رابــــطــــة مــلاك الـــــفــــورد الــحـــوض ..... (F 150, F 250, F 350, Raptor)

[الضاحي]

السلام عليكم ورحمة الله وبركاته

وانا اقلب اليوم بالانترنت اادور قصايد بالفورد او الهاف وحصلت هاذي القصيدة وحبيت انكم تشاركوني بقراءتها وصف عملية تجهيز الهاف قبل عملية التهريب وواصف ماجرى اثناء مروره من مركز الحدود مهربا سلع او بضائع

راكب اللي تعبين عليه المتجر_×××_هاف حيث الهاف ماله مع العالم وجود
احمر سته وستين لوحاته سمر_×××_ في ثلاثين الف بالضبط للبيع محدود
واشتراه اللي يبي قطف نوار الزهر_×××_دافع كل الثمن كاش مايطلب قصود
ومرنه وسط البلد لين وافق للسفر_×××_ماتغالى فيه دفع الخساير والنقود
ودخله عقب التمرن كراجات النمر_×××_ لاجل تكميل اللحايق وتدبيل العضود
دبل السبرنق عل لايميل وينهصر_×××_والتواير جددن طقم بريجستون سود
وحمله من عند خيطان وجنب للبحر_×××_مع تقاطيع الشعيبه على مينا سعود
ويدهج الوفره ومنها مشى عقب الظهر _×××_ ناحر الكبريت ماله عن المركز صدود
جاك مثل مقادع الذيب معطيهم نحر_×××_ حاذف نفسه تحت عين حلال العقود
ومرهم في غفلة ماخذو عنه حذر _×××_واوجسو حسه وهم قبل رقاد سجود
وطلبوه اخوان رشده يقصون الاثر_×××_خلو الرشاش قفوه مثل قصف الرعود
يطردون الهاف ماعندهم علم وخبر_×××_ وهو جديد ولاقضب طارته رخو الزنود
ماركة مصنع امريكا مهو دوج وشفر_×××_ وارد كل يخبره مجرب ومحمود
يطنخ السايق بحسه ايلامنه زفر_×××_عند مايذكر غرابيل نزلات وصعود
صافي منه النواظر تحير وتفتكر_×××_ اسرد ودك تغطيه عن عين الحسود
المواتر كواكب وهو مثل القمر_×××_مايسبه كود كوبان والهيس الربود

صح لسانك ولسان الشاعر

[الضاحي]

السلام عليكم
سجلوني يالربع معكم
f150 غمارة ابيض دفرنسين 2003 قير تماتيك
وتراه لللبيع عليه سوم 30000ريال

هلا بك يا اخوي صالح

يا ليتك تعطينا تجربتك للموتر الله لايهينك

[هامة نجد]

تحياتي للجميع
مشاركة الشباب بالصور عن سيارات فورد بامريكا او غيرها شيئ جميل ولكن وش الفايدة اذا ما هي عندنا
انا اريد صور توضح قوة وهيبة سيارات فورد ذات الدفع الرباعي وقوة تحملها في اجواء وطبيعة المملكة الصحراوية ومقارنتها بالسيارات الاخرى اليابانية والامريكية وغيرها
انا سيارتي فورد امريكي موديل 2000 عملي وممتاز ولكن بعض قطع الغيار سعرها غالي ومشاكل الكهردباء بين فترة واخرى
وارغب بسيارة حوض ذات دفع رباعي عملي+ يتحمل اجواء و طبيعة الصحراء بالمملكة + قطع غيارة في المعقول +سهل الصيانة
ولماذ لا يوجد القديم منه الان مثل ( G M C )
شاكر ومقدر جهود الشباب

[بو جريس 73]

اخي الكريم هامة نجد تحية طيبة وبعد

عندك f-150 ترا ماعليه قصور يعجبك وترا الي سبب عدم تواجد موديلات السبعينات ومنتصف الثمانينات

كان بسبب المقاطعه العربية لذلك تشوف الجموس القديمة منتشرة بكثرة بالخليج واذا تبيلك حوض كرف عندك من

موديل 98وحتى 2003 f-150 يجي منه قير عادي وحقت كرف والله يوفقك بموتر يطيب خاطرك

[هامة نجد]

ما قصرت يا بو جريس 73
مشكور على التوصية والمعلومة
في سيارات الفورد ما نقدر نطبق المثل الي يقول ( قديمك نديمك ) ؟؟؟؟؟؟؟
فالسيارات القديمة لا يوجد بها كمبيوتر و لا تعقيدات كبيرة في الكهرباء
ومعروفة بالصبر و التحمل ولا يخون راعية لا بديرة على طريق الملك فهد ولا بالبر بوسط الصمان
واكرم السيارة تعطيك طولت عمر باذن الله

[بو جريس 73]

حياك الله يا هامة نجد احب اضيفلك معلومه ترا اذا خايف من الكهرباء ترى الموضوع بسيط

تقدر تحول المكينه كابريتر وتحتاج ثلاجة + كابريتر هولي او ايلد بروك وعلى فكرة انا جربت وصار

العزم نار واذا تبي مساعدة ابشر بالتبيه

[لعّاب المنايا]

يالربع انا عندي f 150 شاص طويل

وودي اركب عليه تانكي بنزين استرالي هل هو يركب وإلا لأ ...

[بو جريس 73]

حياك الله يا لعاب المنايا


والله ياليت ذكرت لنا موديل موترك لأن بعض الموديلات يجي خزان البنزين طوالي ونوع يجي تقريبا مربع ملموم

وانا انصحك بتركيب خزان مستعمل لسياره بالطول بالحوض وتلبسه بعازل وتشبكه مع الخزان الأساسي

احسن وان شاء الله تحصل فكره احسن من الشباب بالرابطه

وارجو تقبل مروري يالغالي.

[Xtrema-2]

اليوم يا اخوان كنت عند وكالة فورد في لوس انجليس كاليفورينا وشفت الرابتور عندهم توه نازل ... صحيح اني ماني من المعجبين في الفورد بس بعد ما شفته اعجبت فيه بصراحه .. وحش ..


سعره خيالي جدا .. اربعين الف دولار .. وحاولت فيهم ينزلون قالو نجوم السما اقرب ..

[هبس 911]

يا الربع اذا بتسمحولي اشارك مع الرابطة ب f-150 2001 ومشكورين على الموضوع الجميل و الي كنا نتمناه من قبل ..

[لعّاب المنايا]

موديل موتري 97 تانكي واحد

[بو جريس 73]

اليوم يا اخوان كنت عند وكالة فورد في لوس انجليس كاليفورينا وشفت الرابتور عندهم توه نازل ... صحيح اني ماني من المعجبين في الفورد بس بعد ما شفته اعجبت فيه بصراحه .. وحش ..
سعره خيالي جدا .. اربعين الف دولار .. وحاولت فيهم ينزلون قالو نجوم السما اقرب ..

الله يعطيك العافية على المعلومات

[بو جريس 73]

يا الربع اذا بتسمحولي اشارك مع الرابطة ب f-150 2001 ومشكورين على الموضوع الجميل و الي كنا نتمناه من قبل ..

حياك الله يا (( هبس 911 )) والساعة المباركه والله الله بالتواصل والمشاركات .

[بو جريس 73]

موديل موتري 97 تانكي واحد

والله عن نفسي انصحك تركب خارجي بالحوض وتشبكه بالتانكي الأساسي واذا خلص الموسم تقدر تشيله

ووقت ماتبي تركبه تركبه وتقبل مروري اخي العزيز.

[F.250]

السلام عليكم ورحمةٌ من الله تعالى وبركاته,
كم يشرفني التواجد بينكم أعضاء مكشات ويشرفني ايضاً ان اكون من ضمن رابطة الفورد حوض.

ودمتم سالمين