيم الليل

[ابن البادية]

الاخ العزيز الضاري موضوع جيد و مشكور على طرحة
اما سبب ا ختياري ( لابن البادية )
فهو لاني مغرم بحب البادية وارتاح لشوفة البر والبدوان
واناء من من محافظة مأرب اليمن وهذة المنطقة اغلب اهلها بداوة ورعات حلال
ومن اسباب التسمية بهذا الاسم اني سافرت للمدينة لدراسة في الجامعة
وكنت ادخل القاعة بالثوب والحزام مليان رصاص وكان الاستاذ يتضايق
من هذا المنظر ويقول لي يابدوي وزملاي كانو يدعوني يابدوي وكنت ارتاح لهذا الاسم
وافتخر بة وكنت اكره الزي حق الدراسة
وكان شكلي بة مضحك المهم اني احب هذا الاسم ( ابن البادية)


اناء بدوي و معتز في نفسي *** مدهالي حيث النجر والمحماسlog:

[نجمة سهيل]

اشكرك عزيزي الضاري

على هذا الموضوع الجميل ،،


اما بالنسبه لي ( اسمح لي بسرد قصتي كامله ) :


من طفولتي وانا اعشق الاسلحه ، وحتى الاهل كانوا يعرفون هالشي ، وكنت لما ارجع من الابتدائيه يوم الاربعاء يكون خالي مجهز السياره ويمرني انا واخوي الكبير ونطلع سوا ،

المهم كنا نروح لشعيب قريب من الرياض اسميه (( عــشـــق الــطــفــولــه )) ،

لما نوصل للشعيب انزل من الجيب وكان شروكي من القصر جايبينه ، وارفع المرتبه ونطلع ام حبه وام خمس ،

ونجهز الفشق ونمر على هالضلعان ، نتمشى وكان الحجل هذاك الوقت بأعداد خياليه ،

وكنت اسفهل اذا سمعت صوت الشوزن بين هالضلوع ، احب الصوت حب خيالي ،

حتى أخبر بهالشعيب انه كنا نصيد به من الظهر الين العصر 10 الى20ضب ،

اما ألحين الله يخلف عليهن ، ..

ومع مرور الأيام وانا على هالحال ماأحب الا اسمع صوت الرمي ،،

لكن يوم دخلت للمتوسطه ، بديت اقتني اسلحه خاصه بي ،

واخترت هالاسم ، عشانه المعروف انه هالنجم اذا طلع تبدأ تجي الطيور ،

ومن حبي لطلوع هالنجم ، وللمقناص ، تسميت بهالاسم ،



واسف على الاطااااله وعلى هالسرد الي ماهوب زين\